Kalata yofumila ku Bungwe Yutonga
“Nimwe oyenelela kunkhala aphunzisi.” (Ahe. 5:12) Ganizilani! Yehova—wamene ni Mphunzisi waluso m’chilengedwe chonse—otisenga sewo kuti tikophunzisa ayasu za yove! Udindo uliwonse wophunzisa chendi cha m’Baibolo chokhuza Yehova—keno ni m’banja, mu mpingo olo mu utumiki—ni udindo wantengo wapatali soti ni upepu lini. Kansi tingaukwanilishe tyani?
Tingafwane yankho pa mawu ŵa ntumwi Paulo ŵechilembela Timoteyo akuti: “Pitilija kunkhala wolitwala poŵelenga pa gulu ya ŵanthu, poŵadandaulila, na poŵaphunzisa.” Eyangijilaposoti kuti: “Ukachita tetyo ulipulumushe weka komasoti ŵanthu okumvwishila.” (1 Tim. 4:13, 16) Muli na uthenga wopulumusha moyo wamufunikila kuti muujeko ayanu. Tetyo mufunika kukulisha luso yoŵelenga nophunzisa. Kabuku kano kakonzewa kuti kakuyavyeni kuchita vamene ivi. Onani mwachidule vili m’kabuku kano.
Pa pedji iliyonse pali lemba yamene yufotokoza mfundo ya m’Baibolo yamene yukatijana na phunzilo olo chisanzo kulingana na phunzilo yakuseŵenzelapo munthu.
Yehova ni “Mulangizi Nkulu.” (Yes. 30:20) Kabuku kano kakuyavyeni kukulisha luso yanu yoŵelenga nophunzisa, osaluŵa kuti Yehova niye Chinyina cha uthenga watulalikila ndipo yove niyesoti oita ŵanthu kuti awele kuli yove. (Yohane 6:44) Tetyo, nthawe zonse tikosenga mzimu wake utuŵa. Tikokonda kukatishila ntchito Mawu ŵake. M’malo mofuna kutamandiwa, tikoyavya ŵanthu kutamanda Yehova nokulisha chikondi chawo pali yove.
Mwapasiwa mwayi wophunzisa uthenga wofunika ngako ku ŵanthu. Tili na chidalilo chakuti mukwanishe nchito yamene iyi ngati mudalila “mphamvu yakutipasa Mulungu.”—1 Petulo 4:11.
Nise aphunzisi ayanu,
Bungwe Yutonga ya Mboni za Yehova
