MBALI 5
Pa chigumula cha Nowa—niŵani emvwila? Komasoti niŵani aliyomvwile?
Ŵanthu anyinji mu nthawe ya Nowa enzechita vinthu viipa ngako. Genesis 6:5
Adamu na Hava pechivyala ŵana, ŵanthu eyamba kupaka pa chalo. N’kupita kwa nthawe, angelo ayakine ekatijana na Satana kupondokela Mulungu.
Ewela pano pa chalo novwala miŵili ya ŵanthu kuti azalungule anakazi. Pavuli pake anakazi ŵala evyala viŵana vikulu-vikulu vamphamvu venzeyofya.
Chalo chezula na ŵanthu enzechita vinthu viipa. Baibolo yulaŵila kuti: ‘Kuipa kwa ŵanthu pa chalo kwepaka ngako, komasoti malingililo onse m’mitima ya ŵanthu enze aipa ŵekaŵeka nthawe zonse.’
Nowa emvwila Mulungu nopanga chibote. Genesis 6:13, 14, 18, 19, 22
Nowa enze munthu muweme. Yehova euja Nowa kuti azacheneke ŵanthu aipa na Chigumula chikulu.
Mulungu euja soti Nowa kuti apange chibote chikulu chuitiwasoti kuti chingalaŵa, noloŵeshamo banja yake na nyama za mitundu yosiyana-siyana.
Nowa echenjeja ŵanthu za Chigumula chenzekuza, komalomba aliyemumwile. Ŵanthu ayakine enzemuseka, ayakine enzemuzonda.
Pechisilija kupanga chibote Nowa epeselamo vinyama.
