MUTU 07
Kansi Yehova ni wotyani?
Mukaganizila za Yehova Mulungu, kansi n’chinji chuwela mmaganizo mwanu? Kansi muganiza kuti ni wochitisha wowa koma ali kutali na mwewo, monga ni nyenyezi zili kululu? Olo payakine muganiza kuti yove ni munthulini, koma ni mphamvu ya chilengedwe, monga kugunda kwa leza? Kansi Yehova niŵani ngaye-ngaye? Kupitila m’Mawu ŵake Baibolo, Yehova owulula iyakine mwa minkhalidwe yake ndipo owonasoti mwewo kunkhala wofunika.
1. Ndaŵa yanji tukwanishalini kuwona Mulungu?
Baibolo pa Yohane 4:24 yunena kuti: “Mulungu niye Mzimu.” Yehova alilini na muŵili monga ni wasu. Yove ni Mzimu wamene onkhala kululu, malo akuti tingakwanishelini kuŵaona.
2. Kansi iyakine mwa minkhalidwe ya Yehova ni yotyani?
N’chendi kuti tingakwanishelini kuwona Yehova, koma tikaphunzila minkhalidwe yake iweme tingamuziŵe luweme noyamba kumukonda chifukwa yove ni ngaye-ngaye. Baibolo yunena kuti: “Yehova okonda chilungamo, ndipo azasiyelini ŵanthu ŵake okhulupilika.” (Salimo 37:28) Komasoti yove “ali na chikondi chikulu komasoti ni wachifundo,” kapena kuti, ochitila chifundo ŵanthu makamaka ŵala ovutika. (Yakobo 5:11) “Yehova ali pafupi na ŵanthu ali na ntima wofwaika; ndipo olimvwila chisoni muntima mwawo oŵapulumusa.” (Salimo 34:18) Koma kansi muziŵa kuti vochita vasu vingakondweleshe Yehova olo kumukhumudwisa? Keno munthu wasankha kuchita vinthu viipa, okhumudwisa Yehova ndipo vumuchitisha kunkhala wokalipa. (Salimo 78:40, 41) Koma keno munthu ochita vinthu viweme yove okondwela.—Ŵelengani Miyambo 27:11.
3. Kansi Yehova owonesha tyani kuti otikonda?
Nkhalidwe ikulu ya Yehova ni chikondi. Kulaŵila chendi, Baibolo yunena kuti “Mulungu niye chikondi.” (1 Yohane 4:8) Yehova owulula chikondi chake, osati kupitila tyala m’Baibolo, koma kupitilasoti mu vinthu vechilenga. (Ŵelengani Machitidwe 14:17.) Mwachisanzo, ganizilani mwechitipangila. Yove etipasa nzelu, kuti tikokwanisha kuwona makhala aweme, kumvwa nyimbo ziwene komasoti kulya vakulya viweme. Yove ofuna kuti tikosangalala na moyo.
VATI TIPHUNZILE
Tiphunzile vinthu vakukatishila ntchito Yehova kuti apange vinthu vodabwisa. Ndipo pavuli pake tiwone mwakutiwoneshela Yehova minkhalidwe yake iweme.
4. Mzimu utuŵa—ni mphamvu yukata ntchito ya Mulungu
Monga ni mwatukatishilila ntchito manja ŵasu pokata ntchito, Yehova naye okatishila ntchito mzimu wake utuŵa. Ŵanthu ayakine oganiza kuti mzimu utuŵa ni munthu, koma Baibolo yunena kuti mzimu utuŵa ni mphamvu yakukatishilla ntchito Mulungu pochita vinthu vakufuna. Ŵelengani Luka 11:13 na Machitidwe 2:17, ndipo pavuli pake mukambilane makonsho aŵa:
-
Takwanisha kuwona kuti tingasenge mzimu utuŵa, ndipo Mulungu angatipase. Lomba kansi mwewo muganiza kuti mzimu utuŵa ni munthu olo ni mphamvu yukata ntchito ya Mulungu? Ndaŵa yanji mwewo muganiza tetyo?
Yehova okatishila ntchito mzimu utuŵa kuti apange vinthu vodabwisa. Ŵelengani Salimo 33:6 na 2 Petulo 1:20, 21, ndipo pavuli pake mukambilane konsho iyi:
-
Kansi ni njila zotyani zechikatishilako kale ntchito mzimu utuŵa Yehova?
5. Yehova ali na minkhalidwe iweme
Mose enze ntumiki wokhulipilika wa Mulungu, olo kuti venze tetyo, yove enzefuna kuziŵa vinyinji vokhuza Nyamalenga. N’chifukwa chake Mose euja Yehova kuti: “Niziŵisheni njila zanu, kuti nikuziŵeni.” (Ekisodo 33:13) Tetyo, Yehova efotokozela Mose iyakine mwa minkhalidwe yali nayo. Ŵelengani Ekisodo 34:4-6, ndipo pavuli pake mukambilane makonsho aŵa:
-
Kansi ni minkhalidwe iyakine yotyani ya Yehova yechiphunzila Mose?
-
Kansi ni minkhalidwe yotyani ya Yehova yamukonda ngako?
6. Yehova oganizila ŵanthu
Aheberi enze ŵanthu a Mulungu masiku akuvuli, ove enkhala akapolo ku Iguputo. Kansi Yehova echimvwa tyani pechiwona ŵanthu ŵake ovutika? Mvwishilani VINTHU VOTETEKELA komasoti mukokonkha, olo ŵelengani Ekisodo 3:1-10. Pavuli pake, mukambilane makonsho aŵa okonkhapo.
-
Kansi nkhani yamene iyi yukuujani chinji vokhuza mwakumvwila Yehova akawona ŵanthu ovutika?—Onani mavesi 7 na 8.
-
Kansi muganiza kuti Yehova ofunishisha chendi kuyavya ŵanthu, ndipo muganiza kuti yove ali na mphamvu yochita vamene ivi? Ndaŵa yanji muganiza tetyo?
7. Chilengedwe chutiphunzisa minkhalidwe ya Yehova
Tingaphunzile minkhalidwe ya Yehova pololesha vinthu vechilenga. Lolelani VIDIYO. Pavuli pake ŵelengani Aroma 1:20, ndipo mukambilane konsho yokonkhapo.
-
Kansi ni minkhalidwe yotyani ya Yehova yamwawona mu vinthu vechipanga?
ŴANTHU AYAKINE ONENA KUTI: “Mulungu ni munthulini, koma yove ni mphamvu yamene ili kumalo aliwonse.”
-
Kansi mwewo muganiza tyani?
-
Ndaŵa yanji muganiza tetyo?
MFUNDO ZACHIDULE
Tingakwanishelini kumuwona Yehova chifukwa yove ni Mzimu, ndipo ali na minkhalidwe inyinji, koma nkhalidwe yake ikulu ni chikondi.
Makonsho oweleja
-
Ndaŵa yanji tukwanishalini kumuwona Yehova?
-
Kansi mzimu utuŵa ni chinji?
-
Kansi iyakine mwa minkhalidwe ya Yehova ni yotyani?
PHUNZILANI VINYINJI
Phunzilani vinyinji vokhuza minkhalidwe 4 ya Yehova yofunika ngako.
Onani umboni wakuti Yehova opezekalini kumalo aliwonse.
“Kansi Mulungu ali kumalo aliwonse, pa nthawe imozi?” (Nkhani yapa webisaiti)
Onani chifukwa chake Baibolo yunena kuti mzimu utuŵa uli monga ni manja a Mulungu.
Venze vovuta kuli mwanalume muyakine wamene ololalini kukhulupilila kuti Mulungu omuganizila. Onani mwechichinjila maganizo ŵake.
“Lomba nuwona kuti ningakwanishe kuyavya ayakine” (Nsanja ya Olonda, 1 October, 2015)
