MUTU 09
Vwendelani kwa Mulungu kupitila m’pemphelo
Kansi mwewo mwekumanapo kale na vinthu vamene vekuchitishani kumvwa kuti mufunikila malangizo? Kansi mwewo muli na makonsho okhuza moyo ŵamufuna kuziŵa mayankho ŵake? Kansi mufunikila thandizo komasoti chitonthozo? Kansi mufuna kutang’isha ushamwali ŵanu na Yehova? Pemphelo ingakuyavyeni pa vinthu vonse vamene ivi. Kansi njila iweme yopemphelela ni yotyani? Kansi Mulungu akumvwa mapemphelo onse? Kansi mwewo mungachite chinji kuti Mulungu akomvwishila mapemphelo ŵanu? Tiyeni tiwone.
1. Kansi tufunika kupemphela kwa ŵani, ndipo tikopemphelela chinji?
Yesu ephunzisa kuti tufunika kupemphela tyala kwa Atata ŵasu ŵakululu. Yesu ngaye-ngaye enzepemphela kwa Yehova. Yove enena kuti: “Koma mwewo mukopemphela teti: ‘Atata ŵasu muli kululu . . . ’” (Mateyu 6:9) Keno tupemphela kwa Yehova, ushamwali wasu na yove unkhala wotang’a.
Tingakwanishe kupemphelela nkhani iliyonse. Koma kuti Mulungu ayankhe mapemphelo ŵasu, ofunika kunkhala okatijana na chifunilo chake. “Viliye kanthu kuti tumusenga vinthu votyani mokatijana na chifunilo cha [Mulungu], otimvwa.” (1 Yohane 5:14) Yesu epeleka chisanzo cha vinthu vatingapemphelele. (Ŵelengani Mateyu 6:9-13.) N’chendi kuti tingakwanishe kupemphelela nkhani za sewo seka, koma tufunikalini kuluŵa kupemphelela ŵanthu ayakine komasoti kutembeja Mulungu chifukwa cha vinthu vakutichitila.
2. Kansi tufunika kupemphela tyani?
Baibolo yutilimbikisa sewo kuti “tikomukhutulila vili mu ntima mwasu [Mulungu].” (Salimo 62:8) Tetyo, mapemphelo ŵasu ofunika kunkhala ofumila pansi pa ntima. Tingapemphele mochita kufumya mawu olo mu ntima, ndipo tingachite vamene ivi panthawe iliyonse na kumalo aliwonse.
3. Kansi Mulungu oyankha mapemphelo ŵasu?
Yove ochita vamene ivi m’njila zosiyana-siyana. Mwachisanzo, m’Baibolo tufwanamo mayankho anyinji amakonsho ŵasu. Kuŵelenga Mawu a Mulungu “[kungachitishe] munthu wosaziŵa vinthu kunkhala wanzelu.” (Salimo 19:7; ŵelengani Yakobo 1:5.) Komasoti Yehova otipasa ntendele wa m’maganizo tikakumana na mavuto. Ndipo yove angakatishilesoti ntchito atumiki ŵake kuti atiyavye keno tufunikila thandizo.
VATI TIPHUNZILE
Tiwone vatingafunikile kuchita kuti mapemphelo ŵasu ofumila pansi pa ntima akomvwiwa na Mulungu, ndipo tiphunzile mwangakuyavyileni mapemphelo amene aŵa.
4. Vatingachite kuti Mulungu akokumvwa mapemphelo ŵasu
Kansi ni vinthu votyani vofunika kuti Mulungu akokumvwa mapemphelo ŵasu? Lolelani VIDIYO.
Yehova ofuna kuti tikopemphela kuli yove. Ŵelengani Salimo 65:2, ndipo pavuli pake mukambilane makonsho aŵa:
-
Kansi muganiza kuti wala “Akumvwa pemphelo” ofuna kuti mwewo mukopemphela kuli yove? Ndaŵa yanji muganiza tetyo?
Kuti Mulungu akokumvwa mapemphelo ŵasu, tufunika kuchita vinthu mokatijana na mwakufunila yove. Ŵelengani Mika 3:4 na 1 Petulo 3:12, ndipo pavuli pake mukambilane konsho iyi:
-
Kansi tingankhale tyani osimikija kuti Yehova akokumvwa mapemphelo ŵasu?
Nkati mwa nkhondo, masodja a mbali iliyonse angapemphele kuti apambane. Kansi vingankhale vomvwika kukhulupilila kuti Mulungu ayankhe mapemphelo onse amene aŵa?
5. Mapemphelo ŵasu ofunika kunkhala ofumila pansi pa ntima
Ŵanthu ayakine ephunzila kuti ofunika kupemphela kwa Mulungu mawu amozi na amozi moweleja-weleja. Koma kansi vamene ivi niye vakufuna Mulungu? Ŵelengani Mateyu 6:7, ndipo pavuli pake mukambilane konsho iyi:
-
Kansi mungapewe tyani kulaŵila “vinthu vimozi na vimozi moweleja-weleja” mumapemphelo ŵanu?
Nsiku iliyonse, mukoganizila ngako imozi mwa madaliso yawakupasani Yehova pa moyo wanu, ndipo pavuli pake mutembejeni Yehova chifukwa cha madaliso amene aŵa. Mukachita vamene ivi nsiku iliyonse pa wiki, muwone kuti mwakwanisha kupemphelela vinthu 7 vosiyana-siyana mosawelejela mawu amozi na mozi.
Tata muweme ofunishisha kuti mwana wake akolaŵila naye mofumila pansi pa ntima. Mwanjila yamene iyi, Yehova naye ofunishisha kuti tikopemphela kuli yove mofumila pansi pa ntima
6. Pemphelo ni mphaso yofumila kwa Mulungu
Kansi pemphelo ingatitang’ishe tyani, panthawe iweme komasoti panthawe yovuta? Lolelani VIDIYO.
Baibolo yunena kuti pemphelo ingatiyavye kufwana ntendele ngawo-ngawo wa m’maganizo. Ŵelengani Afilipi 4:6, 7, ndipo pavuli pake mukambilane makonsho aŵa:
-
N’chendi kuti pemphelo ni nthawe zonselini paingasilije mavuto ŵasu, koma olo vili tetyo ndaŵa yanji ingatiyavye?
-
Kansi mwewo mungakonde kupempelela vinthu votyani?
Kansi mwewo muziŵa?
Mawu akuti “ame” otanthauza kuti “ni chendi” olo kuti “vinkhale tetyo.” Kufumila mu nthawe za m’Baibolo, mawu akuti “ame” okatishiliwa ntchito kumapeto kwa mapemphelo.—1 Mbiri 16:36.
7. Nkhalani na nthawe yopemphela
Nthawe ziyakine tunkhala otangwanika ngako mpaka tuluŵa kupemphela. Kansi kupemphela kwenze kofunika ngako kwa Yesu? Ŵelengani Mateyu 14:23 na Maliko 1:35, ndipo pavuli pake mukambilane makonsho aŵa:
-
Kansi Yesu enzechita chinji kuti afwane nthawe yopemphela?
-
Kansi mwewo mungachite chinji kuti mufwane nthawe yopemphela?
ŴANTHU AYAKINE ONENA KUTI: “Kupemphela ni kutaya nthawe chifukwa paliye akumwa tikopemphela.”
-
Kansi mwewo munganene kuti tyani?
MFUNDO ZACHIDULE
Mapemphelo ochitiwa mofumila pansi pa ntima ochitisha kuti tinkhale pafupi na Mulungu, otipasa ntendele wa m’maganizo komasoti otipasa mphamvu yatufunikila kuti tikondwelese Yehova.
Makonsho oweleja
-
Kansi tufunika kupemphela kwaŵani?
-
Kansi tufunika kupemphela tyani?
-
Kansi pemphelo ingatiyavye tyani?
PHUNZILANI VINYINJI
Fwanani mayankho amakonsho ŵakukonsha ŵanthu anyinji okhuza pemphelo.
“Mfundo 7 zamufunikila kuziŵa pa nkhani ya pemphelo” (Nsanja ya Olonda, 1 October, 2010)
Phunzilani vifukwa vofunika vochitila pemphelo komasoti mwamungachitile kuti muyangijile luso yanu pa mapemphelo ŵamupeleka.
Onani vayuphunzisa Baibolo pa nkhani yakuti tufunika kupemphela kwa ŵani.
Kansi nufunika kupemphela kuli ŵanthu atuŵa ntima?” (Nkhani yapa webisaiti)
Mu vidiyo ya nyimbo yamene iyi, muwone kuti kupemphela kudalilalini kuti muli kuni olo ni nthawe yotyani.
