MUTU 13
Mwamene chipembezo chawenye mwachuphunzisila vinthu viipa vokhuza Mulungu
Keno Mulungu niye chikondi, ndaŵa yanji vipembezo vinyinji vamene vunena kuti vuphunzisa vakufuna Mulungu vupitilija kuchita vinthu vinyinji viipa? Mwachidule, vipembezo vamene ivi ni vawenye; chifukwa vavulaŵila vuchitisha ŵanthu kukhulupilila vinthu vawenye vokhuza Mulungu. Kansi ove ochita tyani vinthu viipa vamene ivi? Kansi ove akumvwa tyani na vamene ivi? Kansi azachitiwe chinji chifukwa cha vamene ivi?
1. Kansi chipembezo chawenye chuwonesha tyani kuti chuphunzisa vinthu vawenye vokhuza Mulungu?
Vipembezo vawenye “vuchinjanisha choonadi cha Mulungu na wenye.” (Aroma 1:25) Mwachisanzo, vipembezo vawenye vuphunzisalini ophunzila ŵawo zina ya Mulungu. Komalomba, Baibolo yunena kuti zina ya Mulungu yufunika kukatishiliwa ntchito. (Aroma 10:13, 14) Pakachitika vinthu viyakine viipa, asogoleli avipembezo ayakine onena kuti ni chifunilo cha Mulungu. Koma wamene uyu niwenye. Chifukwa Mulungu niyelini ochitisha vinthu viipa. (Ŵelengani Yakobo 1:13.) N’vomvwisha chisoni kuti wenye wavutala vipembezo uchitisha kuti ŵanthu afutuke kwa Mulungu.
2. Kansi vipembezo vawenye vuwonesha tyani kuti vutalijila wenye Mulungu na vochita vavine?
Chipembezo chawenye chuchitalini vinthu na ŵanthu monga ni mwakuchitila Yehova. Baibolo yunena kuti, “machimo ŵake [avipembezo] aunjikana mpaka kululu.” (Chivumbulutso 18:5) Kwa vyaka vinyinji, vipembezo vawenye vankhala vutolako mbali mu ndale, kuyavya pa nkhondo komasoti kuchitisha olo kuvomekeja kuti ŵanthu anyinji apaiwe. Asogoleli avipembezo ayakine ofuna kulemela ngako ndipo olimbikisa ŵanthu a m’vipembezo kuti akoŵapasa ndalama. Vinthu vamene ivi vakuchita ni umboni wakuti omuziŵilatulini Mulungu olo patontho, tetyo aliye ufulu wonena kuti ni atumiki ŵake.—Ŵelengani 1 Yohane 4:8.
3. Kansi Mulungu akumvwa tyani akawona vavuchita vipembezo vawenye?
Keno vinthu vavuchita vipembezo vawenye vukuchitishani kunkhala okhumudwa, kansi muganiza kuti Yehova naye akumvwa tyani? Yove okonda ŵanthu, koma ozonda asogoleni avipembezo amene ophunzisa ŵanthu vinthu vawenye vokhuza yove komasoti kuchitila vinthu viipa ŵanthu am’chipembezo chawo. Yove olonjeza kuti vipembezo vonse vawenye vizawonongewe ndipo “vizaŵepolinisoti.” (Chivumbulutso 18:21) Kwalombapano, Mulungu awononge vipembezo vonse vawenye.—Chivumbulutso 18:8.
VATI TIPHUNZILE
Tiphunzile mwakuwonela chipembezo chawenye Mulungu. Tiphunzilesoti vinthu vinyinji vakuchita yove, komasoti chifukwa chake vamene ivi vufunikalini kukukangishani kuziŵa Yehova.
4. Mulungu ovomekejalini vipembezo vonse
Ŵanthu anyinji okhulupilila kuti vipembezo vili monga ni misewu yosiya-siyana yamene yufwikisha ŵanthu kwa Mulungu. Kansi vamene ivi n’vachendi? Ŵelengani Mateyu 7:13, 14, ndipo pavuli pake mukambilane konsho iyi:
-
Kansi Baibolo yuufotokoza tyani msewu ukuya ku moyo?
Lolelani VIDIYO, ndipo pavuli pake mukambilane konsho iyi.
-
Kansi Baibolo yunena kuti pali vipembezo vinyinji vamene vukondwelesha Mulungu?
5. Vavuchita vipembezo vawenye vuwoneshalini kuti Mulungu ni wachikondi
Vipembezo vawenye vutalijila wenye Mulungu m’njila zinyinji. Njila imozi yoziŵika luweme niyakuti vipembezo vamene ivi vutolako mbali mu nkhondo. Kuti muwone mwakuchitila vamene ivi, lolelani VIDIYO. Ndipo pavuli pake mukambilane makonsho aŵa:
-
Kansi matchetchi anyinji echita chinji nkati mwa nkhondo yachiŵili yapa chalo chonse?
-
Kansi mwewo mukumvwa tyani mukaganizila vinthu vechichita?
Ŵelengani Yohane 13:34, 35 na 17:16. Ndipo pavuli pake mukambilane makonsho aŵa:
-
Kansi muganiza kuti Yehova akumvwa tyani akawona kuti vipembezo vuyavyako pa nkhondo?
-
Vipembezo vawenye vuchita vinthu vinyinji viipa. Kansi mwewo ni vinthu votyani vamwawona kuti vipembezo vukwanishalini kuwonesha chikondi cha Mulungu?
Vavuchita vipembezo vawenye vuwoneshalini kuti Mulungu ali na chikondi
6. Mulungu ofuna kuti ŵanthu afumemo mu vipembezo vawenye
Ŵelengani Chivumbulutso 18:4, a ndipo pavuli pake mukambilane konsho iyi:
-
Kansi mwewo mukumvwa tyani poziŵa kuti Mulungu ofuna kupulumusa ŵanthu amene osemphewa na vipembezo vawenye?
7. Pitilijani kuphunzila vokhuza Mulungu wachendi
Vinthu viipa vavuchita vipembezo vawenye osati vikuchitisheni kuti muleke kukhulupilila Mulungu noyamba kumuwona kuti ni muipa. Ganizilani za mwana wamene okana malangizo anzelu ŵakumupasa atata ŵake. Mwana wamene uyo osankha kufumapo pang’anda nakuyayamba kunkhala na minkhalidwe iipa. Koma atata ŵake okatijanalini navo vawachita mwana wawo. Kansi ndaŵa yanji chingankhalelini chilungamo kuimba mulandu atata ŵake chifukwa cha vochita va mwana wawo wopanduka wamene uyo?
-
Kansi vingankhale luweme kuimba mulandu Yehova nakuleka kuphunzila za yove chifukwa cha vochita va vipembezo vawenye?
ŴANTHU AYAKINE ONENA KUTI: “Nufunalini kuphunzila vokhuza Mulungu chifukwa vipembezo niye vuyambisha mavuto anyinji.”
-
Kansi mwewo mukumvwasoti teti?
-
Ndaŵa yanji tufunikalini kuleka kukhulupilila Yehova chifukwa cha vinthu vavuchita vipembezo vawenye?
MFUNDO ZACHIDULE
Vipembezo vawenye vankhala vusempha ŵanthu pa nkhani yokhuza Mulungu pokatishila ntchito viphunziso vawenye komasoti kuchita vinthu vinyinji viipa. Mulungu azawononge vipembezo vonse vawenye.
Makonsho oweleja
-
Kansi mwewo mukumvwa tyani mukaganizila vavuphunzisa vipembezo vawenye na mwavuchitila vinthu?
-
Kansi Yehova akumvwa tyani na vinthu vavuchita vipembezo vawenye?
-
Kansi Mulungu azachite chinji na vipembezo vawenye?
PHUNZILANI VINYINJI
Onani njila ziŵili kuti muziŵe mwamene vipembezo vinyinji mwavuchitila vinthu visakondwelesha Mulungu.
Ndaŵa yanji Yehova ofuna kuti tikomulambila pamozi na ŵanthu ayakine?
“Kansi pali vuto keno munthu angalekenkhala m’chipembezo chilichonse?” (Nkhani yapa webisaiti)
Wansembe muyakine enzekaikila vechenzechita chipembezo chake. Koma vamene ivi viliyemukangishe kuphunzila chendi cha m’Baibolo.
“Ndaŵa yanji wansembe muyakine eleka chipembezo chake?” (Galamukani!, February 2015)
Kwa vyaka mahandiledi anyinji, vipembezo vankhala vuphunzisa vinthu vawenye vamene vupangisha ŵanthu kukhulupilila kuti Mulungu otikondalini komasoti kuti ni wankhaza. Phunzilani vachendi pa nkhani zitatu izi zawenye.
“Wenye wamene ukangisha ŵanthu kukonda Mulungu” (Nsanja ya Olonda, 1 November, 2013)
a Kuti muziŵe chifukwa chake mwanakazi otomolewa kuti Babulo Nkulu m’buku ya Chivumbulutso opanamila vipembezo vawenye, onani Mawu Akumapeto 1.
