MUTU 15
Kansi Yesu ni ŵani?
Yesu ni mmozi mwa ŵanthu otchuka ngako. Ŵanthu anyinji oiziŵa zina yake, koma oziŵalini vinyinji vokhuza yove ndipo ofotokoza vinthu vosiyana-siyana akakonshewa kuti Yesu ni ŵani. Kansi Baibolo yunena kuti Yesu ni ŵani?
1. Kansi Yesu ni ŵani?
Yesu ni mngelo wamphamvu ndipo onkhala kululu. Yehova Mulungu elenga Yesu akaliye lenga chinthu chilichonse. Tetyo, yove oziŵika kuti “woyamba kuvyalika wa chilengedwe chonse.” (Akolose 1:15) Baibolo yunena kuti Yesu ni “Mwana . . . wovyalika yekha” wa Mulungu chifukwa ni yove yeka wechilenga Yehova mwachindunji. (Yohane 3:16) Yesu enzekata ntchito pamozi na Atata ŵake Yehova, enzeŵayavya kulenga vinthu viyakine vonse. (Ŵelengani Miyambo 8:30.) Yesu akalipitilija kukata ntchito pamozi na Atata ŵake Yehova mokondwela. Yove otumikila mokhulupilika monga womulaŵilila m’malo mwa Mulungu. Ndipo oitiwa kuti “Mawu,” kutanthauza kuti opeleka mauthenga na malangizo ofumila kwa Mulungu.—Yohane 1:14.
2. Ndaŵa yanji Yesu ewela pano pachalo?
Vyaka pafupi-fupi 2.000 vapita, Yehova echita chodabwisa. Yove ekatishila ntchito mzimu utuŵa pofulusha moyo wa Yesu kululu nowuika m’mala mwa ndola iyakine zina yake Mariya. Mwa njila yamene iyi, Yesu evyalika monga munthu. (Ŵelengani Luka 1:34, 35.) Yehova etumija Yesu pano pachalo kuti azankhale Mesiya wolonjezewa kapena kuti Khilisitu komasoti kuti azapulumushe ŵanthu. a Maulosi onse a m’Baibolo onena za Mesiya ekwanilishiwa pali yove. Tetyo, ŵanthu aliyevutike kumuziŵa Yesu monga “Khilisitu, Mwana wa Mulungu wamoyo.”—Mateyu 16:16.
3. Kansi palipano Yesu ali kuni?
Yesu pechipaiwa pano pachalo, Mulungu emuusha monga mngelo ndipo ejokela kululu. Kululu kwamene uko, “Mulungu emukweja nomuika pamalo apalulu ngako.” (Afilipi 2:9) Palipano, Yesu ali na udindo wapalulu ngako—ndipo ni wachiŵili kwa Yehova.
VATI TIPHUNZILE
Tiphunzile noziŵa chendi chake chokhuza Yesu komasoti chifukwa chake kuphunzila za yove n’kothandiza.
4. Yesu ni Mulungulini Wamphamvuzonse
Baibolo yutiphunzisa kuti olokuti Yesu ni mngelo wamphamvu ngako kululu, yove omvwila Mulungu wamene ni Atata ŵake, Yehova. Ndaŵa yanji tulaŵila tetyo? Lolelani VIDIYO kuti muziŵe vayunena Baibolo vokhuza kusiyana kulipo pakati pa Yesu na Mulungu Wamphamvuzonse.
Ŵelengani malemba aŵa okonkhapo kuti mumvwishe kusiyana kwamene kulipo pakati pa Yehova na Yesu. Ŵelengani lemba iliyonse ndipo pavuli pake mukambilane makonsho aŵa.
Ŵelengani Luka 1:30-32.
-
Kansi vinthu vechinena mngelo viwonesha tyani kuti Yesu ni wosiyana na Yehova Mulungu, “Wam’mwambamwamba”?
Ŵelengani Mateyu 3:16, 17.
-
Pa nthawe yenzebatizika Yesu, kansi kululu kwimvwika mawu akuti tyani?
-
Kansi muganiza kuti mawu amene awo enze a ŵani?
Ŵelengani Yohane 14:28.
-
Pakati pa tata na mwana, kansi ni ŵani onkhala nkulu komasoti wa udindo ukulu?
-
Kansi Yesu enzetanthauza chinji penzelaŵila kuti Yehova niye Atata ŵake?
Ŵelengani Yohane 12:49.
-
Kansi Yesu enzewona kuti yove na Atata ŵake enze olingana? Mwewo muganiza tyani?
5. Umboni wamene uwonesha kuti Yesu enze Mesiya
M’Baibolo muli maulosi anyinji onena za Mesiya wamene Mulungu emusankha kuti azapulumushe ŵanthu. Maulosi amene aŵa eyavya ŵanthu kuti amuziŵe mosavuta. Lolelani VIDIYO kuti muwone mwachidule ayakine mwa maulosi okhuza Yesu amene ekwanilishiwa pa nthawe yenze pano pa chalo.
Ŵelengani maulosi aŵa a m’Baibolo, ndipo pavuli pake mukambilane makonsho aŵa:
Ŵelengani Mika 5:2 kuti muziŵe kwenzefunikila kuvyalikila Mesiya. b
-
Kansi kwechivyalikila Yesu kwikwanilisha tyani ulosi wamene uyu?—Mateyu 2:1.
Ŵelengani Salimo 34:20 na Zekariya 12:10 kuti muwone veyinenelatu Baibolo vokhuza kupaiwa kwa Mesiya.
-
Kansi maulosi amene aŵa ekwanilishiwa chendi?—Yohane 19:33-37.
-
Ndaŵa yanji sembe viliye kwanishike kuti Yesu achitishe kuti maulosi amene aŵa akwanilishiwe?
-
Kansi vamene ivi vukuyavyani kuziŵa vinthu votyani vokhuza Yesu?
6. Kuphunzila vokhuza Yesu kutiyavya ngako
Baibolo yutilimbikisa kuti tufunikila kuphunzila vokhuza Yesu komasoti za udindo wechimupasa Mulungu. Ŵelengani Yohane 14:6 na 17:3, ndipo pavuli pake mukambilane konsho iyi:
-
Kansi kuphunzila vokhuza Yesu n’kofunika chifukwa cha chinji?
Yesu esegula njila yamene yutiyavya kuti tinkhale pa ushamwali na Mulungu. Yove ephunzisa choonadi chunena za Yehova komasoti kupitila muli yove tingazafwana moyo wosasila
ŴANTHU AYAKINE ONENA KUTI: “A Mboni za Yehova okhulupililalini Yesu.”
-
Kansi mwewo mungayankhe kuti tyani?
MFUNDO ZACHIDULE
Yesu ni mngelo wamphamvu. Yove ni mwana wa Mulungu komasoti Mesiya.
Makonsho oweleja
-
Ndaŵa yanji Yesu oitiwa kuti “woyamba kuvyalika wa m’chilengedwe chonse”?
-
Kansi Yesu enzechita chinji akaliye wela pano pa chalo?
-
Kansi tuziŵa tyani kuti Yesu ni Mesiya?
PHUNZILANI VINYINJI
Phunzilani vinyinji vokhuza udindo wa Yesu monga Mesiya.
“Kansi maulosi onena za Mesiya osimikijila kuti Yesu enze chendi Mesiya?” (Nkhani yapa webisaiti)
Fufuzani kuti muwone keno Mulungu evyala Yesu monga ni mwakuchitila tata kuvyala ŵana.
“N’chifukwa n’chinji Baibolo yunena kuti Yesu ni Mwana wa Mulungu?” (Nkhani yapa webisaiti)
Onani chifukwa chutisimikijila kuti Utatu ni chiphunzisolini cha m’Baibolo.
Ŵelengani kuti mudziŵe mwamene mayi muyakine mwechichinjila moyo wake pavuli pofufuza vayunena Baibolo vokhuza Yesu.
“Mzimayi wachiyuda efufuzasoti mozama vinthu venzekhulupilila” (Galamukani!, May 2013)
a M’mutu 26 na 27 tizakambilane chifukwa chake sewo taŵanthu tufunikila kupulumushiwa komasoti mwechitipulumushila Yesu.
b Onani Mawu Akumapeto 2 kuti muziŵe vinthu vokhuza ulosi wamene winenelatu nthawe ngayo-ngayo yati azawonekele Yesu pano pa chalo.
