MUTU 19
Kansi a Mboni za Yehova ni Akhilisitu ngawo-ngawo?
Sewo a Mboni za Yehova tukhulupilila kuti nise Akhilisitu ngawo-ngawo. Ndaŵa yanji tunena tetyo? Tunena tetyo chifukwa cha kwavufumila vinthu vatukhulupilila, zina yatuziŵika nayo komasoti chikondi chatuwoneshana.
1. Kansi vinthu vakukhulupilila a Mboni za Yehova vufumila kuni?
Yesu enena kuti: “Mawu [a Mulungu] niye choonadi.” (Yohane 17:17) Molingana na Yesu, vinthu vakukhulupilila a Mboni za Yehova vufumila m’Mawu a Mulungu. Mwachisanzo, ganizilani vechichita a Mboni za Yehova amene poyamba enzeitiwa kuti Ophunzila Baibolo. Mu 1870 gulu ya Ophunzila Baibolo yeyamba kuphunzila Baibolo mosamala ngako kuti imvwishe vinthu vayuphunzisa. Ove eyamba kukhulupilila vayuphunzisa Baibolo olo kuti vikhulupililo vawo venzesiyana na vikhulupililo va matchetchi ayakine. Pavuli pake eyamba kuujako ayakine mfundo za choonadi zenzefwana m’Baibolo. a
2. Ndaŵa yanji tuziŵika na zina yakuti Mboni za Yehova?
Yehova otomola ŵanthu amene omulambila kuti Mboni zake chifukwa olaŵila vachendi vokhuza yove. (Aheberi 11:4–12:1) Mwachisanzo, kale kuvuli Mulungu ewuja atumiki ŵake kuti: “Mwewo nimwe mboni zangu.” (Ŵelengani Yesaya 43:10.) Yesu naye oitiwa kuti “Mboni Yokhulupilika.” (Chivumbulutso 1:5) Tetyo, mu 1931 teyamba kuziŵika na zina yakuti Mboni za Yehova. Kuziŵika na zina yamene iyi ni mwayi ukulu ngakosoti.
3. Kansi a Mboni za Yehova okonkheja tyani Yesu pa nkhani yowonesha chikondi?
Yesu enzeŵakonda ngako ophunzila ŵake mwakuti enzeŵawona monga enekwake ngawo-ngawo. (Ŵelengani Maliko 3:35.) Tetyo a Mboni za Yehova nawo ni banja imozi yokatijana ya pa chalo chonse. N’chifukwa chake tunena kuti nise abale na alongo. (Filimoni 1, 2) Tumvwilasoti lamulo yakuti: “Kondani gulu yonse ya abale.” (1 Petulo 2:17) A Mboni za Yehova owonesha kuti okonda abale ŵawo mu njila zinyinji ngako. Mwachisanzo, Akhilisitu ayawo akakumana na mavuto pano pa chalo oŵayavya.
VATI TIPHUNZILE
Tiphunzile kuti tiziŵe vinyinji vokhuza mbili ya Mboni za Yehova, ndipo tiwone umboni uyakine uwonesha kuti nise chendi Akhilisitu ngawo-ngawo.
Vinthu vakukhulupilila Akhilisitu ngawo-ngawo vufumila m’Baibolo ndipo oujako ayakine vinthu vakukhulupilila
4. Vatukhulupilila vufumila m’Baibolo
Yehova enenelatu kuti atumiki ŵake azamvwishe choonadi cha m’Baibolo patontho na patontho. Ŵelengani Danieli 12:4, ndipo pavuli pake mukambilane konsho iyi:
-
Mokatijana na lemba yamene iyi, kansi atumiki a Mulungu angaziŵe chinji keno opitilija kusakila-sakila mfundo za m’Baibolo?
Onani venzechita Ophunzila Baibolo, kupamikijapo M’bale Charles Russell, pophunzila Mawu a Mulungu. Lolelani VIDIYO, ndipo pavuli pake mukambilane konsho iyi:
-
Mu vidiyo yamene iyi, kansi M’bale Charles Russell na Ophunzila Baibolo ayake enzekonkha njila yotyani pophunzila Baibolo?
Kansi muziŵa?
Nthawe ziyakine tuchinja viyakine mwa vinthu vatankhala tukhulupilila. Chifukwa n’chinji tuchita tetyo? Zuŵa ikayamba fuma yuŵala patontho-patontho. Molingana na vamene ivi, Mulungu otiyavya kumvwisha Mawu ŵake mwa patontho-patontho. (Ŵelengani Miyambo 4:18.) Baibolo yuchinjalini, koma keno tuimvwisha luweme tuchinja vatankhala tukhulupilila.
5. Tuchita vinthu vokatijana na zina yasu
Ndaŵa yanji tiyamba kuziŵika na zina yakuti Mboni za Yehova? Lolelani VIDIYO, ndipo pavuli pake mukambilane konsho iyi.
-
Kansi zina yakuti Mboni za Yehova ni yoyenelela chifukwa n’chinji?
Chifukwa n’chinji Yehova osankha ŵanthu kuti ankhale Mboni zake? Chifukwa ofuna kuti ove akoyavya ŵanthu kuziŵa kuti Yehova ni Mulungu wachendi, komasoti chifukwa chakuti ŵanthu kufumila kale ophunzisa vinthu vawenye vokhuza yove. Tiyeni tiwone uŵili mwa wenye wamene uyu.
Vipembezo viyakine vuphunzisa kuti Mulungu ofuna kuti tikokatishila ntchito mafano polambila. Koma kansi vamene ivi n’vachendi? Ŵelengani Levitiko 26:1, ndipo pavuli pake mukambilane makonsho aŵa:
-
Kansi chendi chake n’chotyani pamene apa? Kansi Yehova akumvwa tyani ŵanthu akayamba kulambila mafano?
Asogoleli a vipembezo ayakine ophunzisa kuti Yesu ni Mulungu. Koma kansi vamene ivi ni vachendi? Ŵelengani Yohane 20:17, ndipo pavuli pake mukambilane makonsho aŵa:
-
Kansi chendi chake n’chotyani pamene apa? Kansi Yesu naye ni Mulungu?
-
Kansi mukumvwa tyani mukaganizila kuti Yehova otumija Mboni zake kuti zilalikile choonadi chokhuza yove na Mwana wake?
6. Sewo tukondana muyake na muyake
Baibolo yunena kuti Akhilisitu ofunikila kukondana komasoti kunkhala okatijana monga ni vizo va muŵili wa munthu. Ŵelengani 1 Akorinto 12:25, 26, ndipo pavuli pake mukambilane makonsho aŵa:
-
Kansi Akhilisitu ngawo-ngawo ochita chinji akawona kuti Akhilisitu ayawo ovutika?
-
Kansi mwewo mwaona votyani pa nkhani ya mwakuwoneshelana chikondi a Mboni za Yehova?
A Mboni za Yehova akayamba kuvutika mu chalo chiyakine a Mboni ayawo pa chalo chonse oyeja-yeja kuŵayavya mokulumija. Kuti muwone chisanzo cha vameme ivi, lolelani VIDIYO. Ndipo pavuli pake mukambilane konsho iyi.
-
Kansi vinthu vakuchita a Mboni za Yehova poyavyana vuwonesha tyani kuti okondana?
Akhilisitu ngawo-ngawo oyavya ayawo amene akumana na mavuto
ŴANTHU AYAKINE ONENA KUTI: “Ndaŵa yanji muitiwa kuti Mboni za Yehova osati Mboni za Yesu?”
-
Kansi Yehova eyamba nthawe yanji kutomola ŵanthu amene omulambira kuti Mboni zake?
MFUNDO ZACHIDULE
A Mboni za Yehova ni Akhilisitu ngawo-ngawo. Nise banja imozi ya pa chalo chonse ndipo vinthu vatuphunzila vufumila m’Baibulo komasoti tuuja ayasu choonadi chulaŵila za Yehova.
Makonsho oweleja
-
Ndaŵa yanji teyamba kuziŵika na zina yakuti Mboni za Yehova?
-
Kansi tuchita tyani vinthu na Akhilisitu ayasu?
-
Kansi mwewo muganiza kuti a Mboni za Yehova ni Akhilisitu ngawo-ngawo?
PHUNZILANI VINYINJI
Ziŵani vinyinji vokhuza mbili yasu.
Mboni za Yehova ziwonesha chikhulupililo, Gawo 1: Kufuma mu mfinzi (1:00:53)
Onani visanzo vuwonesha vachita a Mboni za Yehova posilijana na viphunziso vawenye.
Fwanani mayankho a makonsho ŵamuli nawo okhuza a Mboni za Yehova.
A Stephen enzekonda kuchita vachiwawa. Ŵelengani nkhani yamene iyi kuti mufwane vechiwona ove kuli a Mboni za Yehova vinthu venzechita vichitisha kuti ove achinje.
“Moyo wangu wenzengoyipila-yipila” (Nsanja ya Olonda, 1 July, 2015)
a Magazini yasu ya Nsanja ya Mulonda yamene ni yoziŵika luweme yankhala yufotokoza mfundo za choonadi cha m’Baibolo kufumila mu 1879.
