Yesu enena kuti Akhilisitu ofunika kubatizika. (Ŵelengani Mateyu 28:19, 20.) Koma kansi ubatizo n’chinji? Ndipo munthu ofunika kuchita chinji kuti akabatizike?

1. Kansi ubatizo n’chinji?

Mawu akuti “kubatiza” ofumila ku mawu ayakine Achigiliki amene otanthauza “kusunsika.” Vamene ivi niye vichitikila Yesu pa nthawe yenzebatizika mu Mmana wa Yorodano, ndipo muŵili wake wonse wembijiwa mmanzi. Tuziŵa vamene ivi chifukwa chakuti pavuli pakuti wabatizika yove “evuuka mmanzi.” (Maliko 1:​9, 10) Molingana na Yesu, Akhilisitu achendi akobatizika muŵili wawo wonse umbijiwa mmanzi.

2. Kansi munthu owonesha chinji akobatizika?

Pobatizika munthu owonesha kuti wapeleka moyo wake kwa Yehova. Lomba kansi yove olipeleka tyani? Akaliye batizika, yove opeleka pemphelo kwa Yehova, nomuuja kuti nufuna nikutumikileni kwa moyo wangu wonse. Yove olonjeza kuti akolambila Yehova yeka komasoti kuti kuchita chifunilo chake kunkhale chinthu chofunikila ngako pa moyo wake. Yove osankha “kulikana yove yeka . . . nokonkha nthawe zonse” viphunziso komasoti chisanzo cha Yesu Khilisitu. (Mateyu 16:24) Ni chifukwa cholipeleka komasoti kubatizika, kwamene kungachitishe kuti munthu ankhale pa ushamwali wotang’a na Yehova komasoti naŵala amene omulambila yove.

3. Kuti munthu abatizike n’chinji chakufunikila kuchita?

Mukaliye batizika mufunika kuphunzila za Yehova komasoti kunkhala na chikhulupililo chotang’a muli yove. (Ŵelengani Aheberi 11:6.) Mukankhala na chikhulupililo komasoti chiziwiso chikulu mwewo munkhalesoti na chikondi chikulu ngako kwa Yehova. Tetyo, kulaŵila chendi mwewo mufunishishe kulalikila za yove nonkhala mokatijana na vakunena yove kuti ichi n’chiweme ichi n’chiipa. (2 Timoteyo 4:2; 1 Yohane 5:3) Keno munthu owonesha kuti ofuna ankhale na “moyo wokondwelesha Yehova,” yove angasankhe kupeleka moyo wake mpaka pofwika pobatizika.​—Akolose 1:​9, 10. a

 VATI TIPHUNZILE

4. Tingaphunzilepo vinyinji pa ubatizo wa Yesu

Ŵelengani Mateyu 3:​13-​17 kuti tiphunzilepo vinyinji pa ubatizo wa Yesu. Ndipo pavuli pake mukambilane makonsho aŵa:

• Kansi Yesu enze lucheche pechibatizika?

• Kansi yove ebatiziwa tyani? Kansi echingomutila manzi pa mutu?

Pavuli pakuti wabatizika Yesu eyamba ntchito yechimupasa Mulungu. Ŵelengani Luka 3:​21-​23 na Yohane 6:​38, ndipo pavuli pake mukambilane konsho iyi:

• Pavuli pakuti Yesu wabatizika, kansi ni ntchito yotyani yechiika pamalo oyamba pa moyo wake?

5. Ubatizo ni cholinga chamene namwe mungachikwanilishe

Cholinga cholipeleka kwa Yehova komasoti kubatizika chingawoneke monga ni udindo ukulu ngakosoti. Koma mukaphunzila viyinji vokhuza Yehova komasoti kukatishila ntchito vakunena yove, mwewo munkhale osimikijila kupanga chosankha chamene ichi chofunika ngako. Kuti muwone ayakine mwa ŵanthu echitako kale vamene ivi, lolelani VIDIYO.

Ŵelengani Yohane 17:3 na Yakobo 1:5, ndipo pavuli pake mukambilane konsho iyi:

• N’chinji chingayavye munthu kuti akonzekele kuyabatizika?

 6. Tikabatizika tunkhala kumbali ya banja ya Yehova

Tikabatizika tunkhala mbali ya banja yokatijana ya pachalo chonse. Paliye kanthu kuti tunkhala m’chalo chotyani olo ntundu wotyani koma tonse tukhulupilila vinthu vimozi, ndipo tumvwila malamulo ŵamo na ŵamo ŵa Mulungu. Ŵelengani Salimo 25:14 na 1 Petulo 2:17, ndipo pavuli pake mukambilane konsho iyi:

• Pavuli pakuti munthu wabatizika kansi onkhala tyani pa ushamwali wotang’a na Yehova komasoti na ŵanthu omutumikila?

 MFUNDO ZACHIDULE

Yesu ephunzisa kuti ophunzila ŵake ofunika kubatizika. Kuti vikwanishike munthu wamene uyo ofunika kunkhala na chikhulupililo chotang’a mwa Yehova, kunkhala mokatijana na vakunena Mulungu kuti n’viweme, nopeleka moyo wake kwa Mulungu.

Makonsho oweleja

• Kansi ubatizo n’chinji, ndipo ndaŵa yanji ni wofunika ngako?

• Kansi pali kukatijana kotyani pakati pa kulipeleka na ubatizo?

• Kansi ni vinthu votyani vakufunikila kuchita munthu akaliyepeleka moyo wake kwa Yehova komasoti kubatiziwa?