MUTU 24
Kansi angelo niŵani, ndipo ochita chinji?
Yehova ofuna kuti sewo tiphunzile za banja yake ili kululu. Banja yamene iyi yupamikijapo angelo amene oitiwa kuti “ŵana ŵa Mulungu.” (Yobu 38:7) Kansi Baibolo yunena chinji vokhuza angelo? Ndipo ove ochita chinji? Kansi angelo onse opanga mbali ya banja ya Mulungu?
1. Kansi angelo niŵani?
Yehova eyamba kulenga angelo akaliyelenga chalo. Molingana na Mulungu, angelo tingaŵawonelini ndipo onkhala kululu. (Aheberi 1:14) Kuli angelo mamiliyoni anyinji, ndipo aliyense wa ove ali na minkhalidwe yapadela. (Chivumbulutso 5:11) Ove “ochita vakunena [Yehova] ndipo omvwila malamulo ŵake.” (Salimo 103:20) Masiku akuvuli, Yehova enzekatishila ntchito angelo potumija mauthenga poyavya atumiki ŵake nakuŵapulumusha keno ali pangozi. Masiku ŵano, angelo oyavya Akhilisitu kuti afwane ŵanthu amene ali na ntima wofuna kuphunzila za Mulungu.
2. Kansi Satana na viŵanda vake niŵani?
Angelo ayakine enkhala osakhulupilika kwa Yehova. Mngelo woyamba kupandukila Mulungu “oitiŵa kuti Satana Mdyelekezi, ndipo yove oluŵilisha ŵanthu pachalo chonse.” (Chivumbulutso 12:9) Satana enzefuna kulamulila ayake, chifukwa cha vamene ivi yove ekwanisha kupandusha Adamu na Hava komasoti angelo ayakine kuti ankhale kumbali yake. Angelo amene aŵa opanduka oitiwa kuti viŵanda. Yehova epitikisha angelo amene aŵa kululu ndipo palipano, ali pano pachalo koma ove azawonongewe.—Ŵelengani Chivumbulutso 12:9, 12.
3. Kansi Satana pamozi na viŵanda vake otiyesa tyani?
Satana pamozi na viŵanda vake, osempha ŵanthu pokatishila ntchito vimizimu. Pokatishila ntchito vimizimu vamene ivi, ŵanthu oyeja kulaŵila na viŵanda. Kwamene uku nikuphonya. Mwachisanzo, ŵanthu ayakine oluta kuyalaŵila na ochita vamasenga, ochita vamizimu, ng’anga, na oyombeja. Ayakine osakila thandizo ya mankhwala yamene yukatijana na vamizimu. Satana ochitishasoti kuti ŵanthu akolaŵila na ŵala emwalila. Koma Yehova olaŵila kuti: “Osati mukolaŵila na mizimu, olo kukonsha kwa ŵala olosela vakusogolo.” (Levitiko 19:31) Yove otipasa chenjezo yamene iyi kuti atiteteze kwa Satana na viŵanda vake. Yove ni mdani wa Mulungu, ndipo ofuna kuti nase tisokonezeke.
VATI TIPHUNZILE
Tiphunzile vinthu viweme vakuchita angelo, mwatingatetezekele kumizimu na kwa Satana, na viŵanda vake.
4. Angelo oyavya ŵanthu kuti aphunzile vokhuza Yehova
Angelo olalikilalini menso na menso kuli ŵanthu. Mmalo mwake, ove oyavya Akhilisitu achendi kufwana ŵanthu ofunishisha kuphunzila za Mulungu. Ŵelengani Chivumbulutso 14:6, 7, ndipo pavuli pake mukambilane makonsho aŵa:
-
Ndaŵa yanji tufunika thandizo ya angelo kuti tikate ntchito yolalikila?
-
Kansi muwonalini kuti ni chinthu chiweme kuyavyiŵa na angelo kufwana ŵanthu ofuna kuphunzila vokhuza Baibolo? Ndaŵa yanji mwewo muganiza vamene ivi?
5. Nkhalani kutali na vamizimu
Satana na viŵanda vake ni adani a Yehova. Ndipo nase sewo ni adani ŵasu. Ŵelengani Luka 9:38-42, ndipo pavuli pake mukambilane konsho iyi:
-
Kansi viŵanda vuchita tyani na ŵanthu?
Tufunalini kuti viŵanda vikotisogolela pa moyo wasu. Ŵelengani Deuteronomo 18:10-12, ndipo pavuli pake mukambilane makonsho aŵa:
-
Kansi viŵanda vuyeja tyani kulaŵila nase komasoti kutisempha? Kansi ni vinthu votyani vukatijana na viŵanda vukonda chitika kuno kwasu?
-
Kansi Yehova ali na chifukwa chotileshela vinthu vamizimu? Ndaŵa yanji?
Lolelani VIDIYO, ndipo pavuli pake mukambilane makonsho aŵa.
-
Mu vidiyo Paula eika kachithumwa ku kwanja ya mwana wake. Kansi muganiza kuti vamene ivi venze viipa? Ndaŵa yanji?
-
Kansi Paula enzefunika kuchita chinji kuti aliteteze ku viŵanda?
Akhilisitu achendi nthawe zonse ozondana na viŵanda. Ŵelengani Machitidwe 19:19 na 1 Akorinto 10:21, ndipo pavuli pake mukambilane konsho iyi:
-
Ndaŵa yanji ni bwino kuwononga chinthu chilichonse chukatijana na mizimu?
6. Pambanani pa nkhondo yoniyatana na Satana komasoti viŵanda vake
Viŵanda vutongewa na Satana. Koma angelo okhulupilika otongewa na nkulu wa angelo Mikayeli, yamene ni zina iyakinesoti ya Yesu. Kansi ni mphamvu zotyani zalinazo Mikayeli? Ŵelengani Chivumbulutso 12:7-9, ndipo pavuli pake mukambilane makonsho aŵa:
-
Niŵani ali na mphamvu ngako? Mikayeli na angelo ŵake kapena Satana na viŵanda vake?
-
Kansi muganiza kuti osatila a Yesu ofunika kuchita wowa na Satana na viŵanda vake?
Mwewo mungapambane nkhondo yoniyatana na Satana na viŵanda vake. Ŵelengani Yakobo 4:7, ndipo pavuli pake mukambilane konsho iyi:
-
Kansi mwewo mungaliteteze tyani kwa Satana na viŵanda vake?
ŴANTHU AYAKINE ONENA KUTI: “Paliye vuto kutchaya njuga, kulolela mavidiyo a vamizimu komasoti mafilimu amizimu. Nikusangalala tyala.”
-
Ndaŵa yanji kuganiza koteti n’kuipa?
MFUNDO ZACHIDULE
Angelo okhulupilika otiyayva. Satana pamozi na viŵanda vake ni adani a Mulungu ndipo okatishila ntchito vimizimu pofuna kusempha ŵanthu.
Makonsho oweleja
-
Kansi angelo oyavya tyani ŵanthu kuti aphunzile za Yehova?
-
Kansi Satana na viŵanda vake niŵani?
-
Ndaŵa yanji mwewo mufunika kunkhala kutali na viŵanda?
PHUNZILANI VINYINJI
Onani umboni wakuti Yesu ni Mikayeli nkulu wa angelo.
“Kansi Mikayeli nkulu wa angelo niŵani?” (Nkhani yapa webisaiti)
Onani umboni ŵakuti Mdyelekezi ni munthu ngaye-ngaye osati chiipa nkati mwa ntima wa munthu.
Onani mwamene mwanakazi muyakine mwechipulumukila ku viŵanda.
“Yove eziŵa kuti moyo uli na cholinga” (Nsanja ya Olonda ya 1 July, 1993)
Onani mwamene Satana mwakukatishila ntchito vimizimu pofuna kusempha ŵanthu.
“Chendi chokhuza, zamasenga na ufwiti” (Njira ya ku Moyo Wosatha —Kodi Mwaipeza? chigawo 5)
