MUTU 26
Ndaŵa yanji pali vinthu viipa komasoti mavuto?
Pakachitika viipa ŵanthu olikonsha kuti: “Ndaŵa” yanji vamene ivi vachitika? N’vokondwelesha ngako kuziŵa kuti Baibolo yutipasa yankho!
1. Kansi viipa viyamba tyani pachalo?
Satana Mdyelekezi epandukila Yehova. Yove enzefuna kuti akolamulila ayake. Tetyo yove esokoneza ŵanthu oyambilila Adamu na Hava kuti apandukile Mulungu. Kansi Satana echita tyani vamene ivi? Yove elaŵila wenye kuli Hava. (Genesis 3:1-5) Yove echitisha Hava kuganiza kuti omufisila chinthu chiyakine chiweme. Satana enena kuti ŵanthu angankhale osangalala akaleka kumvwila Mulungu. Tetyo yove etala wenye woyamba kwa Hava. Yove elaŵila kuti muzafwelini. Pa chifukwa chamene ichi Baibolo yunena kuti Satana “ni tata wa wenye.”—Yohane 8:44.
2. Kansi Adamu na Hava esankha kuchita chinji?
Yehova ewonesha ntima wopasa kwa Adamu na Hava. Mulungu eŵauja kuti mulye vitwazi vonse va mmunda wa Edeni kupatulapo va chimuti chimozi. (Genesis 2:15-17) Olo n’tetyo esankha mphela kulya chitwazi chamene chala. Tetyo Hava “etyola chitwazi cha nchimuti chamene chala noyamba kulya.” Pavuli pake, Adamu naye “echilya.” (Genesis 3:6) Adamu na Hava enze angwilo, pa chifukwa chamene ichi venze vosavuta kuchita vinthu viweme. Koma ove esankha kusamvwila Mulungu. Pechichita vamene ivi, ove echimwa ndipo ekana ulamulilo wa Mulungu. Chosankha chamene ichi chileta mavuto akulu kuli ove.—Genesis 3:16-19.
3. Kansi chosankha cha Adamu na Hava chekhuza tyani umoyo wasu?
Adamu na Hava pechichimwa, enkhala aliye ungwilo tetyo kusoŵa ungwilo kwamene uko epasakosoti ŵana ŵawo. Polaŵila za Adamu, Baibolo yunena kuti: “Niye chifukwa chake, monga mwewiloŵela uchimo m’chalo kupitila muli munthu yumo na imfwa kupitila mu uchimo imfwa yamene iyo ifalikila kuli ŵanthu onse chifukwa chakuti onse echimwa.”—Aroma 5:12.
Lomba ndaŵa yanji tuvutika? Nthawe ziyakine sewo tutamana chifukwa cha vosankha viipa vatapanga. Nthawe ziyakine tutamana chifukwa cha vosankha viipa va ŵanthu ayakine. Ndipo nthawe ziyakine sewo tutamana chifukwa chakuti tili pamalo aipa komasoti pa nthawe iipa.—Ŵelengani Mlaliki 9:11.
VATI TIPHUNZILE
Tiphunzile kuti ni Mulungu lini ochitisha vinthu viipa vatuwona pano pachalo. Tiphunzilesoti mwakumvwila yove akawona kuti sewo tutamana.
4. Wamene ochitisha kuti sewo teŵanthu tikotamana
Ŵanthu anyinji oganiza kuti Mulungu niye otonga chino chalo. Kansi vamene ivi ni vachendi? Lolelani VIDIYO.
Ŵelengani Yakobo 1:13 na 1 Yohane 5:19, ndipo pavuli pake mukambilane konsho iyi:
-
Kansi Mulungu niye ochitisha mavuto?
5. Onani vokonkhapo va utongi wa Satana
Ŵelengani Genesis 3:1-6, ndipo pavuli pake mukambilane makonsho aŵa:
-
Kansi Satana etala wenye wotyani?—Onani vesi 4 na 5.
-
Kansi Satana ewonesha tyani kuti Yehova enzefisa vinthu viyakine viweme kuli ŵanthu?
-
Monga ni mwechinenela Satana, kansi ŵanthu ofunikila chendi ufumu wa Yehova kuti ankhale osangalala?
Ŵelengani Mlaliki 8:9, ndipo pavuli pake mukambilane konsho iyi:
-
Pofwika pano tawona kuti Yehova niyelini otonga chino chalo, kansi n’chinji chuchitika chifukwa cha vamene ivi?
-
Adamu na Hava enze angwilo ndipo enze nkhala mpaladaiso. Ove emvwila Satana ndipo epandukila Yehova
-
Uchimo, mavuto, komasoti imfwa vupitilija kupanga mbali ya chino chalo koma Yehova azavisilije
-
Ŵanthu azankhalesoti angwilo ndipo azapitilije kunkhala mpaladaiso
6. Yehova odela nkhaŵa mavuto ŵasu
Kansi Mulungu odela nkhaŵa mavuto ŵasu? Tiyeni tiwone vamene Mfumu Davide komasoti Mtumwi Petulo vechilemba. Ŵelengani Salimo 31:7 na 1 Petulo 5:7, ndipo pavuli pake mukambilane konsho iyi:
-
Malemba amene aŵa otiwonesha kuti Yehova owona mavuto ŵasu, ndipo ofuna kutiyavya. Kansi mwewo mulimvwa tyani mukaziŵa vamene ivi?
7. Mulungu azasilije mavuto onse
Ŵelengani Yesaya 65:17 na Chivumbulutso 21:3, 4, ndipo pavuli pake mukambilane konsho iyi:
-
Ndaŵa yanji ni chinthu chiweme ngako kuziŵa kuti Yehova azasilije mavuto onse ŵatukumana nawo sewo?
Kansi mwewo muziŵa?
Satana pechitala wenye woyambilila, eipisha zina ya Yehova. Yove echita vamene ivi, pofuna kuwonesha kuti Ufumu wa Mulungu ulamulilalini mwa chilungamo komasoti mwa chikondi. Lombapano, Yehova azasilije mavuto onse nowonesha kuti utongi wake ni uweme kupambana uliwonse. Vamene ivi vikazachitika, yove azatuŵishe zina yake kuwenye wonse. Chamene ichi n’chinthu chofunika ngako pachalo chonse.—Mateyu 6:9, 10.
ŴANTHU AYAKINE ONENA KUTI: “Mulungu niye ochitisha mavuto.”
-
Kansi mwewo mungayankhe kuti tyani?
MFUNDO ZACHIDULE
Satana, Adamu na Hava amene aŵa niye eyambisha mavuto pano pachalo. Yehova odelankhaŵa ŵanthu ndipo, kwalombapano asilije mavuto onse.
Makonsho oweleja
-
Kansi niwenye wotyani wechitala Satana Mdyelekezi kwa Hava?
-
Kansi chosankha cha Adamu na Hava chekhuza tyani umoyo wasu?
-
Kansi tuziŵa tyani kuti Yehova odelankhaŵa mavuto ŵasu?
PHUNZILANI VINYINJI
Kansi uchimo ni chinji? Onani yankho ya m’Baibolo.
Ŵelengani vinyinji vokhuza nkhani yechiyambisha Satana Mdyelekezi m’munda wa Edeni.
“Ndaŵa yanji Mulungu walola kuti ŵanthu akotamana?” (Onani Nsanja ya Olonda ya 1 January, 2014)
Onani mayankho onkhazika ntima pansi amakonsho ofunika ngako.
Onani vechiphunzilapo mwanalume muyakine pa mavuto ŵechikumana nawo.
