MUTU 28

Mwatingaoneshele kutembeja pa vechitichitila Yehova na Yesu

IMBANI

Kansi mwewo mukumvwa tyani keno shamwali wanu wakupasani mphaso? N’vowonekelatu, kuti mwewo musangalala ndipo mufuna kumuwonesha shamwali wanu wamene uyu kuti mwakondwela nayo mphaso yake. Yehova na Yesu etipasa mphaso iweme ngako yatufunikila kuilondela yamene ni dipo. Kansi tuwonesha tyani kutembeja dipo yamene iyi?

1. Kansi ni njila iyakine yotyani yatingawoneshele kutembeja Yehova na Yesu pa vechitichitila?

Baibolo yulonjeza kuti “amene angakhulupilile yove (Yesu)” ankhale na moyo kosasila. (Yohane 3:16) Koma kansi kunkhala na chikhulupililo kutanthauza chinji? Kutanthauza vinyinji osati kungokhulupilila tyala Yesu. Tingawoneshesoti chikhulupililo pa vosankha vatili navo komasoti pa vinthu vatuchita. (Yakobo 2:17) Keno tuwonesha m’mawu na m’mvochita vasu kuti tili na chikhulupililo tutang’isha ushamwali wasu na Yesu komasoti Atata ŵake wamene ni Yehova.—Ŵelengani Yohane 14:21.

2. Kansi ni pa vochitika vapadela votyani vamene vutiyavya kuwonesha kutembeja pa vechitichitila Yehova na Yesu?

Usiku wakuti mailo yake apaiwe, Yesu euja ophunzila ŵake mwangawoneshele kutembeja nsembe yake. Yove eŵauja kuti akosonkhana pa nthawe ya padela, chamene Baibolo yutomotola kuti “chakulya cha ambuye” komasoti chuziŵika kuti chikumbukilo cha imfwa ya Khilisitu. (1 Akorinto 11:20) Yesu enzefuna kuti atumwi ŵake onse—komasoti Akhilisitu achendi—akonkhala okumbukila kuti yove etwala moyo wake chifukwa cha sewo tonse. Pa chifukwa chamene ichi, yove eŵalamula kuti: “Mukochita vamene ivi ponikumbukila.” (Luka 22:19) Keno mwewo mwaluta ku Chikumbukilo, muwonesha kutembeja kwanu pa chikondi chikulu chalinacho Yehova na Yesu kuli sewo.

VATI TIPHUNZILE

Muwone njila ziyakine zamungawoneshele kutembeja chikondi chikulu chakuwonesha Yehova na Yesu kuli sewo. Muwonesoti chifukwa chake Chikumbukilo cha imfwa ya Khilisitu ni chofunika ngako.

3. Njila zatingawoneshele kutembeja

Yelekezelani kuti mwewo mumbila mmanzi lomba munthu muyakine wawela nokupulumushani. Niye kuti mungaluŵe chochitika chamene ichi chawakuchitilani munthu wamene uyo? Payakine mungachite vilivonse vamungakwanishe kuti muwoneshe kutembeja pa vawakuchitilani?

Tili na chiyembekezo cha kuzenkhala m’paka kale-kale chifukwa cha Yehova. Ŵelengani 1 Yohane 4:8-10, ndipo pavuli pake mukambilane makonsho aŵa:

Ndaŵa yanji nsembe ya Yesu ni mphaso ya padela?
Kansi mwewo mukumvwa tyani mukaziŵa vechikuchitilani Yehova na Yesu?

Kansi tingawoneshe tyani kutembeja pa vinthu vechitichitila Yehova na Yesu? Ŵelengani 2 Akorinto 5:15 na 1 Yohane 4:11; 5:3. Ndipo pavuli poŵelenga lemba iliyonse kambilanani konsho iyi:

Mokatijana na vamwaŵelenga, mungachite chinji kuti muwoneshe kutembeja?

4. Konkhejani Yesu

Njila iyakine yatingawoneshele kutembeja ni kukonkheja Yesu. Ŵelengani 1 Petulo 2:21, ndipo pavuli pake mukambilane konsho iyi:

Kansi mwewo mungakonkheje tyani vochita va Yesu?

Yesu enzekonda Mawu a Mulungu, mwa kulalikila uthenga uweme komasoti kuyavya ŵanthu

5. Mukopezeka pa Mwambo wokumbukila imfwa ya Khilisitu

Kuti muziŵe chechitika pa Mwambo woyambilila wa Chakulya cha Ambuye, ŵelengani Luka 22:14, 19, 20. Ndipo pavuli pake mukambilane makonsho aŵa:

Ni chinji chechitika pa Mwambo wamene uyu?
Kansi nkate na vinyu vupanamila chinji?—Onani mavesi 19 na 20.

Yesu enzefuna kuti ophunzila ŵake akochita Mwambo wa Chakulya cha Ambuye chaka chilichonse pokumbukila imfwa yake. N’chifukwa chake, a Mboni za Yehova oungana pamo chaka chilichonse kuti akumbukile imfwa ya Yesu mokatijana na mwechilamulila yove. Kuti aphunzile kufunika kwa chikumbukilo chamene ichi, lolelani VIDIYO. Ndipo pavuli pake mukambilane konsho iyi.

VIDIYO: Ndaŵa yanji Yesu echifwa (1:41)

Kansi pa Chikumbukilo pochitika chinji?

Nkate na vinyu ni vizindikilo tyala. Pa Chikumbukilo nkate upanamila muŵili wangwilo wa Yesu wechipeleka chifukwa cha sewo. Vinyu upanamila milopa yake

ŴANTHU AYAKINE ONENA KUTI: “Vinthu vamufunika kuchita kuti muzapulumushiwe ni kukhulupilila Yesu.”

Kansi mungakatishile tyani ntchito lemba ya Yohane 3:16 na Yakobo 2:17 kuti mumuwoneshe munthu wamene uyo kuti ofunika kuchita vinthu vinyinji osati tyala kungo khulupilila Yesu?

MFUNDO ZACHIDULE

Tuwonesha kutembeja pa vechitichitila Yesu ponkhala na chikhulupililo mwa yove komasoti kupezeka pa Chikumbukilo cha imfwa yake.

Makonsho oweleja

Kansi kunkhala na chikhulupililo mwa Yesu kutanthauza chinji?
Kansi mungawoneshe tyani kutembeja pa vechichita Yehova na Yesu kuli mwewo?
Ndaŵa yanji ni chinthu chofunika ngako kupezekapo pa Chikumbukilo cha imfwa ya Khilisitu?

Mutu wamene uyu nasilija pa:

Cholinga

Mukapezekepo pa Chikumbukilo chokonkhapo cha imfwa ya Khilisitu. Konshani munthu wokuphunzisani Baibolo nsiku yati chizachitike Chikumbukilo ndipo lembani deti pa kalendala yanu.

Viyakine:

Your other goal

PHUNZILANI VINYINJI

Kansi imfwa ya Khilisitu yutilimbikisa kuchita chinji?

Enzekatishila ntchito muŵili wake nolemekeza Yehova (9:28)

Phunzilani tanthauzo ya kuwonesha chikhulupililo.

“Mukowonesha kuti mukhulupilila Malonjezo a Yehova” (Nsanja ya Olonda, October 2016)

Mu nkhani yakuti “Nuliwona kuti nine ntuŵa, komasoti nili na moyo wapindu,” onani mwewichinjila moyo wa mwanakazi muyakine pavuli pomvwisha tanthauzo ya nsembe ya Khilisitu.

“Baibolo yuchinja moyo wa ŵanthu” (Nsanja ya Olonda, 1 August, 2011)