MUTU 30

Ŵanthu ŵala ŵemwenze konda azaushiwe!

IMBANI

Imfwa ni yoŵaŵangako komasoti yuleta mavuto. N’chifukwa chake Baibolo yutomola kuti ni mdani. (1 Akorinto 15:26) M’mutu 27, mwewo mwephunzila kuti Yehova azagonjese mdani wamene uyu. Lomba kansi n’chinji chiti chizachitikile ŵanthu amene emwalila? M’mutu wamene uyu, mwewo muphunzilesoti lonjezo iyakine yochitisha chidwi yechilonjeza Yehova—yove akaushesoti mabiliyoni aŵanthu anyinji nakuzankhalasoti na moyo kosasila. Kansi vamene ivi vizachitike chendi? Kansi ove azaukishiwe kuti azankhale kuni, kululu olo pano pachalo?

1. Kansi Yehova ofuna kuzechita chinji kwa abanja ŵanu komasoti azishamwali ŵanu amene emwalila?

Yehova ofunishisha ngako kuzausha ŵala emwalila. Munthu wolungama oitiwa kuti Yobu enzekhulupilila kuti Mulungu azamuluŵelini yove akezekufwa. Yove euja Mulungu kuti “mwewo muzaite, ndipo newo nizayankhe [nili Mmanda mwamene umo].”—Ŵelengani Yobu 14:13-15.

2. Kansi tuziŵa tyani kuti akufwa azaukishiwe?

Yesu penze pa chalo, Mulungu emupasa mphanvu zousha ŵanthu. Mwachisanzo Yesu eushako msimbi muyakine wa vyaka 12 mwana wa mwanakazi wamasiye. (Maliko 5:41, 42; Luka 7:12-15) Ndipo, yove eusha shamwali wake Lazaro. Ganizilani za Lazaro wamene enze emwalila ndipo enkhala mmanda kwa masiku folo, koma Yesu emuusha. Yesu epemphela kwa Mulungu, nonena kuti: “Lazaro, fuma!” “Wala enze wakufwa efuma” —Lazaro enkhalasoti na moyo! (Yohane 11:43, 44) Ganizilani za chisangalalo chenzenacho azishamwali komasoti akwake a Lazaro!

3. Kansi pali chiyembekezo chotyani kwa azishamwali ŵanu olo abanja ŵanu amene emwalila?

Baibolo yutilonjeza kuti: “Kuzankhale kuuka kwa olungama.” (Machitidwe 24:15) Ŵanthu ŵechiukisha Yesu nthawe za kuvuli aliye lute kululu. (Yohane 3:13) Ove enkhala okondwela ngako pechiushiwa nokhalasoti pano pa chalo. Molingana na vamene ivi, Yesu azaushe mamiliyoni aŵanthu kuti azankhale na moyo m’paladaiso mpaka kale-kale pano pa chalo. Yove enena kuti “onse ŵala ali mmanda a chikumbukilo azaukishiwe”—ivi vutanthauza kuti onse ŵala okumbukiliŵa na Mulungu azaukishiwe—olosoti ŵala amene paliye aliyense oŵakumbukila kuti enzeko.—Yohane 5:28, 29.

VATI TIPHUNZILE

Tiwone umboni wa m’Baibolo uwonesha kuti ŵala amene emwalila azaukishiwe ndipo vamene ivi vizachitike chendi. Tiwonesoti mwamene chiukililo mwachingakupasileni chitonthozo komasoti chiyembekezo.

4. Yesu ewonesha umboni wakuti angakwanishe kuusha ŵanthu echifwa

Tiphunzile vinyinji vokhuza vechichita Yesu kuti aushe shamwali wake Lazaro. Ŵelengani Yohane 11:14, 38-44, ndipo pavuli pake mukambilane makonsho aŵa:

Kansi tingaziŵe tyani kuti Lazaro enze echifwa chendi?—Onani vesi 39.
Yesu eusha Lazaro kuti ankhalesoti na moyo pano pa chalo. Kuti Lazaro enze eluta kululu kansi Yesu sembe echita vamene ivi?

Lolelani VIDIYO.

VIDIYO: Yesu oukisha Lazaro (1:16)

5. Ŵanthu anyinji azaukishiwe!

Ŵelengani Salimo 37:29, ndipo pavuli pake mukambilane konsho iyi:

Kansi mabiliyoni a ŵanthu akuti azaukishiwe azankhale kuni?

Yesu azaushelini tyala atumiki a Yehova koma azaushesoti ŵanthu ayakine anyinji. Ŵelengani Machitidwe 24:15, ndipo pavuli pake mukambilane konsho iyi:

Kansi mwewo mungakonde kuzewonasoti ŵani pa chiukililo?

N’chosavuta kuti tata aushe mwana wake aliyone. Molingana na vamene ivi kwa Yesu n’chinthu chosavuta kuukisha munthu emwalila

6. Chiukililo chingakutonthojeni komasoti kukupasani chiyembekezo

Kuŵelenga m’Baibolo nkhani ichitikila mwana wa Yairo kutonthoja komasoti kutang’isha ŵanthu anyinji amene ovutika chifukwa choluza munthu wenzekonda mu imfwa. Ŵelengani nkhani yamene iyi yachendi pa Luka 8:40-42, 49-56.

Akaliye usha mwana wa Yairo, Yesu euja ausuwake kuti: “osachita wowa, koma uŵe na chikhulupililo.” (Onani vesi ya 50.) Kansi chiyembekezo cha chiukililo chingakuyavyeni tyani mwewo . . .

keno munthu wemwenze konda wa mwalila?
keno moyo wanu uli pa ngozi?

Lolelani VIDIYO, ndipo pavuli pake mukambilane konsho iyi.

VIDIYO: Chiyembekezo chakuti akufwa azauke chutiyavya tyani kunkhala otang’a ntima? (3:21)

Kansi chiyembekezo cha chiukililo chitonthoja tyani notang’isha makolo a Felisiti?

ŴANTHU AYAKINE ONENA KUTI: “Nkhani ya chiukililo ni iweme ngako koma ayakine oikhulupililalini.”

Kansi mwewo muganiza tyani?
Nilemba yotyani yamungakatishile ntchito yusimikijila kuti ŵanthu azaukishiwe chendi?

MFUNDO ZACHIDULE

Baibolo yutilonjeza kuti mabiliyoni aŵanthu emwalila azaukishiwe. Yehova ofuna kuti ove akankhalesoti na moyo, ndipo wapasa mphanvu Yesu kuti azachite vamene ivi.

Makonsho oweleja

Kansi Yehova na Yesu ofuna kuzeŵachitila chinji ŵala emwalila?
Mabiliyoni aŵanthu ati azaukishiwe azankhale kuni—kululu olo pa chalo? Ndaŵa yanji mwewo mwanena vamene ivi?
Mwewo musimikijila kuti ŵanthu ŵala ŵemwenze konda azankhalesoti na moyo?

Mutu wamene uyu nasilija pa:

Cholinga

Keno pali munthu wamuziŵa wamene ovutika chifukwa choluza munthu wenzekonda mu imfwa, keno ingankhale nthawe iweme mungakambilane naye vokhuza chiyembekezo cha chiukililo.

Viyakine:

Your other goal