MUTU 31

Kansi Ufumu wa Mulungu n’chinji?

IMBANI

Uthenga wofunika ngako m’Baibolo ni wokhuza Ufumu wa Mulungu. Yehova azakatishile ntchito Ufumu wamene uyu pokwanilisha cholinga chenzenacho chokhuza chino chalo. Lomba kansi Ufumu wa Mulungu n’chinji? Kansi tuziŵa tyani kuti Ufumu wamene uyu utonga palipano? Kansi ni vinthu votyani vawachitako kale Ufumu wamene uyu? N’nga uzachite votyani kusogolo? Makonsho amene aŵa ayankhiwe m’mutu uno komasoti m’mitu iŵili yokonkhapo.

1. Kansi Ufumu wa Mulungu n’chinji, n’nga Mfumu yake ni ŵani?

Ufumu wa Mulungu ni boma yamene yenkhazikishiwa na Yehova Mulungu. Mfumu yake ni Yesu Khilisitu ndipo otonga kufumila kululu. (Mateyu 4:17; Yohane 18:36) Polaŵila za Yesu, Baibolo yunena kuti: “Yove azatonge monga Mfumu . . . mpaka kale-kale.” (Luka 1:32, 33) Monga Mfumu ya Ufumu wa Mulungu, Yesu azatonge ŵanthu onse pano pa chalo.

2. Kansi ni ŵani otonga pamozi na Yesu?

Yesu otongalini yeka. Ŵanthu ofumila “mu fuko iliyonse, chilaŵilo chilichonse, mtundu uliwonse, na chalo chilichonse . . . azankhale mafumu otonga chino chalo.” (Chivumbulutso 5:9, 10) Kansi ni ŵanthu angani amene akuti azatonge pamozi na Khilisitu? Kufumila pa nthawe yechiwela Yesu pano pa chalo, ŵanthu anyinji ankhala osatila ŵake ndipo palipano alipo mamiliyoni anyinji. Koma ni ŵanthu okwana 144.000 ŵeka amene ati azalute kululu kuyatonga pamozi na Yesu. (Ŵelengani Chivumbulutso 14:1-4.) Koma Akhilisitu ayakine onse azankhale pano pa chalo ndipo azatongewe na Ufumu wa Mulungu.—Salimo 37:29.

3. Kansi Ufumu wa Mulungu upambana tyani maboma a ŵanthu?

Olo kuti olamulila a chino chalo ayeje-yeje tyani kuchita vinthu viweme, koma ove angakwanishelini kuchita vonse vakufuna. Pakapita nthawe wotonga muyakine womeka ngako oloŵa m’malo ndipo ofunalini kuyavya ŵanthu. Mosiyana na otonga amene aŵa, Yesu wamene ni Mfumu ya Ufumu wa Mulungu azaloŵewelini m’malo na muyakine aliyense. Mulungu wankhazikisha “Ufumu wamene uzawonongewelini nthawe zonse.” (Danieli 2:44) Yesu azatonge chalo chonse ndipo azakondelelini mtundu uliwonse wa ŵanthu. Yesu ni wachikondi, wachifundo komasoti wachilungamo ndipo azaphunzise ŵanthu kuti azawoneshe minkhalidwe yamene iyi.—Ŵelengani Yesaya 11:9.

VATI TIPHUNZILE

Tiphunzile noziŵa chifukwa chake Ufumu wa Mulungu ni uweme ngako kupambana maboma a ŵanthu.

4. Ufumu wa Mulungu uzatonge chalo chonse

Yesu Khilisitu anamphamvu zotonga chalo kupambana ŵanthu onse otonga chino chalo. Ŵelengani Mateyu 28:18, ndipo pavuli pake mukambilane konsho iyi:

Kansi ulamulilo wa Yesu upambana tyani utongi wa ŵanthu?

Maboma a ŵanthu ochinja-chinja ndipo boma iliyonse yulamulila mbali imozi ya chalo. Lomba tyani Ufumu wa Mulungu? Ŵelengani Danieli 7:14, ndipo pavuli pake mukambilane makonsho aŵa:

Pakuti Ufumu wa Mulungu “uzawonongewelini,” kansi vamene ivi vili na ubwino wotyani?
Kansi muganiza kuti tizapindule tyani Ufumu wa Mulungu ukazayamba kutonga chalo chonse?

5. Maboma a ŵanthu ofunika kufumyiwapo

N’chifukwa n’chinji Ufumu wa Mulungu ufunika kuloŵa m’malo mwa maboma a ŵanthu? Lolelani VIDIYO, ndipo pavuli pake mukambilane konsho iyi:

VIDIYO: Kansi Ufumu wa Mulungu n’chinji?—Kambali kafupi (1:41)

Kansi vokonkhapo va utongi wa ŵanthu ni votyani?

Ŵelengani Mlaliki 8:9, ndipo pavuli pake mukambilane makonsho aŵa:

Kansi muwona kuti ni bwino kuti Ufumu wa Mulungu uzaloŵe m’malo mwa maboma a ŵanthu? Ndaŵa yanji mwayankha tetyo?

6. Ufumu wa Mulungu uli na olamulila amene otimvwisha

Pakuti Yesu, wamene ni Mfumu yasu enkhalapo munthu, yove “otimvwila chisoni pa vofoka vasu.” (Aheberi 4:15) Yehova esalula analume na anakazi okwana 144.000, amene azatonge pamo na Yesu kufumila “mu fuko iliyonse, chilaŵilo chilichonse, mtundu uliwonse, na chalo chilichonse.”—Chivumbulutso 5:9.

Pakuti Yesu pamozi na ŵanthu ati azatongenaye pamo enkhalapo ŵanthu, kansi muwona kuti vamene ivi n’votang’isha? Ndaŵa yanji mwayankha tetyo?

Yehova wankhala osankha analume na anakazi okhulupililika kufumila m’mitundu yosiyana-siyana kuti azalamulile na Yesu

7. Ufumu wa Mulungu uli na malamulo aweme ngako

Maboma a ŵanthu opanga malamulo amene owamila kuteteza, noyavya tyala nzika zawo. Nawosoti Ufumu wa Mulungu uli na malamulo amene nzika zake zufunika kuŵakonkha. Ŵelengani 1 Akorinto 6:9-11, ndipo pavuli pake mukambilane makonsho aŵa:

Kansi muganiza kuti vinthu vizankhale tyani pano pa chalo keno aliyense azokonkheja malamulo a Mulungu? a
Yehova oyembekezela kuti nzika za Ufumu wake zizokonkheja malamulo ŵake, kansi muganiza kuti vamene ivi vakufuna ni viweme? Ndaŵa yanji mwayankha tetyo?
Ni mfundo yotyani yamene yuwonesha kuti ŵanthu amene okonkhejalini malamulo amene aŵa angakwanishe kuchinja?—Onani vesi 11.

Maboma opanga malamulo amene owamila kuteteza noyavya tyala nzika zawo. Ufumu wa Mulungu uli na malamulo aweme ngako amene ni oyavya noteteza nzika zake

ŴANTHU AYAKINE ANGAKUKONSHENI KUTI: “Kansi Ufumu wa Mulungu n’chinji?”

Kansi mungamuyankhe kuti tyani?

MFUNDO ZACHIDULE

Ufumu wa Mulungu ni boma yamene ili kululu ndipo izalamulile pa chalo chonse.

Makonsho oweleja

Kansi niŵani ati azatonge mu Ufumu wa Mulungu?
Kansi Ufumu wa Mulungu upambana tyani maboma a ŵanthu?
Kansi Yehova oyembekezela kuti nzika za Ufumu wake zikochita chinji?

Mutu wamene uyu nasilija pa:

Cholinga

Kuŵelenga vokhudza ulamulilo wa Yesu pa Yesaya 11:1-10 noganizila kusiyana kulipo pakati pa ulamulilo wa Yesu na maulamulilo a ŵanthu.

Viyakine:

Your other goal

PHUNZILANI VINYINJI

Onani vechiphunzisa Yesu vokhudza kwauli Ufumu wa Mulungu.

“Kansi Ufumu wa Mulungu uli mumtima mwanu?” (Nkhani yapa webisaiti)

Ndaŵa yanji a Mboni za Yehova owona kuti kunkhala okhulupilika ku Ufumu wa Mulungu n’kofunika ngako kupambana kunkhala okhulupilika ku maulamulilo a ŵanthu?

Ŵanthu olipeleka ku Ufumu wa Mulungu (1:43)