MUTU 33
Kansi Ufumu wa Mulungu uzachite votyani?
Ufumu wa Mulungu wiyamba kale kutonga. Kwalombapano Ufumu wamene uyu uzalete madaliso anyinji pano pa chalo. Tiyeni tiwone ayakine mwa madaliso amene ŵati tizakondwele nawo, Ufumu wamene uyu ukazayamba kutonga chalo chonse.
1. Kansi Ufumu wa Mulungu uzachite chinji kuti uzalete madaliso na chilungamo pano pa chalo?
Yesu wamene ni Mfumu ya Ufumu wa Mulungu, azawononge ŵanthu aipa na maboma onse a ŵanthu pa nkhondo ya Alumagedo. (Chivumbulutso 16:14, 16) Pa nthawe yamene iyo, tizawone kukwanilishiwa kwa lonjezo ya m’Baibolo iyi yakuti: “Pasala kanthawe katontho, aipa azankhalepolinisoti.” (Salimo 37:10) Yesu azakatishile ntchito Ufumu wamene uyu poleta ntendele komasoti chilungamo pachalo chonse.—Ŵelengani Yesaya 11:4.
2. Kansi moyo uzankhale wotyani chifunilo cha Mulungu chikezechitika pano pa chalo?
Ufumu wa Mulungu ukezeyamba kulamulila chalo ichi, “olungama azalondele chalo, ndipo azankhale mwamene umo kosasila.” (Salimo 37:29) Vizankhale vokondwelesha ngako kuwona kuti aliyense pa chalo, ni wolungama ndipo okonda Yehova na ŵanthu ayakine. Paliye aliyense akuti azalwale ndipo ŵanthu onse azankhale na moyo kosasila.
3. Kansi Ufumu wa Mulungu uzachite votyani ŵanthu aipa akazawonongewa?
Ŵanthu aipa akazawonongewa, Yesu azatonge monga Mfumu kwa vyaka 1.000. Pa nthawe yamene iyi, Yesu na otonga ayake okwana 144.000, azayavye ŵanthu onse pano pa chalo kuti azankhale angwilo. Pofwika kumapeto kwa vyaka 1.000, chalo chonse chizankhale paladaiso ndipo ŵanthu azankhale mosangalala chifukwa chomvwila malamulo a Yehova. Pavuli pake Yesu azajoshele Ufumu kwa Atata ŵake, Yehova. Pa nthawe yamene iyo, zina ya Yehova “izatuŵishiwe” kusiyana na kale yonse. (Mateyu 6:9, 10) Aliyense azaziŵe kuti Yehova ni wotonga muweme ngako ndipo oganizila atumiki ŵake. Tetyo Yehova azawononge Satana, viŵanda, na ŵanthu onse akuti azawoneshe kuti ofunalini kumvwila utongi wake. (Chivumbulutso 20:7-10) Vamene ivi vikeze chitika, madaliso ŵati uzalete Ufumu wa Mulungu pano pa chalo azankhalepo kosasila.
VATI TIPHUNZILE
Tiphunzile kuti muziŵe chifukwa chake tukaikilalini kuti Mulungu azakatishile ntchito Ufumu wake pokwanilisha malonjezo onse amene ali m’Baibolo.
4. Mulungu azasilije maboma onse a ŵanthu
Baibolo yunena kuti: “Munthu wawononga munthu muyake pomutonga.” (Mlaliki 8:9) Yehova azakatishile ntchito Ufumu wake posilija vinthu vonse viliye chilungamo vakuchita ŵanthu kuli ayawo.
Ŵelengani Danieli 2:44 na 2 Atesalonika 1:6-8, ndipo pavuli pake mukambilane makonsho aŵa:
-
Kansi Yehova komasoti mwana wake Yesu, azachite nawo tyani maboma a ŵanthu komasoti ŵanthu oŵakonkhelela?
-
Kansi vamwaphunzila vokhuza Yehova na Yesu vukusimikijilani tyani kuti azachite vinthu mwachilungamo?
5. Yesu ni Mfumu iweme ngako
Monga Mfumu ya Ufumu wa Mulungu, Yesu azachitile ŵanthu vinthu viweme ngako pano pa chalo. Lolelani VIDIYO kuti muone umboni uwonesha kuti Yesu ni wofunishisha kuyavya ŵanthu komasoti kuti Mulungu emupasa mphamvu zochitila vamene ivo.
Vechichita Yesu ali pa chalo, viwoneshelatu vati uzachitile ŵanthu Ufumu wa Mulungu pano pa chalo. Pa madaliso amene ali mnyansi aŵa, ni daliso yotyani yamuyembekezela ngako mwewo? Ŵelengani malemba ali kusogolo kwa daliso iliyonse.
|
YESU, ALI PANO PA CHALO . . . |
YESU, ALI KULULU . . . |
|---|---|
|
|
|
|
|
|
|
|
6. Madaliso ŵati uzalete Ufumu wa Mulungu
Ufumu wa Mulungu uzachitishe kuti ŵanthu azankhale na moyo uweme monga ni mwenzefunila Yehova poyamba. Ŵanthu azankhale na moyo m’paladaiso pano pa chalo kosasila. Lolelani VIDIYO kuti muwone mwakukwanilishila Yehova cholinga chake, pokatishila ntchito mwana wake Yesu.
Ŵelengani Salimo 145:16, ndipo pavuli pake mukambilane konsho iyi:
-
Kansi mukumvwa tyani mukaganizila kuti Yehova ‘azakwanilishe vokumbwa va chamoyo chilichonse’?
ŴANTHU AYAKINE ONENA KUTI: “Keno tingachite vinthu mokatijana, tingakwanishe kusilija mavuto pa chalo chonse.”
-
Kansi Ufumu wa Mulungu uzasilije mavuto otyani amene maboma a ŵanthu akangiwa kuŵasilija?
MFUNDO ZACHIDULE
Ufumu wa Mulungu uzakwanilishe cholinga chenzenacho Mulungu poyamba. Uzachitishe chalo chino kuti chizankhale paladaiso, mwamene muzankhale ŵanthu aweme amene akuti azalambile Yehova kosasila.
Makonsho oweleja
-
Kansi Ufumu wa Mulungu uzachite chinji kuti uzatuŵishe zina ya Yehova?
-
Ndaŵa yanji tukhulupilila kuti Ufumu wa Mulungu uzakwanilishe vonse veilonjeza Baibolo?
-
Pa madaliso onse ŵati uzalete Ufumu wa Mulungu, ni daliso yotyani yamuyembekezela ngako mwewo?
PHUNZILANI VINYINJI
Phunzilani kuti muziŵe tanthauzo ya Alumagedo.
“Kansi nkhondo ya Alumagedo izankhale yotyani?” (Nkhani yapa webisaiti)
Ŵelengani nkhani yamene iyi kuti muziŵe viti vizachitike mu ulamulilo wa Yesu wa vyaka 1.000, komasoti kumapeto kwa ulamulilo wamene uyu.
“Kansi pa nsiku ya Chiweluzo pazachitike votyani?” (Nsanja ya Olonda, 1 September, 2012)
Onani vamene vingayavye mabanja kuliyelekezela kuti ali m’Paladaiso.
Munkhani yakuti, “Nenze na makonsho anyinji amene enzenisoŵesha ntendele,” onani vamene viyavya munthu muyakine woukila boma kufwana mayankho amakonsho enzemusoŵesha ntendele.
“Baibolo yuchinja moyo wa ŵanthu” (Nsanja ya Olonda, 1 January, 2012)
