MUTU 35

Mwamunga pangile vosankha viweme

IMBANI

Tonse tufunika kusankha vochita pa moyo wasu. Koma vatingasankhe vingakhuze ngako moyo wasu komasoti ushamwali wasu na Yehova. Mwachisanzo, tufunika kusankha kwatufuna kuti tikankhale, mwatingafwanile ndalama komasoti keno tufuna kunkhala pa banja olo yayi. Keno tusankha vinthu mwanzelu tingonkhala okondwela komasoti tingakondweleshe Yehova.

1. Kansi Baibolo ingakuyavyeni tyani kuti mukosankha vinthu mwanzelu?

Mukaliyesankha pa nkhani iyakine, mukopemphela kwa Yehova nofufuza m’Baibolo kuti muziŵe maganizo a Yehova pa nkhani yamene iyo. (Ŵelengani Miyambo 2:3-6.) Nthawe ziyakine Mulungu opeleka lamulo yomvwika luweme pa nkhani iyakine. Keno n’tetyo, mungachite luweme ngako kumvwila lamulo yamene iyo.

Lomba, kansi mungasankhe tyani nkhani yamene m’Baibolo muliye lamulo yake yosapita mmbali yokhuza nkhani yamene iyo? Yehova alekelini kukusogolelani “m’njila yamufunikila kupitamo.” (Yesaya 48:17) Kansi angachite tyani vamene ivi? M’Baibolo muli mfundo zingakuyavyeni kusankha vochita. Mfundo zachendi zupezeka m’Baibolo zingakuyavyeni kuziŵa maganizo a Mulungu pa nkhani yamene iyo yamufuna kusankha. Tikoŵelenga Baibolo, nthawe zinyinji tufwana mfundo zotiyavya kuziŵa mwakuiwonela Mulungu nkhani iyakine. Tetyo tikazindikila mwakumvwila Mulungu, tusankha vumukondwelesha.

2. Kansi muwamila kuchita vinthu votyani mukaliye sankha vochita?

Baibolo yunena kuti: “Wochenjela oganizila mwakuyendela.” (Miyambo 14:15) Vamene ivi vutanthauza kuti tufunikila kuyamba taganizila mofasa poyamba tikaliye sankha vochita. Tetyo, mukaliye sankha vochita pa nkhani iyakine, mukolikonsha kuti: ‘Kansi ni mfundo zotyani za m’Baibolo zinganiyavye kusankha mwanzelu vanufunikila kuchita pa nkhani yamene iyi? Kansi vaningasankhe vikhuze tyani moyo wangu? N’nga ŵanthu ayakine viŵakhuze tyani? Chofunika ngako, mukolikonshasoti kuti, Kansi vaningasankhe vikondweleshe Yehova?’—Deuteronomo 32:29.

Yehova ali na ufulu wotiuja vatufunikila kuchita komasoti vatisafunikila kuchita. Keno tuziŵaluweme malamulo na mfundo zake noyeja-yeja kuzikatishila ntchito pa moyo wasu, tunkhala tuphunzisa chikumbuntima chasu kuti chinkhale chiweme. Chikumbuntima niye chutiyavya kuzindikila kuti vatufunikila kuchita olo vamene vatachita n’viweme olo n’vophoniyeka. (Aroma 2:14, 15) Tetyo tikophunzisa luweme chikumbuntima chasu, chizatiyavye kusankha vochita mwanzelu.

VATI TIPHUNZILE

Tiphunzile kuti muwone mwamene mfundo za m’Baibolo komasoti chikumbuntima mwavingatiyavyile kuti tikosankha vinthu mwanzelu.

3. Mukokonkheja mfundo za m’Baibolo

Kansi mfundo za m’Baibolo zingatiyavye tyani patusankha vochita? Lolelani VIDIYO, ndipo pavuli pake mukambilane makonsho aŵa.

VIDIYO: Mukokonkheja mfundo za m’Baibolo mukosankha vochita (5:54)

Kansi ni mphaso yotyani yantengo wapatali yechitipasa Yehova?
Ndaŵa yanji Yehova etipasa mphaso yamene iyi?
Kansi Yehova watipasa chinji pofuna kutiyavya kuti tikosankha vinthu mwanzelu?

Kuti muwone chisanzo cha mfundo ya m’Baibolo, ŵelengani Aefeso 5:15, 16. Ndipo pavuli pake mukambilane “mwamungakatishile ntchito luweme nthawe yanu” . . .

poŵelenga Baibolo nsiku iliyonse.
kuti munkhale mwanalume olo mwanakazi muweme, kolo olosoti mwana muweme.
kuti mukochita nawo misonkhano ya mpingo.

4. Mukophunzisa chikumbuntima chanu kuti mukosankha vinthu mwanzelu

Tuvutikalini kusankha vochita pa nkhani iyakine keno m’Baibolo muli lamulo yomvwika luweme yokhuza nkhani yamene iyo. Lomba tyani keno m’Baibolo muliye lamulo yotiyavya kusankha nkhani iyakine? Lolelani VIDIYO, ndipo pavuli pake mukambilane konsho iyi.

VIDIYO: “Nkhalani na chikumbuntima chiweme” (5:13)

Muvidiyo yamene iyi, kansi mulongo wamene uyu echita chinji kuti aphunzise chikumbuntima chake komasoti kuti asankhe vinthu vingakondweleshe Yehova?

Tikafuna kusankha vochita pankhani iyakine, ndaŵa yanji tufunikilalini kusenga ŵanthu ayakine kuti atisankhile vochita? Ŵelengani Aheberi 5:14, ndipo pavuli pake mukambilane makonsho aŵa:

Vingankhale vosavuta kusenga ŵanthu ayakine kuti atisankhile vochita pa nkhani iyakine. Koma kansi sewo paseka tufunikila kusiyanisha chinji?
Kansi n’chinji chingakuyavyeni kuti mukophunzisa chikumbuntima chanu komasoti kuti mukosankha vinthu mwanzelu?

Molingana na mapu chikumbuntima chutiyavya kusankha luweme vatufunikila kuchita pa moyo wasu

5. Mukolemekeza vikumbuntima va ŵanthu ayakine

Ŵanthu amene ni osiyana osankhasoti vinthu mosiyana. Lomba kansi tingawoneshe tyani kuti tulemekeza vikumbuntima va ŵanthu ayakine? Ganizilani vochitika viŵili ivi:

Chochitika choyamba: Mulongo wamene edjaila kuphauda wafulukila mu mpingo uyakine wamene alongo amumpingo mwamene umo owona kuti kuphauda n’kuipa.

Ŵelengani Aroma 15:1 na 1 Akorinto 10:23, 24, ndipo pavuli pake mukambilane makonsho aŵa:

Mokatijana na mavesi amene aŵa, kansi mulongo wamene uyo angasalule kuchita chinji? N’nga mwewo mungachite tyani keno muli na munthu muyakine wamene chikumbuntima chake chumulolalini kuchita vinthu vamene chikumbuntima chanu chukulolani kuchita vamene ivo?

Chochitika chachiŵili: M’bale oziŵa luweme kuti Baibolo yuleshalini kumwa walwa mosapitilila malile, koma yove wasankha kuti osati akokumwa walwa olo patontho. Tetyo m’bale wamene uyo waitiwa ku phwando ndipo owona kuti abale ayakine akumwa walwa.

Ŵelengani Mlaliki 7:16 na Aroma 14:1, 10, ndipo pavuli pake mukambilane makonsho aŵa:

Mokatijana na mavesi amene aŵa, kansi m’bale wamene uyu angasalule kuchita chinji? N’nga mwewo mungachite tyani keno mwawona munthu muyakine wamene chikumbuntima chake chumulola kuchita vamene chikumbuntima chanu chukulolanilini kuchita vamene ivo?

Kansi ni vinthu votyani vingayavye munthu kusankha vinthu mwanzelu?

1. Mukosenga Yehova kuti akuyavyeni vofunikila kuchita.—Yakobo 1:5.

2. Mukofufuza m’Baibolo, m’mabuku na mu vinthu viyakine vufalisiwa na gulu yasu kuti mufwane mfundo zingakuyavyeni. Mungalaŵilesoti na Akhilisitu otang’a mwauzimu.

3. Mukokumbukila mwamene vosankha vanu mwavingakhuzile chikumbuntima chanu komasoti vikumbuntima va ayakine.

ŴANTHU AYAKINE ONENA KUTI: “Aliyense ali na ufulu wochita vakufuna. Keno ŵanthu ayakine akolaŵila kuti tyani ni vawo vamene ivo!”

Ndaŵa yanji tufunikila kuganizila mwamene vochita vasu mwavingakhuzile Mulungu komasoti ŵanthu ayakine?

MFUNDO ZACHIDULE

Keno taziŵa maganizo a Yehova pa nkhani iyakine tusankha vochita mwanzelu, pavuli pake tuganizila mwavingakhuzile ŵanthu ayakine vochita vasu vamene ivo.

Makonsho oweleja

Kansi mungasankhe tyani vochita vamene vingakondweleshe Yehova?
Kansi mungachiphunzise tyani chikumbuntima chanu?
Kansi mungawoneshe tyani kuti mulemekeza vikumbuntima va ŵanthu ayakine?

Mutu wamene uyu nasilija pa:

Cholinga

Ganizilani nkhani iyakine yamufunikila kusankha vochita kwalombapano. Katishilani ntchito mfundo zitatu zamene zili mu kabokosi kakuti, “ “Kansi ni vinthu votyani vingayavye munthu kusankha vinthu mwanzelu?”

Viyakine:

Your other goal