MUTU 37
Vayunena Baibolo pankhani ya ntchito na ndalama
Kansi mwiyamba mwadelako nkhaŵa pa nkhani zokhuza ntchito na ndalama? Kulaŵila chendi nthawe ziyakine tingavutike kuchita vonse vatingakwanishe kuti tilambile Yehova uku tuyeja-yeja kukata ntchito kuti tifwane vofunika pa moyo. Koma Baibolo ili na malangizo angatiyavye pa nkhani yamene iyi.
1. Kansi Baibolo yunena votyani pa nkhani ya ntchito?
Yehova ofuna kuti tikokondwela na ntchito yatukata. Baibolo yunena kuti: “Kwa munthu, paliye chiweme kupambana . . . Kukondwelesha ntima wake chifukwa chakuti wakata ntchito mwakhama.” (Mlaliki 2:24) Yehova okata ntchito mwakhama. Tetyo tikokata ntchito mwakhama tukondwelesha Yehova, ndipo nasesoti tukondwela.
Ni chendi kuti ntchito ni yofunika. Koma tufunikilalini kuiwona kuti ni yofunika ngako kupambana kulambila Yehova. (Yohane 6:27) Yove etilonjeza kuti keno tikoika vinthu vokhuza kulambila pa malo oyamba, azatipase vinthu vonse vatufunikila.
2. Kansi tufunikila kuziwona tyani ndalama?
Baibolo yunena kuti “ndalama zuteteza.” Koma yunenasoti kuti ndalama zingatiyavyelini kunkhala osangalala. (Mlaliki 7:12) N’chifukwa chake yutichenjeza kuti osati tikokonda ndalama ndipo yutilimbikisa kuti “Munkhale okhutila na vamulinavo pa nthawe yamene iyo.” (Ŵelengani Aheberi 13:5.) Keno tunkhala okhutila na vatili navo tupewa nkhaŵa zamene zuwela chifukwa cha ntima wofuna kunkhala na vinthu vinyinji. Komasoti tupewa nkhongole zosafunikila. (Miyambo 22:7) Tupewasoti mavuto amene owela chifukwa cha kutchaya njuga komasoti kuchita nawo mabizinesi amene olimbikisa ŵanthu kulemela kamangu.
3. Kansi tingawoneshe tyani kuti nise opasa pokatishila ntchito ndalama zasu?
Yehova ni Mulungu wopasa ndipo tingawoneshe kuti tumukonkheja ponkhala “opasa, komasoti okonzeka kuyaŵilako ayakine.” (1 Timoteyo 6:18) Tingachite vamene ivi popeleka ndalama zasu kuti ziyavye pa mpingo komasoti poyavya ŵala ovutika maka-maka abale na alongo ŵasu. Yehova okondwela ngako akowona cholinga chatupelekela ndalama zasu, osati kupaka kwa ndalama zamene izo. Tikopeleka ndalama zasu mofunishisha, tunkhala osangalala komasoti tukondwelesha Yehova.—Ŵelengani Machitidwe 20:35.
VATI TIPHUNZILE
Tiwone ubwino wonkhala na maganizo aweme pankhani ya ntchito komasoti ubwino wokhutila na vinthu vatili navo.
4. Keno mulimbikila ntchito mulemekeza Yehova
Kukonda Yehova kungatiyavye kuti tikonkhala na maganizo aweme pa nkhani ya ntchito. Lolelani VIDIYO, ndipo pavuli pake mukambilane makonsho aŵa.
-
Muvidiyo yamene iyi, n’chinji chakukondweleshani na vakuchita Jason akankhala kuntchito komasoti mwakuiwonela ntchito yamene iyo?
-
Kansi echita votyani kuti ntchito osati ikomukangisha kuchita vinthu vofunika ngako?
Ŵelengani Akolose 3:23, 24, ndipo pavuli pake mukambilane konsho iyi:
-
Ndaŵa yanji kunkhala na maganizo aweme pa nkhani ya ntchito n’kofunikila?
Ntchito niyofunika. Koma tufunikilalini kuwona kuti niyofunika ngako kupambana kulambila Yehova
5. Kunkhala okhutila kutipindulisha
Ŵanthu anyinji opanga chilichonse changakwanishe kuti afwane ndalama zinyinji. Koma Baibolo yutilimbikisalini kuchita vamene ivi. Ŵelengani 1 Timoteyo 6:6-8, ndipo pavuli pake mukambilane konsho iyi:
-
Kansi Baibolo yutilimbikisa kuchita chinji?
Olo kuti tili na vinthu vitontho, tingakwanishe kunkhala osangalala. Lolelani VIDIYO, ndipo pavuli pake mukambilane konsho iyi.
-
Kansi n’chinji chuchitisha mabanja amene aŵa kunkhala osangalala olo kuti ofwana ndalama zitontho?
Kansi pangaŵe vuto yotyani keno tili na vinthu vinyinji koma tufuna kuyangijila viyakine? Yesu elaŵila fanizo yuwonesha kuyofya kwa ntima wamene uyu. Ŵelengani Luka 12:15-21, ndipo pavuli pake mukambilane konsho iyi:
-
Kansi mwaphunzila votyani mu fanizo ya Yesu yamene iyi?—Onani vesi 15.
Ŵelengani Miyambo 10:22 ndipo mulinganije na 1 Timoteyo 6:10. Ndipo pavuli pake mukambilane makonsho aŵa:
-
Kansi muganiza kuti chofunika ngako ni chinji, kunkhala pa ushamwali na Yehova olo kunkhala na ndalama zinyinji? Ndaŵa yanji mwanena teti?
-
Kansi munthu wamene onkhala osakila-sakila ndalama okumana na mavuto otyani?
6. Yehova azatipase vatufunikila
Kusoŵa kwa ntchito komasoti mavuto achuma vingayeje chikhulupililo chasu. Lolelani VIDIYO kuti muwone vatingachite tikakumana na mavuto ngati ni amene aŵa, ndipo pavuli pake mukambilane makonsho aŵa.
-
Mu vidiyo yamene iyi, kansi m’bale wamene uyu ekumana na mavuto otyani?
-
Kansi echita votyani kuti akwanishe kusilija mavuto amene awo?
Ŵelengani Mateyu 6:25-34, ndipo pavuli pake mukambilane konsho iyi:
-
Kansi Yehova elonjeza kuti ŵanthu amene oika vofuna vake pa malo oyamba azaŵachitile votyani?
ŴANTHU AYAKINE ONENA KUTI: “Nufunika kukata ntchito mwakhama kuti nisamalile banja yangu n’chifukwa chake ningakwanishelini kuluta kumisonkhano sondo iliyonse.”
-
Kansi nilemba yotyani yukusimikijilani kuti kuika vinthu vokhuza kulambila pa malo oyamba ni chinthu chanzelu changachite munthu pa moyo wake?
MFUNDO ZACHIDULE
Ntchito komasoti ndalama ni zofunikila, koma osati tilole kuti vikotikangisha kulambila Yehova.
Makonsho oweleja
-
Kansi n’chinji chingakuyavyeni kuti mukowona luweme ntchito?
-
Kansi kunkhala okhutila na vamuli navo kungakuyavyeni tyani?
-
Kansi mungawoneshe tyani kuti mukhulupilila vechilonjeza Yehova vakuti azasamalile atumiki ŵake?
PHUNZILANI VINYINJI
Phunzilani kuti muwone keno Baibolo yunena kuti ndalama ni ziipa.
“Kansi ndalama niye zuleta mavuto onse?” (Nkhani yapa webisaiti)
Onani mwamene mwatingakatishilile ntchito ndalama zasu kuti tikokondwelesha Mulungu.
“Kansi Baibolo yunena votyani pa nkhani ya kupasa?” (Nkhani yapa webisaiti)
Kansi kutchaya njuga kuli na vuto iliyonse?
Onani viyavya munthu muyakine kuleka kutchaya njuga komasoti kuiŵa.
“Nenzekonda ngako mpikishano wa mahosi” (Nsanja ya Olonda, 1 November, 2011)
