MUTU 43
Kansi Akhilisitu ofunikila kuuwona tyani walwa?
Ŵanthu pa chalo ichi ali na maganizo osiyana-siyana pa nkhani ya walwa. Ayakine osankha kumwa walwa na ayawo akotandala. Pamene ayakine osankha kuti osati akokumwa walwa. Ŵanthu ayakinesoti akumwa walwa nofwika pokolewa. Lomba kansi Baibolo yunena kuti tyani pa nkhani ya walwa?
1. Kansi kumwa walwa ni kuphoniya?
Baibolo yunenalini kuti kumwa walwa ni kuphoniya. M’malomwake, ikonena za vinthu viweme vinyinji vawatipasa Mulungu, yutomola za “vinyu wamene ukondwelesha ntima wa munthu.” (Salimo 104:14, 15) Ndipo analume na anakazi okhulupilika ayakine otomolewa m’Baibolo enzekumwa walwa.—1 Timoteyo 5:23.
2. Kansi Baibolo yupeleka malangizo otyani kwa ŵala asankha kumwa walwa?
Yehova olesha kumwa walwa mwauchakolwa komasoti kukolewa. (Agalatiya 5:21) Mawu ŵake onena kuti: “Osati unkhale pakati pa ŵanthu akumwa vinyu ngako.” (Miyambo 23:20) Tetyo tikasankha kumwa walwa—olo kuti tili paseka—tufunikilalini kumwa ngako mpaka pofwika pokangiwa kuganiza luweme, kukangiwa kulaŵila, kuchita vinthu vanzelu olosoti kufwika powononga thanzi yasu. Koma keno tuvutika kumwa walwa molilesha, tingachite luweme kulekelatu.
3. Kansi tingalemekeze tyani vechisankha ŵanthu ayakine pa nkhani ya walwa?
Munthu aliyense ofunikila kusankha yeka keno ofuna kumwa walwa olo yayi. Munthu muyakine akasankha kumwa walwa mosapitilila malile, osati tikomuweluza. Komasoti keno munthu muyakine wasankha kuti osati, akokumwa walwa osamukakamija kuti ayambe kumwa. (Aroma 14:10) Koma, tingasankhe kuti osati tikokumwa walwa keno ayakine angakalipe olo keno kumwa walwa kungalete mavuto ayakine kwa ŵanthu amene awo. (Ŵelengani Aroma 14:21.) Tupewa kuchita vinthu “vopindulisha sewo seka,” koma kuchita vinthu “vopindulisha ayakine.”—Ŵelengani 1 Akorinto 10:23, 24.
VATI TIPHUNZILE
Tiphunzile mfundo za m’Baibolo zamene zingakuyavyeni kusankha kumwa walwa olo yayi komasoti kupaka kwa walwa wamungamwe. Tiwonesoti vamungachite keno muli na vuto yakumwa walwa mosalilesha.
4. Mungasankhe kumwa walwa olo yayi
Kansi maganizo a Yesu enze otyani pa nkhani ya walwa? Kuti tiyankhe konsho yamene iyi, tiyeni tiwone chodabwisa choyamba chechichita Yesu. Ŵelengani Yohane 2:1-11, ndipo pavuli pake mukambilane makonsho aŵa:
-
Mokatijana na vataŵelenga, kansi maganizo a Yesu ni otyani pa nkhani ya kumwa walwa, ndipo oŵawona tyani ŵanthu osankha kumwa walwa?
-
Pakuti Yesu owonalini kuti kumwa walwa ni kuphoniya, kansi Nkhilisitu ofunika kumuwona tyani munthu wasankha kumwa walwa?
Olo kuti Nkhilisitu ali na ufulu wosankha kumwa walwa, koma nthawe ziyakine, ingankhalelini nzelu kuchita vamene ivi. Ŵelengani Miyambo 22:3, ndipo pavuli pake onani mfundo zokonkhapo izi zingakuyavyeni kuziŵa keno mufunikila kumwa walwa olo yayi:
-
Keno mufuna kuyendesha motoka olo kukatishila ntchito mashini ayakine.
-
Keno muli na vumo.
-
Keno dokota wakuujani kuti osati mukokumwa walwa.
-
Keno mukumwa walwa mosalilesha.
-
Keno lamulo ya chalo chanu yukuleshani kumwa walwa.
-
Keno muli na munthu wamene wasankha kuti osati amwe walwa chifukwa chakuti kuvuli uku enzekangiwa kumwa walwa molilesha.
Kansi n’chinji chingakuyavyeni kuziŵa kuti keno ni vofunikila kunkhala na walwa pa phwando ya ukwati olo pa vochitika viyakine? Kuti muziŵe vofunikila kuchita, lolelani VIDIYO.
Ŵelengani Aroma 13:13 na 1 Akorinto 10:31, 32. Ndipo pavuli poŵelenga lemba iliyonse, mukambilane konsho iyi:
-
Kansi kukatishila ntchito mfundo ya mu lemba yamene iyi ingakuyavyeni tyani kusankha vinthu vingakondweleshe Yehova?
Nkhilisitu aliyense osankha yeka kumwa walwa olo yayi. Olo Nkhilisitu wamene akumwa walwa, nthawe ziyakine angasankhe kuti osati amwe
5. Ganizilani kupaka kwa walwa wamungamwe
Keno mwasankha kumwa walwa, mukokumbukila mfundo iyi: Olo kuti Yehova oleshalini kumwa walwa, koma olesha kumwa walwa mwauchakolwa. Ndaŵa yanji vamene ivi vili teti? Ŵelengani Hoseya 4:11, 18, Ndipo pavuli pake mukambilane konsho iyi:
-
Kansi n’chinji chingachitike keno munthu angamwe walwa unyinji?
Kansi n’chinji chingatiyavye kuti osati tikokumwa walwa unyinji? Tufunikila kuziŵa malile ŵasu nopewa kumwa walwa mopitilila malile. Ŵelengani Miyambo 11:2, ndipo pavuli pake mukambilane konsho iyi:
-
Ndaŵa yanji mufunikila kuliikila malile a walwa wamufunikila kuti mukokumwa?
6. N’chinji chingayavye munthu kuleka kumwa walwa mopitilila malile?
Onani viyavya munthu muyakine kuleka kumwa walwa mopitilila malile. Lolelani VIDIYO, ndipo pavuli pake mukambilane makonsho aŵa.
-
Kansi Dmitry enzechita tyani akakolwa?
-
Kansi ekwanisha kuleka kumwa walwa kamozi na kamozi?
-
N’chinji chemuyavya kuti alekeletu kumwa walwa mwauchakolwa?
Ŵelengani 1 Akorinto 6:10, 11, ndipo pavuli pake mukambilane makonsho aŵa:
-
Kansi Baibolo yunena votyani pa nkhani ya kumwa walwa mwauchakolwa?
-
Kansi n’chinji chuwonesha kuti munthu wamene akumwa walwa mopitilila malile angakwanishe kuchinja?
Ŵelengani Mateyu 5:30, ndipo pavuli pake mukambilane konsho iyi:
-
Pamene Yesu penzenena za kutenda kwanja enzetanthauza kuti tufunika kuleka kuchita viyakine na cholinga chakuti tikondweleshe Yehova. Kansi mungachite tyani keno muvutika kuleka kumwa walwa mwauchakolwa? a
Ŵelengani 1 Akorinto 15:33, ndipo pavuli pake mukambilane konsho iyi:
-
Kansi n’chinji chingakuchitikileni keno mutandala na ŵanthu okonda kumwa ngako walwa?
ŴANTHU AYAKINE ANGAKUKONSHENI KUTI: “Kansi kumwa walwa ni kuphoniya?”
-
Kansi mungamuyankhe kuti tyani?
MFUNDO ZACHIDULE
Walwa ni mphaso yechitipasa Yehova kuti tikokondwela. Koma yove ofunalini kuti tikokumwa ngako walwa olo kukolewa.
Makonsho oweleja
-
Kansi Baibolo yunena votyani pa nkhani ya walwa?
-
Kansi kumwa ngako walwa kungalete mavuto otyani?
-
Kansi tingawoneshe tyani kuti tulemekeza vechisankha ŵanthu ayakine pa nkhani ya walwa?
PHUNZILANI VINYINJI
Kansi achilumbwana angasankhe tyani vinthu mwanzelu pa nkhani ya walwa?
Onani njila zamufunikila kukonkheja kuti musilije vuto ya kumwa walwa mosalilesha.
“Nkhalani na maganizo aweme pa nkhani ya kumwa walwa” (Nsanja ya Olonda, 1 January, 2010)
Kansi Nkhilisitu ofunika kuchita nawo mwambo woniyatanisha mabotolo olo makapu a walwa?
“Makonsho ofumila kuli oŵelenga” (Nsanja ya Olonda, 15 February, 2007)
Munkhani yakuti “Nenze chakolwa,” onani vamene viyavya munthu muyakine kuleka kumwa walwa mwauchakolwa.
“Baibolo yuchinja moyo wa ŵanthu” (Nsanja ya Olonda, 1 May, 2012)
a Ŵanthu amene edjaila kumwa ngako walwa angafunikile thandizo ya achipatala kuti akwanishe kuleka. Ndipo madokota olaŵila kuti ŵanthu ali na vuto yamene iyi ofunikilalini kumwa walwa olo patontho.
