MUTU 44
Kansi nivikondwelelo vonse vukondwelesha Mulungu?
Yehova ofuna kuti tikosangalala na moyo komasoti nthawe ziyakine ofuna kuti tikochita vikondwelelo. Koma kansi ni vikondwelelo komasoti maholide onse ŵakukondwela nawo Mulungu? Kansi tingawoneshe tyani kuti tukonda Yehova patusankha vochita pa nkhani yamene iyi?
1. Ndaŵa yanji vikondwelelo vinyinji vukondweleshalini Yehova?
Mungadabwe kuziŵa kuti vikondwelelo vinyinji vukatijanalini na vayuphunzisa Baibolo komasoti viyakine viyambishiwa na vipembezo vawenye. Komasoti vikondwelelo vunkhala vokhuzana na vamizimu payakine viyamba chifukwa cha chikhulupililo chakuti pali chiyakine chupitilija kunkhala na moyo munthu akafwa. Pali viyakinesoti vamene viyamba chifukwa chokhulupilila ufwiti olo chikhulupililo chakuti vinthu viyakine vuchitika chifukwa cha mwayi. (Yesaya 65:11) Tetyo Yehova echenjeza atumiki ŵake kuti: “Lekanani . . . nawo osakumya chinthu choifyiwa.”—2 Akorinto 6:17. a
2. Kansi Yehova akumvwa tyani akawona ŵanthu ochita vikondwelelo volemekeza ŵanthu ayakine?
Yehova otichenjeza kuti tufunika kupewa “kukhulupilila munthu aliyense wofumila kulito.” (Ŵelengani Yeremiya 17:5.) Pali maholide ayakine amene enkhazikishiwa pofuna kulemekeza otonga olo masodja. Pamene ayakine ochita vikondwelelo vokumbukila nsiku yechilondela ufulu wolilamulila olosoti vizindikilo va chalo chawo monga mbendela. (1 Yohane 5:21) Pamene ayakine ochita vikondwelelo pofuna kulemekeza magulu a ndale komasoti mabungwe oniyatila ufulu wa ŵanthu. Kansi Yehova angamvwe tyani keno tuchita vikondwelelo vulemekeza ŵanthu ayakine olo mabungwe, maka-maka olimbikisa mfundo zosiyana na zakufuna Mulungu?
3. Kansi ni minkhalidwe yotyani yuchitisha kuti vikondwelelo viyakine vinkhale vosafunika?
Baibolo yulesha vinthu monga “kumwa vinyu mopitilila malile, maphwando a chongo, [komasoti] kumwa kwa mpikishano.” (1 Petulo 4:3) Ŵanthu ayakine akochita vikondwelelo ochita vinthu mosalilesha komasoti ochita vachiwelewele. Kuti tinkhale pa ushamwali na Yehova, tufunika kupewelatu vikondwelelo vulimbikisa minkhalidwe iipa ngati ni yamene iyi.
VATI TIPHUNZILE
Tiphunzile vamungachite kuti mukokondwelesha Yehova posankha luweme vinthu pa nkhani ya maholide komasoti vikondwelelo.
4. Osati mukochita nawo vikondwelelo vasakondwela navo Yehova
Ŵelengani Aefeso 5:10, ndipo pavuli pake mukambilane makonsho aŵa:
-
Kansi tufunika kusimikijila chinji kuti tiziŵe keno ni kofunika kuchitanawo chikondwelelo chiyakine?
-
Kansi ni vikondwelelo votyani vamene ni voziŵika ngako kwamunkhala?
-
Kansi muganiza kuti Yehova osangalala na vikondwelelo vamene ivo?
Mwachisanzo, kansi mwiyamba mwaganizilapo kuti maganizo a Mulungu pa nkhani yokondwelela nsiku yovyalika ni otyani? Baibolo yutomolalini ntumiki aliyense wa Yehova wamene ekondwelelapo nsiku yovyalika. Koma yutomola ŵanthu aŵili ŵeka amene echita vamene ivi ndipo onse enzetumikilalini Mulungu. Ŵelengani Genesis 40:20-22 na Mateyu 14:6-10 ndipo pavuli pake mukambilane makonsho aŵa:
-
Kansi pa vikondwelelo viŵili ivi pechitika vinthu volingana votyani?
-
Mokatijana na vataŵelenga m’mavesi amene aŵa, kansi muwona kuti maganizo a Yehova ni otyani pa nkhani yokondwelela masiku a kuvyalika?
Payakine mungalikonshe kuti, Kansi Yehova angakalipe keno ningachite nawo vikondwelelo va masiku ovyalika olo vikondwelelo vosakatijana na mfundo za m’Baibolo? Ŵelengani Ekisodo 32:1-8. Ndipo pavuli pake, lolelani VIDIYO nokambilana makonsho aŵa.
-
Ndaŵa yanji tufunika kusimikijila poyamba kuti vatufuna kuchita ni vovomelejeka kwa Yehova?
-
Lomba tingachite tyani vamene ivi?
Mwamungaziŵile vikondwelelo vasakondwela navo Mulungu
-
Kansi chikondwelelo chamene ichi ni chokatijana na vayuphunzisa Baibolo? Kuti muziŵe, fufuzani mwechiyambila.
-
Kansi chikondwelelo chamene ichi chulemekeza ŵanthu, mabungwe komasoti vizindikilo vamene chalo chuviwona kuti ni vofunika ngako? Tufunika kulemekeza Yehova kupambana aliyense ndipo tukhulupilila kuti yove niye akuti azasilije mavuto onse pano pa chalo.
-
Kansi vakuchita ŵanthu pa chikondwelelo chamene ichi vukatijana na mfundo za m’Baibolo? Tufunika kuyeja-yeja kunkhala atuŵa pa menso pa Mulungu.
5. Mukoyavya ayakine kuti akolemekeza vamukhulupilila
Vunkhalalini vosavuta ayakine akokukakamija kuti uchite nawo vikondwelelo visakondwelesha Yehova. Koma mungachite luweme kuŵafotokozela modekha komasoti mosamala chifukwa chake mungachitelini nawo vikondwelelo vamene ivo. Kuti muwone chisanzo cha mwamungachitile vamene ivi, lolelani VIDIYO.
Ŵelengani Mateyu 7:12, ndipo pavuli pake mukambilane makonsho aŵa:
-
Mokatijana na vesi yamene iyi, kansi mufunika kuuja achibale ŵanu kuti aleke kuchita chikondwelelo chiyakine?
-
Kansi mungasimikijile tyani achibale ŵanu kuti muŵakonda, komasoti muŵaganizila olo kuti muchitalini nawo pamozi chikondwelelo chiyakine?
6. Yehova ofuna kuti tikosangalala
Yehova ofuna kuti tikosangalala na achibale ŵasu komasoti ayasu. Ŵelengani Mlaliki 8:15, ndipo pavuli pake mukambilane makonsho aŵa:
-
Kansi vesi yamene iyi yuwonesha tyani kuti Yehova ofuna kuti tikosangalala?
Ŵelengani Agalatiya 6:10, ndipo pavuli pake mukambilane konsho iyi:
-
Kansi tufunika kuchita nawo maholide oziŵika ngako ‘monga njila yochitila ayakine viweme’?
-
Pa vinthu viŵili ivi, kansi ni chinji chingachitishe kuti mukondwele ngako: Kukakamijiwa kupeleka mphaso chifukwa chachikondwelelo chiyakine olo kupeleka mofunishisha?
-
Nthawe ziyakine, a Mboni anyinji ochitila ŵana ŵawo vinthu viyakine vapadela. Ndipo nthawe ziyakine, oŵagulila mphaso zamene enzeziyembekezelalini. Keno muli na ŵana, ni vinthu votyani vamungaŵachitile?
ŴANTHU AYAKINE ONENA KUTI: “Viliye ntchito kuti holide yamene iyo iyamba tyani. Chofunika ni chakuti pa nthawe yamene iyi tufwana mwayi wokondwela pamozi na achibale ŵasu komasoti ayasu.”
-
Kansi mungamufotokozele tyani munthu woteti?
MFUNDO ZACHIDULE
Yehova ofuna kuti tikosangalala pamozi na achibale ŵasu komasoti ayasu. Koma yove ofuna kuti osati tikochitanawo vikondwelelo visamukondwelesha.
Makonsho oweleja
-
Kansi tingalikonshe makonsho otyani kuti tiziŵe keno chikondwelelo chiyakine chukondwelesha Yehova olo yayi?
-
Kansi tingaŵayavye tyani achibale ŵasu na ayasu kuti amvwishe chifukwa chake tuchitalini nawo maholide ayakine?
-
Kansi tuziŵa tyani kuti Yehova ofuna kuti tikosangalala?
PHUNZILANI VINYINJI
Onani maholide ayakine ŵasakondwela nawo Akhilisitu.
“Ndaŵa yanji a Mboni za Yehova ochitalini nawo maholide ayakine?” (Nkhani yapa webisaiti)
Onani vifukwa 4 vutichitisha kukhulupilila kuti vikondwelelo va masiku ovyalika vukondweleshalini Mulungu.
“Ndaŵa yanji a Mboni za Yehova okondwelelalini masiku ovyalika?” (Nkhani yapa webisaiti)
Onani mwechichitila vinthu mosamala mulumbwana muyakine ku sikulu pechinyozewa chifukwa chokana kukondwelela nawo khilisimasi.
Akhilisitu anyinji esankha kuti osati akokondwelela nawo khilisimasi. Kansi akumvwa tyani akaganizila vechisankha vamene ivi?
“Osangalala olo kuti ochitalini khilisimasi” (Nsanja ya Olonda, 1 December, 2012)
a Onani Mawu akumapeto 5 kuti muziŵe vamungachite ŵanthu ayakine pakukondwelela holide iyakine.
