MUTU 56
Pitilijani kuchita vinthu mogwilizana mu mpingo
Tikankhala pamozi na Akhilisitu ayasu tikumvwa monga ni mwenzemvwila Mfumu Davide yamene inena kuti: “Ni viweme komasoti vokondwelesha ngako abale akankhala pamozi mokatijana.” (Salimo 133:1) Komalomba kukatijana kuchitikalini kweka. Tonse tufunika kuchita khama kuti tipitilije kukatijana na abale ŵasu.
1. Kansi ŵanthu a Yehova ochita vinthu votyani vukuchitishani chidwi?
Mukaluta ku chalo chiyakine nopezeka pa misonkhano, abale na alongo okulondelani na manja aŵili, okuwoneshani chikondi komasoti munkhala omasuka olo kuti mukumvwalini chilaŵilo chawo. Ndaŵa yanji? Vikuŵa tetyo chifukwa chakuti vinthu vatukatishila ntchito pophunzila Baibolo ni volingana kulikonse. Kuyangijila pamene apa, tuyeja-yeja kuwoneshana chikondi. Viliyekanthu kuti tunkhala kuni, tonse “tuita pa zina ya Yehova nomutumikila mokatijana.”—Zefaniya 3:9, mawu a mnyansi.
2. Kansi mungayavye tyani kuti mu mpingo mukonkhala mgwilizano?
Baibolo yunena kuti: “Kondanani ngako kufumila muntima.” (1 Petulo 1:22) Kansi mwewo mungakatishile tyani ntchito malangizo amene aŵa? Mmalo mwakungowona vinthu vakuifya ŵanthu ayakine, mukoganizila ngako minkhalidwe yawo iweme osati mwakungotandala tyala na ŵanthu amene okonda vinthu vamukonda mwewo, mmalomwake mukoyeja-yeja kuziŵana na abale na alongo osiyana-siyana. Keno tili na kantima kasankho, tufunika kuyeja-yeja kukasilijilatu.—Ŵelengani 1 Petulo 2:17. a
3. Kansi mufunika kuchita chinji keno mwaphoniyana maganizo na Nkhilisitu muyanu?
Olo kuti nise ŵanthu okatijana koma niselini angwilo. Nthawe ziyakine tuphoniyana maganizo nokhumudwisana chifukwa nise ochimwa. Tetyo Mawu a Mulungu otiuja kuti “pitilijani . . . kukhululukilana na ntima wonse . . . monga Yehova mwechikukhululukilani na ntima wonse namwe muchitesoti chimozi-mozi.” (Ŵelengani Akolose 3:13.) Sewo taŵanthu tukhumudwisa Yehova nthawe zinyinji koma yove otikhululukila. Tetyo yove ofuna kuti nase tikokhululukila abale na alongo ŵasu. Mukaziŵa kuti mwakhumudwisa muyanu, mwewo mukoyeja-yeja kufwana njila kuti mukambilane na muyanu wamene uyo nacholinga chakuti musilije kusamvwana.—Ŵelengani Mateyu 5:23, 24. b
VATI TIPHUNZILE
Ganizilani vamungachite poyavya kuti mu mpingo mupitilije kunkhala mgwilizano na ntendele.
Kansi mungachite tyani kuti munkhazikishe ntendele?
4. Yeja-yejani kusilija ntima wasankho
Tonse tufuna kukonda abale na alongo ŵasu onse. Komalomba tingavutike kukatijana na munthu wamene owoneka kuti ni wosiyana na sewo. Lomba ni chinji chingatiyavye? Ŵelengani Machitidwe 10:34, 35, ndipo pavuli pake mukambilane makonsho aŵa:
-
Yehova olondela ŵanthu amitundu yonse kuti ankhale Mboni zake. Lomba mungatolele tyani chisanzo cha Yehova pa nkhani ya mwamuwonela ŵanthu osiyana na mwewo?
-
Kansi mwewo mufuna kupewa vinthu votyani vamene ŵanthu anyinji mudela yanu vakuchita powonesha sankho?
Ŵelengani 2 Akorinto 6:11-13, ndipo pavuli pake mukambilane konsho iyi:
-
Kansi muganiza kuti mufunika kuchita chinji kuti mukokonda abale na alongo amene musiyana nawo vinthu viyakine?
5. Mukokhululuka na ntima wonse komasoti mukoyeja-yeja kunkhazikisha ntendele
Yehova otikhululukila na ntima wonse olo kuti yove otilakwilalini. Ŵelengani Salimo 86:5, ndipo pavuli pake mukambilane makonsho aŵa:
-
Kansi vesi yamene iyi yutiphunzisa chinji vokhuza Yehova pa nkhani yokhululuka?
-
Kansi mutembeja Yehova chifukwa chakuti otikhululukila? Ndaŵa yanji mwayankha tetyo?
-
Kansi ni vinthu votyani vingatikangishe kunkhala pa ntendele na ayasu?
Kansi tingakonkheje tyani Yehova pa nkhani yokhululuka nochita vinthu mokatijana na abale na alongo ŵasu? Ŵelengani Miyambo 19:11, ndipo pavuli pake mukambilane konsho iyi:
-
Munthu muyakine akakukhumudwisani olo kukuyambani, kansi mufunika kuchita chinji kuti munkhale naye mphela pa ntendele?
Nthawe ziyakine nase tukhumudwisa ayakine. Lomba vamene ivi vikachitika tikochita tyani? Lolelani VIDIYO, ndipo pavuli pake mukambilane konsho iyi.
-
Kansi mulongo wa muvidiyo yamene iyi echita chinji kuti ankhazikishe ntendele?
6. Mukowona vinthu viweme muli abale na alongo ŵanu
Tikayamba kuziŵana nawo luweme abale na alongo ŵasu, niye patuyamba kuwona minkhalidwe yawo iweme komasoti vinthu vakuphoniyesha. Kansi tingachite chinji kuti tikoganizila ngako minkhalidwe yawo iweme? Lolelani VIDIYO, ndipo pavuli pake mukambilane konsho iyi.
-
Kansi ni chinji chingakuyavyeni kuti mukowona viweme muli abale na alongo ŵanu?
Yehova owona ngako minkhalidwe yasu iweme. Ŵelengani 2 Mbiri 16:9a, ndipo pavuli pake mukambilane konsho iyi:
-
Kansi mukumvwa tyani poziŵa kuti Yehova owona ngako minkhalidwe iweme yamuli nayo?
Olo diamondi muweme ngako onkhala na vuto, koma olo n’tetyo onkhala mphela wa ntengo wapatali. N’chimozi-mozi na abale na alongo ŵasu onse aliye ungwilo ni ochimwa, koma ni antengo wapatali kwa Yehova
ŴANTHU AYAKINE ONENA KUTI: “Nimukhululukile peka-peka akanipepesa poyamba.”
-
Ndaŵa yanji tufunika kukhululukila ayakine na ntima wonse?
MFUNDO ZACHIDULE
Mungayavye kuti mpingo upitilije mphela kuchita vinthu mokatijana, keno mukhululuka komasoti muyeja-yeja kukonda abale na alongo ŵanu onse.
Makonsho oweleja
-
Kansi mungasilije tyani ntima wasankho?
-
Mukaphoniyana maganizo na Nkhilisitu muyanu, kansi mufunika kuchita chinji?
-
Ndaŵa yanji mufuna kukonkheja chisanzo cha Yehova pa nkhani yokhululukila ayakine?
PHUNZILANI VINYINJI
Onani mwaingatiyavyile fanizo ya Yesu kuti tikopewa kuweluza ŵanthu ayakine.
Kansi tufunika kupepesa olo tuwona kuti tiliye phoniyeshe chilichonse?
“Kupepesa—ni njila imozi yoyavya kufwana ntendele” (Nsanja ya Olonda, 1 November, 2002)
Onani chinthu chiyavya ŵanthu aŵa aŵili kuti ayambe kukondana ngako olo kuti ekulila m’chalo chamene ŵanthu anyinji enzekatijanalini chifukwa chosankhana mitundu.
Johny na Gideon: poyamba enze pachidani, koma lomba ni okatijana (6:42)
Onani mwamungasilijile kusamvwana keno mwaphoniyana maganizo na munthu muyakine kuti osati musokoneze ntendele mu mpingo.
“Mwamungasilijile nkhani mwachikondi mukaphoniyana maganizo” (Nsanja ya Olonda, May 2016)
a Mawu a kumapeto 6 ofotokoza mwamene chikondi mwachuyavyila Akhilisitu kupewa kufalisa matenda opasilana.
b Mawu a kumapeto 7 ofotokoza vamungachite kuti musilije kusakatijana pa nkhani zokhuza bizinesi komasoti malamulo.
