MUTU 58
Pitilijani kunkhala okhulupilika kwa Yehova
Akhilisitu achendi ololalini kuti munthu olo chinthu chilichonse chiŵakangishe kulambila Yehova. Tukaikilalini kuti mwewo namwe muwona tetyo. Yehova okondwela ngako akawona kuti mupitilija kunkhala okhulupilika kuli yove. (Ŵelengani 1 Mbiri 28:9.) Kansi ni vinthu votyani vingakukangisheni kunkhala okhulupilika kwa Yehova? Lomba n’chinji chingakuyavyeni kuti osati muleke kunkhala okhulupilika kwa Yehova?
1. Kansi ŵanthu ayakine angatichitishe tyani kuti tileke kunkhala okhulupilika kwa Yehova?
Ŵanthu ayakine ofuna kuti tileke kutumikila Yehova. Kansi ŵanthu amene aŵa ni ŵani? Ŵanthu ayakine amene eleka kutumikila Yehova olaŵila wenye wokhuza gulu ya Mulungu na cholinga chakuti sewo nase tileke kutumikila Yehova. Ŵanthu amene aŵa otomolewa kuti ampatuko. Komasoti asogoleli avipembezo viyakine olaŵila wenye na cholinga chofuna kusokoneza ŵanthu amene akungotolela vilivonse kuti aleke kutumikila Yehova. Tufunikila kupewa kushushana na ŵanthu ampatuko, kuŵelenga mabuku ŵawo olo vakulemba pa intaneti, kusegula ma webisaiti ŵawo komasoti kulolela mavidiyo ŵawo. Polaŵila za ŵanthu amene ochitisha ayakine kuleka kutumikila Yehova mokhulupilika, Yesu elaŵila kuti: “Alekeni amene awo. Ove ni asogoleli a ng’ala. Tetyo keno munthu wa ng’ala osogolela wa ng’ala muyake, onse aŵili angaponele mu chisengu.”—Mateyu 15:14.
Lomba mungachite tyani keno munthu muyakine wamuziŵa wanena kuti ofunalini kunkhalasoti wa Mboni za Yehova? Vunkhala voŵaŵa ngako keno munthu watukonda wasalula kuchita vamene ivi. Nthawe ziyakinesoti angatikakamije kuti tisalule kunkhala kumbali yake olo kwa Yehova. Keno n’tetyo, tufunikila kusimikija ntima kuti tinkhale mphela okhulupilika kwa Yehova kupambana aliyense. (Mateyu 10:37) Tetyo tufunikila kumvwila lamulo ya Yehova yakuti osakatijana nawo ŵanthu oteti.—Ŵelengani 1 Akorinto 5:11.
2. Kansi vatusankha pa moyo wasu vingatichitishe tyani kuti tileke kunkhala okhulupilika kwa Yehova?
Keno tukonda Yehova, tingapewe kuchita chilichonse chukatijana na chipembezo chawenye. Tingapewe kunkhala olo kukata ntchito mu gulu iyakine ya chipembezo olo kuchita chilichonse chukatijana na chipembezo chawenye. Yehova otichenjeja kuti: “Fumani [mu Babulo nkulu] ŵanthu ŵangu.”—Chivumbulutso 18:2, 4.
VATI TIPHUNZILE
Tiphunzile vamungachite kuti aliyense osati akukangisheni kunkhala okhulupilika kwa Yehova. Tiwonesoti mwamungawoneshele kuti nimwe okhulupilika kwa Yehova pofuma mu Babulo nkulu.
3. Chenjelani na aphunzisi awenye
Kansi tufunikila kuchita tyani tikamvwa ŵanthu ayakine olaŵila vinthu viipa vokhuza gulu ya Yehova? Ŵelengani Miyambo 14:15, ndipo pavuli pake mukambilane konsho iyi:
-
Ndaŵa yanji tufunikila kunkhala ochenjela kuti osati tikokhulupilila vilivonse vatamvwa?
Ŵelengani 2 Yohane 10, ndipo pavuli pake mukambilane makonsho aŵa:
-
Mokatijana na lemba yamene iyi, kansi tufunika kuchita tyani na ŵanthu ampatuko?
-
Olo kuti tingatandalelini pa menso na menso na ŵanthu ampatuko, kansi tingasokonezewe tyani na vakuphunzisa?
-
Kansi muganiza kuti Yehova angamvwe tyani akatiwona kuti tumvwishila vinthu vawenye vokhuza yove komasoti gulu yake?
4. Mukopitilija kunkhala okhulupilika keno munthu muyakine wachita chimo
Kansi tufunikila kuchita chinji tikamvwa kuti munthu muyakine mumpingo wachita chimo ikulu? Onani mfundo yamene yupezeka mu lamulo yechipeleka Mulungu kuli Aisiraeli. Ŵelengani Levitiko 5:1.
Mokatijana na vesi yamene iyi, tikaziŵa kuti munthu muyakine wachita chimo ikulu, tufunikila kuuja akulu vatuziŵa pa nkhani yamene iyo. Komalomba tikaliyechita vamene ivi, tufunikila kuuja munthu wamene wachita chimo kuti akaulule yeka kwa akulu za chimo yake yamene iyo. Lomba keno okana kuchita vamene ivi, sewo tufunikila kuwonesha kuti nise okhulupilika kwa Yehova mwa kuluta kuyalaŵila kwa akulu. Kansi tikachita vamene ivi tuwonesha tyani kuti tili na chikondi chokhulupilika kwa . . .
-
Yehova Mulungu?
-
munthu wamene uyo wachita chimo?
-
ŵanthu onse mumpingo?
Keno Mkhilisitu muyanu wachita viipa, mufunikila kumuyavya
5. Fumani mu Babulo nkulu
Ŵelengani Luka 4:8 na Chivumbulutso 18:4, 5, ndipo pavuli pake mukambilane makonsho aŵa:
-
Kansi niliye fyimvyishe zina yangu ku chipembezo chawenye?
-
Kansi nili mugulu yamene yuchita vinthu mokatijana na chipembezo chiyakine?
-
Kansi ntchito yanukata yuyavyako pa vochita va chipembezo chawenye?
-
Kansi pali viyakinesoti vaningachite kuti nilekeletu kuchita vinthu mokatijana na chipembezo chawenye?
-
Keno pali konsho iyakine yanayankha kuti eye, kansi nufunikila kuchinja vinthu votyani?
Pa vinthu vonse vatakambilana ivi, mukowoneshesha kuti vamungasankhe vikokuyavyani kunkhala na chikumbuntima chituŵa komasoti vikowonesha kuti nimwe okhulupilika kwa Yehova.
Kansi mungachite tyani keno mwasengewa kuti mupeleke ndalama zoyavya pa ntchito iyakine ya gulu ya chipembezo?
ŴANTHU AYAKINE ONENA KUTI: “Nufunikila kuziŵa vakulaŵila ampatuko vokhuza Mboni za Yehova kuti niteteze choonadi.”
-
Kansi muwona kuti ni nzelu kuchita vamene ivi? Ndaŵa yanji mwayankha tetyo?
MFUNDO ZACHIDULE
Kuti tipitilije kunkhala okhulupilika kwa Yehova tufunikila kupewa kukatijana na ŵanthu amene ni osakhulupilika kuli yove. Tufunikilasoti kupewa kuchita chilichonse chukatijana na chipembezo chawenye.
Makonsho oweleja
-
Ndaŵa yanji tufunikilalini kulolela, kuŵelenga komasoti kumvwishila vakuphunzisa ampatuko?
-
Kansi tufunika kuchita tyani vinthu na ŵanthu amene asalula kuti osati ankhalesoti a Mboni za Yehova?
-
Kansi tingawoneshe tyani kuti tumvwila chenjezo yakuti tifume mu chipembezo chawenye?
PHUNZILANI VINYINJI
Phunzilani vamufunikila kuchita keno ŵanthu ayakine olaŵila vinthu vawenye vokhuza Mboni za Yehova.
“Kansi muziŵa nkhani yonse?” (Nsanja ya Olonda, August 2018)
Kansi mungaziŵe tyani kuti magulu olo vinthu viyakine vukatijana na Babulo nkulu?
Kansi ni vinthu votyani vachita ŵanthu oshusha pofuna kufokesha chikhulupililo chasu?
Mu nkhani yakuti, “Kufumila penenze mwana nenzefunishisha kuziŵa Mulungu,” ŵelengani nkhani ya wansembe wa chipembezo cha Shinto wamene efuma mu chipembezo chawenye.
“Baibolo yuchinja moyo wa ŵanthu” (Nsanja ya Olonda, 1 July, 2011)
