Nyamalenga wasu niwanzelu ngako kuposha sewo. Poziŵa kuti yove ni Atata wasu otikonda, osamala za sewo. Komasoti enzefunalini kuti tikozitangulila seka mosachetekela yove. (Yeremiya 10:23) Tetyo, molingana na mwana ntontho owamila kutanguliliwa na makolo ŵake, tonse tuwamila kutanguliliwa na Mulungu. (Yesaya 48:17, 18) Mfundo za m’Baibolo nizopindulisha, soti nizamahala zofumila kwa Mulungu.—Ŵelengani 2 Timoteyo 3:16.

Malamulo a Yehova yotiphunzisa mwatingaŵele na umi uweme ngako masiku ŵano. Yutiphunzisa soti mwatingazofwanila madaliso osasila. Poziŵa kuti Mulungu niye etipanga, tuwamila kumvwela malamulo ŵake nakumutembeja ngako.—Ŵelengani Salimo 19:7, 11; Chivumbulutso 4:11.

Mfundo za m’Baibolo ni mfundo za chendi zamene zuchinja lini, komasoti zukata ntchito pa vochitika vosiyana-siyana. Nthawe ziyakine malamulo angachinje koma mfundo zuchinja lini. (Deuteronomo 22:8) Tuŵamila kuseŵenzesha nzelu zasu kuti tiziŵe mwatingachitile zamene izi. (Miyambo 2:10-12) Mwachisanzo, m’Baibolo tuphunzilamo kuti umi nichamahala chofuma kwa Mulungu. Mfundo iyi, ingatiyavye kuti tichinjilije umi wasu pochita vinthu ku ntchito, pa ng’anda, na paulwendo.—Ŵelengani Machitidwe 17:28.

Yesu elaŵila za malamulo yaŵili yofunika ngako. Yoyamba  yunena kuti tuwamila kuziŵa Mulungu, kumutemwa, nomutumikila mochetekeleka, chikomo chakuti yove etipa umi. Kukumbukila lamulo yamene iyi, kungatiyavye pa vonse vatusalula kuti tichite. (Miyambo 3:6) Ŵala ochita vinthu vukatijana na lamulo yamene iyi onkhala pa ushamwali na Mulungu. Kuyangijila pameneapo, akafwane umi wosasila.—Ŵelengani Mateyu 22:36-38.

Lamulo yachiŵili ingatiyavye kuti tonkhala pamtendele na ŵanthu ayakine. (1 Akorinto 13:4-7) Munthu angawoneshe kuti okatishila ntchito lamulo yamene iyi pokonkheja Mulungu mwakuchitila vinthu na ŵanthu.—Ŵelengani Mateyu 7:12; 22:39, 40.

Mfundo za m’Baibolo zuphunzisa mabanja kunkhala otemwa komasoti kuti awokatijana. (Akolose 3:12-14) Malizu ya Mulungu yochinjilija mabanja, chikomo chakuti yolaŵila kuti ŵanthu akalungulana osati awolekana yayi.—Ŵelengani Genesis 2:24.

Kukonkha malamulo ya m’Boibolo kungatiyavye pa vinthu vakumuŵili na vauzimu. Mwachisanzo, ŵanthu akafuna kulemba ntchito munthu, ofuna ŵala ochita vinthu mwachilungamo pokonkha malamulo ya m’Baibolo, komasoti olimbikila pa ntchito. (Miyambo 10:4, 26; Aheberi 13:18) Malizu ya Mulungu yotiphunzisa soti kuti tikonkhala okhutila na vinthu vofunika ngako pa umi. Yutiphunzisa soti kuwona ushamwali wasu na Mulungu kuŵa wofunika ngako kuposha vinthu vakumuŵili.—Ŵelengani Mateyu 6:24, 25, 33; 1 Timoteyo 6:8-10.

Kukonkha mfundo zupezeka m’Malizu ya Mulungu kungatiyavye kunkhala na umi uweme. (Miyambo 14:30; 22:24, 25) Mwachisanzo, malamulo a Mulungu olesha uchakolwa angatichinjilije ku matenda yopaya, na ku ngozi. (Miyambo 23:20) Yehova otilesha lini kumwa walwa. Yove ofuna kuti tawokuŵa na malile. (Salimo 104:15; 1 Akorinto 6:10) Malamulo a Mulungu otiyavya kupeyuka vichito viipa. (Salimo 119:97-100) Olo kuti ni tetyo, Akhilisitu achendi okonkhejalini malamulo pofuna kuti vinthu viŵayendele luweme tyala yayi, ove ochita vamene ivi, chikomo chakuti olemekeza Yehova.—Ŵelengani Mateyu 5:14-16.