MUTU 8
Kansi Mulungu walolelanji viipa na matamano?
1. Kansi matamano eyamba tyani?
Mulungu walola kuti ŵanthu alilamulile kwa nthawe yokwanila pofuna kuwonesha kuti paŵeka angakwanishelini kusilija matamano
Matamano eyamba pano pachalo, Satana pechitala wenye woyambilila. Poyamba Satana enze mngelo muweme. Olo nitetyo, yove ‘aliye nkhazikike mu chendi.’ (Yohane 8:44) Eyamba kukumbwila kuti ŵanthu awolambila yove m’malo mwa Mulungu. Yove eyamba kumunyengelela wala mwanakazi nomutalija wenye kuti amvwile yove m’malo momvwila Mulungu. Adamu naye ekatijana na Hava nkazi wake pa kusamvwila Mulungu. Vechisalula kuchita Adamu veleta matamano na imfwa.—Ŵelengani Genesis 3:1-6, 19.
Satana pechiwuja Hava kuti osati amvwile Mulungu, echitisha kuti ŵanthu anyinji apandukile utongi wa Mulungu. Ŵanthu anyinji akatijana na Satana pa kumukana Mulungu kuti aŵe ntongi wawo. Umu ni mwiwiwelela ‘utongi wa Satana.’—Ŵelengani Yohane 14:30; 1 Yohane 5:19.
2. Kansi vechilenga Mulungu venze na chilema?
Ntchito zonse za Mulungu ni zangwilo. Angelo pamozi na ŵanthu enze ŵangwilo pechilengewa na Mulungu. Tetyo onse sembe ekwanisha kumumvwila Mulungu mosaphoniyeshako chilichonse. (Deuteronomo 32:4, 5) Mulungu etipasa ufulu wosalula vochita, viweme olo viipa. Ufulu wamene uyu utipasa shuko yowonesha kuti tumutemwa Mulungu.—Ŵelengani Yakobo 1:13-15; 1 Yohane 5:3.
3. Kansi Mulungu walolelanji viipa mpaka pano?
Kwa nthawe yoikika, Yehova walola kuti ŵanthu apandukile utongi wake. Pachikomo chanji? Kuti awoneshe kuti utongi wa ŵanthu ungapindulishe lini aliyense ngati ochetekela lini Mulungu. (Mlaliki 7:29; 8:9) Vaachita ŵanthu pa vyaka 6.000 vapita, vawoneshelatu kuti ichi ni chendi. Ŵanthu akangiwa kufumyapo nkhondo, vichito vosamvwila malamulo, kusoŵa chilungamo na matenda.—Ŵelengani Yeremiya 10:23; Aroma 9:17.
Kusiyana na utongi wa ŵanthu, utongi wa Mulungu upindulisha ŵala omuvwila. (Yesaya 48:17, 18) Lombapano Yehova azafumyepo maboma yonse ya ŵanthu. Koma osalula utongi wa Mulungu, niye ati akankhale pano pachalo.—Yesaya 11:9.—Ŵelengani Danieli 2:44.
4. Kansi kudekha kwa Mulungu kwatipasa shuko yotyani?
Kudekha kwa Mulungu kwatipasa shuko yakuti tiwoneshe keno tusalula utongi wa Mulungu kapena wa ŵanthu. Satana elaŵila kuti sewo taŵanthu tu tumikila Mulungu pa chikomo cha dyela tyala. Mwa mufuna kuwonesha kuti uyu niwenye? Vatuchita vingawoneshe mbali yatasalula.—Ŵelengani Yobu 1:8-12; Miyambo 27:11.
5. Kansi tingasalule tyani Mulungu kuŵa ntongi wasu?
Vochita vasu niye vuonesha keno tasalula Mulungu kuŵa ntongi wasu
Tingasalule Mulungu kuŵa ntongi wasu mwa kusakila chendi m’malizuŵke Baibolo, na kuchita vinthu vokatijana na kulambila kwa chendi. (Yohane 4:23) Koma Satana tingamukane kuŵa ntongi wasu potolela chisanzo cha Yesu, osatolamo nawo mbali mu ndale, na m’nkhondo.—Ŵelengani Yohane 17:14.
Satana pokatishila ntchito mphamvu zake, otumfya ŵanthu kuti awochita vinthu viipa. (1 Petulo 4:3, 4) Tetyo sewo tuwamila kusalula vinthu viweme. Mwa tipitilije kukatijana na ŵanthu otemwa Mulungu? Mwa timvwile malamulo ŵake anzelu na achinthemwa? Tikachita vamene ivi tioneshe kuti Satana etala wenye pechilaŵila kuti kuliye munthu angamvwile Mulungu akaŵa pa matamano.—Ŵelengani 1 Akorinto 6:9, 10; 15:33.
Chikondi cha Mulungu pa ŵanthu chutisimikijila kuti matamano na viipa vikasile. Ŵala ochetekela vamene ivi akaŵe na umi wotemwa, wosasila pano pachalo.—Ŵelengani Yohane 3:16.
