MUTU 5
Ndaŵa yanji Mulungu epanga chino chalo?
1. Kansi Mulungu epangilanji ichi chalo?
Yehova epanga chalo kuti ŵanthu ankhalemo. Tetyo banja yoyanba, Adamu na Hava aliye ŵapange kuti akankhale kululu. Mulungu epanga mwanalume woyamba Adamu na nkazi wake Hava kuti ankhale m’munda uweme wa Edeni. Yehova enzefuna kuti Adamu na Hava, pamozi na ŵana ŵawo ankhale pa chalo kosasila. (Genesis 2:15-17) Tetyo chalo niye malo ŵasu onkhala. Onkhala kululu ni Mulungu, pamozi na angelo.—Yobu 38:4, 7.; Ŵelengani Salimo 37:29; 115:16.
Poyambilila Paladaiso wenze tyala m’munda wa Edeni. Adamu na Hava enzefunika kuvyala ŵana, kuti apake na kuzuja chalo chonse. Ŵanthu enzefunika kusamalila chalo mpaka chonse kuŵa paladaiso. (Genesis 1:28) Chalo chizachenekewe lini. Chove nthawe zonse chiŵe malo yasu yonkhala.—Ŵelengani Salimo 104:5.
2. Ndaŵa yanji chalo ni paladaiso lini palipano?
Ni chifukwa chakuti Adamu na Hava aliye mumvwile Mulungu, tetyo Yehova m’pechiŵafumiyamo m’munda wa Edeni, apa m’pechiluza Paladaiso. Paliye munthu angakwanishe kuwuwejelapo soti. Baibolo yulaŵila kuti: ‘Chalo chitwaliwa m’manja mwa muipa.’—Yobu 9:24; Ŵelengani Genesis 3:23, 24.
Niye kuti Yehova echinja malingalilo ŵake wopasa ŵanthu chalo cha paladaiso? Yayi. Yove ni wamphamvu yonse, komasoti azachite vonse vechilaŵila. (Yesaya 45:18) Ŵanthu azankhale na umi wosasila pa chalo m’paladaiso, mwenzefunila munecho pachiyambi.—Ŵelengani Salimo 37:11, 34.
3. Kansi chizachitike n’chinji kuti chalo chizaŵe soti paladaiso?
Yesu monga mfumu azatonge chalo. Yove azamumange Satana kwa vyaka 1.000. Baibolo yulaŵila kuti pa nkhondo yuitiwa Alumagedo, Yesu na angelo ŵake azacheneke ŵanthu wosavwila Mulungu. Koma wovwila Mulungu azachenekewe lini, Yesu azaŵasamalile. Wove azankhale na umi wosasila m’paladaiso pano pachalo.—Ŵelengani Chivumbulutso 20:1-3; 21:3, 4.
4. Kansi matamano yazasile nthawe yanji?
Kansi Mulungu azasilije nthawe yanji matamano na kuipa konse? Yesu elaŵila ‘chizindikilo’ kwa ŵanthu choŵayavya kuziŵa kuti mapeto ya chino chalo yali pafupi. Chalo ichi chili pa ngozi vonse vuchitika vuwonesha kuti tunkhala ‘m’masiku yosilija.’—Ŵelengani Mateyu 24:3, 7-14, 21, 22.
Ali kululu, Yesu azatonge chalo monga mfumu kwa vyaka 1.000 na kusilija matamano yonse. (Yesaya 9:6, 7; 11:9) Kuyangijila soti pamene apo, Yesu azafyifyiletu uchimo wonse wa ŵanthu okonda Mulungu. Yehova akakatishile ntchito Yesu posilija matenda, kukulukaja, na imfwa.—Ŵelengani Yesaya 25:8; 33:24.
5. Niŵani akuti akankhale m’paladaiso?
Ku Ng’anda ya Ufumu mukaziŵe ŵanthu okonda Mulungu na kuphunzila mwa mungamutemweshele yove
Ŵanthu ovwila Mulungu niye ati azankhale mu Paladaiso. (1 Yohane 2:17) Yesu etumija ophunzila ŵake kuti akasakile, na kuphunzisa ŵanthu wodekha kuti Mulungu aoŵatemwa. Masauzande anyinji ya ŵanthu, ophunzila zakufunikila kuchita kuti akaŵe na umi m’paladaiso ikuza pa chalo. (Zefaniya 2:3) Ku Ng’anda ya Ufumu ya Mboni za Yehova, ŵanthu olambila Mulungu, ophunzila vangachite kuti ankhale analume na azitata aweme, olo anakazi na azimama aweme. Ŵana na makolo olambila Mulungu pamozi, komasoti ophunzila vangachite kuti afwane madaliso chifukwa cha uthenga uweme.—Ŵelengani Mika 4:1-4.
