Yesu pechifwika ku Betaniya kufupi na Yelusalemu, penze pepita masiku 4 Lazaro aliufwe. Yesu pamo na Marita na Mariya, azilongosi a Lazaro wala enze echifwa, eluta ku manda. Pakaliye pita nthawe ikulu, ŵanthu ewunjikana kumanda. Lingililani chinthemwa chenzenacho Marita na Mariya pechiwona kuti Yesu wausha Lazaro!—Ŵelengani Yohane 11:21-24, 38-44.

Marita enzeziŵa kale za uthenga uweme ulaŵila za akufwa. Eziŵa kuti Yehova akaushe ŵanthu echifwa kuti akankhale soti na umi pa chalo.—Ŵelengani Yobu 14:14, 15.

Tikafwa paliye chupitilija kunkhala na umi. Tomfwe oleka kuseŵenza, malingililo ŵasu osililatu. Tiliyelengewe na muŵili uli na mzimu usafwa, sewo tepangiwa kufumila ku lito. (Genesis 2:7; 3:19) Pa chikomo chamene ichi, Lazaro aliyelaŵilepo kuti kumanda kwenze enzechitanji.—Ŵelengani Salimo 146:4; Mlaliki 9:5, 6, 10.

Kansi Mulungu onzunza ŵanthu ku mulilo? Baibolo yulaŵila kuti akufwa oziŵalini kalikonse. Tetyo kuphunzisa kuti Mulungu oshoka ŵanthu pa mulilo nikumutalijila wenye. Yove onyansiwa na chiphunziso chamene ichi.—Ŵelengani Yeremiya 7:31.

Akufwa angalaŵile lini nase olo kutimvwa. (Salimo 115:17) Koma kuli angelo aiipa, angalaŵile na ŵanthu kuyejelela n’nga ni ŵala echifwa. (2 Petulo 2:4) Yehova olesha kulaŵila na akufwa.—Ŵelengani Deuteronomo 18:10, 11.

Ŵanthu mamiliyoni anyinji ali kumanda azaŵe soti na umi pano pachalo. Ŵala enzochita viipa, echifwa akaliyoziŵa Mulungu, akaushiwe nawo.—Ŵelengani Luka 23:43; Machitidwe 24:15.

Ŵanthu ati akaushiwe akaphunzile chendi cha Mulungu, komasoti akachetekele Yesu nomumvwila. (Chivumbulutso 20:11-13) Ŵala ati akachite viweme pavuli pakuti aushiwa, azaŵe na umi wosasila mpaka kale-kale pano pa chalo.—Ŵelengani Yohane 5:28, 29.

Kuushiwa kwa ŵanthu echifwa kutiuja za chikondi, ubwino wake na chinthemwa chake. Yehova etipa chilindililo chakuti akufwa azauke pechitumija Mwana wake kuzotifwela. Niŵani ngako-ngako wamufuna kuzawonana naye akufwa akazaukishiwa?—Ŵelengani Yohane 3:16; Aroma 6:23.