MUTU 7
Kansi Ufumu wa Mulungu nichinji?
1. Kansi Ufumu wa Mulungu ni chinji?
Chuchitisha Yesu kuŵa mfumu iweme ni chinji?—MALIKO 1:40-42.
Ufumu wa Mulungu ni boma ya kululu. Uzeloŵe m’malo mwa maufumu wonse, nakuzakwanilisha cholinga cha Mulungu pa chalo. Nzotemwesha kuziŵa kuti Mulungu azecheneke mautongi wonse pokatishila ntchito Ufumu wake. Sewo tufunishisha kunkhala na Ufumu wamene uyu. Wamene uyu ni uthenga uweme wofumila kuli Mulungu.—Ŵelengani Danieli 2:44; Mateyu 6:9, 10; 24:14.
Boma iliyonse yukuŵa na mfumu yake. Naye Yehova eika Yesu Khilisitu Mwana wake kuŵa Mfumu ya boma yake.—Ŵelengani Chivumbulutso 11:15.
2. Ndaŵa yanji Yesu ni Mfumu iweme?
Yesu ni Mfumu iweme chikomo chakuti yove ni muweme ntima, komasoti ni wachilungamo. (Yohane 1:14) Kuyangijila pameneapo, yove akaŵe na mphamvu zoyavya ŵanthu chikomo chakuti azotonga ali kululu. Yesu pechiushiwa eluta kululu, nakuyalindilila ku kwanja ya lendi ya Atata ŵake, kuti amupase mphamvu zotonga. (Aheberi 10:12, 13) Pakalipano yove otonga kululu, emupasa soti mphamvu zotonga pano pachalo, koma akaliyeyamba.—Ŵelengani Danieli 7:13, 14.
3. Kansi niŵani ati azatonge pamo na Yesu?
Kagulu koitiwa kuti ‘atuŵa’ niye kati kazatonge pamo na Yesu. (Danieli 7:27) Pakali pano Mulungu osalula kagulu ka ŵanthu kamene aka kuti kazatonge pamozi na Yesu kululu. Atuŵa Eyamba kusaluliwa , enze atumwi a Yesu ochetekeleka. Mpaka lomba, Yehova akalisalula analume na anakazi ochetekeleka kuti ankhale atuŵa. Monga mwechiushiliwa Yesu, amene aŵa soti oushiwa na miŵili yauzimu.—Ŵelengani Yohane 14:1-3; 1 Akorinto 15:42-44.
Mwa ni angani akuya kululu? Yesu eŵatomola kuti ‘kagulu ka mbelele.’ (Luka 12:32) Posilijila pake onse ekwana 144.000. Amene aŵa pamo na Yesu azatonge chalo chonse.—Ŵelengani Chivumbulutso 14:1.
4. Kansi Yesu pechiyamba kutonga echitanji?
Chinthu choyamba, Yesu epitikisha Satana na viŵanda vake kululu kuŵaponya pano pachalo. Satana ekalipa ngako. Ivi vechitika mu 1914 pewiyamba kutonga Ufumu wa Mulungu kululu. * Tetyo, yove eyamba kuchitisha kuti vinthu viipa vipake pano pachalo. (Chivumbulutso 12:7-10, 12) Kufumila nthawe yamene iyo, matamano akuya opakila-pakila, monga: Nkhondo, njala, matenda na kutamana, vonse ivi ‘vuwoneshelatu’ kuti lombapano Ufumu wa Mulungu uyambe kuyendesha vinthu vonse pano pachalo.—Ŵelengani Luka 21:7, 10, 11, 31.
5. Kansi ufumu wa Mulungu uchitanji pakalipano?
Kupitila mu ntchito yolalikila pachalo chonse, Ufumu wa Mulungu wiyamba kale kuwunganisha ŵanthu ofumila m’mitundu yonse, kuti ankhale gulu ikulu ngako. Mamiliyoni anyinji a ŵanthu onkhala osatila a Yesu. Komasoti Ufumu wa Mulungu ukateteze ŵanthu ochita viweme, pakuzachenekewa ochita viipa. Onse ofuna kupindula na Ufumu wamene uyu, ofunika kumvwila nonkhala osatila a Yesu.—Ŵelengani Chivumbulutso 7:9, 14, 16, 17.
M’vyaka 1.000, Ufumu wa Mulungu ukakwanishe cholinga chake choyambilia pa kupangiwa kwa ŵanthu. Chalo chonse chikaŵe paladaiso. Posilijila pake Yesu akuya akajoshele Ufumu kwa Atata ŵake. (1 Akorinto 15:24-26) Mwa alipo wamuziŵa, wamungafune kumuwujako za Ufumu wa Mulungu?—Ŵelengani Salimo 37:10, 11, 29.
^ ndime 6 Kuti munvwishe luweme ponena za chaka cha 1914 lolani pedji 217 mpaka 220 m’buku yakuti Zimene Baibulo Limaphunzitsa.
