Yesu ephunzisa ophunzila ŵake chipembezo chimo tyala chachendi. Chili monga ni nsewu utangulila ku umi wosasila. Yesu elaŵila kuti: ‘Ni ŵanthu atontho owufwanga’ nsewu wamene uyo. (Mateyu 7:14) Mulungu ovomeja tyala kulambila kokatijana na malizu yake Baibolo. Olambila onse achendi ni okatijana pa chichetekelo chimo.—Ŵelengani Yohane 4:23, 24; 14:6; Aefeso 4:4, 5.

Yesu echenjeja kuti olosela awenye akaifye Chikhilisitu. Mwakuwonekela ochita monga ni achendi. M’matchetchi ŵawo ove olaŵila kuti ni achikhilisitu. Koma mwewo mungaŵaziŵe na vichito vawo kuti ni Akhilisitu awenye. Chiyakine nchotyani? Chipembezo chachendi chikuŵa na Akhilisitu a minkhalidwe iweme.—Ŵelengani Mateyu 7:13-23.

Onani vinthu 5 ivi, vamene vingakuyavyeni kuŵaziŵa:

• Olambila achendi olemekeza Baibolo pakuŵa malizu a Mulungu. Otang’ilila kukonkheja mfundo na malamulo ŵa m’Baibolo pa umi wawo. Tetyo chipembezo chachendi chusiyana na vipembezo vutolela malingililo ya ŵanthu. (Mateyu 15:7-9) Kusiyana na olambila aŵenye, olambila achendi ochita vakuphunzila.—Ŵelengani Yohane 17:17; 2 Timoteyo 3:16, 17.

•   Ophunzila achendi a Yesu olemekeza zina ya Mulungu, yakuti Yehova. Yesu elemekeza zina ya Mulungu poiziŵikisha ku ŵanthu. Eyavya ŵanthu kuziŵa Mulungu noŵaphunzisa kupemphela kuti zina ya Mulungu ituŵishiwe. (Mateyu 6:9) Kansi kwamunkhala, ni chipembezo chotyani chuwujako ŵanthu za zina ya Mulungu?—Ŵelengani Yohane 17:26; Aroma 10:13, 14.

• Akhilisitu achendi olalikila za Ufumu wa Mulungu. Mulungu etuma Yesu kuzolalikila za uthenga uweme wa Ufumu. Ni Ufumu wa Mulungu weka uti uzafumyepo matamano ya ŵanthu. Yesu enkhalila kulaŵila za Ufumu wamene uyo mpaka pa nsiku yechifwa. (Luka 4:43; 8:1; 23:42, 43) Yove elaŵila kuti, ophunzila ŵake ofunikila kuti akolalikila za Ufumu wamene uyu. Kansi munthu akawela kung’anda kwanu kuzalaŵila namwe za Ufumu wa Mulungu, mungaganize kuti ni ŵachipembezo chotyani?—Ŵelengani Mateyu 24:14.

• Ophunzila ŵa Yesu ochitakolini mbali m’chalo chino chiipa. Mungaŵaziŵe pachikomo chakuti otolako lini mbali m’nkhani za ndale olo m’mikangano ya ŵanthu. (Yohane 17:16; 18:36) Komasoti otolelakolini minkhalidwe na malingalilo aiipa a chino chalo.—Ŵelengani Yakobo 4:4.

• Akhilisitu achendi owoneshana chikondi chikulu muyake na muyake. Ove ophunzila m’Baibolo kuti oŵamila kulemekeza ŵanthu amitundu yonse. Olo kuti vipembezo vawenye vuloŵelela mu nkhondo ngati vyalo vuniyatana, olambila achendi ochitalini vamene ivo. (Mika 4:1-3) Olo n’tetyo olambila achendi okatisha ntchito nthawe yawo, mphamvu zawo na vinthu vawo kuti ayavye ayawo noŵatang’isha.—Ŵelengani Yohane 13:34, 35; 1 Yohane 4:20.

Ni chipembezo chotyani chamene vonse vakuphunzisa vukatijana na malizu ya Mulungu, chulemekeza zina ya Mulungu, komasoti chulalikila kuti Ufumu wa Mulungu tyala niye uti uzafumyepo matamano yonse ya ŵanthu? Ni chipembezo chini chamene ŵanthu ŵake owoneshana chikondi ngacho-ngacho, soti chuchitakolini nkhondo? Kansi mungayankhe kuti tyani?—Ŵelengani 1 Yohane 3:10-12.