MUTU 4
Mwa Yesu Khilisitu niŵani?
1. Mwa umi wa yesu wiyamba tyani?
Mwa nimankhalidwe otyani a Yesu enzechitisha kuti ŵanthu awomasuka naye?—MATEYU 11:29; MALIKO 10:13-16.
Umi wa Yesu wiyambila kululu. Yove akaliyevyalika pano pachalo enzenkhala kululu monga mngelo. (Yohane 8:23) Yove enze chopangiwa choyamba cha Mulungu, komasoti emuyavya pa ntchito yopanga vinthu vonse. Niyove yeka tyala epangiwa mwachindunji na Mulungu. Pachikomo chamene ichi, owamila kuitiwa kuti Mwana ‘wovyalika yeka’ wa Mulungu. (Yohane 1:14) Enze soti wolaŵilila wa Mulungu, tetyo oitiwa soti kuti ‘Lizu.’—Ŵelengani Miyambo 8:22, 23, 30; Akolose 1:15, 16.
2. Mwa Yesu ewelela chinji pano pachalo?
Yesu ewela pano pachalo pavikomo vitatu (1) kuzaphunzisa chendi ponena za Mulungu (2) echizatiwonesha chisanzo mwatingachitile chifunilo cha Mulungu, olo kuti tili pa matamano (3) echizatwala umi wake wangwilo kuti ‘awombole’ ŵanthu ku uchimo. Mulungu etumija Mwana wake pachalo pofulusha umi wake kululu nakuzauika m’mala mwa ndola iyakine yachiyuda zina yake Mariya. Tetyo Yesu aliye atata ŵake aumunthu.—Luka 1:30-35.—Ŵelengani Mateyu 20:28.
3. Ndaŵa yanji tufunikila kuwombolewa?
Tufunikila kuwombolewa pachikomo chakuti tuphoniya komasoti tikufwa. Mulungu pechipanga Adamu, Yove enzefunalini kuti tikokalamba na kufwa. Koma Adamu aliyomvwile. (Genesis 2:16, 17; 5:5) Wonse efumila kwa Adamu enkhala akapolo a ‘uchimo’ na imfwa. Penzefunikila malipilo kuti timasuliwe. Mwa malipilo nichinji? Ni chinthu chala chutwaliwa pofuna kumasula munthu olo chinthu chala chakatiwa.—Ekisodo 21:29, 30.—Ŵelengani Aroma 5:12; 6:23.
Mwa niŵani angakwanishe kutimasula ku mulandu wa uchimo na imfwa? Enzefunika kunkhala munthu wala aliye uchimo.—Ŵelengani Salimo 49:7-9.
4. Nchifukwa nchinji Yesu echifwa?
Yesu echifwa chifukwa chokonda ŵanthu. Yove enze wosaphoniya, tetyo enzewamila lini kufwa chikomo chakuti enze wangwilo. Olo nitetyo yove enkhala ochetekeleka nomvwila ausuwake nowela kuzotifwila sewo. Pachikomo chamene ichi Mulungu ewonesha chikondi chake mwakuti etimvwila chifundo.—Ŵelengani Yohane 3:16; Aroma 5:18, 19.
Loleshani vidiyo Ndawa yanji Yesu echifwa?
5. Mwa Yesu ochita chinji palipano?
Yesu otonga kululu monga Mfumu. Penze pachalo Yove ewusha ŵanthu, epoja olwala, eyavya ŵanthu enze pa matamano osiyana-siyana. (Mateyu 15:30, 31; Yohane 5:28) Pavuli pakuti wafwa, Mulungu emuwusha kuti akankhale kululu. (1 Petulo 3:18) Pamene apo Yesu elindilila mpaka Yehova kumuwuja kuti yamba kutonga. (Aheberi 10:12, 13) Lelo ŵanthu anyinji pachalo chonse omvwila yove, komasoti ophunzisa ayawo kuti yove ni Mfumu. Vinthu viweme vechichita Yesu pachalo pano vuwonesha kuti kusogolo azachite vinyinji.—Ŵelengani Danieli 7:13, 14; Mateyu 24:14.
Kwalombapano, Yesu azacheneke ŵanthu aiipa, paliye ati azatamane soti. Uyo ati azaŵe wochetekeleka na kumvwila Yesu azankhale na umi mpaladaiso mpaka kale-kale.—Ŵelengani Salimo 37:9-11.
