MUTU 14
Ndaŵa yanji Mulungu ali na umba?
1. Ndaŵa yanji Mulungu etola Aisiraeli kuti ankhale umba yake?
Mulungu etola ŵanthu n’chivumo cha Abulahamu kuti aŵe ntundu wake, noupa malamulo yosiyana-siyana. Ntundu wamene uyo eupasa zina yakuti ‘Isiraeli’ soti eikija kulambila kwachendi na malizu yake m’manja mwao. (Salimo 147:19, 20) Echita vamene ivi kuti ŵanthu amitundu yonse azepindule kufumila kuli Aisiraeli.—Ŵelengani Genesis 22:18.
Mulungu esalula Aisiraeli kuŵa mboni zake. Mbili yawo yuwonesha kuti ŵanthu opindula ngako akamwvila malamulo ya Mulungu. (Deuteronomo 4:6) Tetyo, kupitila muli Aisiraeli, ŵanthu ayakine enze na shuko yoziŵa Mulungu wachendi.—Ŵelengani Yesaya 43:10, 12.
2. Ndaŵa yanji Akhilisitu achendi ni umba yuchita vinthu mwadongosolo?
M’kuluta kwa nthawe, Aisiraeli eleka kumvwela Mulungu, tetyo Yehova eukana ntundu wao. M’malo mwake, etola mpingo wachikhilisitu kuŵa ŵanthu ŵake. (Mateyu 21:43; 23:37, 38) Nsiku zino, m’malo mwa Aisiraeli, Akhilisitu achendi niye mboni za Yehova.—Ŵelengani Machitidwe 15:14, 17.
Yesu ekonzekelesha ophunzila ŵake kuti akalalikile uthenga uweme nophunzisa ŵanthu a mitundu yonse kuti ankhale ophunzila ŵake. (Mateyu 10:7, 11; 24:14; 28:19, 20) Mu nsiku zino zosilijila, ntchito yamene iyi yafwika pa chinyinawene. M’mbili yonse ya ŵanthu, ino niyo yankhala nthawe yotatika, Yehova waunganisha ŵanthu mamiliyoni anyinji kuti aomulambila pamo. (Chivumbulutso 7:9, 10) Akhilisitu achendi ni umba yokatijana komasoti yutang’ishana noyavyana muyake na muyake. Pachalo chonse, oseŵenzesha njila imo yophunzilila Baibolo pa misonkhano yawo.—Ŵelengani Aheberi 10:24, 25.
3. Kansi umba ya Mboni za Yehova ya masiku ŵano yeyamba tyani?
M’vyaka va m’ma 1870, kaumba ka ophunzila Baibolo keyamba kufwana chendi cha m’Baibolo chenze chisoŵa kwa nthawe ikulu. Ove eziŵa kuti Yesu epanga mpingo wachikhilisitu noupasa ntchito yolalikila. Tetyo, eyamba kampeni ya pa chalo chonse yolalikila uthenga uweme. Mu 1931, etola zina yakuti Mboni za Yehova.—Ŵelengani Machitidwe 1:8; 2:1, 4; 5:42.
4. Kansi umba ya Mboni za Yehova ililinganijiwe tyani?
Mu nthawe ya Akhilisitu oyambilila, mipingo yachikhilisitu pachalo chonse yenzetanguliliwa na Bungwe Yutonga. Bungwe yamene iyi yenzelemekeza Yesu monga mutu wa mpingo. (Machitidwe 16:4, 5) Masiku ŵano soti, Bungwe Yutonga niyo yutangulila Mboni za Yehova pachalo chonse. Ali m’Bungwe yamene iyi ni akulu oziŵa moyendeshela vinthu. Otangulila ntchito yukatiwa ku maofesi a nthambi a Mboni za Yehova. Ntchito yamene iyi ni kumasulila mabuku yophunzilila Baibolo, kupanga, na kutumija ku mipingo yosiyana-siyana na kuŵayaŵila ŵanthu mu vilaŵilo vopitilila 600. Tetyo, Bungwe yutonga yukwanisha kutang’isha na kutwala malangizo a m’malemba kumipingo yonse yopitilila 100.000 pachalo chonse. Mpingo uliwonse muli analume ofwikapo otumikila monga akulu kapena kuti otangulila. Analume amene aŵa osamalila mbelele za Mulungu mwa chikondi.—Ŵelengani 1 Petulo 5:2, 3.
Mboni za Yehova ni umba yamene yukata ntchito yolalikila nophunzisha ŵanthu. Kulingana mwenzochitila atumwi a Yesu, sewo nase tulalikila ku ng’anda na ng’anda. (Machitidwe 20:20) Komasoti tulitwala kuphunzila Baibolo na ŵanthu ŵamene otemwa chendi. Mboni za Yehova ni umba lini tyala yayi. Nise banja ya atata yumo otitemwa. Tonse ni pokwasu komasoti tusamalilana muyake na muyake. (2 Atesalonika 1:3) Pofwana kuti ŵanthu a Yehova ni umba yuyavyana komasoti yuyavya ŵanthu ayakine, yankhala banja yotemwa ngako pachalo chonse.—Ŵelengani Salimo 33:12; Machitidwe 20:35.
