Yai, komalomba mu vipembezo vonse alimo ŵanthu ayakine aweme mitima. Uthenga uweme ni wakuti Mulungu oŵaona ŵanthu amene awo noŵaganizila. Koma chuchitisha chiya n’chakuti chipembezo chankhala chofisamilamo pochita viipa. (2 Akorinto 4:3, 4; 11:13-15) Kulingana na nkhani za pa nyunzi, vipembezo viyakine vachitofwika potolako nawo mbali mu vauchigaŵenga, nkhondo, kuchitilana nkhanza na kuyona ŵana atontho-atontho. Ivi vukwinyililisha ŵanthu aweme mitima ochetekela Mulungu.—Ŵelengani Mateyu 24:3-5, 11, 12.

Chipembezo chachendi chulemekeza Mulungu, koma vipembezo vawenye vuchita vinthu vumukalifya. Vuphunzisa vinthu visafwaniwa m’Baibolo. Komasoti vuphunzisa wenye polaŵila za Mulungu na vuchitika munthu akafwa. Koma Yehova ofuna kuti ŵanthu aziŵe chendi polaŵila za yove.—Ŵelengani Ezekieli 18:4; 1 Timoteyo 2:3-5.

N’chotemwesha kuziŵa kuti vipembezo vawenye vingamusemphe lini Mulungu polaŵila kuti vumukonda koma ngako-ngako vukonda chalo cha Satana. (Yakobo 4:4) M’malizu ya Mulungu vipembezo vonse vawenye kuvipamikija pamo vuitiwa kuti ‘Babulo Nkulu.’ Zina yamene iyi yetolewa ku tauni ikulu yakale-kale ya Babulo kwevitatikila vipembezo vawenye pavuli pa Chigumula cha m’nthawe za Nowa. Lombapano, Mulungu azefumyepo vipembezo vonse vusempha ŵanthu noŵakandilila.—Ŵelengani Chivumbulutso 17:1, 2, 5, 16, 17; 18:8.

Palisoti uthenga uyakine uweme wakuti Yehova oluŵa lini ŵanthu aweme mitima alimwajikane m’vipembezo vawenye  pachalo chonse. Ŵanthu otetyo oŵaleta pamo mwa kuŵaphunzisa chendi.—Ŵelengani Mika 4:2, 5.

Yehova osamalila ŵanthu okonda vinthu vachendi na viŵeme. Yove oŵatang’isha kuti afumemo m’chipembezo chawenye. Ŵanthu okonda Mulungu ofunishisha kuti achinje noyamba kumutemwesha.—Ŵelengani Chivumbulutso 18:4.

Munthawe ya atumwi, ŵanthu a mitima iweme pechimvwa uthenga uweme kuli atumwi amene awo, eulondela motemwa ngako. Yehova eŵaphunzisa vinthu viweme vanyowani, eyamba kunkhala na umi uweme komasoti chilindilo chiweme. Ŵanthu amene aŵa ni chisanzo chiweme kuli seo zino nsiku. Chili tetyo chikomo chakuti emvwila uthenga uweme, noika Yehova pasogolo paumi wao.—Ŵelengani 1 Atesalonika 1:8, 9; 2:13.

Yehova olondela ŵanthu onse ofuma m’chipembezo cha wenye noloŵa m’banja ya olambila achendi. Mukamvwela Yehova nowela mu umba yake, munkhale naye paushamwali. Soti muŵe m’banja yotemwa ya olambila Yehova nakuzafwana umi wosasila.—Ŵelengani Maliko 10:29, 30; 2 Akorinto 6:17, 18.

Ni uthenga uweme kuziŵa kuti vipembezo vawenye vizachenekewe. Ivi vizachitishe kuti ŵanthu pachalo chonse amasuke kumatamano ochitishiwa na vipembezo vawenye. Ŵanthu azaluŵilishiwe lini soti na vipembezo vawenye olo kuŵayaŵanisha mitundu. Ŵanthu onse azakatijane polambila Mulungu yumo tyala wachendi.—Ŵelengani Chivumbulutso 18:20, 21; 21:3, 4.