Mulungu ofuna kuti ŵanthu a mitundu yonse awomuvwendela kupitila mu pemphelo. (Salimo 65:2) Olo nitetyo, ni mapemphelo lini yonse yakumvwa kapena kuyankha Mulungu. Mwachisanzo, mapemphelo ya mwanalume ochitila nkhanza mwanakazi wake mapemphelo yake yangachingilijiwe. (1 Petulo 3:7) Komasoti chikomo chakuti Aisiraeli enzengonkhalila kuchita viipa, Mulungu aliye yankhe mapemphelo ŵawo. Kulaŵila chendi, pemphelo ni shuko ikulu ngako yolaŵila na Mulungu. Yove akumvwa mapemphelo, olo ya munthu wachita tchimo ikulu, koma angamvwe ngati munthu wamene uyo waleka.—Ŵelengani Yesaya 1:15; 55:7.

Pemphelo ni mbali ya kulambila kwasu. Tetyo tuwamila kupemphela kwa Nyamalenga yeka, Yehova. (Mateyu 4:10; 6:9) Komasoti pakuti nise ochimwa, tuwamila kupemphela kupitila mu zina ya Yesu chikomo chakuti efwela machimo yasu. (Yohane 14:6) Yehova ofuna lini kuti tikolaŵila naye m’mapemphelo yowelejela-welejela, kapena yochito lemba. Yove ofuna kuti tikomusenga mofumila pansi pa ntima.—Ŵelengani Mateyu 6:7; Afilipi 4:6, 7.

Nyamalenga wasu akumvwa olo mapemphelo ya muntima. (1 Samueli 1:12, 13) Ofuna soti kuti tikomusenga nthawe iliyonse. Mwachisanzo, tikawuka m’mawa, pakulya, poyona usiku, komasoti tikakumana na matamano.—Ŵelengani Salimo 55:22; Mateyu 15:36.

Kuvwendela pafupi na Mulungu ni chinthu lini chipepu. Vili tetyo chikomo chakuti tunkhala pamo na ŵanthu aliye  chichetekelo kwa Mulungu, komasoti onyoza lonjezo yake yakuti pachalo pazankhale ntendele. (2 Timoteyo 3:1, 4; 2 Petulo 3:3, 13) Tetyo tuwamila kuungana pamo na ochetekeleka ayasu kuti titang’ishane muyake na muyake.—Ŵelengani Aheberi 10:24, 25.

Kutandala na ŵanthu otemwa Mulungu kungatiyavye kuŵa pafupi na Mulungu. Misonkhano ya Mboni za Yehova yutipa shuko iweme kuti tipindule kuli ochetekeleka ayasu.—Ŵelengani Aroma 1:11, 12.

Mungavwendele pafupi na Mulungu polingilila vamwaphunzila m’malizu ŵake. Lingililani ntchito zake, malangizo yake, malonjezo yake na vinthu vechipanga. Kulingilila koteti, pamo na pemphelo, kungatiyavye kutembeja ngako chikondi na nzelu za Mulungu.—Ŵelengani Yoswa 1:8; Salimo 1:1-3.

Kum’chetekela Mulungu niye kungakuleteni pafupi na yove. Koma chichetekelo chili monga ni chinthu chaumi chuwamila kulya. Tetyo muwamila kuchilyesha nsiku iliyonse chichetekelo chanu, powelelamo kuŵelenga vinthu vala vemwiphunzila vukuchitishani kuti munkhale na chichetekelo.—Ŵelengani Mateyu 4:4; Aheberi 11:1, 6.

Yehova osamala ŵala omukonda. Angaŵachingilije ku chinthu chilichonse chingacheneke chichetekelo chawo, na kuika chilindililo chawo cha umi wosasila pa ngozi. (Salimo 91:1, 2, 7-10) Otichenjeja soti ku vinthu vingacheneke umi wasu, na vinthu vingachitishe kuti tiŵe osatemwa. Yehova otiphunzisha mwatingachitile kuti vinthu vitiyendele luweme pa umi wasu.—Ŵelengani Salimo 73:27, 28; Yakobo 4:4, 8.