1. Kansi mungaganizile kuchita tyani pavuli pakuti mwaphunzila buku ino mosamala?

POFWIKA pano mwaphunzila vinthu vinyinji kufumila m’buku ino vokhuza chendi cha m’Baibolo monga lonjezo ya Mulungu yokhuza moyo wosasila, chuchitika munthu akafwa na chiyembekezo cha chiukililo. (Mlaliki 9:5; Luka 23:43; Yohane 5:28, 29; Chivumbulutso 21:3, 4) Payakine mweyamba kale kupezekapo pa misonkhano ya Mboni za Yehova nokhulupilila kuti ochita vinthu  mokatijana na kulambila kwachendi. (Yohane 13:35) Payakine mweyamba kale kukulisha ushamwali wanu na Yehova, soti payakine mwapanga kale chosankha chakuti mum’tumikile. Tetyo mungayambe kuganiza kuti, ‘Kansi nufunika kuchita tyani kuti nitumikile Mulungu?’

2. Ni chinji chechitisha munthu wa ku Itiyopiya kuti afune kubatizika?

² Ivi niye vechiganizila kuchita munthu wa ku Itiyopiya wamene enkhalako mu nthawe ya Yesu. Nthawe iyakine pavuli pakuti Yesu waushiwa, wophunzila wa Yesu Filipo, elalikila kuli munthu wamene uyu. Filipo emuwonesha umboni wakuti Yesu enze Mesiya. Munthu wa ku Itiyopiya esonkhejelewa na vinthu vechiphunzila ndipo nthawe yamene iyo elaŵila kuti: “Onani! aŵa manzi anyinji. Chunilesha kubatizika ni chinji?”—Machitidwe 8:26-36.

3. (a) Kansi Yesu epeleka lamulo yotyani kwa ophunzila ŵake? (b) Kansi munthu ofunikila kubatizika tyani?

³ Baibolo yunena momvwika bwino kuti keno mufuna kutumikila Yehova, mufunika kubatizika. Yesu euja opunzila ŵake kuti: “Nkhoyani mukaphunzise ŵanthu a mitundu yonse kuti ankhale ophunzila ŵangu, mukoŵabatiza.” (Mateyu 28:19) Yesu ewonesha chisanzo mwa kubatizika m’manzi. Yove embijiwa m’manzi, osati kutiliwa tyala manzi pamutu. (Mateyu 3:16) Masiku ŵano Mkhilisitu pobatizika ofunika kumbijiwa muŵili wonse m’manzi.

4. Kansi ubatizo wanu uwonesha chinji kuli ayanu?

⁴ Mukabatizika, muwonesha ayakine kuti mufuna chendi kunkhala shamwali wa Mulungu nomutumikila. (Salimo 40:7, 8) Tetyo payakine mungakonshe kuti, ‘Kansi nufunikila kuchita tyani kuti nibatizike?’

5. (a) Kansi mufunika kuchita tyani poyamba mukaliye batizika? (b) Ndaŵa yanji misonkhano Yachikhilisitu ni yofunika ngako?

⁵ Mukaliye batizika, mufunika kuziŵa Yehova na Yesu. Soti mwayamba kale kuchita vamene ivi mwa kuphunzila Baibolo. (Ŵelengani Yohane 17:3.) Koma kuchita ivi ni kosakwanila. Baibolo yunena kuti mufunika “kunkhala oziŵa bwino” chifunilo cha Yehova. (Akolose 1:9) Misonkhano ya Mboni za Yehova ikuyavyeni kunkhala pa ushamwali wotang’a na Yehova. Niye chifukwa chake ni chinthu chofunika ngako kupezeka pa misonkhano nthawe zonse.—Aheberi 10:24, 25.

6. Kansi mufunika kuziŵa vinthu vonse va m’Baibolo kuti mubatizike?

⁶ Yehova oyembekezelalini kuti muziŵe vinthu vonse va m’Baibolo kuti muyenelele ubatizo. Yove aliye yembekezele kuti munthu wa ku Itiyopiya aziŵe vinthu vonse akaliye batizika. (Machitidwe 8:30, 31) Chifukwa tipitilije kuphunzila za Mulungu mpaka kale-kale. (Mlaliki 3:11) Koma kuti mubatizike, mufunikila kuziŵa novomekeja mfundo zoyambilila za m’Baibolo.—Aheberi 5:12.

7. Kansi kuphunzila kwanu Baibolo kwakuyavyani tyani?

⁷ Baibolo yunena kuti: “Paliye chikhulupililo n’vosakwanishika kukondwelesha Mulungu.” (Aheberi 11:6) Tetyo mufunika kunkhala na chikhulupililo mukaliye batizika. Baibolo yutiuja kuti ŵanthu ayakine a mu tauni yakale ya Akorinto echimvwa venzephunzisa ophunzila a Yesu, ndipo “eyamba kukhulupilila nobatizika.” (Machitidwe 18:8) Molingana na vamene ivi, kuphunzila kwanu Baibolo kwakuyavyani kunkhala na chikhulupililo m’malonjezo a Mulungu na mu mphamvu ya nsembe ya Yesu, yamene ingatipulumushe ku uchimo na imfwa.—Yoswa 23:14; Machitidwe 4:12; 2 Timoteyo 3:16, 17.

8. Kansi ni chinji chiti chikuchitisheni kuujako ayanu vamwaphunzila?

⁸ Pamuphunzila vinthu vinyinji kufumila m’Baibolo nowona mwayukuyavyilani pa moyo wanu, chikhulupililo chanu chinkhale chotang’a. Munkhale ofunishisha kuujako ayanu vamuphunzila. (Yeremiya 20:9; 2 Akorinto 4:13) Koma kansi ni ŵani ŵamufunika kuujako?

9, 10. (a) Kansi mungayambe kuujako ŵani vamwaphunzila? (b) Kansi mufunika kuchita tyani keno mufuna kuyamba kulalikila pamozi na mpingo?

⁹ Payakine mungaujeko abanja ŵanu, ayanu, ŵamunkhala nawo pafupi olo ŵamuseŵenza nawo vinthu vamwaphunzila. Keno muchita tetyo niye kuti muchita bwino, koma nthawe zonse mufunika kuchita vamene ivi mowama ntima komasoti mwachikondi. M’kupita kwa nthawe, mungayenelele kulalikila pamozi na mpingo. Mukafuna kuyamba kulalikila pamozi na mpingo, ujani wa Mboni wamene okuphunzisani Baibolo, kuti mufuna muyambe kulalikila pamozi na mpingo. Keno okuphunzisani owona kuti nimwe oyenelela soti muchita vinthu mokatijana na mfundo za m’Baibolo pa moyo wanu, mwewo pamozi na yove mukaonane na akulu aŵili a mu mpingo.

¹⁰ Kansi ni chinji chiti chikachitike mukayekumana na akulu? Akulu akakambilane namwe kuti akawone keno mumvwisha nokhulupilila mfundo zoyambilila za m’Baibolo, keno mukonkha mfundo za m’Baibolo pa moyo wanu, komasoti keno mufunishisha chendi kunkhala Mboni ya Yehova. Kumbukilani kuti akulu osamalila ŵanthu onse a mu mpingo, kuyangijilapo mwewo. Tetyo mufunikalini kuchita wowa kulaŵila nawo. (Machitidwe 20:28; 1 Petulo 5:2, 3) Pavuli pake, akulu  amene aŵa akakuujeni keno mungayambe kulalikila pamozi na mpingo.

11. Ndaŵa yanji ni chinthu chofunika ngako kuchinja mukaliyeyamba kulalikila pamozi na mpingo?

¹¹ Akulu angakuujeni kuti mufunika kuchinja mbali ziyakine pa moyo wanu mukaliyeyamba kulalikila pamozi na mpingo. Chifukwa ni chinji kuchinja mbali zamene izo ni chinthu chofunika ngako? Chifukwa chakuti keno tayamba kuujako ayasu za Mulungu, tupanamila Yehova soti mufunika kunkhala mu njila yowonesha kuti tumulemekeza.—1 Akorinto 6:9, 10; Agalatiya 5:19-21.

12. Ndaŵa yanji ŵanthu onse ofunika kulapa?

¹² Pali vinthu viyakine vamufunika kuchita mukaliye batizika. Ntumwi Petulo elaŵila kuti: “Tetyo lapani nosintha kuti machimo ŵanu afyifyiwe.” (Machitidwe 3:19) Kansi kulapa kutanthauza chinji? Kutanthauza kumvwa chisoni chofumila pansi pa ntima pa chinthu chiipa chatachita. Mwachisanzo, keno mwenze na moyo wachiwelewele, mufunika kulapa. Komasoti olo kuti pa moyo wanu mwenzeyeja-yeja kuchita vinthu viweme, mufunika mphela kulapa, chifukwa chakuti tonse nise ochimwa soti tufunika kusenga Mulungu kuti akotikhululukila.—Aroma 3:23; 5:12.

13. Kansi “kusintha” kutanthauza chinji?

¹³ Kansi kulimvwila tyala chisoni pa vinthu viipa vemwenzechita ni kokwanila? Yayi. Ntumwi Petulo elaŵila kuti mufunikasoti “kusintha.” Ivi vutanthauza kuti mufunika kuleka nkhalidwe iliyonse iipa noyamba kuchita vinthu viweme. Mwachisanzo, ganizilani kuti mukuya kumalo ayakine kwamukaliyelutako. Pavuli pakuti mwayendako patontho, mwaziŵa kuti mwakonkha njila isali yamene. Kansi mungachite tyani? Mosakaikila  mungapaname, nojoka nokonkha njila yoyenelela. Molingana na vamene ivi, pamuphunzila Baibolo, mungazindikile kuti pali vinthu viyakine va mufunika kusintha pa moyo wanu. Nkhalani ofunishisha “kusintha”—kutanthauza kuti mufunika kusintha—ndipo yambani kuchita vinthu voyenela.

14. Kansi mungalipeleke tyani kwa Mulungu?

¹⁴ Chinthu chiyakine chofunika ngako chamufunikila kuchita mukaliye batizika ni kulipeleka kwa Yehova. Keno mwalipeleka kwa Yehova, mulonjeza kupitila m’pemphelo kuti mutumikile tyala yove komasoti kuchita chifunilo chake ni chinthu chofunika ngako pa moyo wanu.—Deuteronomo 6:15.

15, 16. Kansi n’chinji chumuchitisha munthu kulitwala kwa Mulungu?

¹⁵ Kulonjeza kuti mutumikile tyala Yehova, kulingana na kulonjeza kuti munkhale na munthu wamukonda kwa moyo wanu wonse. Ganizilani kuti mwanalume ali pa chitomelo na mwanakazi. Mwanalume akayamba kumuziŵa bwino mwanakazi, ofwika pomukonda nofuna kumulungula. Olo kuti ichi ni chosankha chikulu, mwanalume onkhala wofunishisha kumulungula chifukwa chakuti omukonda.

¹⁶ Pamuphunzila za Yehova, mufwike pomukonda, soti mufune kuchita vilivonse vamungakwanishe kuti mum’tumikile. Ivi vikuchitisheni kumulonjeza m’pemphelo kuti mufuna kumutumikila. Baibolo yunena kuti aliyense ofuna kukonkha Yesu ofunika “kulikana yeka.” (Maliko 8:34) Kansi ivi vutanthauza chinji? Vutanthauza kuti kumvwila Yehova kunkhale chinthu choyamba pa moyo  wanu. Vakufuna Yehova ni vinthu vofunika ngako kupambana vofuna vanu.—Ŵelengani 1 Petulo 4:2.

17. Ndaŵa yanji ŵanthu ayakine olipelekalini kwa Yehova?

¹⁷ Ŵanthu ayakine oyopa kulipeleka kwa Yehova chifukwa chakuti oganiza kuti angakwanishelini kusunga lonjezo yawo yotumikila yove. Ofunalini kukalipisha Yehova, olo payakine angaganize kuti keno angaleke kulipeleka kuli yove, Yehova angaŵaimbelini mulandu pa vinthu vakuchita.

18. Kansi ni chinji chingakuyavyeni kuti musilije wowa wakuti mungakalipishe Yehova?

¹⁸ Chikondi chanu pa Yehova chikuyavyeni kusilija wowa wakuti mungamukalipishe. Chifukwa chakuti mumukonda, muchite chilichonse chamungakwanishe kuti musunge lonjezo yanu. (Mlaliki 5:4; Akolose 1:10) Muwone kuti kuchita chifunilo cha Yehova n’kosavuta. Ntumwi Yohane elemba kuti: “Chifukwa chakuti kukonda Mulungu kutanthauza kusunga malamulo ŵake, soti malamulo ŵake oŵeŵeshalini.”—1 Yohane 5:3.

19. Ndaŵa yanji mufunikalini kuyopa kulipeleka kwa Yehova?

¹⁹ Mufunikalini kunkhala angwilo kuti mulipeleke kwa Yehova. Yove oyembekezelalini kuti tichite vinthu vatingaleke kwanisha. (Salimo 103:14) Yove akuyavyeni kuchita vinthu voyenela. (Yesaya 41:10) Khulupililani Yehova na ntima wanu wonse, soti “yove azayondolole njila zanu.”—Miyambo 3:5, 6.

20. Pavuli pakuti mwalipeleka kwa Mulungu, kansi mufunikila kuchita tyani?

²⁰ Kansi muganizila kuti nimwe okonzeka kulipeleka kwa Yehova? Pavuli pakuti mwalipeleka kwa Yehova, niye kuti nimwe okonzeka kubatizika.

21, 22. Kansi ‘mungalengeze tyani patuŵa’ za chikhulupililo chanu?

 ²¹ Ziŵishani wogwilizanisa ntchito za bungwe ya akulu kuti mwalipeleka kwa Yehova ndipo mufuna kubatizika. Pavuli pake akauje akulu ayakine kuti azakambilane namwe viphunziso voyambilila va m’Baibolo. Keno awona kuti nimwe woyenelela, akakuujeni kuti mungabatizike pa nsonkhano wokonkhapo wadela olo wachigawo wa Mboni za Yehova. Pa nsonkhano wamene  uyu, pakankhale nkhani yofotokoza tanthauzo ya ubatizo. Wolaŵila nkhani akakonshe makonsho aŵili kuli akuya ku ubatizo. Mwa kuyankha makonsho amene aŵa, “mukalengeze patuŵa” za chikhulupililo chanu.—Aroma 10:10.

 ²² Pavuli pake mukabatizike. Mukambijiwe muŵili wonse m’manzi. Ubatizo wanu ukaoneshe patuŵa kuti mwalipeleka kwa Yehova, soti nimwe Mboni ya Yehova.

23. Kansi kubatizika “m’zina ya Atata, ya Mwana, na ya mzimu utuŵa” kutanthauza chinji?

²³ Yesu elaŵila kuti ophunzila ŵake akobatizika “m’zina ya Atata, ya Mwana, na ya mzimu utuŵa.” (Ŵelengani Mateyu 28:19.) Kansi vamene ivi vutanthauza chinji? Vutanthauza kuti muzindikila ulamulilo wa Yehova na udindo wa Yesu pokwanilisha chifunilo cha Mulungu, na kuziŵa kuti Yehova okatishila ntchito mzimu wake utuŵa, pokwanilisha chifunilo chake.—Salimo 83:18; Mateyu 28:18; Agalatiya 5:22, 23; 2 Petulo 1:21.

24, 25. (a) Kansi ubatizo upanamila chinji? (b) Kansi tizakambilane chinji m’mutu wapasogolo?

²⁴ Ubatizo upanamila chinthu chiyakine chofunika ngako. Kumbijiwa m’manzi kutanthauza kuti mwafwa ku moyo wanu wakale. Kuvuuka m’manzi kutanthauza kuti mwayamba moyo wanyowani wochita chifunilo cha Mulungu. Ivi vuwonesha kuti mutumikile Yehova kufumila lomba mpaka kale-kale. Kumbukilani kuti muliye lipeleke ku munthu aliyense, ku bungwe iliyonse olo ku ntchito iliyonse. Koma mwelipeleka kwa Yehova.

²⁵ Kulipeleka kwanu kukuyavyeni kunkhala pa ushamwali wotang’a na Mulungu. (Salimo 25:14) Ivi vutanthauzalini kuti munthu akapulumushiwe tyala chifukwa chakuti ni wobatizika. Ntumwi Paulo elemba kuti: “Pitilijani kukonza chipulumuso chanu.” (Afilipi 2:12) Ubatizo ni poyambila tyala. Koma kansi mungapitilije tyani kunkhala pafupi na Yehova? Mutu wosilijila wa buku ino uzayankhe konsho yamene iyi.