1, 2. Kansi ayakine mwa azishamwali a Yehova enze ŵani?

KANSI mungasankhe munthu wotyani kunkhala shamwali wanu? Mosakaikila mungafune munthu wamulingana naye vokonda, maganizo, komasoti vochita. Mungakonde munthu wamene ali na minkhalidwe iweme, yamene yamukumbwila.

² Yehova Mulungu osankha ŵanthu ayakine kunkhala azishamwali ŵake. Mwachisanzo, Abulahamu enze mmozi mwa azishamwali a Yehova. (Yesaya 41:8; Yakobo 2:23) Davide enzesoti shamwali wa Yehova. Mulungu elaŵila kuti Davide enze ‘munthu wapantima pake.’ (Machitidwe 13:22) Soti mneneli Danieli enze “munthu wokondewa ngako” na Yehova.—Danieli 9:23.

3. Ndaŵa yanji Abulahamu, Davide, na Danieli enze azishamwali a Yehova?

³ Kansi Abulahamu, Davide na Danieli enkhala tyani azishamwali a Yehova? Yehova euja Abulahamu kuti: “Wewo wamvwila mawu ŵangu.” (Genesis 22:18) Yehova onkhala shamwali wa ŵala omumvwila molichefya. N’vokwanishika ntundu wonse wa ŵanthu kunkhala pa ushamwali na Yehova. Yove euja ntundu wa Aisiraeli kuti: “Mukomvwila mawu ŵangu, soti ninkhale Mulungu wanu, mwewo munkhale ŵanthu ŵangu.” (Yeremiya 7:23) Keno mwewo mukomvwila Yehova munkhale shamwali wake.

4, 5. Kansi Yehova oteteza tyani azishamwali ŵake?

⁴ Baibolo yunena kuti Yehova osakila njila “kuti aoneshe mphamvu zake kuli ŵanthu amene ntima wawo ni wamphumbulu kuli yove.” (2 Mbiri 16:9) Pa lemba ya Salimo 32:8, Yehova olonjeza azishamwali ŵake kuti: “Nikupase  nzelu nokulangiza njila yakuti uyendemo. Nikupase malangizo nokuyanganila.”

⁵ Pali mdani wamphamvu wamene ofuna kutitaisha ushamwali wasu na Mulungu. Koma Yehova ofunishisha kutiteteza. (Ŵelengani Salimo 55:22.) Monga azishamwali a Yehova, tumutumikila na ntima wasu wonse. Tunkhala okhulupilika kuli yove olo kuti tukumana na mavuto. Komasoti tili na chidalilo n’nga ni chenze nacho wamasalimo. Polaŵila za Yehova yove elemba kuti: “Poziŵa kuti ali kukwanja ngayo yangu, ninyang’anyike lini.” (Salimo 16:8; 63:8) Kansi Satana oyeja tyani kutitaisha ushamwali wasu na Mulungu?

6. Kansi Satana onena chinji vokhuza ŵanthu?

⁶ M’Mutu 11 tiphunzila kuti Satana eshusha Yehova soti elaŵila kuti ni wawenye komasoti aliye chilungamo chifukwa chosalola Adamu na Hava kulisankhila ŵeka chinthu chiweme na chiipa. Buku ya m’Baibolo ya Yobu yutiuja kuti Satana onena kuti azishamwali a Mulungu omutumikila chifukwa chadyela, osati chifukwa chomukonda. Satana olaŵilasoti kuti angachose aliyense ku mbali ya Mulungu. Tiyeni tiwone vatingaphunzile kuli Yobu na mwechimutetezela Yehova.

7, 8. (a) Kansi Yehova enzemuwona tyani Yobu? (b) Kansi Satana elaŵila chinji vokhuza Yobu?

⁷ Kansi Yobu enzeŵani? Yobu enze munthu muweme wamene enkhalako vyaka pafupi-fupi 3.600 vapita. Yehova elaŵila kuti pa nthawe yamene iyo penzeve munthu enze n’nga ni Yobu pano pachalo. Yobu enzelemekeza ngako Mulungu soti enzezonda vinthu viipa. (Yobu 1:8) Kulaŵila chendi, Yobu enze shamwali wapantima wa Yehova.

⁸ Satana elaŵila kuti Yobu enzetumikila Mulungu chifukwa cha dyela. Satana euja Yehova kuti: “Kansi mwewo  muliye muchingilije yove? Mwachingilija soti ng’anda yake na chilichonse chali nacho. Mwadalisa ntchito ya manja ŵake ndipo vifuwo vake vapaka ngako pano pachalo. Koma lomba tambululani kwanja yanu nokhuza vonse vali navo, soti muwone, akutukileni m’menso muli to.”—Yobu 1:10, 11.

9. Kansi Yehova elola Satana kuti achite chinji?

⁹ Satana elaŵila kuti Yobu otumikila Yehova chifukwa cha vinthu viweme venzemupasa. Satana elaŵilasoti kuti angakwanishe kumulekesha Yobu kutumikila Yehova. Yehova eziŵa kuti wamene uyu ni wenye, ndipo Yove elola kuti Satana ayese Yobu kuti awone keno enzemutumikila chifukwa chomukonda olo chifukwa cha dyela.

10. Kansi Satana emuyesa tyani Yobu, lomba Yobu echita chinji?

¹⁰ Poyamba, Satana epaya vifuwo vonse va Yobu. Pavuli pake epaya a ntchito anyinji a Yobu. Vonse venze navo Yobu vwonongeka. Posilijila pake, Satana epaya ŵana 10 a Yobu na chimphepo chankuntho. Koma Yobu enkhala wokhulupilika kwa Yehova. “M’vinthu vonse vamene ivi Yobu aliye chimwe, olo kulaŵila kuti Mulungu wachita vosayenela.”—Yobu 1:12-19, 22.

11. (a) Kansi n’chinji chiyakine chechichita Satana kwa Yobu? (b) N’nga Yobu echita chinji?

¹¹ Satana aliyelekele pamene apo. Yove eshusha Mulungu polaŵila kuti: “Khuzani mnyomfu wake mpaka ku vifupa vake, ndipo muwone, akutukileni m’menso muli to.” Tetyo Satana eleta nthenda yoŵaŵa pa muŵili wa Yobu. (Yobu 2:5, 7) Yobu epitilija kunkhala wokhulupilika kwa Yehova. Yove elaŵila kuti: “Mpaka kufwa kwangu newo, nisiye lini kunkhala na ntima wosayaŵanika!”—Yobu 27:5.

12. Kansi Yobu ewonesha tyani kuti Satana ni wawenye?

¹² Yobu enzeziŵa lini venzenena Satana vokhuza yove komasoti aliyeziŵe chifukwa chake enzevutika. Yove enzeganiza  kuti Yehova niye enzechitisha mavuto amene awo. (Yobu 6:4; 16:11-14) Koma olo n’tetyo, Yobu epitilija kunkhala wokhulupilika kwa Yehova. Kukhulupilika kwa Yobu kwiwonesha kuti enzetumikila Mulungu chifukwa chomukonda osati chifukwa cha dyela. Vechilaŵila Satana viwonekelatu kuti venze vawenye.

13. Kansi penkhala vokonkhapo votyani chifukwa cha kukhulupilika kwa Yobu?

¹³ Olo kuti Yobu enzeziŵa lini venzechitika kululu, enkhala wokhulupilika kwa Mulungu soti ewonesha kuti Satana ni muipa. Yehova edalisa Yobu chifukwa chopitilija kunkhala wokhulupilika.—Yobu 42:12-17.

14, 15. Kansi Satana olaŵila chinji vokhuza ŵanthu onse?

¹⁴ Mungaphunzilepo vinthu vofunika ngako pali vinthu vichitikila Yobu. Olo masiku ŵano, Satana olaŵila kuti tutumikila Yehova chifukwa cha dyela. Pa lemba ya Yobu 2:4, Satana elaŵila kuti: “Munthu angalole kutwala chinthu chilichonse chali nacho kuti apulumushe moyo wake.” Tetyo Satana olaŵila kuti ŵanthu onse, analume na anakazi, osati Yobu yeka, otumikila Mulungu chifukwa cha dyela. Vyaka mahandiledi pavuli pakuti Yobu wafwa, Satana enze akalinyoza Yehova na kushusha atumiki ŵake. Mwachisanzo, pa lemba ya Miyambo 27:11, tuŵelenga kuti: “Mwana wangu, nkhala wanzelu ukondweleshe ntima wangu, kuti nimuyankhe wala onitonja [olo, kuti oninyoza].”

¹⁵ Mungasankhe kumvwila Yehova nonkhala shamwali wake wokhulupilika kuti muwoneshe kuti Satana ni wawenye. Olo kuti mufunikila kuchinja mbali ziyakine pa moyo wanu kuti munkhale shamwali wa Mulungu, ichi n’chosankha chiweme ngako kupambana chosankha chilichonse chamungachite. Chosankha chamene ichi ni nkhani yofunika ngako. Satana olaŵila kuti mwewo mungankhale lini wokhulupilika kwa Mulungu keno mwakumana na  mavuto. Oyeja kutinyengelela kuti osati tinkhale okhulupilika kwa Mulungu. Kansi ochita tyani vamene ivi?

16. (a) Kansi ni njila zotyani zakukatishila ntchito Satana pofuna kutilesha kutumikila Yehova? (b) Kansi muganiza kuti Mdyelekezi angakatishile ntchito njila yotyani pofuna kukuleshani mwewo pamweka kutumikila Yehova?

¹⁶ Satana okatishila ntchito njila zosiyana-siyana na cholinga chofuna kusokoneza ushamwali wasu na Mulungu. Yove otiukila “n’nga ni mphondolo yuwuluma, yufunishisha kuti ilye muyakine.” (1 Petulo 5:8) Osadabwa keno ayanu, ŵanthu a m’banja mwanu, olo ŵanthu ayakine oyeja kukuleshani kuti osati mukophunzila Baibolo komasoti kuchita vinthu viweme. Vamene ivi vingakuchitisheni kuwona n’nga kuti mutamana. * (Yohane 15:19, 20) Satana oliyalushasoti kunkhala monga ni “mngelo wa kungweleŵela.” Tetyo angayeje kutinyengelela mochenjela kuti tileke kumvwila Yehova. (2 Akorinto 11:14) Njila iyakine yakukatishila ntchito Satana pofuna kutilesha kutumikila Yehova ni kutichitisha kuliwona kuti nise atyala-tyala m’menso mwa Mulungu.—Miyambo 24:10.

17. Ndaŵa yanji tufunika kumvwila Yehova?

¹⁷ Keno tumvwila Yehova, tuwonesha kuti Satana ni wawenye. Kansi n’chinji chingatiyavye kunkhala omvwila? Baibolo yunena kuti: “Ukokonda Yehova Mulungu wako na ntima wako wonse, moyo wako wonse, na mphamvu zako zonse.” (Deuteronomo 6:5) Tumvwila Yehova chifukwa chakuti tumukonda. Chikondi chasu kwa Yehova chikakula, tinkhale ofunishisha kumvwila malamulo ŵake  onse. Ntumwi Yohane elemba kuti: “Kukonda Mulungu kutanthauza kusunga malamulo ŵake; soti malamulo ŵake oŵeŵesha lini.”—1 Yohane 5:3.

18, 19. (a) Kansi ni vinthu viyakine votyani vakutiuja Yehova kuti ni viipa? (b) Kansi tuziŵa tyani kuti Yehova otisenga lini kuchita vinthu vatingaleke kwanisha?

¹⁸ Kansi ni vinthu viyakine votyani vakutiuja Yehova kuti ni viipa? Visanzo viyakine vili m’kabokosi kakuti “ Mukozonda Vinthu Vakuzonda Yehova.” Poyamba, mungaganizile kuti vinthu vamene ivi ni viipa lini ngako. Koma mukaŵelenga mavesi a m’Baibolo noŵaganizila ngako, muwone kuwama komvwila malamulo a Yehova. Mungawonesoti kuti mufunikila kuchinja mbali ziyakine pa moyo wanu. Olo kuti kuchita vamene ivi kungankhale kovuta nthawe ziyakine, kuchinja minkhalidwe yanu kuchitishe kuti munkhale na ntendele wamuntima komasoti chimwemwe chamene chuwela chifukwa chonkhala okhulupilika kwa Mulungu. (Yesaya 48:17, 18) Kansi tuziŵa tyani kuti vingakwanishike kuchinja minkhalidwe yasu?

 ¹⁹ Yehova otisengalini kuti tikochita vinthu vatingaleke kwanisha kuchita. (Deuteronomo 30:11-14) Monga shamwali wasu ngaye-ngaye, yove otiziŵa luweme kupambana mwatuliziŵila seka. Yove oziŵa vatingakwanishe kuchita na vatingakangiwe. (Salimo 103:14) Ntumwi Paulo enena mfundo yotang’isha yakuti: “Mulungu ni wokhulupilika, soti alole lini kuti muyesewe kufwika pamungaleke kukwanisha kuchiŵilila, koma pamukumana na mayeselo amene aŵa yove apeleke njila yopulumukila kuti mukwanishe kuŵachiŵilila.” (1 Akorinto 10:13) Tingankhale na chidalilo chakuti nthawe zonse Yehova atipase mphamvu kuti tikwanishe kuchita vinthu viweme. Yove akupaseni “mphamvu yopambana yachibadwa” kuti ikuyavyeni kuchiŵilila mayeselo. (2 Akorinto 4:7) Pavuli powona mwechimuyavyila Yehova pa nthawe ya mayeselo, ntumwi Paulo elaŵila kuti: “Pa vinthu vonse, nupeza mphamvu kufumila kuli wala onipasa mphamvu.”—Afilipi 4:13.

20. Kansi ni minkhalidwe yotyani yamufunika kukonkheja, ndipo ndaŵa yanji?

²⁰ Keno tufuna kunkhala shamwali wa Yehova, tufunika kuleka kuchita vinthu vakunena Yehova kuti n’viipa. Koma palisoti viyakine vatufunika kuchita. (Aroma 12:9) Azishamwali a Mulungu okonda vinthu vakukonda yove. Vinthu vakukonda Mulungu vafotokozewa pa lemba ya Salimo 15:1-5. (Ŵelengani.) Azishamwali a Yehova okonkheja minkhalidwe yake nowonesha “chikondi, chimwemwe, ntendele, kuleza ntima, kuwama mtima, ubwino, chikhulupililo, kusisikaniya na kulilesha.”—Agalatiya 5:22, 23.

21. Kansi mungaphunzile tyani kuwonesha minkhalidwe yakukonda Mulungu?

²¹ Kansi mungaphunzile tyani kuwonesha minkhalidwe iweme yamene iyi? Mufunika kuziŵa vinthu vakukonda Yehova mwa kuŵelenga nophunzila Baibolo nthawe zonse. (Yesaya 30:20, 21) Keno mukochita vamene ivi, chikondi chanu pa Yehova chikule, soti chikondi chamene ichi chikakula, munkhale ofunishisha kumvwila malamulo ŵake.

22. Kansi pangankhale vokonkhapo votyani keno mumvwila Yehova?

²² Vinthu vamungafunikile kuchinja pa moyo wanu vingalinganijiwe na kuvula vovwala vakale novwala vanyowani. Baibolo yunena kuti mufunika “kuvula umunthu wakale” novwala “umunthu wanyowani.” (Akolose 3:9, 10) Olo kuti kuchita vamene ivi kungankhale kovuta, keno tachinja nomvwila Yehova, yove otilonjeza kutipasa “madaliso anyinji.” (Salimo 19:11) Sankhani kumvwila Yehova nowonesha kuti Satana ni wawenye. Tumikilani Yehova, osati chifukwa cha madaliso a kusogolo, koma chifukwa cha chikondi chosalikonda. Mukachita tetyo, munkhale shamwali ngaye-ngaye wa Mulungu!