Mutu 19
Pitilijani kunkhala pafupi na Yehova
1, 2. Kasi tingachifwane kuni chitetezo masiku ŵano?
GANIZILANI kuti muyenda mu msewu ndipo kuli chimphepo champhamvu. Kululu kwachita mfinzi chifukwa cha mikumbi. Tuleza tuyamba kucheluka, soti kumvwika kugunda, pavuli pake mvula yuyamba kulokwa! Musakila-sakila malo akuti muloshe. Mukumvwa bwino kuti mwapeza malo aweme oloshamo.
2 Sewo nase tunkhala mu nthawe yulingana na ya chimphepo. Vinthu pachalo vuipila-ipila. Payakine mungalikonshe kuti, ‘Ni kuni kwaningafwane chitetezo?’ Wamasalimo elemba kuti: “Nikauje Yehova kuti: ‘Mwewo nimwe pothaŵila pangu na malo ŵangu achitetezo, Mulungu wangu wanukhulupilila.’” (Salimo 91:2) Kulaŵila chendi, Yehova angatiyavye pa mavuto ŵatukumana nawo palipano, soti otipasa chiyembekezo chiweme cha kusogolo.
3. Kansi tingachite tyani kuti Yehova ankhale malo ŵasu achitetezo?
3 Kansi Yehova angatiteteze tyani? Yove angatiyavye kupilila mavuto ŵatukumana nawo, soti yove ni wamphamvu ngako kupambana munthu aliyense wamene angatichitile vinthu viipa. Olo kuti vinthu viipa vitichitikile palipano, tingankhale osimikijila kuti Yehova akawamyesoti vinthu kusogolo. Baibolo yutilimbikisa kuti: “Pitilijani kuchita vinthu vingachitishe kuti Mulungu akokukondani.” (Yuda 21) Tufunika kupitilija kunkhala pafupi na Yehova kuti atiyavye tikakumana na mavuto. Kansi tingachite tyani vamene ivi?
MUKOWONESHA KUTI MUMUKONDA MULUNGU
4, 5. Kansi Yehova ewonesha tyani chikondi chake kuli sewo?
4 Kuti tipitilije kunkhala pafupi na Yehova, tufunikila kuziŵa mwawawoneshela chikondi chake kuli sewo. Ganizilani vinthu vonse vawatichitila Yehova. Yove watipasa chalo chiweme soti watipasa vimiti na nyama zosangalasa. Watipasa soti vakulya viweme na manzi. Kupitila m’Baibolo, Yehova watiphunzisa za zina yake na minkhalidwe yake iweme. Kupambana vonse, etiwonesha chikondi chake pechitumija Mwana wake wokondewa, Yesu, pano pachalo kuzatifwela. (Yohane 3:16) Ndipo chifukwa cha nsembe yamene iyo, tili na chiyembekezo cha moyo uweme kusogolo.
5 Yehova watipasa Ufumu Waumesiya, boma ya kululu yamene ikuti izasilije mavuto onse kwalombapano. Ufumu wamene uyu ukapange chalo kunkhala paladaiso, mwamene aliyense azankhale mwantendele komasoti mosangalala mpaka kale-kale. (Salimo 37:29) Njila iyakine yawatiwoneshela chikondi chake Yehova ni kutiphunzisa mwatingankhalile na moyo uweme palipano. Watiujasoti kuti tikopemphela kuli yove, ndipo ni wokonzeka kumvwishila mapemphelo ŵasu. Yehova wawonesha patuŵa chikondi chake kuli aliyense wa sewo.
6. Kansi mungawoneshe tyani kuti mutembeja chikondi cha Yehova?
6 Kansi mungawoneshe tyani kuti mutembeja chikondi cha Yehova? Oneshani kutembeja pa vinthu vonse vawakuchitilani. Ni vomvwisha chisoni kuti ŵanthu anyinji masiku ŵano otembejalini. Umu niye mwevenzele, Yesu penze pano pachalo. Pa nthawe iyakine, Yesu epojeka ŵanthu 10 a mankhutu, koma yumo tyala niye ewela kuzamutembeja. (Luka 17:12-17) Tufunika kunkhala monga ni wala munthu ejokela kuzatembeja Yesu. Tufunikila kutembeja Yehova nthawe zonse.
7. Kansi chikondi chasu kwa Yehova chufunika kunkhala chikulu tyani?
7 Tufunikasoti kuwonesha chikondi chasu kwa Yehova. Yesu euja ophunzila ŵake kuti ofunika kukonda Yehova na ntima wawo wonse, moyo wawo wonse, na maganizo ŵawo wonse. (Ŵelengani Mateyu 22:37.) Kansi vamene ivi vutanthauza chinji?
8, 9. Kansi tingamuwoneshe tyani Yehova kuti tumukonda?
8 Kansi kulaŵila tyala kuti tukonda Yehova ni kokwanila? Yayi. Keno tukonda Yehova na ntima wasu wonse, moyo wasu wonse, na maganizo ŵasu wonse, tiwoneshe chikondi chasu mu vochita vasu. (Mateyu 7:16-20) Baibolo yutiphunzisa momvwika bwino kuti keno tukonda Mulungu, tikomvwila malamulo ŵake. Kansi kuchita vamene ivi n’kovuta? Yayi, chifukwa chakuti “malamulo a Yehova oŵeŵeshalini.”—Ŵelengani 1 Yohane 5:3.
9 Keno tumvwila Yehova, tunkhala na moyo wosangalala komasoti wokhutilisha. (Yesaya 48:17, 18) Koma kansi ni chinji chingatiyavye kupitilija kunkhala pafupi na Yehova? Tiyeni tiwone.
PITILIJANI KUVWENDELA PAFUPI NA YEHOVA
10. Ndaŵa yanji mufunika kupitilija kuphunzila za Yehova?
10 Kansi mwenkhala tyani shamwali wa Yehova? Kupitila mukuphunzila kwanu Baibolo, mwefwika pomuziŵa bwino Yehova soti mwekulisha ushamwali wanu na yove. Ushamwali wamene uyu uli monga nimulilo wamufunikila kusonkhela kuti upitilije kuyaka. Monga nimulilo wamene ufunikila nkhuni kuti upitilije kuyaka, mufunika kupitilija kuphunzila za Yehova kuti ushamwali wanu na yove upitilije kunkhala wotang’a.—Miyambo 2:1-5.
Monga nimulilo ufuna kusonkhelewa, chikondi chanu kwa Yehova chufunika kusonkhelewa kuti chipitilije kuyaka
11. Kansi vinthu vamuphunzila m’Baibolo vingakhuze tyani ntima wanu?
11 Mukapitilija kuphunzila Baibolo, muziŵe vinthu viti vikufwikeni pa ntima. Ganizilani mwechimvwila ophunzila aŵili a Yesu, penzeŵafotokozela maulosi a m’Baibolo. Ove eyamba kuujana kuti: “Kansi ni palalini mitima yasu yenzetutumila penzelaŵila nase munsewu, notifotokozela malemba momvwika bwino?”—Luka 24:32.
12, 13. (a) Kansi ni chinji chingachitikile chikondi chasu kwa Mulungu? (b) Kansi tingachite tyani kuti chikondi chasu kwa Yehova osati chizimwe?
12 Monga mwechikhuziliwa mitima ophunzila a Yesu pechimvwisha Malemba, payakine namwe mwenkhala osangalala pemwiyamba kuimvwisha Baibolo. Ivi vekuyavyani kuziŵa Yehova nomukonda. Osalola kuti chikondi chamene ichi chizimwe.—Mateyu 24:12.
13 Mukangonkhala shamwali wa Mulungu, mufunikila kuchita nthina kuti ushamwali wanu upitilije kunkhala wotang’a. Mufunika kupitilija kuphunzila za Mulungu na Yesu nosinkha-sinkha vamuphunzila nowona mwamungavikatishile ntchito pa moyo wanu. (Yohane 17:3) Pamuŵelenga olo kuphunzila Baibolo, mufunikila kulikonsha kuti: ‘Kansi vamene ivi vuniphunzisa chinji polaŵila za Yehova Mulungu? Ndaŵa yanji nufunika kumukonda na ntima wangu wonse na moyo wangu wonse?’—1 Timoteyo 4:15.
14. Kansi pemphelo ingatiyavye tyani kuti ushamwali wasu na Yehova unkhale wotang’a?
14 Keno muli na shamwali wanu wapantima ndipo mulaŵila naye nthawe zonse ivi vuchitisha kuti ushamwali wanu upitilije kunkhala wotang’a. Molingana na vamene ivi, keno tulaŵila na Yehova nthawe zonse m’pemphelo, chikondi chasu pali yove chunkhala chotang’a. (Ŵelengani 1 Atesalonika 5:17.) Pemphelo ni mphaso iweme yofumila kuli Atata ŵasu onkhala kululu. Tufunika kulaŵila naye nsiku zonse mofumila pansi pa ntima. (Salimo 62:8) Tufunikalini kuchita mapemphelo ochitaloŵeza, koma tufunika kusenga vinthu ngavo-ngavo vatufuna. Keno tupitilija kuphunzila Baibolo nopemphela kufumila pansi pa ntima, ushamwali wasu na Yehova unkhale wotang’a.
MUKOUJAKO AYANU ZA YEHOVA KOMASOTI MUKOSONKHANA
15, 16. Kansi ntchito youjako ayanu uthenga uweme ingakupindulisheni tyani?
15 Keno tufuna kupitilija kunkhala pafupi na Yehova, tufunikasoti kuujako ayasu za chikhulupililo chasu. Kuujako ayasu za chikhulupililo chasu ni mwayi ukulu ngako. (Luka 1:74) Ni udindo wapadela wechipeleka Yesu kuli Akhilisitu onse achendi. Aliyense wa sewo ofunika kuujako ayakine za uthenga uweme wa Ufumu wa Mulungu. Kansi mweyamba kale kuchita vamene ivi?—Mateyu 24:14; 28:19, 20.
16 Ntumwi Paulo ewona kuti kuujako ayasu uthenga uweme ni chinthu chamtengo wapatali; soti elaŵila kuti ni “chuma” kuli yove. (2 Akorinto 4:7) Kuujako ayasu za Yehova na cholinga chake ni ntchito iweme ngako yamungachite. Yehova owona ntchito yamene iyi yomutumikila kunkhala yofunika ngako. (Aheberi 6:10) Kuujako ayasu uthenga uweme kungankhale kopindulisha kuli mwewo na kwa ŵala okumvwishilani. Mukachita tetyo mwewo na ŵala okumvwishilani muvwendele pafupi na Yehova komasoti mukalondele moyo wosasila. (Ŵelengani 1 Akorinto 15:58.) Kansi pali ntchito iyakine iliyonse yamene ingakukondwelesheni?
17. Ndaŵa yanji ntchito yolalikila yufunikila kuchitika mokulumija?
17 Ntchito yolalikila uthenga uweme yufunika kuchitika mokulumija. Tufunika “kulalikila mawu,” soti tufunika “kulalikila molipeleka.” (2 Timoteyo 4:2) Ŵanthu ofunika kuziŵa vinthu vokhuza Ufumu wa Mulungu. Baibolo yunena kuti: “Nsiku ikulu ya Yehova ili pafupi. Ili pafupi soti ikuza mokulumija ngako.” Mapeto “achelwelini.” (Zefaniya 1:14; Habakuku 2:3) Eye, lombapano Yehova akuzawononga chalo chiipa cha Satana. Ivi vikaliyechitika, ŵanthu ofunikila kuchenjejewa kuti asankhe ŵeka kutumikila Yehova olo yayi.
18. Ndaŵa yanji tufunika kulambila Yehova pamozi na Akhilisitu achendi?
18 Yehova ofuna kuti tikomulambila pamozi na Akhilisitu achendi. Baibolo yunena kuti: “Ndipo tiyeni tiganizilane kuti titang’ishane pa chikondi na ntchito ziweme. Osaleka kusonkhana pamozi, monga ni mwakuchitila ayakine achiyoloŵezi chosafwika pa misonkhano. Koma tiyeni titang’ishane, soti tiyangijile kuchita vamene ivi, makamaka pamuwona kuti nsiku yamene iyo yuvwendela.” (Aheberi 10:24, 25) Tufunika kuchita vilivonse vatingakwanishe kuti tikopezeka pa misonkhano yonse. Misonkhano yutipasa mwayi uweme wotang’ishana muyake na muyake.
19. Kansi n’chinji chingakuyavyeni kukonda abale na alongo Achikhilisitu?
19 Keno mupezeka pa misonkhano, mufwane ayanu aweme amene angakuyavyeni kulambila Yehova. Mukumane na abale na alongo osiyana-siyana ali monga ni mwewo, amene oyeja-yeja kuchita vilivonse vangakwanishe kuti alambile Yehova. Nawo aliye ungwilo monga ni mwewo soti olakwa nthawe ziyakine. Keno akulakwilani, nkhalani okonzeka kuŵakhululukila. (Ŵelengani Akolose 3:13.) Nthawe zonse mukowona minkhalidwe iweme ya abale na alongo Achikhilisitu, kuchita tetyo, kukuyavyeni kuŵakonda soti muvwendele pafupi na Yehova.
MWEWO MUNGANKHALE OSANGALALA MPAKA KALE-KALE
20, 21. Kansi “moyo ngawo-ngawo” n’chinji?
20 Yehova ofuna kuti azishamwali ŵake onse ankhale na moyo uweme. Baibolo yuphunzisa kuti moyo watili nawo lomba uzankhale wosiyana na moyo wati tizankhale nawo kusogolo.
Yehova ofuna kuti muzasangalale na “moyo ngawo-ngawo.” Kansi mwewo muufuna?
21 Tizankhale na moyo wosasila kusogolo osati kunkhala tyala vyaka 70 olo 80. Tizasangalale na “moyo wosasila” na thanzi yangwilo, ntendele, na chikondi m’paladaiso. Uyu niye wayunena Baibolo kuti “moyo ngawo-ngawo.” Yehova olonjeza kutipasa moyo ngawo-ngawo, koma tufunika kuchita vilivonse vatingakwanishe lomba teti kuti “tiukate na mphamvu” moyo wamene uyu.—1 Timoteyo 6:12, 19.
22. (a) Kansi “tingaukate tyani na mphamvu moyo ngawo-ngawo”? (b) Ndaŵa yanji tingakwanishelini kuugula moyo wosasila?
22 Kansi “tingaukate tyani na mphamvu moyo ngawo-ngawo”? Tufunikila “kuchita vinthu viweme” komasoti “kunkhala olemela pa ntchito ziweme.” (1 Timoteyo 6:18) Ivi vutanthauza kuti tufunika kukatishila ntchito vinthu vatuphunzila kufumila m’Baibolo. Koma moyo ngawo-ngawo udalilalini tyala pa kuyeja-yeja kwasu. Tingaugulelini moyo wosasila. Ni mphaso yamahala yakupeleka Yehova kuli atumiki ŵake okhulupilika komasoti ni “kuwama ntima kwake kukulu.” (Aroma 5:15) Atata ŵasu onkhala kululu ni ofunishisha kupasa atumiki ŵake okhulupilika mphaso yamene iyi.
23. Ndaŵa yanji mufunika kupanga vosankha vanzelu lomba teti?
23 Likonsheni kuti, ‘AmKansi nulambila Mulungu mu njila yovomelejeka?’ Keno mwawona kuti mufunika kuchinja mbali ziyakine, mufunika kuchita vamene ivi lomba teti. Keno tudalila Yehova nochita vilivonse vatingakwanishe pomumvwila, yove ankhale malo ŵasu achitetezo. Yehova oteteza atumiki ŵake okhulupilika m’masiku osilija a chalo cha Satana. Pavuli pake Yehova azawonesheshe kuti tankhala na moyo wosasila m’Paladaiso, monga ni mwechilonjezela. Eye, mungankhale na moyo ngawo-ngawo keno mupanga vosankha vanzelu lomba teti!
