“Popemphela, osati ukolaŵila vinthu moweleja-weleja.”—Mateyo 6:7.

Yehova ofunalini kuti tikoweleja mapemphelo ŵatadjaila olo kuŵelenga kufumila m’buku yamapemphelo. Koma ofuna kuti tikolaŵila kufumila mu ntima. Ganizilani mwamungamvwile keno muyanu olaŵila namwe moweleja-weleja mawu ŵamo na ŵamo nsiku iliyonse. Ayanu apantima angachitelini vamene ivi koma omasuka namwe nokuujani va mu ntima mwawo. Keno tupemphela kufumila mu ntima tuwonesha kuti tuwona kuti Atata ŵasu akululu ni muyasu.

“Musenga koma, mulondela lini chifukwa musenga na cholinga chiipa.”—Yakobo 4:3.

Tingayembekezele lini kuti Mulungu amvwe mapemphelo ŵasu keno tusenga vinthu vamene tuziŵa kuti osangalalalini navo. Mwachisanzo, Yehova otichenjeja kuti osati tinkhale na ntima wa dyela olo kukhulupilila mulungu wa mwayi. (Yesaya 65:11; Luka 12:15) Lomba keno munthu otchaya njuga nosenga kwa Mulungu kuti achite mwayi! Kansi Mulungu angayankhe pemphelo yamene iyo? Ni vosachita kukonsha kuti angayankhelini pemphelo yotetyo. Koma kuti Mulungu ayankhe mapemphelo ŵasu, tufunika kusenga vinthu mokatijana na vayunena Baibolo.

 “Munthu wamene othaŵisha kwatu yake kuti osati amvwe chilamulo—olo pemphelo yake yunkhala iipa.”—Miyambo 28:9.

Nthawe yakuvuli, Mulungu enzeyankhalini mapemphelo a ŵanthu amene enzemvwilalini malamulo ŵake. (Yesaya 1:15, 16) Mulungu aliye chinje. (Malaki 3:6) Keno tufuna kuti Mulungu akoyankha mapemphelo ŵasu, tufunika kuchita vonse vatingakwanishe kuti tikomvwila malamulo ŵake. Lomba tyani keno kuvuli uku tichita vinthu viyakine viipa? Kansi vamene ivi vutanthauza kuti Yehova angamvwishilelini soti mapemphelo ŵasu? Yayi! Mulungu azatikhululukile tikachinja noyeja-yeja kuchita vinthu vamene vumukondwelesha.—Machitidwe 3:19.