Kansi Mulungu akumvwa mapemphelo ŵasu?
Kansi mweyamba mwaganilapo kuti Mulungu akumvwa lini mapemphelo ŵanu? Keno ntetyo, ziŵani kuti ni mwewo lini mweka. Ŵanthu anyinji esengapo kale Mulungu kuti aŵayavye pa mavuto ŵawo koma aliye sile. Kansi vamene ivi vutanthauza kuti Mulungu omvwishila lini mapemphelo ŵasu? Yayi! Baibolo yutisimikijila kuti Mulungu omvwishila tikopemphela kuli yove mwanjila yoyenelela. Tiyeni tiwone vayunena Baibolo pa nkhani yamene iyi.
MULUNGU OMVWISHILA.
“Mwewo mukumvwa pemphelo, ŵanthu amitundu yonse azawele kuli mwewo.”—Salimo 65:2.
Ŵanthu ayakine olaŵila kuti akumvwa bwino akapemphela olo kuti okhulupilila lini kuti pali muyakine omvwishila. Koma cholinga chapemphelo osati nikungotiyavya tyala kunkhazika ntima pansi tikakumana na mavuto. Baibolo yutisimikijila kuti “Yehova a ali pafupi na onse oyitila pali yove. Yove ali pafupi na onse omuyita muchonadi . . . akamvwe kulila kwawo kosenga thandizo.”—Salimo. 145:18, 19.
Tetyo paliye chifukwa chokayikilila kuti Yehova Mulungu akumvwa mapemphelo a ŵanthu amene omulambila. Yove olaŵila mwachikondi kuti: “Ndipo mwewo muzaniite komasoti muzawele kuli newo mpemphelo, ndipo newo nizakumvwishileni.”—Yeremiya 29:12.
MULUNGU OFUNA KUTI MUKOPEMPHELA KULI YOVE.
“Mukolimbikila kupemphela.”—Aloma 12:12.
Baibolo, yutilimbikisa kuti “tikopemphela mosalekeja” komasoti “tikopemphela pa chochitika chilichonse.” Nivonekelatu kuti Yehova Mulungu ofuna kuti sewo tikopemphela kuli yove.—Mateyo 26:41; Aifenso 6:18.
Ndaŵa yanji Mulungu ofuna kuti tikopemphela kuli yove? Ganizilani ivi: Kansi pali tata wamene angafune lini kuti mwana wake anene kuti “Kansi atata, munganiyavyeko”? Nichendi kuti tata wamene uyo angankhale kuti oziŵa kale vakufunikila mwana wake. Koma akamvwa mwana osenga thandizo vuwoneshelatu kuti mwana wamene oyo oŵadalila atata ŵake. Molingana na vamene ivi, tikopemphela kwa Yehova Mulungu tuwonesha kuti tumudalila ndipo tufuna kukatijana naye.—Miyambo 15:8; Yakobo 4:8.
MULUNGU OKUKONDANI.
“Mukochita vamene ivi pamumutulila nkhaŵa zanu zonse, chifukwa okufunilani viweme.” —1 Petulo 5:7.
Mulungu ofuna kuti sewo tikopemphela kuli yove chifukwa otikonda komasoti otidela nkhaŵa. Yove oziŵa luweme nkhaŵa zasu, ndipo ofunishisha kutiyavya.
Nthawe zonse mfumu Davide enzepemphela kwa Yehova pofuna kusenga thandizo, kumuuja maganizo ŵake, komasoti mwenzemvwila. (Salimo 23:1-6) Kansi Mulungu enzemuwona tyani Davide? Yove enzemukonda ndipo enzemwvishila mapemphelo ŵake onse. (Machitidwe 13:22) Mulungu omvwishila soti mapemphelo ŵasu, chifukwa yove otikonda.
“NTIMA WANGU NI WOZULA NA CHIKONDI NDAŴA YEHOVA WAMVWA MAWU ŴANGU”
Mawu amene aŵa elembewa na munthu muyakine wamene elemba nawo Masalimo a m’Baibolo. Yove enzekayikila lini kuti Mulungu enzekumvwa mapemphelo ŵake. Vamene ivi vemuyavya kunkhala pawushamwali wotang’a na Mulungu.—Masalimo 116:1-9.
Tikokhulupilila na ntima wonse kuti Mulungu akumvwa mapemphelo ŵasu tizapitilije kupemphela pafupi-pafupi kuli yove. Chisanzo pa nkhani yamene iyi ni Pedro, wamene onkhala kumpoto kwa chalo cha Spain. Mwana wake wa vyaka 19, echifwa pa ngozi yapa msewu. Pedro echimvwa chisoni ngako ndipo ewuja Mulungu vonse vamuntima mwake. Emusenga soti moweleja-weleja kuti akomutang’isha komasoti kumuyayva. Lomba kansi nchinji chechitika? Pedro enena kuti: “Yehova eyankha mapemphelo ŵangu pokatishila ntchito Akhilisitu ayasu kuti akotitang’isha komasoti kutiyavya newo na mkazi wangu.”
Nthawe zinyinji Mulungu oyankha mapemphelo ŵasu pokatishila ntchito ayasu kuti akotitang’isha komasoti kutiyavya
Nichendi kuti mapemphelo aliye yavye mwana wa Pedro kuti ankhale soti na moyo, koma eyavya Pedro na banja yake munjila ziyakine zofunika. Mwanakazi wake zina yake María Carmen, enena kuti: “Kupemphela kweniyavya kupilila chisoni chenenze nacho. Nenze ziŵa kuti Yehova Mulungu onimvwisha chifukwa nikapemphela kuli yove ntima wangu wenzenkhala m’malo.”
Baibolo komasoti visanzo va ŵanthu ayakine vuwonesha kuti Mulungu akumvwa mapemphelo ŵasu. Koma pali mapemphelo ayakine ŵasayakha Mulungu. Ndaŵa yanji Mulungu oyankha mapemphelo ayakine, koma ayakine yayi?
a Yehova niye zina ya Mulungu.—Salimo 83:18.
