Vinthu vakunena ŵanthu vokhuza kupemphela
“Nikopemphela nikumvwa monga kuti Mulungu ali pa mbali pangu ndipo wanikata kwanja nonisogolela nikawona kuti nasokela.”—MARÍA.
“Mwanakazi wangu emwalila pavuli povutika na kansa kwa vyaka 13. Nukumbukila kuti pa nthawe yamene iyo nenzepemphela kwa Mulungu nsiku iliyonse ndipo nenzewona kuti onimvwishila komasoti kuziŵa mwevenzeniŵaŵila. Nikapemphela nenzefwana ntendele wa muntima.”—RAÚL.
“Pemphelo ni mphaso iweme ngako yechitipasa Mulungu sewo taŵanthu.”—ARNE.
María, Raúl, Arne, komasoti ŵanthu ayakine anyinji owona kuti pemphelo ni mphaso yopatulika. Ove owona kuti akapemphela olaŵila na Mulungu pomutembeja komasoti kusenga kuti aŵayavye. Ove okhulupilila na ntima wonse lonjezo ya m’Baibulo yokhuza pemphelo yakuti: “Sewo tumudalila kuti chilichonse chatingamusenge mokatijana na chifunilo chake otimvwishila.”—1 Yohani 5:14.
Koma ŵanthu anyinji okhulupilila lini bwino-bwino vayunena Baibolo pa nkhani ya pemphelo. Mwachisanzo munthu muyakine zina yake Steve, enena kuti: “Penenze na vyaka 17, ayangu atatu echifwa pa ngozi. Mmozi echifwa pa ngozi ya motoka, pamene ayakine aŵili embila pa nyanja.” Kansi Steve echita tyani? Yove enena kuti: “Nepemphela kwa Mulungu kuti aniyavye kumvwisha vinthu venichitikila, koma aliye niyankhe. Ndipo newona kuti paliye chifukwa chochitila pemphelo.” Ŵanthu anyinji amene owona kuti mapemphelo ŵawo aliye yankhiwe oyamba kuganiza kuti kupemphela nikosayavya.
Ŵanthu ayakine soti ali na vifukwa voŵachitisha kuganiza kuti kupemphela nikosayavya. Mwachisanzo, ayakine olaŵila kuti Mulungu oziŵa vinthu vonse, tetyo yove oziŵa kale vatufunikila komasoti mavuto ŵasu, niye paliye chifukwa chomuujila soti m’pemphelo.
Pamene ayakine okhulupilila kuti Mulungu omvwishila lini mapemphelo ŵawo chifukwa cha vinthu vechiphoniyesha kuvuli. Munthu muyakine zina yake Jenny, enena kuti: “Vuto yangu niyakuti, nechita vinthu vamene nuliimba navo mulandu ndipo nuliwona kuti nine watyala-tyala. Niye nuliuja kuti nine lini woyenelela kuti Mulungu akomvwishila mapemphelo ŵangu.”
Kansi mwewo muyiwona tyani nkhani ya kupemphela? Keno namwe soti mweganizapo molingana na ŵanthu amene aŵa vokhuza pemphelo, musangalale ngako kuziŵa mayankho ŵayupeleka Baibolo oyavya pa nkhani yamene iyi. a Baibolo yufotokoza mfundo zodalilika zokhuza pemphelo ndipo ingakuyavyeni kufwana mayankho amakonsho okonkhapo aŵa:
-
Kansi Mulungu akumvwa chendi mapemphelo ŵasu?
-
Ndaŵa yanji mapemphelo ayakine oyankhiwa lini?
-
Kansi mungachite tyani kuti Mulungu akokumvwa mapemphelo ŵanu?
-
Kansi kupemphela kungakuyavyeni tyani?
a M’Baibolo muli mapemphelo ŵatumiki anyinji a Mulungu, kupamikijapo Yesu Khilisitu. Mmalemba Achihebeli , ŵakunena ŵanthu anyinji kuti chipangano chakale, muli mapemphelo opitilila 150.
Mungakondesoti kuwona izi
VAKUKONSHA ACHILUMBWANA AYANU
Ndaŵa Yanji Nufunika Kupemphela?
Kansi pemphelo ikungoyavya tyala kuti ntima unkhale mmalo, olo payakine yuyavyasoti m’njila ziyakine?
