Chomvwisha chisoni n’chakuti penikwanisha vyaka 13, ushamwali wenenze nawo wotang’a na Yehova wiyamba kuchepa. Ayangu aku sikulu enzewoneka monga ali na ufulu uliye malile, ndipo newo nenzewona kuti nuluza. Niyamba kumvwa kuti malamulo a makolo ŵangu komasoti mfundo za Chikhilisitu ni zovuta ngako, ndipo niyamba kuganiza kuti kutumikila Yehova ni chintchito chikulu ngako. Nthawe zonse nenzekhulupilila kuti Yehova aliko, koma nenzekumvwa kuti nililini naye pa ushamwali.

Koma olo n’tetyo, niliyelekeletu kulalikila koma nenzelalikila mwa apo na apo mwenenze kwanishila. Pakuya mu ulaliki, nenzekonzekelalini olo patontho, koma nenzekungolitang’isha kuti nipitilije kukambilana naye munthu. Ndipo vokonkhapo vake, venze vakuti nenzenkhala niliye maulwendo oweleja olo maphunzilo a Baibolo ndipo nenzewamijiwa nawolini ulaliki, vamene vinichitisha kuti nileke kuikonda ntchito yolalikila. Nenzelikonsha kuti, ‘Kansi munthu angapitilije tyani kulalikila sondo iliyonse komasoti mwezi uliwonse?’

Penikwanisha vyaka 17, nenzefuna kunkhala paneka. Tetyo  nilonga vyola vangu, nofumapo pang’anda, ndipo nifulukila ku Australia. Kuwona newo nufumapo pang’anda chinkhala chinthu chovuta ngako kuli makolo ŵangu. Ove enze na nkhaŵa, koma enzeganiza kuti newo nipitilije kutumikila Yehova.

 Ku Australia, umoyo wangu wa uzimu ŵiloŵelatu pansi ngako. Niyamba kudjomba kumisonkhano. Ninkhala na azishamwali amene molingana na newo, nawo enzefuna kunkhala osangalala ngako, tenzeluta ku misonkhano nchingulo koma pavuli pake noluta kuyakumwa novina usiku. Nikalolesha kuvuli kwanafuma, nuwona kuti nenzechite kwendo imozi mu choonadi iyakine ku chalo, koma kulaŵila chendi nenzekumvwalini kuti nili kumbali iliyonse.

Pavuli pakuti papita vyaka viŵili, mu kanthawe katontho, nichizaziŵa mulongo muyakine wamene mosaziŵa, enichitisha kuti niganizile kwewenzeloŵela moyo wangu. Nenzenkhala mu ng’anda imozi na alongo ayakine 5 amene enze mbeta, ndipo tiita wopanamila dela pamozi na nkazi wake Tamara, kuti ankhale kung’anda kwasu sondo yonse. Ngati mwanalume wake watangwanika na kusamalila vinthu vokhuza mpingo, Tamara enzetola nthawe ikulu ali pamozi na sewo asimbi ndipo tenzeseka pamozi. Nenzekondwela na vameme ivi. Yove enze womasuka ngako ndipo enze wosavuta kulaŵila naye. Ivi venze vodadwisa ngako kuti munthu wamene onkhala wotangwanika na vinthu wauzimu koma n’kunkhalako na nthawe yotandala na sewo.

Tamara enze wolimbikisa ngako. Kukonda kwake choonadi na utumiki vitikhuza ngako. Yove enze wokondwela kupasa Yehova vinthu viweme, koma newo nenzelini wokondwela chifukwa nenzechitalini vinyinji. Nkhalidwe yake iweme komasoti chisangalalo chake ngacho-ngacho vikhuza ngako moyo wangu. Chisanzo chake chinichitisha kuti niganizile pa mfundo yofunika ngako yakuti: “Tumikilani Yehova mokondwela. Welani pamenso pake muŵilikija mosangalala.”​—Sal. 100:2.

Newo nenzefuna kunkhala na ntundu wa chisangalalo monga ni chenzenkhala nacho Tamara, koma kuti nifwane chisangalalo chamene ichi, nenzefunika kuchinja vinthu vinyinji. Niliye chinje lelo na lelo yayi. Koma niyamba kuchinja patontho-patontho. Niyamba kukonzekela pakuya mu utumiki, komasoti kutola upainiya wothandiza pa nthawe pa nthawe. Vamene ivi viniyavya kuti osati nikonkhala wokhumudwa ngako komasoti kuti nikolimvwa  kunkhala wodalilika. Chifukwa chakuti nenzekatishila ntchito ngako Baibolo kaŵili-kaŵili mu utumiki, niyamba kuukonda ngako utumiki. Pakaliye pita nthawe, niyamba kutola upainiya wothandiza mwezi uliwonse.

Niyamba kusalula azishamwali amisinkhu yonse amene enzechita vinyinji potumikila Yehova komasoti amene enzesangalala potumikila Yehova. Chisanzo chawo chiniyavya kuganizila za vinthu vamene ni vofunika ngako pa moyo wangu komasoti kuyamba kuŵelenga Baibolo nsiku iliyonse. Niyamba kusangalala ngako na utumiki, ndipo pamapeto pake niyamba kutumikila monga mpainiya wonkhazikika. Kumayambililo kwa chaka, nilimvwa kunkhala wosangalala komasoti womasuka mumpingo.

Pavuli pakuti papita chaka, nikumana na Alex, yove enze munthu muweme ntima, ndipo enzekonda chendi-chendi Yehova komasoti utumiki. Yove enzetumikila monga ntumiki wothandiza ndipo enze echitako kale upainiya kwa vyaka 6. Alex enze etumikilakosoti ku Malawi kwa kanthawe chifukwa kwenzefunikila ofalisa anyinji. Penze ku Malawi, yove enkhala nthawe ikulu pamozi na amishonale amene enkhala chisanzo chiweme kuli yove ndipo emulimbikisa kuti apitilije kuika kutumikila Yehova pa malo oyamba pa moyo wake.

Mu 2003, newo na Alex tichizalungulana, ndipo kufumila nthawe yamene iyo tipitilija kuchita utumiki wa nthawe zonse. Sewo tiphunzila vinthu vinyinji viweme ngako, ndipo Yehova enzetidalisa mu njila zinyinji.

Mu 2009, tisengewa kuti tikatumikile monga amishonale ku Timor-Leste, ka chalo katontho kamene kali ku nsuwa zaku Indonesia. Tidabwa ngako, tiwamijiwa komasoti tenze na wowa vonse pa nthawe imozi. Pavuli pa miyezi 5, tichizaluta mu tauni ikulu ya mu chalo chamene icho yuitiwa kuti Dili.

Dela yanyowani wenze wovuta ngako kusiyana na kudela yetenze kale. Tenzefunikila kuphunzila chilaŵilo, kudjaila chinkhalidwe, vakulya komasoti malo onkhala. Mu utumiki, nthawe zinyinji  tenzewona ŵanthu osauka ngako, ophunzilako patontho olo payakine aliyephunzileko olo patontho komasoti opondelezewa. Ndipo tiwona ŵanthu anyinji amene enze na mavuto anyinji mwakuthupi kamasoti m’maganizo chifukwa cha nkhondo komasoti chiwawa. *

Utumiki wenze wochitisha chidwi! Mwachisanzo, nsiku iyakine nikumana na msimbi muyakine wa vyaka 13 zina yake Maria *, wamene enze na chisoni. Amayi ŵake enze emwalila vyaka vitontho pavuli pake, ndipo yove enzewona tyala atata ŵake. Molingana na ŵana anyinji a nsinkhu wake, Maria enzeviziŵalini venzefunika kukwanilisha pa moyo wake. Newo nukumbukila nthawe iyakine kuti yove enzelila ponifotokozela mwenzemvwila. Olo n’tetyo, newo nenzekumvwalini venzelaŵila chifukwa nenzechiziŵalini luweme chilaŵilo chake. Nipemphela kwa Yehova, nimusenga kuti aniyavye kuti nimulimbikise, ndipo niyamba kumuŵelengela malemba olimbikisa. Pavuli pa vyaka vitontho, newo niwona choonadi chuchinja minkhalidwe ya Maria, kawonekedwe kake, komasoti moyo wake wonse. Yove echizabatizika, ndipo patunena pano yove ochitisha maphunzilo ŵake a Baibolo. Lelo Maria ali na banja ikulu ya ŵanthu a Yehova ndipo olimvwa kuti yove okondewa.

Yehova wadalisa ntchito yolalikila ku Timor-Leste. Olo kuti anyinji mwa ofalisa ebatizika tyala vyaka 10 vapita, anyinji otumikila monga apainiya, atumiki othandiza olo akulu. Ayakine okata ntchito m’maofesi omasulila ndipo oyavya kupanga chakulya chauzimu mu chilaŵilo cha kudela kwawo. Newo nunkhala wokondwela ngako kuŵamvwa oimba pa misonkhano, kuwona vinso vawo vili vokondwela na kuŵawona kuti onkhala azishamwali a Yehova.

Kunkhala ku Timor-Leste kwenze kosiyana ngako na umoyo waku Australia, koma nenzeganizilakolini za moyo uweme ngako. Nthawe ziyakine tenzekwela mu kabasi katontho koma kozula na ŵanthu, nsomba ziyumu, na mitolo ya ndiyo za matepo za kunsika wa kudela yamene iyo. Masiku ayakine, tenzechitisha phunzilo ya Baibolo mu kang’anda katontho mwamene mwenzenkhala mwakupya, mwenzenkhala mnyontho, pansi pake penze pogedeza na lito ndipo nkhuku zenzekungo pita-pita pafupi na sewo. Koma olo kuti tenzekumana na mavuto, nthawe zinyinji nenzeganiza kuti: ‘Vamene ivi n’vodabwisalini!’

Nikalolesha kuvuli, nutembeja ngako kuti makolo ŵangu echita luweme ngako kuniphunzisa njila za Yehova komasoti kuniyavya, olo pa nthawe yamene ushamwali wangu na Yehova wenze wofoka. Lemba ya Miyambo 22:6 inkhala ya chendi kuli newo. Amama na atata omekela ngako komasoti ni okondwela kuwona Alex pamozi na newo tukatishiliwa ntchito na Yehova. Kuyambila mu 2006 tatumikila mu dela mu gawo ya ofesi ya nthambi ya ku Australia.

Ndipo vuwoneka ngati ni wenye kuti kale newo nenzeikondalini ntchito yolalikila. Lomba nuukonda utumiki! Newo nawona kuti paliye kanthu na mavuto ŵaungakumane nawo pa moyo, chisangalalo ngacho-ngacho chuwela tyala chifukwa chotumikila Mulungu na ntima wonse. N’chendi, pa vyaka 18 vapita vatatumikila Yehova pamo na Alex vankhala vyaka vokondwelesha ngako pa moyo wangu. Newo lomba numvwisha kuti mawu ŵechinena wamasalimo Davide kuuja Yehova ni ŵachendi, akuti: “Onse outukila kuli mwewo azakondwele. Azaŵilikije mokondwela mpaka kale-kale. . . . Okonda zina yanu azakondwele chifukwa cha mwewo.”​—Sal. 5:11.