Ndaŵa yanji Yesu wasala patontho kufwa ekata mawu a Davide amene opezeka pa lemba ya Salimo 22:1?

Mawu osilijila ŵechinena Yesu wasala patontho kufwa, opezeka pa Mateyu 27:46 akuti: “Mulungu wangu, Mulungu wangu, mwanisiilanji newo?” Polaŵila vamene ivi, Yesu ekwanilisha mawu a wamasalimo Davide amene elembewa pa Salimo 22:1. (Mk. 15:34) Kungankhale kuphoniya kunena kuti Yesu ekata mawu amene aŵa chifukwa chokhumudwa olo chifukwa chakuti etaya chikhulupililo chake mwa Yehova kwa kanthawe. Yesu emvwisha chifukwa chechifunikila kufwa, ndipo yove enze wokonzeka kufwa. (Mt. 16:21; 20:28) Yove enzeziŵasoti kuti pa nthawe ya imfwa yake, Yehova enzefunikila kusiya ‘kumuchingilija.’ (Yobu 1:10) Tetyo, Yehova elekeja kumuteteza Yesu, kuti Yesu asimikijile kuti nthawe zonse angapitilije kunkhala wokhulupilika olo imfwa yake inkhale yoŵaŵa ntundu ŵanji.​—Mk. 14:35, 36.

Lomba ndaŵa yanji Yesu elaŵila mawu ali pa salimo yamene iyi? Olo kuti tiliye chisimikijo, tiyeni tikambilane vifukwa viyakine. *

Polaŵila mawu amene aŵa, payakine Yesu esimikijila ngako kuti Yehova aloŵelelepolini pa imfwa yake. Yesu enzefunika kupeleka dipo paliye thandizo ya Yehova. Yove enze munthu ngaye-ngaye ndipo efunikila kufwa kuti “alaŵe imfwa m’malo mwa munthu aliyense.”​—Ahe. 2:9.

Pokata mawu amene ali pa salimo yamene iyi, Yesu enzefuna kuti ayakine aganizile za salimo yonse. M’masiku amene awo, Ayuda enzekonda kusunga m’mutu masalimo anyinji. Pokumbushiwa vesi imozi ya mu salimo, mwachibadwa  ove sembe elimbikisiwa kuganizila salimo yonse. Keno vamene ivi niye venzenavo Yesu m’maganizo, niye kuti eyavya ophunzila ŵake Achiyuda, kukumbukila maulosi anyinji amene opezeka pa salimo yamene iyi okhuza vinthu vichitika pa imfwa yake. (Sal. 22:7, 8, 15, 16, 18, 24) Komasoti, mavesi osilijila a salimo otamanda Yehova ndipo omufotokoza kuti ni Mfumu ya chalo chonse.​—Sal. 22:27-31.

Pokata mawu amene aŵa a Davide, Yesu enzesimikijila kuti enze wosaphoniya. Yesu akaliyepaiwa, efunikila kupilila chiweluzo chiliye chilungamo chamene emuwona kuti ali na mulandu wonyoza Mulungu. (Mt. 26:65, 66) Khoti Ikulu ya Ayuda iwungana mokulumija, mpaka pakati pa usiku, ndipo iweluza mulandu mosakonkheja malamulo. (Mt. 26:59; Mk. 14:56-59) Yesu pechikonsha konsho yakuti, “Mulungu wangu, Mulungu wangu, mwanisiilanji newo?” yove payakine enzeŵakopa chidwi chakuti yove aliyechite chinthu chilichonse chiipa ndipo penzeve chifukwa chilichonse chomupaila.

Yesu enzekumbushasoti ayakine kuti olo kuti Davide, wamene elemba salimo yamene iyi, elolewa kuti atamane, vamene ivi venzetanthauzalini kuti Yehova waleka kumukonda Davide. Konsho ya Davide yutanthauzalini kuti yove enze etaya chikhulupililo mwa Mulungu. Pechikonsha konsho yamene iyi, yove enena kuti enzekhulupilila kuti Yehova angapulumushe ŵanthu ŵake, ndipo Yehova epitilija kumudalisa. (Sal. 22:23, 24, 27) Molingana na vamene ivi, olo kuti Yesu, “Mwana wa Davide,” enzetamana pa chimuti chotamanilapo, venzetanthauzalini kuti Yehova enze eleka kumukonda Yesu.​—Mt. 21:9.

Yesu enzewonesha chisoni chake chikulu chifukwa chakuti Yehova emuchosela chitetezo Chake kuti awoneshe kukhulupilika kwake. Chenzelini cholinga cha Mulungu kuti Mwana wake atamane mpaka kufwa. Vamene ivi venze vofunikila tyala pavuli pakuti Adamu na Hava apanduka. Yesu aliyechite chinthu chilichonse chiipa, koma yove efunikila kutamana komasoti kufwa kuti ayankhe makonsho ŵechiyambisha Satana, nopeleka malipilo okwanila kuti awombole vinthu vechitaya munthu. (Mk. 8:31; 1 Pet. 2:21-24) Vamene ivi sembe vikwanishika tyala pavuli pakuti Yehova wachosa chitetezo chake kwa kanthawe, kamozi tyala pa moyo wake.

Yesu enzeyeja kuyavya ophunzila ŵake kuganizila chifukwa chechilolela Yehova kuti yove afwe pa chimuti chotamanilapo. * Yesu enzeziŵa kuti kufwa imfwa yoteti monga ni chigaŵenga pa chimuti chotamanilapo sembe kwichitisha anyinji kukhumudwa. (1 Akor. 1:23) Kuti ophunzila ŵake eika maganizo pa chifukwa ngacho-ngacho cha imfwa yake, ove sembe emvwisha tanthauzo yake ngayo-ngayo. (Aga. 3:13, 14) Tetyo, ove sembe emuwona monga Mpulumusi osati monga ni chigaŵenga.

Viliye kanthu kuti Yesu enze na chifukwa chotyani polaŵila mawu amene aŵa, yove eziŵa kuti venzekumana navo yenze mbali ya cholinga cha Mulungu kuli yove. Papita kanthawe katontho pavuli pakuti Yesu walaŵila mawu amene ali mu salimo yamene iyi, yove enena kuti: “Nakwanilisha chifunilo chanu!” (Yoh. 19:30; Lk. 22:37) Ni chendi, kuchosewa kwa chitetezo cha Yehova kwa kanthawe kwichitisha kuti Yesu akwanilishe vonse vechitumiwa kuzachita pano pachalo. Komasoti kwimupasa mwayi wokwanilisha vonse vilembewa vokhuza yove “mu Chilamulo cha Mose, mu volemba va Aneneli komasoti mu Masalimo.”​—Lk. 24:44.