1-2. Kansi ni motyani mwatingakonkhele maluwayo ŵa Yesu? Kansi ni chisanzo chotyani chutiyavya kuti timvwishe vamene ivi?

YELEKEZELANI kuti muli m’gulu ya ŵanthu amene ofwamba mu chipululu choyofya ngako ndipo kuli vimiseche. Koma munthu muyakine waluso okusogolelani. Lomba yove pakufwamba, osiya maluwayo mu miseche. Koma papita kanthawe, mwewo mwaleka kumuwona wala munthu okusogolelani! Koma muchitalini wowa. Mmalomwake, mwewo pamozi na ayanu ŵamuli nawo pa ulwendo mukonkha mosamala ngako maluwayo a wala munthu enzekusogolelani!

² Chalo chino chiipa chatunkhala ŵano masiku chili monga ni chipululu choyofya​—ndipo Akhilisitu a chendi ali monga ni gulu ya ŵanthu amene ofwamba mu chipululu. Tutembeja ngako chifukwa chakuti Yehova etipasa Wotisogolela muweme ngako—Mwana wake, Yesu Khilisitu, wamene tingakonkhe maluwayo ŵake mosamala ngako. (1 Pet. 2:21) Mokatijana na buku iyakine yofotokozela Baibolo, apa Petulo olinganija Yesu na wosogolela. Molingana na wosogolela wamene osiya maluwayo kuvuli kwakufuma, Yesu naye esiya maluwayo kuvuli amene sewo tingaŵakonkhe. Lomba tiyeni tikambilane makonsho atatu okhuza kukonkha maluwayo ŵa​—Yesu, tikambilane makonsho akuti: Kansi kukonkha maluwayo ŵa Yesu kutanthauza chinji? Ndaŵa yanji tufunika kuchita vamene ivi? Komasoti kansi tingachite tyani vemene ivi?

3. Kansi kukonkha maluwayo a munthu muyakine kutanthauza chinji?

³ Kansi kukonkha maluwayo a munthu muyakine kutanthauza chinji? M’Baibolo mawu akuti “kufwamba” komasoti “luwayo” nthawe ziyakine otanthauza vakuchita munthu pa moyo wake. (Gen. 6:9; Miy. 4:26) Njila yakuchitilamo vinthu munthu pa moyo wake payakine ingalinganijiwe na maluwayo ŵakusiya yove kuvuli kwakufuma keno ofwamba. Tetyo kukonkha maluwayo a munthu  muyakine kutanthauza kukonkheja chisanzo chake olo kuti, kumukonkheja.

4. Kansi kukonkha maluwayo ŵa Yesu kutanthauza chinji?

⁴ Lomba, kansi kukonkha maluwayo ŵa Yesu kutanthauza chinji? Kufotokoza mwachidule tinganene kuti, kutanthauza kukonkheja chisanzo chake. Lemba pafumila mutu wa ino nkhani, ntumwi Petulo onena tyala za chisanzo chiweme ngako chechisiya Yesu chifukwa yove epilila mavuto; koma olo n’tetyo, pa lemba yamene iyi pali vinthu viyakine vinyinji vechichita Yesu vamene sewo tingavikonkheje. (1 Pet. 2:18-25) Kulaŵila chendi, pa moyo wake wonse Yesu​—vonse venzelaŵila olo kuchita—​ni chisanzo kuli sewo chatingakonkheje.

5. Kansi ŵanthu ochimwa angakonkheje chendi chisanzo changwilo cha Yesu? Fotokozani.

⁵ Lomba pakuti nise ŵanthu ochimwa, kansi tingakonkheje chendi chisanzo cha Yesu? Eye, tingakonkheje. Petulo aliyenene kuti sewo tufunika kukonkha maluwayo ŵa Yesu mwaungwilo yayi. Mmalomwake, yove etilangiza kuti “tufunika kukonkha maluwayo ŵa [Yesu] mosamala ngako.” Keno sewo tukonkha maluwayo ŵa Yesu mosamala, pochita viweme vatingakwanishe monga ŵanthu ochimwa, tinkhale kuti tumvwila mawu a ntumwi Yohane akuti: ‘Pitilijani kuyenda monga ni mwechiyendela yove [Yesu].’​—1 Yoh. 2:6.

6-7. Ndaŵa yanji tinganene kuti keno sewo tukonkha maluwayo ŵa Yesu niyekuti tingankhale azishamwali apantima a Yehova?

⁶ Kukonkha maluwayo ŵa Yesu kutichitisha kunkhala pa ushamwali wotang’a na Yehova. Ndaŵa yanji tunena tetyo? Choyamba, Yesu epeleka chisanzo chiweme ngako cha mwatingachitile kuti tikochita vinthu vukondwelesha Mulungu. (Yoh. 8:29) Tetyo, keno tingakonkhe maluwayo ŵa Yesu, niyekuti tikondweleshe Yehova. Ndipo tufunikalini kukaikila kuti Atata ŵasu ŵakululu ankhale pafupi na ŵala amene oyeja-yeja kuti ankhale azishamwali ŵake.​—Yak. 4:8.

 ⁷ Chachiŵili, Yesu okonkheja Atata ŵake mwaungwilo. N’chifukwa chake yove enena kuti: “Wala wawona newo wawonasoti Atata.” (Yoh. 14:9) Tingakonkheje minkhalidwe ya Yesu komasoti mwenzechitila vinthu na ŵanthu ayakine. Mwachisanzo,​—yove emvwila chifundo munthu wa mankhutu, emvwila chifundo mwanakazi wamene enze na matenda akulu komasoti emvwila chifundo ŵanthu ŵala amene enze etaikiliwa ŵanthu ŵenzekonda mu imfwa. Keno tukonkheja Yesu, niyekuti tukonkhejasoti Yehova. (Mk. 1:40, 41; 5:25-34; Yoh. 11:33-35) Tikoyeja-yeja kukonkheja minkhalidwe ya Yehova, niyekuti ushamwali wasu na yove utang’esoti ngako.

8. Fotokozani chifukwa chake kukonkha maluwayo ŵa Yesu kungatiyavye ‘kuchigonjesa’ ichi chalo.

⁸ Kukonkha maluwayo ŵa Yesu kutiyavya kuti osati tisokonezewe na ichi chalo chiipa. Pa usiku wosilijila wa moyo wake monga munthu pano pachalo, Yesu ekwanisha kunena kuti: “Newo nachigonjesa ichi chalo.” (Yoh. 16:33) Yove enzetanthauza kuti aliyelole kuti maganizo, volinga na vochita va ŵanthu muli chino chalo vimusokoneze. Yesu aliyeluŵe olo patontho chifukwa chechiwelela pano pachalo—kuti chenze kulemekeza Yehova. Lomba tyani kuli sewo? Pano pachalo, pali vinthu vinyinji vamene vingatisokoneze. Koma keno tingachite molingana na Yesu, kuika maganizo ŵasu pa kuchita chifunilo cha Yehova, niyekuti nase ‘tichigonjese’ ichi chalo.​—1 Yoh. 5:5.

9. Kansi tufunika kuchita chinji kuti osati tipatuke mu njila yuloŵela ku moyo wosasila?

⁹ Kukonkha maluwayo ŵa Yesu kusogolela ku moyo wosasila. Mulumbwana wa chuma pechikonsha vangachite kuti azafwane moyo wosasila, Yesu emuyankha kuti: “Uwele uzankhale wophunzila wangu.” (Mt. 19:16-21) Kuli Ayuda ayakine amene anzefunalini kumukhulupilila kuti yove enze Khilisitu, Yesu eŵauja kuti: “Mbelele zangu . . . zunikonkha. Newo nuzipasa moyo wosasila.” (Yoh. 10:24-29) Kuli Nikodemo, m’mozi mwa akulu a Khoti ya Sanihedirini, wamene enzefuna kuziŵa vinyinji vokhuza vinthu venzephunzisa Yesu, Yesu emuuja kuti aliyense wamene “angakhulupilile yove” ankhazankhala “na moyo wosasila.” (Yoh. 3:16) Sewo tuwonesha kuti tukhulupilila Yesu keno tukatishila ntchito vechiphunzisa yove nokonkheja venzechita yove. Keno sewo tingachite vamene ivi, niyekuti tipatukelini mu njila yuloŵela ku moyo wosasila.​—Mt. 7:14.

10. Kansi tufunika kuchita chinji kuti ‘timuziŵe’ luweme Yesu? (Yohane 17:3)

¹⁰ Tikaliyeyamba kukonkha maluwayo ŵa Yesu mosamala ngako, poyamba tufunika kumuziŵa yove. (Ŵelengani Yohane 17:3.) ‘Kuziŵa’ Yesu ni chinthu chatufunikila kupitilija kuchita. Tufunika kupitilija kuphunzila ngakosoti za yove, vamene ni, minkhalidwe yake, kaganizidwe kake komasoti kachitidwe kake ka vinthu. Paliye kanthu kuti tankhala mu choonadi vyaka vinyinji tyani, tufunika kupitilija kuchita khama kuti timuziŵe Yehova na Mwana wake.

11. Kansi m’mabuku 4 a Mauthenga muli chinji?

 ¹¹ Pofuna kutiyavya kuti timuziŵe luweme Mwana wake, Yehova mwachikondi eika mabuku 4 a Mauthenga m’Mawu ŵake amene onena za mbili ya moyo wa Yesu komasoti utumiki wake. Nkhani zamene izi zutiuja venzelaŵila Yesu, kutiwonesha venzechita yove ndipo zutiululila mwenzemvwila. Mabuku 4 amene aŵa otiyavya “kuganizila mosamala ngako” chisanzo cha Yesu. (Ahe. 12:3) Kulaŵila chendi, mabuku amene aŵa ali na maluwayo ŵechisiya Yesu kuvuli. Tetyo mwa kuganizila mabuku a Mauthenga, tingamuziŵe luweme Yesu. Vokonkhapo vake ni vakuti, tingakonkhe maluwayo ŵake mosamala ngako.

12. Kansi tingachite tyani kuti tipindule ngako na mabuku a Mauthenga?

¹² Kuti tipindule ngako na mabuku a Mauthenga amene aŵa, tufunika kuchita vinyinji osati tyala kungoŵaŵelenga. Tufunika kupatula nthawe kuti tiŵaphunzile mosamala noŵaganizila ngako. (Yelekezelani na Yoswa 1:8.) Lomba tiyeni tikambilane njila ziŵili zamene zingatiyavye kuganizila ngako pa mabuku a Mauthenga komasoti kukatishila ntchito vatuŵelenga m’Mauthenga amene aŵa.

13. Kansi mungachite tyani kuti nkhani zufotokoza za moyo wa Yesu zikufwikeni pantima?

¹³ Choyamba, chitishani nkhani za m’mabuku a Mauthenga kunkhala ngazo-ngazo kuli mwewo. Yejani kuganizila kuti muwone, mutetekele komasoti kumvwa venzechitika. Kuti mumvwishe luweme, sakilani-sakilani mu mabuku ofalisiwa na gulu ya Yehova. Onani nkhani yonse​—olo kuti, onani vinthu vichitika nkhani yamene iyo yamuŵelenga ikaliyechitika olo pavuli pakuti yachitika. Yejani kuziŵa vinyinji vokhuza ŵanthu na malo otomolewa mu nkhani yamene iyo. Yelekezelani nkhani yamuŵelenga mwewo na chochitika chiyakine cha mu buku iyakine ya Uthenga. Nthawe ziyakine munthu elemba buku ya Uthenga otomola mfundo iyakine yofunika ngako yamene muyake aliye itomole.

14-15. Kansi tingazikatishile tyani ntchito pa moyo wasu nkhani za m’mabuku a Mauthenga?

¹⁴ Chachiŵili, vikatishileni ntchito pa moyo wanu vamuŵelenga m’mabuku a Mauthenga. (Yoh. 13:17) Kansi mungachite tyani vamene ivi? Pavuli pophunzila mosamala nkhani za m’mabuku a Mauthenga, likonsheni kuti: ‘Kansi pali chinthu chanuphunzilamo mu Uthenga wamene  uyu chamene ningachikatishile ntchito pa moyo wangu? Kansi nkhani yamene iyi ningaikatishile tyani ntchito kuti niyavyeko munthu muyakine?’ Yejani kuganizila munthu wamungayavye. Pavuli pake, pa kanthawe kaweme, muujeni munthu wamene uyo mowama ntima komasoti mwachikondi vamwaphunzila.

¹⁵ Lomba tiyeni tiwone chisanzo chamene chikuti chitiyavye kuwona mwatingakatishile ntchito njila ziŵili zamene izi. Tiphunzile nkhani ya mwanakazi wamasiye wosauka wechiwona Yesu ku kachisi.

16. Ŵelengani lemba ya Maliko 12:41, ndipo fotokozani vamuganizila kuti niye venzechitika.

¹⁶ Chitishani nkhani yamene iyo kukhala ngayo-ngayo. (Ŵelengani Maliko 12:41.) Yejani kuganizila venzechitika. Ni pa Nisani 11, 33 C.E.​—kwasala masiku atontho kuti Yesu afwe. Yesu otola nthawe ikulu ophunzisa m’kachisi. Yove oshushiwa ngako na asogoleli a vipembezo. Ayakine mwa asogoleli omukonsha kuti yove ochita ntchito yake na ulamulilo wa ŵani. Ayakine oyeja kumukonsha makonsho ovuta kuti yove akangiwe kuyankha. (Mk. 11:27-33; 12:13-34) Lomba, Yesu oluta ku mbali iyakine ya kachisi. Yove—okwanisha kuwona mabokosi a ndalama, lomba—mwavuwonekela yove ali pa malo a kachisi oitiwa kuti Malo ŵa Anakazi. Yove wankhala noyamba kulolesha ŵanthu amene oponya ndalama m’mabokosi a zopeleka. Yove owona ŵanthu anyinji olemela oponya ndalama zinyinji m’mabokosi. Payakine yove wankhala pafupiko kuti akokumvwa zungo ya ndalama zupona nkati mwamabokosi.

17. Kansi mwanakazi wamasiye otomolewa pa Maliko 12:42, echita chinji?

¹⁷ Ŵelengani Maliko 12:42. Papita nthawe, Yesu owona mwanakazi muyakine. Yove ni “mwanakazi wamasiye,” wosauka. (Lk. 21:2) Vinthu ni vovuta pa moyo wake; mwavuwonekela ni vovuta kuti akwanishe kufwana vofunika pamoyo va nsiku na nsiku. Koma olo n’tetyo, yove oluta pa bokosi iyakine, ndipo mochenjela oponya mu bokosi tundalama tuŵili tutontho. Tundalama ni tutontho ngako, mwakuti tumvwikalini zungo poponela mu bokosi. Yesu oziŵa vaika mwanakazi wamene uyu mu bokosi​—twenze tundalama tuŵili twansimbi twa lepta, tundalama tutontho ngako twamene twenzekatishiliwa ntchito pa nthawe yamene iyo. Tundalama twamene uto ni tutontho mphamvu, mwakuti tukwanishalini kugula kanthaki kamo (olo kuti, kampheta), kamozi mwa tunyoni totchipa ngako kamene munthu angagule kuti akalye.

18. Mokatijana na lemba ya Maliko 12:43, 44, kansi Yesu elaŵila chinji pa nkhani ya chopeleka cha mwanakazi wamasiye?

¹⁸ Ŵelengani Maliko 12:43, 44. Yesu ochita chidwi ngako na mwanakazi wamasiye. Oita ophunzila ŵake, nolata mwanakazi wamasiye nonena kuti: “Uyu mwanakazi wamasiye wosauka waponya zinyinji kupambana ayakine onse.” Lomba Yesu ofotokoza kuti: “Ndaŵa onse [maka-maka olemela] aponya zatapa pa zinyinji zalinazo, koma uyu mwanakazi, mu umphaŵi wake, waponya zonse zenzenazo, zonse zochilikizila moyo wake.” Mwanakazi wamasiye wokhulupilika wamene uyu pechiponya tundalama twake tosilijila mu bokosi ya ndalama mu kachisi, yove eikasoti moyo wake m’manja mwa Yehova.​—Sal. 26:3.

19. Kansi ni phunzilo yofunika ngako yotyani yatingaphunzilepo pa mawu ŵa Yesu pa nkhani ya mwanakazi wamasiye wosauka?

¹⁹ Ikatishileni ntchito nkhani yamene iyo pa moyo wanu. Likonsheni kuti: ‘Kansi ningaphunzilepo chinji pa mawu ŵa Yesu pa nkhani ya mwanakazi wamasiye wosauka?’ Yejani kumuganizila mwanakazi wamasiye. Kulaŵila chendi, yove enzefuna kupeleka vinyinji kwa Yehova. Olo n’tetyo, mwanakazi wamasiye echita vangakwanishe; yove epasa Yehova viweme venze navo. Ndipo Yesu enzeziŵa kuti chopeleka cha mwanakazi wamene uyu chenze cha ntengo wapatali  kuli Atata ŵake. Pamene apa pali phunzilo yofunika ngako kuli sewo. Yehova okondwela ngako keno sewo tumupasa viweme vatili navo pa ntchito yasu​—na moyo wasu wonse komasoti na ntima wonse. (Mt. 22:37; Akol. 3:23) Yehova okondwela akotiwona kuti tuchita vonse vatingakwanishe! Mfundo yamene iyi yukata ntchito pa kukula kwa nthawe komasoti mphamvu zatukatishila ntchito pa kulalikila, kupezeka pa misonkhano komasoti pa kuchita chinthu chilichonse chokhuza kumulambila.

20. Kansi mwewo mungavikatishile tyani ntchito vamwaphunzila pa nkhani ya mwanakazi wamasiye? Pelekani chisanzo.

²⁰ Kansi mwewo mungaikatishile tyani ntchito nkhani ya mwanakazi wamasiye? Yejani kuganizila abale ŵamuziŵa, payakine ayakine mwa abale amene awo akumvwa kunkhala okhumudwa chifukwa chakuti owona kuti ochitalini vinyinji potumikila Yehova. Payakine pali mulongo muyakine wamuziŵa wamene thanzi yake ni yofoka, yove aliye mphamvu zakuti angakwanishe kuchita vinyinji mu utumiki monga ni mwenzechitila kale. Chifukwa cha vamene ivi, yove olimvwa kuti ali na mulandu komasoti watyala-tyala. Olo payakine mwewo, pali m’bale wamukumbukila wamene ali na matenda asapola komasoti oŵaŵa. Pakuti yove okwanishalini kupezekasoti pamisonkhano yonse ku Ng’anda ya Ufumu, yove akumvwa kunkhala wokhumudwa. Lomba n’chinji chamungachite mwewo? Laŵilani nawo mawu “aliwonse otang’isha.” (Aef. 4:29) Ŵafotokozelenkoni vinthu viweme vatuphunzilapo pa nkhani ya mwanakazi wamasiye wosauka. Mukachita tetyo, niyekuti muŵayavye kuti ankhale osimikijila kuti Yehova okondwela ngako keno tumupasa viweme vatili navo, olo kuti vatuchita vuwoneka kuti ni vitontho. (Miy. 15:23; 1 Ates. 5:11) Keno mwewo muŵatembaja abale chifukwa chopeleka viweme kwa Yehova​—paliye kanthu kuti viwoneke kuti ni vitontho tyani—​niyekuti muwonesha kuti mukonkha maluwayo ŵa Yesu mosamala ngako.

21. Kansi mwewo nimwe wosimikijila kuchita chinji?

²¹ Sewo tutembeja ngakosoti kuti nkhani za m’mabuku a Mauthenga zutifotokozela vinthu vinyinji vokhuza moyo wa Yesu, nkhani zamene izi zutiyavya kumukonkheja, pokonkha mosamala ngako maluwayo ŵake! Kansi muwona tyani kukatishila ntchito mpata wa phunzilo yanu ya pamweka olo wa Kulambila kwanu kwa Pabanja kuti mukoikila ngako nzelu pa kuphunzila mabuku a Mauthenga? Osaluŵa kuti, kuti mupindule ngako pophunzila mabuku a Mauthenga, mwewo mufunika kuwona nkhani zamene izo kunkhala ngazo-ngazo komasoti kuzikatishila ntchito pa moyo wanu. Koma kukonkheja tyala venzechita Yesu ni kosakwanila, tufunikasoti kumvwila vechilaŵila yove. Mu nkhani ikuza, tizawone vatingaphunzilepo pa mawu osilijila ŵa Yesu monga munthu pano pachalo.