Kansi mwiŵelenga bwino-bwino magazini a Nsanja za Mulonda za chino chaka? Chabwino, yejani kuyankha makonsho aŵa ali mnyansi:

Kansi lemba ya Yakobo 5:11 yutisimikijila chinji ponena kuti Yehova ni “wachikondi chikulu” komasoti ni “wachifundo”?

Sewo tuziŵa kuti Yehova, mwachifundo chake, otikhululukila machimo ŵasu. Lemba ya Yakobo 5:11 yutisimikijila kuti Yehova olipelekasoti mwachikondi kuti atiyavye. Tingachite bwino kumukonkheja.—w21.01, pedji 21.

Ndaŵa yanji Yehova epanga makonzedwe akuti ayakine ankhale na ulamulilo?

Yove echita tetyo chifukwa cha chikondi. Makonzedwe amene aŵa ochitisha banja yake yokhulupilika kukata ntchito mwantendele, komasoti mwadongosolo. Aliyense m’banja wamene ochita vinthu mokatijana na dongosolo yamene iyi, oziŵa wamene ali na udindo wopanga vosankha komasoti kusogolela pokonkheja vosankha vamene ivo.—w21.02, pedji 3.

Ndaŵa yanji Akhilisitu ofunika kunkhala osamala pokatishila ntchito njila zotumijila mamesegi?

Keno munthu wasankha kukatishila ntchito mapulogilamu amene aŵa, ofunika kusankha ŵanthu aweme otandala nawo. Koma kuchita vamene ivi n’kovuta maka-maka tikotumijilana mauthenga m’magulu onkhala na ŵanthu anyinji. (1 Tim. 5:13) Pangankhalesoti ngozi ikulu keno tufalisa nkhani ziliye umboni komasoti kukatishila ntchito ma.adilesi a gulu pochita malonda.—w21.03, pedji 31.

Kansi vifukwa viyakine vamene vichitisha Mulungu kulola kuti Mwana wake atamane mpaka kufwa n’votyani?

Chifukwa choyamba n’chakuti kupachikiwa kwake pa chimuti kwiyavya Ayuda kuti amasuliwe ku tembelelo. (Aga. 3:10, 13) Chachiŵili, Yehova enzemukonzekelesha kuti azakwanilishe udindo wake monga Nkulu wa Ansembe. Ndipo chachitatu, kukhulupilika kwake mpaka imfwa kwisimikijila kuti ŵanthu angankhale mphela okhulupilika kwa Yehova olo angakumane na mayeselo akulu tyani. (Yobu 1:9-11)—w21.04, pedji 16-17.

Kansi mufunika kuchita tyani keno mufwanalini ŵanthu pang’anda mukolalikila?

Mukochinja nthawe noluta pa nthawe yakupezeka ŵanthu pang’anda. Mungayejesoti kuchinja malo olalikilila. Komasoti mungayeje kukatishila ntchito njila iyakine yolalikilila, monga kulemba makalata.—w21.05, pedji 15-16.

Kansi ntumwi Paulo enzetanthauza chinji pechinena kuti: “Mwa chilamulo, newo nichifwa ku chilamulo”? (Aga. 2:19)

Chilamulo cha Mose chiwonesha luweme kuti ŵanthu aliye ungwilo ndipo chisogolela Aisiraeli kuli Khilisitu. (Aga. 3:19, 24) Vamene ivi vichitisha kuti Paulo avomekeje komasoti kukhulupilila Khilisitu. Apa yove ‘echifwa ku chilamulo’ mwakuti chilamulo chenzevesoti mphamvu pali yove.—w21.06, pedji 31.

Kansi Yehova otipasa tyani chisanzo pa nkhani ya kupilila?

Yehova wankhala opilila kunyozewa kwa zina yake, kushushiwa kwa Ulamulilo wake, kusamvwila kwa ŵana ŵake ayakine, wenye wakunena Mdyelekezi, kutamana kwa atumiki ŵake okondewa, kusoŵana na azishamwali ŵake amene emwalila, keno ŵanthu aipa okandilila ayawo, minkhalidwe iipa yamene ŵanthu yalinayo komasoti kuwonongewa kwa vinthu vechilenga.—w21.07, pedji 9-12.

Kansi Yosefe etipasa chisanzo chotyani pa nkhani ya kuleza ntima?

Yove epilila vinthu viliye chilungamo vechimuchitila enekwake. Vamene ivi vichitisha kuti aimbiwe mulandu wa wenye ndipo enkhala mu djeli kwa vyaka vinyinji ku Iguputo.—w21.08, pedji 12.

Kansi lemba ya Hagai 2:6-9, 20-22 inenelatu za kunyang’anyisha kophiphilisila kotyani?

Mitundu ya ŵanthu yufunalini kumvwishila uthenga wa Ufumu, koma olo n’tetyo ŵanthu anyinji ophunzila chendi cha m’Baibolo. Kwalombapano ŵanthu anyang’anyishiwe kosilijila akazayamba kuwonongewa.—w21.09, pedji 15-19.

Ndaŵa yanji tufunikalini kufoka pa ntchito yasu yolalikila?

Yehova owona khama yasu ndipo okondwela ngako. Tikaleka kuŵeŵa olo kufoka, tizafwane moyo wosasila.—w21.10, pedji 25-26.

Kansi mfundo za mu Levitiko chapitala 19 zingatiyavye tyani kukonkheja malamulo akuti: “Mwewo namwe nkhalani atuŵa m’minkhalidwe yanu yonse”? (1 Pet. 1:15)

Vuwoneka kuti mawu ali pa vesi yamene iyi etolewa pa Levitiko 19:2. Chapitala 19 chufotokoza visanzo vinyinji va mwatingakatishilile ntchito malangizo apa 1 Petulo 1:15 nsiku iliyonse pa moyo wasu.—w21.12, pedji 3-4.