Ali kululu, Yesu ephunzila za minkhalidwe yamene imuchitisha kunkhala wokata naye ntchito muweme. Pavuli pake, penze pano pachalo, enze chisanzo chiweme ngako cha munthu wamene enzekata ntchito luweme na ŵanthu ayakine. Kansi sewo tingapindule tyani na chisanzo cha Yesu? Mwa kuganizila chisanzo chake, tingafwane mfundo zitatu zamene zingatiyavye kukata ntchito luweme na ŵanthu ayakine. Mfundo zamene izi zitiyavye kunkhala okatijana ngako na abale ŵasu.

Munthu wokata naye ntchito muweme onkhala wolichefya. Yove owona ayake ŵakukata nawo ntchito kunkhala ofunika ndipo oyejalini kuliwoneshela. Yesu ephunzila nkhalidwe yamene iyi kufumila kuli Atata ŵake. Olo kuti Yehova yeka niye woyenelela kuitiwa kuti Nyamalenga, yove efuna kuti ayakine aziŵe za ntchito yofunika yechichita Mwana wake. Tumvwisha vamene ivi kufumila pa vechilaŵila Mulungu kuti: “Tiyeni tipange munthu m’chifanizilo chasu.” (Gen. 1:26) Yehova pechilaŵila mawu amene aŵa, Yesu eziŵa kuti Yehova ni wolichefya ngako.—Sal. 18:35.

Ali pano pachalo, Yesu naye enze wolichefya. Pechitamandiwa na ŵanthu chifukwa cha vinthu vechichita, yove epeleka ulemelelo kuli Wala wamene enzefunikila kulondela ulemelelo wamene uyo. (Mk. 10:17, 18; Yoh. 7:15, 16) Yesu enzeyeja-yeja kunkhala mwantendele na ophunzila ŵake ndipo enzechita nawo vinthu monga azishamwali ŵake, osati monga akapolo. (Yoh. 15:15) Yove mpaka esambika mendo ŵawo pofuna kuŵaphunzisa kuti ofunika kunkhala olichefya. (Yoh. 13:5, 12-14) Molingana  na yove, sewo nase tufunika kulemekeza ayasu a kuntchito mmalo moika vofuna vasu pasogolo kupambana vawo. Tingachite vinyinji keno sewo tulemekeza ayasu ndipo tikofunalini kuti nthawe zonse tikotamandiwa.—Aro. 12:10.

Komasoti munthu wolichefya omvwisha kuti ‘alangizi akapaka malingalilo niye pakukwanilishiwa.’ (Miy. 15:22) Viliye kanthu kuti tili na luso yotyani olo n’vinthu votyani vatukwanisha kuchita, tufunika kukumbukila kuti paliye munthu wamene oziŵa chilichonse. Olo Yesu enzeziŵa kuti penze vinthu viyakine venzelekaziŵa. (Mt. 24:36) Komasoti, yove enzeikila nzelu pa vinthu venzeziŵa olo kuganizila ophunzila ŵake ochimwa. (Mt. 16:13-16) N’chifukwa chake ophunzila ŵake enzemasuka kunkhala naye! Sewo nase, tikankhala ŵanthu olichefya na kukumbukila kuti tuziŵalini chilichonse, komasoti kumvwishila maganizo ŵa ayasu, vingachitishe kuti tikonkhala nawo mwantendele, ndipo tonse pamozi tichitishe kuti ‘volinga vikwanilishiwe.’

Makamaka kuli akulu vamene ivi n’vofunika ngako, ove ofunika kukonkheja Yesu ponkhala olichefya pakukatila ntchito pamozi. Ove ofunika kukumbukila kuti pa nthawe yakukambilana pa nsonkhano wawo monga bungwe, mzimu utuŵa ungachitishe nkulu aliyense kuti afotokoze mfundo yamene ingayavye bungwe yonse kuti apange chosankha chiweme. Keno pamisonkhano yawo, akulu oyeja-yeja kuchitisha kuti aliyense akonkhala womasuka kufotokozapo maganizo ŵake, onse pamozi angachite vosankha vamene vingapindulishe mpingo wonse.

Munthu wokata naye ntchito muweme onkhala wololela akokata ntchito na ayake. Yove oyumishalini vinthu ndipo onkhala womvwila. Kulaŵila chendi, Yesu enze na mipata inyinji yowona Atata ŵake kunkhala ololela. Mwachisanzo, Yehova emutuma kuti azapulumushe ŵanthu ku chilango cha imfwa chenzefunikila kulondela.—Yoh. 3:16.

Yesu enzeyumishalini vinthu ndipo enzevomekeja vinthu vikachinja keno pangafunikile. Kumbukilani mwechiyavyila mwanakazi wa ku Foinike, olo kuti etumijiwa kuti azayavye Aisiraeli. (Mt. 15:22-28) Yove enze wololela pa venzeyembekezela kufumila kuli ophunzila ŵake. Pavuli pakuti nshamwali wake wapantima Petulo wamukana pagulu, Yesu enze wokonzeka kumukhululukila. Pavuli pake, yove epasa Petulo maudindo ofunika ngako. (Lk. 22:32; Yoh. 21:17; Mac. 2:14; 8:14-17; 10:44, 45) Chisanzo cha Yesu chutiwonesha luweme kuti tufunika kulola kuti “ŵanthu onse aziŵe kuti [nise] ololela” mwa kunkhala ogonjela.—Afil. 4:5.

 Kunkhala wololela kutiyavyasoti kunkhala wokonzeka kuchinja keno pangafunikile kuti tikokata ntchito mwantendele na ŵanthu osiyana-siyana. Yesu enzechita vinthu luweme na ŵanthu ŵenze nawo pafupi mwakuti adani ŵake anjilu emuyopejela kuti enze “shamwali wa okhomesha nsonkho na ochimwa.” (Mt. 11:19) Molingana na Yesu, kansi nase tingokata ntchito luweme na ayasu ŵatusiyana nawo mitundu? Louis, m’bale wamene ekata ntchito na ŵanthu osiyana-siyana monga wopanamila dela komasoti ku Beteli, enena kuti: “Kukata ntchito pamozi na ŵanthu ayakine amene aliye ungwilo, kuli monga n’kumanga chipupa na miyala yosiyana. Chifukwa chakuti miyala ni yosiyana pofunika kuchita khama ngako, koma n’vokwanishika chipupa kunkhala sitiliti. Niyeja kuchinja venenzefunikila pa moyo wangu kuti nikokata ntchito mwantendele na ŵanthu ayakine, kuti tikwanishe kusilija ntchito.” Amene aŵa ni malingalilo aweme ngako!

Kansi tili na mipata yotyani yowoneshela kuti nise ololela kuli ŵanthu a mumpingo mwasu? Tili na mwayi wochita vamene ivi tikankhala na kagulu kasu ka utumiki wakumunda. Payakine tingakate ntchito pamozi na ofalisa amene ali na maudindo m’banja osiyana na ŵasu olo ŵatusiyana nawo nsinkhu. Payakine tingachinje kachitidwe ka vinthu olo kunkhala okonzeka kuchita ulaliki mwakufunila ove kuti ankhale na chisangalalo chikulu mu utumiki.

Wokata naye ntchito muweme onkhala ‘wokonzeka kupasako ayake.’ (1 Tim. 6:18) Vuwoneka kuti Yesu penzekata ntchito pamozi na atata ŵake, eziŵa kuti Yehova enzefisalini vinthu. Yehova “penzekonza kululu,” Yesu ‘enzepo’ ndipo ephunzila vinthu kufumila kuli yove. (Miy. 8:27) Pavuli pake, yeka Yesu esangalala kuuja ophunzila ŵake “vinthu [vechimvwa]” kufumila kuli Atata ŵake. (Yoh. 15:15) Tingakonkheje chisanzo cha Yehova, poujako abale ŵasu komasoti alongo vinthu vataphunzila. Munthu wokata naye ntchito muweme oyejalini kuchita ngako ulamulilo pa ŵanthu ayake poŵafisila vinthu vakufunikila kuziŵa olo vinthu vamene vingaŵayavye. Yove onkhala wosangalala kuujako ayake vinthu viweme vawaphunzila.

Komasoti, tingalimbikise ayasu ŵatukata nawo ntchito. Keno munthu muyakine wawona khama yasu notitembeja kufumila pansi pa ntima, kansi tukumvwalini luweme? Yesu epatula nthawe kuti auje ayake ŵenzekata nawo ntchito vinthu vechiwona muli ove. (Yelekezelani na Mateyu 25:19-23; Luka 10:17-20.) Yove eŵaujasoti kuti “azachite ntchito zikulu kupambana” zake. (Yoh. 14:12) Usiku wakuti mailo wake apaiwe, yove etembeja ophunzila ŵake, poŵauja kuti: “Mwewo mwankhala mphela na newo m’mayeselo ŵangu.” (Lk. 22:28) Ganizilani tyala mwechiŵalimbikisila mawu ŵake amene aŵa noŵachitisha kuchitapo kanthu! Keno nase tupatulako nthawe kuti tiŵatembeje ayasu ŵatukata nawo ntchito, kulaŵila chendi ove ankhale osangalala ngako ndipo ntchito yawo angoiwona kunkhala yatanthauzo.

M’bale muyakine zina yake Kayode, enena kuti: “Wokata naye ntchito muweme ofunikalini kuchitankhala wangwilo, koma ochitisha ayake kunkhala osangalala komasoti ochitisha kuti ntchito inkhale yosavuta kuli ayake ŵakukata nawo ntchito.” Kansi mwewo nimwe munthu wokata naye ntchito woteti? Payakine mungakonshe ayakine mwa abale ŵanu na alongo kuti akuujeni kuti okuwonani kuti nimwe munthu wokata naye ntchito wotyani. Keno ove okondwela kukata namwe ntchito pamozi, molingana na ophunzila a Yesu amene enzekondwela kukata naye ntchito pamozi, mwewo mungalaŵile monga ni mwechilaŵilila ntumwi Paulo kuti: “Nise antchito ayanu kuti munkhale na chisangalalo.”—2 Akor. 1:24.