1. Kansi n’chinji chuwela mmaganizo mwanu mukaganizila za Yehova?

 KANSI mwewo nthawe iyakine mweyejapo kale kuganizila mwakuwonekela Mulungu? Keno mulaŵila naye m’pemphelo, kansi n’chinji chuwela mmaganizo mwanu? Olo kuti Yehova owonekalini, Baibolo yumufotokoza mwa njila zosiyana-siyana. Yehova otomolewa kuti “zuŵa komasoti chishango” otomolewasoti kuti “mulilo uwononga.” (Sal. 84:11; Ahe. 12:29) Mmesomphenya ŵake, Ezekieli efotokoza Yehova monga mwala wa Safilo, siliva woyavija na golide, komasoti utaŵaleza woyetimila. (Eze. 1:26-28) Ayakine mwa mawu amene aŵa, angatichitishe wowa olo kuliwona kuti nise atyala-tyala.

2. Kansi n’chinji chingakangishe ŵanthu ayakine kuvwendela kwa Yehova?

² Chifukwa chakuti sewo tingakwanishelini kumuwona Yehova, payakine chingankhale chinthu chovuta kukhulupilila kuti yove otikonda. Ayakine oganiza kuti Yehova angaŵakondelini chifukwa cha vinthu vechikumana navo pa moyo wawo. Vingachitike kuti atata ŵasu amene etivyala enzetiwoneshalini chikondi. Yehova omvwisha vochitika monga nivamene ivi ndipo oziŵa mwavutikhuzila. Pofuna kutiyavya, yove otiululila kupitila m’Baibolo kuti ni Mulungu wachifundo chikulu.

3. Ndaŵa yanji tufunikila kuganizila ngako za chikondi cha Yehova?

³ Mawu amene omufotokoza luweme ngako Yehova ni chikondi. (1 Yoh. 4:8) Chikondi niye nkhalidwe yake. Ndipo chilichonse chakuchita, ochichita chifukwa cha chikondi. Chikondi cha Mulungu n’chikulu ndipo n’champhamvu ngako, mwakuti yove okondalini tyala ŵanthu amene omukonda, koma okondasoti ŵala amene omukondalini. (Mat. 5:44, 45) Munkhani ino, tikambilane ngako za Yehova komasoti chikondi chake. Tikaphunzila vinyinji vokhuza Mulungu wasu, niyesoti patingamukonde ngako.

 YEHOVA OTIKONDA NGAKO

4. Kansi chikondi chikulu cha Yehova chukuchitishani kumvwa tyani? (Onanisoti chithunzi.)

⁴ “Yehova ali na chikondi chikulu.” (Yako. 5:11) M’Baibolo, Mulungu olilinganija na mayi wachifundo. (Yes. 66:12, 13) Ganizilani tyala mwamene mayi mwakusamalilila mwana wake ntontho. Yove omutola nomuika pa mendo komasoti kumulaŵija mawu aweme omunkhazika ntima pansi. Mwana akolila olo kumvwa kuŵaŵiwa, mayi owoneshesha kuti ali na chilichonse chakufunikila mwana wake. Tikakumana na mavuto tingankhale na chidalilo chakuti Yehova otikonda. Wamasalimo muyakine elemba kuti: “Nkhaŵa pezinitamanisha muntima mwangu mwewo mwenitonthoja nonilimbikisa.”—Sal. 94:19.

5. Kansi chikondi chokhulupilika cha Yehova chutanthauza chinji kuli mwewo?

⁵ Yehova ni wokhulupilika. (Sal. 103:8) Yove oŵeŵalini nase tikaphoniyesha vinthu viyakine. Ntundu wa Aisiraeli wenzemukhumudwisa Yehova moweleja-weleja; koma olo n’tetyo, yove ewonesha chikondi chake chosasila kuli ŵanthu ŵake amene elapa mwakulaŵila mawu aŵa okonkhapo: “Chifukwa chakuti niwe wantengo wapatali kuli newo, nukulemekeza ndipo nukukonda.” (Yes. 43:4, 5) Chikondi cha Mulungu chiliye chinje. Sewo tingachidalile nthawe zonse. Olo pa nthawe yataphoniyesha vinthu vikulu, Yehova otisiya lini. Sewo tikalapa nojokela kwa Yehova, tizakwanishe kuwona kuti yove akali tikonda mphela. Yove olonjeza kuti “okhululuka na ntima wonse.” (Yes. 55:7) Baibolo, yunena kuti kukhululuka kwamene uku kuli monga ni “nthawe zosangulusha . . . zofumula kwa Yehova.”—Mach. 3:19.

6. Kansi lemba ya Zekariya 2:8 yutiphunzisa chinji vokhuza Yehova?

⁶ Ŵelengani Zekariya 2:8. Chifukwa chakuti otikonda, yove omvwisha mwatumvwila ndipo niwokonzeka kutiteteza. Tikakhumudwa, naye okhumudwa. Chifukwa cha vamene ivi sewo tili na vifukwa vomvwika vopemphela kwa Mulungu kuti: “Nisungeni monga mwana wa linso.” (Sal. 17:8) Linso ni mbali ikulu komasoti yapadela ngako pa muŵili wa munthu. Tetyo, Yehova pakutilinganija na mwana wa linso yake vili monga otiuja kuti, ‘Munthu aliyense wamene ochitila vinthu viipa atumiki ŵangu, ochitila viipa chinthu chantengo wapatali kuli newo.’

7. Ndaŵa yanji tufunika kutang’isha chikhulupililo chasu ponena za chikondi cha Yehova?

⁷ Yehova ofuna kuti sewo tikokhulupilila kuti yove okonda aliyense wa sewo monga munthu payeka. Koma yove oziŵa kuti chifukwa cha  vinthu vetichitikila pa moyo wasu kuvuli, nthawe ziyakine tingokaikila keno yove otikonda. Vingachitike kuti palipano tukumana na vinthu vamene vuyesa chikhulupililo chasu pa chikondi cha Yehova. Kansi n’chinji chingatang’ishe chikhulupililo chasu? Ni kuphunzila vechichita Yehova powonesha chikondi kuli Yesu, ozozewa, komasoti kuli aliyense wa sewo.

MWAKUWONESHELA CHIKONDI CHAKE YEHOVA

8. Ndaŵa yanji Yesu enzekhulupilila kuti Atata ŵake enzemukonda?

⁸ Yehova pamozi na mwana wake ankhala ali pamozi kwa nthawe itali ngako kupambana chinthu chilichonse m’chilengedwe. Mkati mwa vyaka mabiliyoni anyinji vamene ivi ali pamozi kululu, ove eyamba kukondana ngako muyake na muyake. Molingana na mwatuŵelengela pa Mateyo 17:5, Yehova elaŵila momvwika luweme mwenzemukondela Yesu. Yehova sembe echingolaŵila tyala kuti, ‘Uyu niye munthu wanukondwela naye.’ Koma Mulungu enzefuna kuti tiziŵe kuti omukonda ngako Yesu, n’chifukwa chake yove enena kuti, “Mwana wangu wokondewa.” Yehova enzemumekela Yesu maka-maka chifukwa chakuti enze wokonzeka kupeleka moyo wake. (Aife. 1:7) Ndipo Yesu enzekaikila lini olo patontho kuti Atata ŵake enzemukonda. Yove enzewosimikija kosilijilatu kuti Atata ŵake enzemukonda. Yove moweleja-weleja enzelaŵila mofumila pansi pa ntima kuti Atata ŵake enzemukonda.—Yoh. 3:35; 10:17; 17:24.

9. Kansi ni mawu otyani amene ofotokoza mwamene Yehova mwakukondela Akhilisitu ozozewa? Fotokozani. (Aloma 5:5)

⁹ Yehova owoneshasoti chikondi chake kuli ozozewa. (Ŵelengani Aloma 5:5.) Ganizilani mawu akuti “wazuja.” Buku iyakine imasulila mawu amene aŵa ponena kuti “kuwela kuli sewo monga mmana.” Fanizo yamene iyi yuwonesha kuti Yehova oŵakonda chendi ngako ozozewa! Akhilisitu ozozewa oziŵa kuti ove “okondewa na Mulungu.” (Yuda 1) Mtumwi Yohane efotokoza mwenzemvwila pechilemba kuti: “Ganizilani zachikondi chikulu chawatiwonesha Atata watitomola kuti nise ŵana a Mulungu!” (1 Yoh. 3:1) Kansi Yehova okonda tyala Akhilisitu ozozewa ŵeka? Yayi, Yehova wawonesha chikondi chake kuli sewo tonse.

10. Kansi ni umboni wotyani ukulu wamene uwonesha kuti Yehova okukondani?

¹⁰ Kansi n’chinji chutisimikijila ngako za chikondi cha Yehova? Ni mphaso ya dipo. Mwakupeleka mphaso yamene iyi—Mulungu wawonesha chikondi chikulu mu mbili yonse ya moyo wa ŵanthu! (Yoh. 3:16; Alo. 5:8) Yehova epeleka mwana wake wapadela, yove elola kuti mwana wake afwile mitundu yonse ya ŵanthu na cholinga chakuti machimo ŵasu akhululukiwe komasoti kuti tinkhale azishamwali ŵake. (1 Yoh. 4:10) Tikaganizila ngako za ntengo wechipeleka Yehova na Yesu, niyesoti patumvwisha ngako za kukula kwa chikondi chawo kuli aliyense wa sewo. (Agal. 2:20) Sikuti mphaso ya dipo ichingopelekewa pachifukwa tyala chakuti Mulungu ni wachilungamo. Nsembe yamene iyi nimphaso yachikondi. Yehova ewonesha chikondi chake kuli sewo mwakupeleka chinthu chamene ni chapadela ngako kuli yove—Yesu. Yehova elola kuti mwana wake atamane na kufwa chifukwa cha sewo.

11. Kansi tuphunzila chinji kufumila pa Yeremiya 31:3?

¹¹ Molingana na mwatawonela, sikuti Yehova angoganiza tyala muntima mwake kuti otikonda koma yove owoneshasoti kupitila muvochita kuti otikonda ngako. (Ŵelengani Yeremiya 31:3.) Yehova watidonsela kuli yove chifukwa chakuti otikonda. (Yelekezelani na Deuteronomo 7:7, 8.) Paliye chinthu chilichonse kapena munthu aliyense wamene angatilekanishe na chikondi chamene ichi. (Alo. 8:38, 39) Kansi chikondi chamene ichi chukuchitishani kumvwa tyani? Ŵelengani Salimo 23, ndipo onani mwenzemvwila Davide ponena za chikondi cha Yehova komasoti mwachukukhuzila ni mwewo.

 KANSI MWEWO MUKUMVWA TYANI MUKAGANIZILA ZA CHIKONDI CHA MULUNGU?

12. Kansi mungachifotokoze tyani mwachidule chapitala 23 cha buku ya Masalimo?

¹² Ŵelengani Salimo 23:1-6. Buku ya Salimo 23 ni nyimbo yamene yuwonesha mwakutikondela Yehova komasoti mwakutisamalila mwachikondi. Davide wamene niye elemba Salimo yamene iyi ofotokoza za kutang’a kwa ushamwali wa pakati pa yove na nchiŵeta wake Yehova. Davide enzelimvwa kunkhala wotetezeka chifukwa cholola kuti Yehova akomusogolela, ndipo yove enzemudalila na ntima wake wonse. Davide enzeziŵa kuti Yehova akomuwonesha chikondi nsiku iliyonse. Kansi n’chinji chimuyavya kunkhala na chidalilo chikulu teti?

13. Ndaŵa yanji Davide enzekaikilalini kuti Yehova azamusamalile?

¹³ “Nizasoŵelini kanthu.” Davide enzewona kuti osamaliliwa luweme chifukwa chakuti Yehova nthawe zonse enzemupasa chilichonse chenzefunikila. Davide enzeziŵasoti kuti Yehova ni nshamwali wake komasoti kuti yove enzesangalala naye. Chifukwa chavamene ivi yove enze na chidalilo chakuti mosasamala kanthu za vinthu vingamuchitikile kusogolo Yehova azapitilije kumupasa vonse vakufunikila. Chifukwa chakuti Davide enzekhulupilila kuti Yehova enzemukonda komasoti kumusamalila, venzemuyavya kuti osati akodela nkhawa, mmalo mwake akonkhala wosangalala na wokhutila.—Sal. 16:11.

14. Kansi Yehova angatisamalile tyani mwachikondi?

¹⁴ Yehova otisamalila mwachikondi maka-maka pa nthawe yatukumana na vinthu viipa pa moyo wasu. Claire, a wamene watumikila pa beteli kwa vyaka 20, enzeziŵalini changachite kuti ayavye banja yake pa nthawe yenzekumana na vuto ikulu. Atata ŵake enzelwala matenda ozizila vizo, mulongosi wake muyakine echosewa mumpingo, ndipo banja yawo iluza bizinesi komasoti  ng’anda yawo. Kansi Yehova eŵasamalila tyani mwachikondi? Claire enena kuti: “Yehova enzewoneshesha kuti banja yangu ili na vinthu vayufunikila nsiku iliyonse. Nthawe zinyinji Yehova enzetipasa vopambana vetenzefunikila! Nthawe zinyinji, newo nuganizila mwakutiyavyila Yehova ndipo nizaluŵelini chikondi chake. Kukumbukila vamene ivi, kwaniyavya kuti nikwanishe kulimbana luweme na mavuto ŵangu.”

15. Ndaŵa yanji Davide esisimuliwa? (Onanisoti chithunzi.)

¹⁵ “Osisimula moyo wangu.”  Nthawe ziyakine Davide enzevutika maganizo chifukwa cha mavuto komasoti mayeselo amene ŵenzekumana nawo. (Sal. 18:4-6) Koma olo n’tetyo, chikondi chikulu cha Yehova komasoti chisamalilo chake venzemusisimula. Yehova enzesogolela nshamwali wake wovutika wamene uyu “mmalo ansipu unyinji”, komasoti “mmalo opumulila amanzi anyinji.” Monga vokonkhapo vake, Davide etang’ishiwa ndipo enze na mphamvu zomuyavya kupitilija kutumikila Yehova mosangalala.—Sal. 18:28-32.

16. Kansi chikondi cha Yehova chakusisimulani tyani mwewo?

¹⁶ Molingana na vamene ivi, “chifukwa cha kuwama ntima kosasila kwa Yehova sewo tiliye fafaniziwe” na mavuto komasoti vovuta viyakine vatukumana navo masiku ŵano. (Mlr. 3:22; Akol. 1:11) Ganizilani chisanzo cha Rachel. Yove ekhumudwa ngako mwanalume wake pechimusiya noleka kutumikila Yehova pa nthawe ya mulili wa COVID–19. Kansi Yehova emuchitila chinji? Yove enena kuti: “Yehova enzewoneshesha kuti newo nikowona kuti onikonda. Yove enipasa azishamwali anyinji amene enzetandala nane pamozi, kulya nane chakulya, kutumija mamesedji na malemba onitang’isha, kunisekelela, komasoti amene enzenikumbusha kuti Yehova onisamalila. Newo numutembeja Yehova mosalekeja chifukwa chonipasa banja ikulu yachikondi.”

17. Ndaŵa yanji Davide ‘enzeyopalini kanthu’?

¹⁷ “Nuyopalini kanthu pakuti mwewo muli nane.” Moyo wa Davide kanyinji-kanyinji wenzenkhala pangozi, ndipo yove enze na adani anyinji amphamvu. Koma olo n’tetyo, chikondi cha Yehova chenzemuchitisha kulimvwa kuti niwosungika komasoti wotetezeka. Davide enzewona kuti Yehova ali naye pa vuto iliyonse ndipo vamene ivi venzemunkhazika ntima pansi. Chifukwa cha vamene ivi, yove enze na vifukwa vomvwika voimbila kuti: “Pakuthaŵa-thaŵa kwangu konse [Yehova] enitaisha.” (Sal. 34:4) Olo kuti Davide nthawe ziyakine enzechita wowa ngako; yove enze na mphamvu zomuyavya kulimbana na wowa wake chifukwa enzeziŵa kuti Yehova omukonda.

18. Kansi kunkhala osimikijila kuti Yehova otikonda kungatitang’ishe tyani tikankhala na wowa?

¹⁸ Kansi kuziŵa kuti Yehova otikonda kungatitang’ishe tyani tikakumana na vinthu voyofya?  Mpainiya muyakine zina yake Susi, efotokoza mwechimvwila pamozi na mwanalume wake pavuli pakuti mwana wawo walipaya, yove enena kuti: “Munthu ukakumana na chinthu chomvwisha chisoni pa moyo wako chukukhuza ngako ndipo uyamba kuchita wowa kuti pachitikesoti chinthu chiyakine chiipa kupambana chamene icho. Koma chikondi chikulu cha Yehova, chetichitisha kulimvwa kuti tililini seka komasoti nise otetezeka.” Rachel, watatomola poyamba pokumbukila enena kuti: “Usiku uyakine peniyamba kumvwa chisoni chikulu komasoti wowa neyamba kupemphela kwa Yehova uku nulila. Panthawe yamene iyo letu, neyamba kumvwa kuti Mulungu wanitonthoja noninkhazika ntima pansi monga ni mwakuchitila mama kuli mwana wake ntontho ndipo nifwana tulo. Nthawe yamene iyi niyosaluŵika pa moyo wangu.” Nkulu muyakine zina yake Tasos, enkhala m’djeli kwa vyaka 4 chifukwa chokana kuloŵa usodja. Kansi yove ewona tyani chikondi cha Yehova na chisamalilo chake? Yove enena kuti: “Yehova enipasa vinthu vinyinji kupambana venenzefunikila. Vamene ivi vetang’isha chikhulupililo changu kuti nikomudalila ngako. Kuyangijila pamene apo, kupitila muli mzimu wake Yehova enipasa chisangalalo olo kuti m’djeli enze malo aipa ngako. Vamene ivi veniyavya kuziŵa kuti keno numudalila ngako Yehova, niyesoti paningayambe kuwona kuti onikonda ngako. Tetyo, newo neyamba kutumikila monga mpainiya wonkhazikika pa nthawe yenenze kudjeli.”

VWENDELANI KWA MULUNGU WANU WACHIKONDI

19. (a) Kansi kuziŵa kuti Yehova otikonda kukhuza tyani vinthu vatulaŵila m’mapemphelo ŵasu? (b) Kansi ni mawu otyani owonesha kuti Yehova otikonda amene okukhuzani mwewo pamweka? (Onani bokosi yakuti “Mawu amene otiyavya kumvwisha kukula kwa chikondi cha Yehova.”)

¹⁹ Vochitika vonse vatakambilana vuwonesha kuti Yehova wamene ni “Mulungu wachikondi” ali pamozi nase! (2 Ako. 13:11) Yove ochita chidwi na aliyense payeka-payeka. Sewo tili na chidalilo kuti nise “ozengulukiwa na kuwama ntima kosasila.” (Sal. 32:10) Tikaganizila ngako mwakutiwoneshela chikondi chake Mulungu niyesoti patumukhulupilila ngako, ndipo tulimvwa kuti tili naye paushamwali wotang’a. Tingapemphele kuli yove momasuka nomufotokozela kufunika kwa chikondi chake kuli sewo. Tingamufotokozele nkhaŵa zasu zonse tili na chidalilo kuti atimvwishe komasoti niwokonzeka kutiyavya.—Sal. 145:18, 19.

20. Kansi chikondi cha Yehova chutiyavya tyani kuvwendela ngako kuli voye?

²⁰ Molingana na mwatukopekela na mulilo pa nsiku yozizila, sewo tukopekasoti na chikondi cha Yehova. Olo kuti chikondi cha Yehova n’champhamvu, chikondi chamene ichi n’chotang’asoti ngako. Tetyo, mukonkhala osangalala chifukwa chakuti Yehova okukondani. Ndipo tiyeni tonse tilole kuti chikondi cha Mulungu chitilimbikise kunena kuti: “Ntima wangu ukonda Yehova”!—Sal. 116:1.