NKHANI YOPHUNZILA N.° 25
NYIMBO N.° 7 Yehova, niye mphamvu zasu
Mukokumbukila kuti Yehova ni “Mulungu wamoyo”
“Yehova ni wamoyo!”—SAL. 18:46.
CHOLINGA CHANKHANI
Munkhani ino, tiwone chifukwa chake tinganene kuti n’kofunika nthawe zonse kuwona kuti Mulungu watutumikila ni “Mulungu wamoyo.”
1. Kansi n’chinji chuŵayavya atumiki a Yehova kuti apitilije kumutumikila olo kuti okumana na mavuto anyinji?
“MASIKU osilijila izankhale nthawe yovuta”—Baibolo yukatishila ntchito mawu amene aŵa pofotokoza nthawe yatunkhalamo masiku ŵano. (2 Tim. 3:1) Kuyangijila pamavuto ŵakukumana nawo ŵanthu onse, atumiki a Yehova otamanishiwasoti mwanjila ziyakine. Koma kansi n’chinji chutiyavya kuti tipitilije kulambila Yehova olo kuti tukumana na mavuto anyinji? Chifukwa chimozi n’chakuti sewo tuziŵa kuti Yehova ni “Mulungu wamoyo.”—Yer. 10:10; 2 Tim. 1:12.
2. Kansi ni vinthu votyani vatuziŵa vokhuza Yehova vamane vutitang’isha ngako?
2 Yehova owona mavuto onse ŵatukumana nawo ndipo nthawe zonse niwofunishisha kutiyavya. (2 Mbiri 16:9; Sal. 23:4) Tikakumbukila kuti Mulungu otidela nkhaŵa ngako ndipo nthawe zonse ofunishisha kutiyavya tufwana mphamvu zatufunikila kuti tikwanishe kulimbana na vuto iliyonse yatingakumane nayo. Tiyeni tiwone umboni wa vinthu vamene ivi pokambilana vechitika pamoyo wa Davide komasoti wa atumiki ayakine a Yehova.
3. Kansi Davide enzetanthauza chinji pechilaŵila kuti “Yehova ni wamoyo”?
3 Davide enzemuziŵa luweme Yehova ndipo enzemudalila. Panthawe yenzetamanishiwa na adani ŵake kupamikijapo mfumu Sauli, Davide epemphela kwa Yehova kuti amuyavye. (Sal. 18:6) Pavuli pakuti Mulungu wayankha pemphelo yake nomuyavya, Davide enena kuti: “Yehova ni wamoyo!” (Sal. 18:46) Kansi Davide enzetanthauza chinji pechilaŵila mawu amene aŵa? Buku iyakine inena kuti Davide elaŵila mawu amene aŵa powonesha kuti niyove yeka Mulungu wachendi ndipo nthawe zonse oyavya atumiki ŵake. Molingana na vinthu venzemuchitikila, Davide enzeziŵa kuti Yehova oziŵa mavuto ŵakukumana nawo ndipo niwokonzeka kumuyavya. Chifukwa cha vamene ivi Davide epitilija kutumikila Yehova na kumutamanda.—Sal. 18:28, 29, 49.
4. Ndaŵa yanji n’kofunika kuti tikokhulupilila kuti Yehova ni Mulungu wamoyo?
4 Keno tukhulupilila kuti Yehova ni Mulungu wamoyo vingatiyavye kuti tikomutumikila mwakhama. Kuziŵa vamene ivi kungatipase mphamvu zatufunikila kuti tikwanishe kulimbana na mayeselo aliwonse notiyavya kuti tichite vonse vatingakwanishe pomutumikila. Komasoti kungatiyavye kunkhala pafupi na Mulungu wasu.
MULUNGU WAMOYO AZAKUPASENI MPHAMVU
5. Kansi n’chinji chingatang’ishe chikhulupililo chasu patukumana na mavuto? (Afilipi 4:13)
5 Sewo tingakwanishe kulimbana na vuto iliyonse yatingakumane nayo, itontho olo ikulu, keno tukumbukila kuti Yehova ni Mulungu wamoyo komasoti kuti niwokonzeka nthawe zonse kuti atiyavye. Kulaŵila chendi paliye vuto iliyonse yatingakumane nayo yamene ingankhale ikulu ngako kuli Yehova. Vili tetyo chifukwa chakuti yove ni Mulungu wa mphamvu zonse ndipo angatipase mphamvu zatufunikila. (Ŵelengani Afilipi 4:13.) Tetyo sewo tingakwanishe kulimbana na vuto iliyonse yatingakumane nayo mwachidalilo. Tikawona kuti Yehova watiyavya olo pamayeselo atontho-atontho chikhulupililo chasu chutang’a ngako ndipo tuyamba kukhulupilila kuti azatiyavyesoti pamavuto akulu-akulu.
6. Kansi n’chinji chemuchitikila Davide penze mulumbwana chamene chemuyavya kuti akodalila ngako Yehova?
6 Onani vochitika viŵili vamene viyavya Davide kuti akokhulupilila ngako Yehova. Davide penze nchiŵeta wachilumbwana, chimbalangondo na mphondolo vikata mbelele m’gulu yambelele za atata ŵake. Pavochitika viŵili vamene ivi, Davide elimbana navo vinyama vamene ivi ndipo ekwanisha kupulumusha mbelele. Koma Davide aliyeganize kuti wakwanisha kuchita vamene ivo paliye kuyavyiwa na Mulungu. Yove enzeziŵa kuti Yehova niye emuyavya kunkhala wotang’a ntima nomupasa mphamvu kuti akwanishe kuchita vamene ivo. (1 Sam. 17:34-37) Davide aliyeluŵe vochitika vonse viŵili vamene ivi. Akaganizila vinthu vechikumana navo pamoyo wake chidalilo chake mwa Yehova chenzetang’a ngako chifukwa enzeziŵa kuti Mulungu wamoyo akomuyavya nthawe zonse akafunikila thandizo.
7. Kansi Davide enzeganizila ngako chinji, ndipo vamene ivi vemuyavya tyani polimbana na Goliati?
7 Pavuli pake, Davide akaliyekwanisha vyaka 20 eluta kunsasa kwamene kwenze gulu ya masodja ŵa Aisiraeli. Yove eziŵa kuti masodja Achiisiraeli enze na wowa ngako chifukwa chakuti nsodja wamphamvu wachifilisiti zina yake Goliati “enzenyoza masodja ŵa Aisiraeli.” (1 Sam. 17:10, 11) Masodja amene awo echita wowa chifukwa chakuti enzeganizila ngako kukula kwansinkhu wa Goliati komasoti vinthu venzelaŵila poŵayofya. (1 Sam. 17:24, 25) Davide, enzeganizila ngako za Yehova. Yove enzeziŵa kuti Mulungu wamene emuyavya panthawe yenzeŵetela mbelele amuyavyesoti pachochitika chamene ichi. Davide enzekaikilalini kuti Yehova amuyavye. (1 Sam. 17:26) Chifukwa cha vamene ivi Davide ekwanisha kulimbana na Goliati ndipo molingana na mwatuziŵila, yove epambana!—1 Sam. 17:45-51.
8. Kansi n’chinji chingatiyavye kuti tikokhulupilila ngako kuti Yehova azatiyavye tikakumana na mavuto? (Onanisoti chithunzi.)
8 Nase tingakwanishe kulimbana na vuto iliyonse yatingakumane nayo keno tukumbukila kuti Mulungu wa moyo ni wokonzeka kutiyavya nthawe zonse. (Sal. 118:6) Keno tukumbukila vinthu vechichita kale Mulungu kuvuli chikhulupililo chasu mwa Yehova chunkhala champhamvu. Tetyo mukoŵelenga nkhani za m’Baibulo zamene zuwonesha vechichita Yehova poyavya atumiki ŵake. (Yes. 37:17, 33-37) Kuyangijila pamene apo mwewo mungaŵelenge vinthu vechikumana navo enekwasu na akalongosi pa saiti yasu ya jw.org. Vochitika vamene ivi vuwonesha luweme ngako mwakuyavyila atumiki ŵake Yehova masiku ŵano. Mungachite soti luweme kukumbukila nthawe yechikuyavyani Yehova. Nthawe ziyakine Mulungu angakuyavyenilini munjila yodabwisa monga kukupasani mphamvu kuti muniyatane na chimbala ngondo kapena mphondolo, koma nkhani niyakuti nthawe zonse Yehova owonesha kuti niwokonzeka kuti akuyavyeni pakafunikila! Mulungu niye wamene ekudonsani kuti munkhale nshamwali wake. (Yoh. 6:44) Komasoti mwewo mupitilija kumutumikila mokhulupilika chifukwa chakuti Yehova okuyavyani. Lomba tyani kupemphela kwa Yehova kuti akuyavyeni kukumbukila nthawe yechiyankha mapemphelo ŵanu, yechikuyavyani pemwenzefunikila, olo nthawe yemwenzekumana na mavuto akulu ndipo yove enze namwe pafupi kuti akuyavyeni? Kuganizila vinthu monga nivamene ivi kuzakuyavyeni kukhulupilila kuti Yehova nthawe zonse akokuyavyani.
Vatuchita tikakumana na mayeselo vumukhuza Yehova (Onani ndime 8–9.)
9. Kansi tufunika kukumbukila chinji keno tukumana na mavuto? (Miyambo 27:11)
9 Kuwona Yehova monga Mulungu wamoyo kungatiyavyesoti kuti tikowona mavuto ŵasu mwanjila iweme. Ndaŵa yanji tunena tetyo? Panthawe yatukumana na mavuto tufunikila kukumbukila vinthu vamene nivofunika ngako. Satana onena kuti sewo tikakukumana na mavuto tingaleke kutumikila Yehova. Tetyo vatuchita tikakumana na mavuto vuwonesha keno sewo tuwona kuti kutumikila Yehova nichinthu chofunika pamoyo wasu. (Yob 1:10, 11; ŵelengani Miyambo 27:11.) Tetyo tikapitilija kutumikila Yehova mokhulupilika olo pa nthawe yatukumana na mavuto azachuma, tuwonesha kuti tukonda Mulungu komasoti kuti Satana ni wawenye. Lomba tyani ponena zamwewo, kansi mukumana na mavuto monga kutamanishiwa na akulu-akulu aboma mavuto azachuma, kusalondelewa luweme muulaliki, olo mavuto ayakine? Keno n’tetyo kumbukilani kuti vinthu vamukumana navo vukupasani mwayi wakuti mukondweleshe ntima wa Yehova. Komasoti mukokumbukila kuti Mulungu angalolelini kuti muyesewe mpaka pamungalekekwanisha kupilila. (1 Ako. 10:13) Nthawe zonse yove akokupasani mphamvu zamufunikila kuti mupambane.
MULUNGU WAMOYO AZAKUPASENI MPHASO
10. Kansi Mulungu oŵalonjeza chinji ŵanthu amene ni okhulupilika kuli yove?
10 Yehova nthawe zonse opeleka mphaso kuli ŵanthu amene ni okhulupilika kuli yove. (Ahe. 11:6) Mulungu otiyavya kunkhala na ntendele komasoti okhutila palipano ndipo kusogolo azatipase moyo wosasila. Sewo tukhulupilila kuti Yehova niwokonzeka kutipasa mphaso, ndipo ali na mphamvu zochitila vamene ivi. Chifukwa cha vamene ivi tupitilija kuchita vonse vatingakwanishe pomulambila molingana na mwechichitila atumiki ŵake akuvuli. Vamene ivi niye vechichita Timoteyo.—Ahe. 6:10-12.
11. Ndaŵa yanji Timoteyo enzechita khama potumikila mumpingo? (1 Timoteyo 4:10)
11 Ŵelengani 1 Timoteyo 4:10. Timoteyo enzekhulupilila Mulungu wamoyo. Chifukwa cha vamene ivi, enzechita vonse vangakwanishe potumikila Yehova komasoti enekwasu na akalongosi. Kansi yove echita tyani vamane ivi? Ntumwi Paulo emulimbikisa kuti akophunzisa luweme mumpingo komasoti muutumiki. Paulo eujasoti Timoteyo kuti ankhale chisanzo chiweme kuli enekwasu onse achilumbwana komasoti akulu-akulu. Kuyangijila pamene apo, Timoteyo elondela mautumiki ayakine ovuta amene enzepamikijaposoti kupeleka malangizo amphamvu koma mwachikondi kuli ŵanthu amene enzefunikila kulangiziwa. (1 Tim. 4:11-16; 2 Tim. 4:1–5) Nthawe ziyakine, ŵanthu enzeziŵalini kuti Timoteyo okata ntchito yotyani nomutembeja pantchito yamene iyo. Koma yove enzeziŵa kuti munthu wofunika ngako oziŵa vonse vokhuza ntchito yake ndipo azamupase mphaso.—Alo. 2:6, 7.
12. Ndaŵa yanji akulu ochita vonse vangakwanishe potumikila mumpingo? (Onanisoti chithunzi.)
12 Nawosoti akulu amasiku ŵano, angankhale na chidalilo kuti Yehova owona vonse vakuchita ndipo otembeja chifukwa cha vamene ivo. Kuyangijila pantchito yoŵetela, kuphunzisa, komasoti kulalikila, akulu anyinji oyavya pantchito zomanga komasoti kupeleka chithandizo kuli ŵanthu. Ayakine otumikila m’kagulu ka onyungila olwala olo m’komiti ya olaŵila na azachipatala. Akulu amene olipeka kuti akate ntchito yamene iyi oziŵa kuti mpingo niwa Yehova osati wa munthu aliyense. Tetyo ochita vonse vangakwanishe ndipo onkhala na chidalilo kuti Yehova azaŵadalise.—Akol. 3:23, 24.
Mulungu wamoyo azakudaliseni chifukwa cha vinthu vamuchita potumikila mpingo (Onani ndime 12-13.)
13. Kansi Yehova akumvwa tyani akatiwona kuti tumutumikila mwakhama?
13 Ni ŵanthulini onse mumpingo amene angankhale akulu. Koma onse angakwanishe kuchita vonse vangakwanishe kuti akondwelesha Yehova. Mulungu wasu osangalala ngako sewo tikachita vonse vatingakwanishe pomutumikila. Yove owona vatuchita pantchito yoyavya pachalo chonse olo kuti vinkhale vitontho. Yove osangalalasoti ngako tikoyeja-yeja kusilija nsoni zasu nopanamika kwanja kuti tiyankhe pamisonkhano ndipo muntima mwake onkhala wosangalala ngako akaziŵa kuti tukwanisha kuika pambali vophoniya venekwasu noŵakhulukila na ntima wonse. Olo kuti mwewo mulimvwa kuti mungakwanishelini kuchita vinyinji potumikila Yehova, mungankhale nachidalilo kuti yove otembeja ngako pavamuchita. Yove okukondani ngako ndipo azakupaseni madaliso.—Luk. 21:1–4.
PITILIJANI KUNKHALA PAFUPI NA MULUNGU WAMOYO
14. Kansi kunkhala paushamwali wotang’a na Yehova kutiyavya tyani kunkhala okhulupilika? (Onanisoti chithunzi.)
14 Tikankhala paushamwali wotang’a na Yehova vunkhala vosavuta ngako kuti tipitilije kunkhala okhulupilika kuli yove. Vamene ivi niye vechitika pamoyo wa Yosefe. Yove ekana kuti achite chigololo. Yove enze paushamwali wotang’a na Mulungu ndipo enzefunalini kuchita chilichonse chamene chingamukhumudwise. (Gen. 39:9) Keno nase tufuna kuti Yehova ankhale nshamwali wasu mpaka kale-kale tufunikila kupatula nthawe yotandala naye komasoti kuphunzila Mawu ŵake. Tikachita tetyo ushamwali wasu na yove uzankhale wotang’a. Ndipo molingana na mwechichitila Yosefe, tikankhala paushamwali wotang’a na Yehova tizapewe kuchita chinthu chilichonse chamene chingakhumudwise ntima wa Yehova.—Yako. 4:8.
Kunkhala paushamwali wotang’a na Mulungu wamoyo kuzakuyavyeni kuti mupitilije kunkhala okhulupilika (Onani ndime 14-15.)
15. Kansi tingaphunzilepo chinji pa vinthu vechitikila Aisiraeli panthawe yenze m’chipululu? (Ahebeli 3:12)
15 Munthu akaluŵa kuti Yehova ni Mulungu wamoyo angaleke kumutumikila mosavuta. Ganizilani vechitikila Aisiraeli panthawe yenze m’chipululu. Ove enzeziŵa kuti Yehova aliko, koma eyamba kukaikila kuti Yehova angaŵapase vinthu vakufunikila. Chifukwa cha vamene ivi, ove ekonsha kuti: “Kansi pakati pasu pano Yehova alipo olo yayi?” (Eks. 17:2, 7) Monga vokonkhapo vake ove eyamba kumupandukila Mulungu. Kulaŵila chendi, sewo tufunalini kupanduka monga nimwechichitila ove, mmalo mwake tufuna kumvwila Yehova.—Ŵelengani Ahebeli 3:12.
16. Kansi chikhulupililo chasu chingayesewe tyani?
16 N’chinthulini chipepu kupitilija kunkhala paushamwali wotang’a na Yehova muli chino chalo chiipa. Ŵanthu anyinji okana kuti Mulungu aliko. Ndipo kanyinji-kanyinji ŵanthu amene okana kuchita vakufuna Mulungu owoneka monga vinthu vuŵayendela luweme. Tikawona vamene ivi vuchitika chikhulupililo chasu chingayesewe. N’chendi kuti sewo tingafwikelini pokana kuti Mulungu aliko, koma tingayambe kukaikila kuti yove angakwanishe chendi kutipasa vinthu vatufunikila pamoyo wasu. Vamene ivi niye vechitikila munthu muyakine wamene elemba Salimo 73. Ŵanthu ŵenzenkhala nawo enzewaya-waya malamulo a Mulungu nochita vinthu vakufuna ove. Monga vokonkhapo vake, yove eyamba kukaikila kuti kutumikila Mulungu nikopindulisha chendi.—Sal. 73:11-13.
17. Kansi n’chinji chingatiyavye kuti tipitilije kunkhala pafupi na Yehova?
17 Kansi n’chinji chemuyavya wamasalimo kuti achinje maganizo ŵake? Yove eganizila vangakumane navo ŵanthu amene oluŵa Yehova. (Sal. 73:18, 19, 27) Yove eganizilasoti madaliso ŵakufwana ŵanthu amene otumikila Mulungu. (Sal. 73:24) Nase tingachitesoti luweme kuganizila madaliso onse awatipasa Yehova. Yejani kuganizila kuti moyo wanu sembe ulityani kuti mutumikilalini Yehova. Kukumbukila vinthu monga nivamene ivi, kuzatiyavye kuti tipitilije kutumikila Yehova mokhulupilika, ndipo molingana na wamasalimo nase tizanene kuti: “Kuli newo, kuvwendela kwa Mulungu nichinthu chiweme.”—Sal. 73:28.
18. Ndaŵa yanji tufunikilalini kuyopa vinthu vikuti vichitike kusogolo?
18 Sewo tingakwanishe kulimbana na vuto iliyonse yatingakumane nayo m’masiku ŵano osilijila chifukwa chakuti ‘tutumikila Mulungu wamoyo komasoti wachendi.’ (1 Ates. 1:9) Mulungu wasu otidela nkhaŵa ndipo otiyavya nthawe zonse. Yove enzeyavya atumiki ŵake masiku akuvuli, ndipo azachite chimozi-mozi kuli sewo masiku ŵano. Kwalombapano ngako, sewo tizakumane na chisauso chikulu. Koma tizaŵelini seka. Mmalo mwake Yehova azankhale kumbali yasu. (Yes. 41:10) Tiyeni tonse “tinkhale otang’a ntima ndipo tinene kuti: ‘Yehova niye oniyavya; Nizayopelini. Kansi munthu anganichite chinji?’”—Ahe. 13:5, 6.
NYIMBO N.° 3 Nimwe mphamvu zasu, chiyembekezo chasu komasoti tukudalilani
