Makonsho ofumila kuli oŵelenga
Kansi mawu akuti “Muzaŵalolele” amene ali pa Salimo 12:7, onena za ŵanthu “otamana” (vesi 5) kapena onena za “Mawu a Yehova” (vesi 6)?
Tikawona nkhani yonse muchapitala chamene ichi, pali umboni wamene uwonesha kuti vesi yamene iyi yunena za ŵanthu.
Pa Salimo 12:1–4, tuŵelenga kuti “ŵanthu okhulupilika esililatu pakati pa ŵanthu.” Ndipo pavuli pake pa Salimo 12:5–7, yove onena kuti.
“Yehova wanena kuti: ‘Chifukwa chakuti ŵanthu ovutika okandililiwa,
Chifukwa cha kuvutika maganizo kwa ŵanthu osauka
Nizanyamuke nochitapo kanthu.’
‘Nizaŵapulumushe kuli ŵanthu amene oŵanyoza.’
Mawu a Yehova ni atuŵa;
Ali monga ni siliva wosefelewa muuvuni yalito maulwendo okwanila 7.
Mwewo Yehova muzaŵalolele;
Aliyense waove muzamuteteze kum’badwo wamene uyo mpaka Kale-kale.”
Muvesi 5 yunena vakuti azachite Mulungu kuli ŵanthu “otamana.” Ndipo yove azaŵapulumushe.
Muvesi 6 yuyangijila na mawu onena kuti “Mawu a Yehova ni atuŵa,” ‘monga ni siliva wosefewa.’ Amene aŵa ni maganizo amene Akhilisitu olipeleka ovomekejana nawo ngako.—Masal 18:30; 119:140.
Lomba ganizilani vayunena vesi yokonkhapo Salimo 12:7: “Mwewo Yehova muzaŵalolele. Aliyense wa ove muzamuteteze kum’badwo wamene uyu mpaka kale-kale.” Kansi mawu akuti “muzaŵa” onena za chinji?
Chifukwa chakuti vesi 7 ili pa vuli pa mawu amu vesi 6 amene onena vokhuza “mawu a Yehova,” ŵanthu ayakine anganene kuti mawu akuti “muzaŵa” otanthauza mawu a Mulungu. Ndipo sewo tuziŵa kuti Mulungu wateteza Mawu ŵake Baibolo olo kuti ŵanthu oshusha ayeja-yeja kulesha kuti ifalisiwe komasoti enzefuna kuiwononga.—Yes. 40:8; 1 Pet. 1:25.
Koma n’vowonekelatu kuti Yehova otetezasoti ŵanthu molingana na vesi 5. Yehova oteteza ndipo apitilije kuyavya komasoti kupulumusha “ŵanthu otamana” komasoti ŵanthu amene “okandililiwa.”—Yobu 36:15; Masal. 6:4; 31:1, 2; 54:7; 145:20.
Lomba kansi mawu akuti “muzaŵa” amene ali mu vesi 7 onena za chinji?
Nkhani yonse muchapitala 12 chabuku ya Masalimo, yuwonesha kuti mawu akuti “muzaŵa” onena za ŵanthu.
Kumayambililo kwa Salimo 12:1 Davide onena za atumiki okhulupilika a Yehova amene etalijiwa wenye na ŵanthu aipa. Pavuli pake, tuŵelenga kuti Yehova azachitepo kanthu kuti awononge ŵanthu amene awo amene olaŵila vinthu viipa. Salimo yamene iyi yutisimikijila kuti tingamudalile Mulungu kuti azachitepo kanthu m’malo mwa ŵanthu ŵake chifukwa chakuti mawu ŵake ni atuŵa.
Tetyo vesi 7 yunena kuti Yehova azalolele komasoti “azateteze” ŵanthu amene otamanishiwa na ŵanthu aipa.
Mawu ŵechimasulila kuti “muzaŵa” enzeŵakatishila ntchito pa vesi yamene iyi m’makope odalilika a Malemba Achihebeli. Panthawe yoyamba yenzemasulila malemba Achihebeli kuluta m’Chigiliki ekatishila ntchito mawu akuti “sewo” kwa maulwendo aŵili pomasulila vesi yamene iyi. Tetyo mawu akuti “muzaŵa” onena za atumiki a Mulungu okhulupilika amene otamanishiwa komasoti kukandililiwa. Posilijila pake, vesi 7 yunena kuti “aliyense wa ove” kutanthauza kuti atumiki a Mulungu okhulupilika azatetezewe “kum’badwo wamene uyu,” kutanthauza ŵanthu amene olimbikisa vinthu viipa. (Sal. 12:7, 8) M’Baibolo imasuliliwa m’Chiaramu kufumila m’Malemba Achihebeli pa vesi 7 inena kuti: “Mwewo AMBUYE muzateteze ŵanthu olungama, muzaŵateteze kuli m’badwo wamene uyu uipa. Ŵanthu aipa oyenda uku na uku monga ni unyolo wamene ufuna kunyonkha milopa ya ŵana aŵanthu”. Mawu amene aŵa ŵechikatishila ntchito pomasulila, opelekasoti umboni uyakine wamene uwonesha kuti Salimo 12:7 yunenalini za Mawu a Mulungu.
Pa chifukwa chamene ichi, vesi yamene iyi yupeleka chiyembekezo kuli “ŵanthu okhulupilika” chakuti Mulungu azachitepo kanthu kuti aŵayavye.
