1. Kansi ŵanthu a Yehova enzechita tyani vinthu mwadongosolo mu nthawe ya Akhilisitu oyambilila?

 YEHOVA akapeleka ntchito kuli ŵanthu ŵake kuti aikate, yove nthawe zonse oyembekezela kuti ichitike mwadongosolo. (1 Ako. 14:33) Mwachisanzo, chifunilo cha Mulungu n’chakuti uthenga uweme ulalikiliwe “pachalo chonse kulikonse kwamene kuli ŵanthu.” (Mat. 24:14) Ndipo Yehova epasa Yesu udindo wosogolela ntchito yamene iyi. Komasoti Yesu owoneshesha kuti ntchito yamene iyi ikochitika mwadongosolo. Nthawe ya Akhilisitu oyambilila, mipingo inkhazikishiwa komasoti akulu eyamba kuikiwa kuti akosogolela. (Mach. 14:23) M’masiku amene awo, gulu ya atumwi komasoti akulu aku Yerusalemu yenzepanga vosankha posogolela mipingo. (Mach. 15:2; 16:4) Monga vokonkhapo vake, “ŵanthu amʼmipingo epitilija kunkhala na chikhulupililo chotang’a ndipo chiŵelengelo chenzeyangijilika nsiku iliyonse.”—Mach. 16:5.

2. Kansi Yehova wankhala ochita chinji posogolela nopeleka chakulya chauzimu kuli ŵanthu ŵake kufumila mu 1919?

² Masiku ŵano, Yehova opitilija kusogolela gulu yake. Kufumila mu 1919, Yesu wankhala okatishila ntchito kagulu katontho ka ozozewa kuti akosogolela pa ntchito yolalikila nopeleka chakulya chauzimu kuli ophunzila ŵake. a (Luk. 12:42) N’vowonekelatu kuti Yehova odalisa ngako ntchito ya kagulu kamene aka.—Yes. 60:22; 65:13, 14.

3-4. (a) Pelekani chisanzo chowonesha mwatupindulila chifukwa chochita vinthu mwadongosolo. (b) Kansi tikambilane chinji munkhani ino?

³ Kuti tuchitalini vinthu mwadongosolo, sembe tiliye kwanishe kukata ntchito yechitisiila Yesu. (Mat. 28:19, 20) Mwachisanzo,  ganizilani tyala kuti tenzeve gawo yasu-yasu yatingachitile utumiki. Aliyense sembe olalikila kulikonse kwangakonde. Magawo ayakine sembe olalikiliwa moweleja-weleja, koma ayakine yayi. Kansi mungaganizileko mapindu ayakine ŵatufwana chifukwa chochita vinthu mwadongosolo?

⁴ Penze pano pachalo Yesu eyavya ophunzila ŵake kuti akochita vinthu mwadongosolo, ndipo akalipitilija kuyavya ophunzila ŵake mpaka pano. Munkhani ino, tikambilane chisanzo chechitisiila Yesu, komasoti vayuchita gulu yasu pokonkheja chisanzo chake. Tiphunzilesoti vatingachite powonesha kuti tutembeja vayuchita gulu ya Yehova.

GULU YASU YUKONKHEJA CHISANZO CHA YESU

5. Kansi ni njila imozi yotyani yatingakonkhejele chisanzo cha Yesu? (Yohani 8:28)

⁵ Yesu enzekonkheja vechimuphunzisa Atata ŵake polaŵila komasoti pochita vinthu na ŵanthu yakine. Pokonkheja chisanzo cha Yesu, gulu ya Yehova yukatishila ntchito Baibolo potiphunzisa chiweme na chiipa, komasoti mwatingachitile vinthu vakukondwela navo Yehova. (Ŵelengani Yohani 8:28; 2 Tim. 3:16, 17) Gulu ya Yehova, yutikumbusha nthawe zonse kuti tikoŵelenga Baibolo nokonkheja vatuphunzila. Kansi kuchita vamene ivi kungatiyavye tyani?

6. Kansi n’chinthu chotyani chofunika chatingachite kuti tikopindula pophunzila Baibolo?

⁶ Sewo tupindula ngako tikophunzila Baibolo pokatishila ntchito mabuku ŵasu. Mwachisanzo, tukwanisha kuyelekezela vayunena Baibolo na malangizo ŵatulondela m’gulu ya Yehova. Ndipo tikawona kuti malangizo ŵatulondela ni ofumila m’Malemba, chikhulupililo chasu pa gulu ya Yehova chutang’a ngako.—Alo. 12:2.

7. Kansi ni uthenga wotyani wenzelalikila Yesu, ndipo gulu ya Yehova yukonkheja tyani chisanzo chake?

⁷ Yesu enzelalikila “uthenga uweme wa Ufumu wa Mulungu.” (Luk. 4:43, 44) Yove elamula soti ophunzila ŵake kuti akolalikila za Ufumu wa Mulungu. (Luk. 9:1, 2; 10:8, 9) Masiku ŵano, tonse amene tumvwila malangizo a gulu ya Yehova tulalikila uthenga uweme wa Ufumu viliye kanthu kuti tunkhala kuni ndipo tili na maundindo ŵanji pamoyo wasu.

8. Kansi sewo tili na mwayi wotyani?

⁸ Tuwona kuti ni mwayi ukulu ngako kuujako ayakine za chonadi chunena za Ufumu wa Mulungu! Ndipo Mulungu wapasa sewo seka mwayi wamene uyu. Mwachisanzo, Yesu penze pano pachalo aliyelole kuti mizimu iipa ilaŵile vokhuza yove. (Luk. 4:41) Masiku ŵano, munthu akaliyeyamba kukata ntchito yolalikila pamozi na ŵanthu a Yehova, ofunika kunkhala na viyeneleso poyamba. Ndipo tuwonesha kuti tutembeja ngako mwayi wamene uyu polalikila kulikonse komasoti pa nthawe iliyonse mwatingakwanishile. Komasoti molingana na Yesu cholinga chasu ni kukomola mbewu za Ufumu m’mitima ya ŵanthu noŵaphunzisa chonadi.—Mat. 13:3, 23; 1 Ako. 3:6.

9. Kansi gulu yasu yachita chinji kuti ŵanthu aziŵe zina ya Mulungu?

⁹ Yesu enzephunzisa ŵanthu za zina ya Mulungu. Popemphela kuli Atata ŵake, Yesu enena kuti: “Nachitisha kuti ove aziŵe zina yanu.” (Yoh. 17:26) Pokonkheja chisanzo cha Yesu, gulu ya Yehova yachita vonse vaingakwanishe poyavya ŵanthu kuti aziŵe zina ya Mulungu. Njila imozi yachitila vamene ivi, ni kupitila m’Baibulo la Dziko Latsopano la Malemba Opatulika. Palipano, Baibolo yamene iyi yupezeka m’vilaŵilo vopitilila 270 yonse, kapena mbali yake tyala. Mu Zakumapeto A4 na A5, muli mawu amene ofotokoza luweme vechitika kuti zina ya Mulungu iwejeleshewe m’Baibolo  yamene iyi komasoti chifukwa chake. Zakumapeto C mu Bíblia de Estudo, yufotokoza maumboni anyinji owonesha kuti zina ya Mulungu yufunika kupezeka maulwendo 237 m’Malemba Achigiliki Achikhilisitu.

10. Kansi tingaphunzile chinji pa vechilaŵila mayi muyakine waku Myanmar?

¹⁰ Molingana na Yesu, tufuna kuyavya ŵanthu anyinji mwatingakwanishile kuti aziŵe zina ya Mulungu. Mayi muyakine wa vyaka 67 waku Myanmar pechiziŵa kuti zina ya Mulungu ni Yehova, eyamba kulila. Ndipo enena kuti: “Nenze nikaliyeujiwapo kuti Mulungu ali na zina pamoyo wangu wonse. . . . Mwaniphunzisa chinthu chofunika ngako kupambana vinthu vonse vanuziŵa.” Chochitika chamene ichi, chuwonesha kuti ŵanthu aweme mitima angakwanishe kuchinja moyo wawo akaziŵa zina ya Mulungu.

PITILIJANI KUWONESHA KUTI MUDALILA GULU YASU

11. Kansi akulu owonesha tyani kuti odalila gulu ya Yehova? (Onanisoti chithunzi.)

¹¹ Kansi akulu angawoneshe mwanjila yotyani kuti odalila gulu ya Mulungu? Akulu akalondela malangizo a gulu, oŵaŵelenga mosamala ngako ndipo oyeja-yeja mwakhama kuŵakonkheja. Mwachisanzo, ove olondelalini tyala malangizo onena za mwangalaŵilile nkhani pamisonkhano na vinthu vangalaŵile popemphela, koma olangiziwasoti mwangasamalile mbelele za Khilisitu. Akulu amene omvwila malangizo a gulu, oyavya enekwasu na akalongosi kulimvwa kuti okondewa ndipo ni otetezeka.

12. (a) Ndaŵa yanji tufunika kuchita vinthu mokatijana nenekwasu amene osogolela? (Aheberi 13:7, 17) (b) Ndaŵa yanji tufunika kuganizila ngako vinthu viweme vakuchita ŵanthu amene osogolela?

¹² Tikalondela malangizo ofumila kuli akulu, tufunika kuŵakonkheja na ntima wonse. Tikankhala omvwila, akulu akokata ntchito yawo mosavuta posogolela mpingo. Baibolo yutilangiza kuti tikomvwila nogonjela ŵanthu amene otisogolela. (Ŵelengani Aheberi 13:7, 17.) Kuchita vamene ivi kungankhale kovuta nthawe ziyakine. Ndaŵa yanji? Tunena tetyo chifukwa chakuti akulu amene otisogolela aliye ungwilo. Koma olo n’tetyo, keno sewo tuganizila ngako vinthu vasachita luweme mmalo mwa minkhalidwe yawo iweme, niye kuti tili kumbali ya adani a ŵanthu a Mulungu. Mwanjila yotyani? Adani ŵasu ofuna kuti sewo tikokaikila kuti Yehova okatishila ntchito gulu yake potisogolela. Tetyo, kuganizila vinthu vasachita luweme akulu kungachitishe kuti tiyambe kukaikila gulu ya Mulungu noleka kuidalila. Kansi n’chinji chingatiyavye kuziŵa nopewa wenye wa adani ŵasu?

OSALEKA KUDALILA YEHOVA CHIFUKWA CHA ŴANTHU

13. Kansi adani a Mulungu ochita tyani poyeja kuipisha mbili ya gulu ya Yehova?

¹³ Adani a Mulungu oyeja-yeja kuti vinthu viweme m’gulu ya Yehova tikoviwona kunkhala viipa. Mwachisanzo, Malemba owonesha kuti Mulungu ofuna kuti atumiki ŵake ankhale atuŵa mwakuthupi, m’minkhalidwe, komasoti mwauzimu. Ndipo onena kuti aliyense wamene opitilija kuchita machimo koma osalapa, akochosewa mumpingo. (1 Ako. 5:11-13; 6:9, 10) Sewo tuchita vinthu mokatijana na vakunena Malemba. Koma chifukwa chakuti tumvwila lamulo yamene iyi, adani ŵasu onena kuti sewo tiliye chikondi, tuimba milandu ŵanthu, komasoti tufunalini ŵanthu amene ochita vosiyana na vatuchita sewo.

14. Kansi ni ŵani wamene olimbikisa nkhani zawenye zokhuza gulu yasu?

¹⁴ Ziŵani kuti Satana niye nkulu wa adani ŵasu. Satana Mdyelekezi niye olimbikisa ŵanthu kuti akonena nkhani zawenye zokhuza  gulu yasu. Yove ni “tata wawenye.” (Yoh. 8:44; Gen. 3:1-5) Tetyo, n’vosadabwisa kuti yove okatishila ntchito ŵanthu amene ali kumbali yake pofalisa nkhani zawenye zokhuza gulu ya Yehova. Ivi niye vechikumana navo Yesu komasoti Akhilisitu oyambilila.

15. Kansi asogoleli achipembezo echita tyani polimbana na Yesu komasoti ophunzila ŵake?

¹⁵ Yesu enze munthu wangwilo komasoti Mwana wa Mulungu. Olo n’tetyo, Satana ekatishila ntchito ŵanthu ayakine pofalisa wenye wonena za Yesu. Mwachisanzo, asogoleli achipembezo enzeuja ŵanthu kuti Yesu ofumya viŵanda “na mphamvu za wolamulila viŵanda.” (Mko. 3:22) Yesu penzetongewa mulandu, asogoleli achipembezo emuyopejela mulandu wakuti onyoza Yehova, ndipo elimbikisa ŵanthu kuti akoŵilikija kuti Yesu apaiwe. (Mat. 27:20) Pavuli pake, ophunzila a Yesu penzelalikila uthenga uweme, adani ŵawo “elaŵila vinthu viipa kuli ŵanthu amitundu iyakine noŵachitisha kuti ashushane nenekwasu amene awo.” (Mach. 14:2, 19) Pofotokoza lemba ya Machitidwe 14:2, Nsanja ya Olonda ya 1 Disemba 1998, inena kuti ŵanthu amene enze kumbali ya Satana ekana kumvwishila uthenga wenzelalikila Akhilisitu, komasoti elaŵila vinthu viipa ngako vokhuza enekwasu na cholinga chakuti ŵanthu osati aŵamvwile noyamba kuzondana nawo.

16. Kansi n’chinji chatufunika kukumbukila tikamvwa nkhani zawenye?

¹⁶ Satana aliyeleke kufalisa wenye munthawe ya Akhilisitu oyambilila. Masiku ŵano, yove akalipitilija ‘kuluŵilisha ŵanthu pachalo chonse kwamene kuli ŵanthu.’ (Chiv. 12:9) Mukamvwa nkhani zawenye zokhuza gulu yasu komasoti enekwasu osogolela, mukokumbukila vechichita adani a Mulungu kuli Yesu komasoti ophunzila ŵake munthawe ya Akhilisitu  oyambilila. Masiku ŵano, ŵanthu a Yehova otamanishiwa komasoti kunenelewa vinthu viipa mokatijana na veilosela Baibolo. (Mat. 5:11, 12) Wenye wamene uyu ungatiluŵilishelini keno tukumbukila kuti Satana niye oulimbikisa, komasoti keno tuchitapo kanthu mokulumija kuti tiliteteze. Kansi tingaliteteze tyani ku wenye wamene uyu?

17. Kansi tufunika kuchita tyani kuti osati tiluŵile na nkhani zawenye? (2 Timoteyo 1:13) (Onanisoti bokosi yakuti “ Vatingachite tikamvwa nkhani zawenye.”)

¹⁷ Mukopewa kumvwishila nkhani zawenye. Mtumwi Paulo epeleka malangizo omvwika luweme okhuza vatufunikila kuchita tikamvwa nkhani zawenye. Yove euja Timoteyo kuti ‘auje ŵanthu ayakine kuti . . . osati akomvwishila nkhani zawenye.’ Emuuja soti kuti, “ukopewa nkhani zawenye.” (1 Tim. 1:3, 4; 4:7) Ganizilani ivi: Mwana ntontho angaike nkamwa chinthu chawadoba pansi noyamba kulya, koma munthu nkulu angachitelini vamene ivo chifukwa oziŵa kuti chingamulwalishe. Sewo tupewa nkhani zawenye chifukwa tuziŵa luweme kuti Satana niye wamene eziyambisha. Sewo tumvwishila “mawu achendi” achonadi.—Ŵelengani 2 Timoteyo 1:13.

18. Kansi tingawoneshe tyani kuti tudalila gulu ya Yehova?

¹⁸ Munkhani ino, takambilana tyala vinthu vitatu vayuchita gulu ya Mulungu pokonkheja chisanzo cha Yesu. Keno muphunzila Baibolo mukonkhala tchelu kuti muwone vinthu viyakine vayuchita gulu yasu pokonkheja chisanzo cha Yesu. Mukoyayvako ayakine mumpingo kuti akodalila ngako gulu ya Yehova. Pitilijani kuwonesha kutembeja kwanu Mulungu mwakutumikila Yehova mokhulupilika, nopitilija kukatijana ngako na gulu yake yamene oikatishila ntchito pokwanilisha chifunilo chake. (Sal. 37:28) Tiyeni tonse tipitilije kutembeja mwayi ukulu watili nawo wokata ntchito pamozi na ŵanthu a Yehova amene ni achikondi komasoti okhulupilika.