1. Kansi ayakine akumvwa tyani akaganizila za ntchito yolalikila muutumiki? (Onanisoti chithunzi.)

 MONGA ŵanthu a Yehova, sewo tukata ntchito yolalikila chifukwa chakuti tukonda Atata ŵasu akululu komasoti tufuna kuyavya ŵanthu ayakine kuti aŵaziŵe. Ofalisa anyinji osangalala pokata ntchito yolalikila. Koma pali ayakine amene osangalalini pokata ntchito yamene iyi. Ndaŵa yanji? Ofalisa ayakine ali na vuto yolikaikila ndipo ayakine ali na nsoni. Ayakine omasukalini kuluta kung’anda ya munthu paliye kuitiwa na munecho. Ayakine ochita wowa kuti ŵanthu angaŵalondelelini luweme. Ofalisa ayakine ephunzisiwa kuti akopewa kukangana na ŵanthu kufumila akali atontho. Olo kuti ove okonda ngako Yehova, enekwasu na akalongosi amene aŵa ovutika kuvwendelela munthu kuti amuuje uthenga uweme. Olo n’tetyo, ove oziŵa kuti ntchito yolalikila niyofunika ngako, ndipo oyeja-yeja kuikata nthawe zonse. Yehova otimekela ngakosoti akatiwona tulalikila!

2. Ndaŵa yanji mufunikalini kutaya ntima keno musangalala lini muutumiki?

² Kansi mwewo musangalala lini nthawe ziyakine mukokata ntchito yolalikila? Keno n’tetyo, osataya ntima. Wamene oyo ni umboni wowonesha kuti nimwe olichefya ndipo mufunalini kuliwoneshela olo kukangana na munthu aliyense. Komasoti paliye munthu wamene osangalala keno aliyelondelewe luweme, maka-maka pakuyeja-yeja kuchitila ayake viweme. Koma ziŵani kuti Atata ŵanu akululu oziŵa mwavilili vovuta kuli mwewo kuti mukwanishe kuchita vamene ivi, ndipo ni okonzeka kukupasani thandizo yamufunikila. (Yes. 41:13) Munkhani ino, tikambilane vinthu 5 vamene vingatiyavye kulimbana na maganizo monga ni amene aŵa komasoti vatingachite kuti tikosangalala ngako pokata ntchito yolalikila.

 MUKOLOLA KUTI MAWU A MULUNGU AKUTANG’ISHENI

3. Kansi n’chinji chimuyavya Yeremiya kuti akwanishe kulalikila?

³ Kufumila kale-kale, uthenga wa Mulungu wankhala upeleka mphamvu kuli atumiki ŵake kuti akwanishe kuchita utumiki wovuta. Ganizilani chisanzo cha mneneli Yeremiya. Yove enze na nkhaŵa Yehova pechimupasa ntchito yolalikila. Yeremiya enena kuti: “Newo nukwanishalini kulaŵila ndaŵa nine mwana.” (Yer. 1:6) Kansi n’chinji chimutang’isha ntima Yeremiya kuti akwanishe kulalikila? Mawu ŵechimuuja Yehova niye emupasa mphamvu. Yove enena kuti: “Koma muntima mwangu, Mawu ŵake enze monga ni mulilo uyaka wamene wazaliliwa m’mafupa ŵangu mwakuti niŵeŵa na kulilesha kuti osati nilaŵile ndipo niliyekwanishe soti kupilila.” (Yer. 20:8, 9) Olo kuti gawo yechipasiwa Yeremiya yenze iyumu, uthenga wechipasiwa kuti alalikile wemupasa mphamvu zenzefunikila kuti ankhale wotang’a ntima nokata ntchito yamene iyo.

4. Kansi n’chinji chuchitika tikoŵelenga Baibolo noganizila? (Akolose 1:9, 10)

⁴ Masiku ŵano, nawo Akhilisitu olondela mphamvu zakufunikila kupitila m’Baibolo. Ntumwi Paulo penzelemba kalata yoluta kumpingo wa Akolose, elimbikisa enekwasu kuti aphunzile vinyinji vokhuza chifunilo cha Yehova. Vamene ivi sembe veŵayavya ‘kunkhala na nkhalidwe yokatijana na vakufuna Yehova’, komasoti “kutyala vitwazi pantchito iliyonse iweme.” (Ŵelengani Akolose 1:9, 10.) Ntchito ziweme zamene izo zupamikijapo soti ntchito yolalikila. Tetyo, keno tuŵelenga Baibolo noganizila, chikhulupililo chasu chutang’a ngako ndipo tumvwisha chifukwa chake ntchito yolalikila za Ufumu ni yofunika ngako.

5. Kansi n’chinji chingatiyavye poŵelenga komasoti pophunzila Baibolo?

⁵ Kuti tikopindula ngako na Mawu a Mulungu tufunikalini kuŵaŵelenga, kuŵaphunzila, olo kuŵaganizila moutuka. Mukopewa kuphunzila Baibolo moutuka. Mukafwana nkhani iyakine yamene yakuvutani kuti muimvwishe, osataya nayo ntima. Mmalo mwake, katishilani ntchito Índice das Publicações da Torre de Vigia, olo Buku Lofufuzira Nkhani la Mboni za Yehova kuti mufwane vofalisa vamene vufotokoza vesi yamene iyo. Keno mupatula nthawe kuti muphunzile Mawu a Mulungu modekha, muzatang’ishe chikhulupililo chanu kuti Baibolo ili na mawu a chonadi. (1 Ates. 5:21) Chikhulupililo chanu chikakula, mukosangalala ngako poujako ŵanthu ayakine vamuphunzila m’Mawu a Mulungu.

 MUKOKONZEKELA LUWEME ULALIKI

6. Ndaŵa yanji tufunika kukonzekela luweme tikaliyeluta muutumiki?

⁶ Keno mukonzekela luweme mukaliyeluta muutumiki, vikokuvutani lini ngako kuti muyambe kulaŵila na ŵanthu. Yesu ekonzekelesha ophunzila ŵake akaliyeŵatumija kuti akalalikile. (Luk. 10:1-11) Ove ekatishila ntchito vinthu vonse vechiŵaphunzisa Yesu. Chifukwa cha vamene ivi, esangalala ngako na vechikwanisha kuchita.—Luk. 10:17.

7. Kansi tingachite tyani pokonzekela kuyalalikila? (Onanisoti chithunzi.)

⁷ Kansi tingakonzekele tyani ulaliki? Tufunika kukonzekela vatikuti tikalaŵile noganizila mwatingavifotokozele m’mawu ŵasu-ŵasu. Komasoti n’kofunika ngako kukonzekela nkhani ziŵili olo zitatu zakukonda kushusha ŵanthu am’gawo yasu nowona mwatingayankhile pankhani iliyonse. Pavuli pake, tikayamba kulaŵila na ŵanthu tikonkhala omasuka, kusekelela, komasoti kunkhala aushamwali.

8. Kansi Akhilisitu olingana tyani na viya valito vechitomola ntumwi Paulo?

⁸ Ntumwi Paulo euja enekwasu aku Korinto kuti: “Tili na chuma chamene ichi muviya valito.” (2 Ako. 4:7) Kansi chuma chamene ichi chupanamila chinji? Chove chupanamila ntchito yolalikila yamene yupulumusha miyoyo ya ŵanthu komasoti yunena za Ufumu wa Mulungu. (2 Ako. 4:1) Kansi viya valito vupanamila chinji? Viya vamene ivi vupanamila atumiki a Mulungu amene olalikila uthenga uweme poujako ŵanthu ayakine. Mu nthawe ya Paulo, ŵanthu ochita malonda enzekatishila ntchito viya valito ponyamula olo posunga katundu muyakine wofunika ngako monga vakulya, vinyu, komasoti ndalama. Molingana na vamene ivi, sewo nise viya valito ndipo Yehova otikatishila ntchito ponyamula uthenga uweme wamene ni wantengo wapatali. Chifukwa chakuti Yehova otiyavya, sewo tili na mphamvu zatufunikila kuti tipitilije kulalikila mokhulupilika.

MUKOSENGA MULUNGU KUTI AKUYAVYENI KUNKHALA OTANG’A NTIMA

9. Kansi n’chinji chingatiyavye kuti osati tikochita wowa na ŵanthu olo kuyopa kuti angatilondelelini luweme? (Onanisoti chithunzi.)

⁹ Nthawe ziyakine tingachite wowa na ŵanthu olo kuganiza kuti atilondelelini luweme. Kansi n’chinji chingatiyavye kuti osati tikoyopa ŵanthu? Ganizilani za pemphelo yechipeleka ophunzila panthawe yechilamuliwa kuti aleke kulalikila uthenga uweme. Mmalo mochita  wowa, ove esenga Yehova kuti aŵayavye na cholinga chakuti ‘apitilije kulaŵila Mawu ŵake motang’a ntima’, ndipo Yehova eyankha pemphelo yamene iyo mokulumija. (Mach. 4:18, 29, 31) Keno muvutika kulalikila chifukwa choyopa ŵanthu, mukomusenga Yehova kuti akuyavyeni. Musengeni Mulungu kuti akuyavyeni kuti mukokonda ngako ŵanthu kupambana mwamuŵayopela.

10. Kansi Yehova otiyavya tyani kukwanilisha udindo wasu monga Mboni zake? (Yesaya 43:10-12)

¹⁰ Yehova etisankha kuti tinkhale Mboni zake komasoti otilonjeza kuti akotiyavya kunkhala ŵanthu otang’a ntima. (Ŵelengani Yesaya 43:10-12.) Tiyeni tiwone njila 4 zakukatishila ntchito potiyavya. Choyamba, Yesu onkhala pamozi na sewo nthawe zonse polalikila uthenga uweme. (Mat. 28:18-20) Chachiŵili, Yehova esankha angelo kuti akotiyavya pantchito yolalikila. (Chiv. 14:6) Chachitatu, Yehova watipasa mzimu wake utuŵa kuti ukotiyavya kukumbukila vatuphunzila. (Yoh. 14:25, 26) Cha 4, enekwasu na akalongosi otiyavya pantchito yolalikila. Chifukwa chakuti Yehova komasoti enekwasu na akalongosi okondewa otiyavya, sewo tili na vonse vofunika kuti tinkhale otang’a ntima nopitilija kulalikila.

NKHALANI OKULUMIJA KUCHINJA NDIPO MUKOWONA VINTHU MWANJILA IWEME

11. Kansi mungachite tyani kuti mukofwana ŵanthu anyinji muutumiki? (Onanisoti chithunzi.)

¹¹ Kansi mwewo mufoka keno mwafwana ŵanthu atontho olo mukalekafwana munthu aliyense polalikila ng’anda na ng’anda? Vamene ivi vikakuchitikilani, likonsheni kuti: ‘Kansi ŵanthu alikuni ino nthawe?’ (Mach. 16:13) ‘Kansi aluta kuntchito olo aluta kuyagula vinthu?’ Keno n’tetyo, kansi mungalalikile ŵanthu anyinji polalikila munsewu? Mkwasu muyakine zina yake Joshua enena kuti, “Nifwana malo ŵaningalalikile penenzeyenda mmalo ogulisila malonda komasoti mmalo opezeka ŵanthu anyinji.” Yove pamozi na mwanakazi wake Bridget, ofwana ŵanthu anyinji pang’anda akaluta kuyalalikila nchingulo olo pa Sondo nzuŵa.—Aife. 5:15, 16.

12. Kansi n’chinji chingatiyavye kuziŵa vakukhulupilila munthu komasoti vumudesa nkhaŵa?

¹² Mukaziŵa kuti munthu muyakine ochitalini chidwi na vamulaŵila, yejani kuziŵa vakukhulupilila olo vinthu vumudesa nkhaŵa.  Joshua na Bridget okatishila ntchito konsho ya mutu wa kapepa kuti ayambishe makambilano. Mwachisanzo, pokatishila ntchito kapepa kakuti Kansi muiwona tyani Baibolo? ove olaŵila kuti: “Ŵanthu ayakine owona kuti Baibolo ni Mawu a Mulungu, koma ayakine okaikila kuti ni Mawu a Mulungu chendi. Kansi mwewo muganiza tyani?” Kanyinji-kanyinji, vamene ivi vuchitisha kuti ankhale na makambilano aweme.

13. Ndaŵa yanji tinganene kuti utumiki utiyendela luweme olo kuti ŵanthu akane kumvwishila uthenga wasu? (Miyambo 27:11)

¹³ Kuti utumiki wasu uyende luweme, vudalilalini kuti ŵanthu atimvwishile olo yayi. Ndaŵa yanji tunena tetyo? Chifukwa chakuti tikaluta muutumiki tuwonesha kuti tumvwila Yehova pamozi na Mwana wake Yesu—sewo tuchitila umboni mokwanila za uthenga wa Ufumu. (Mach. 10:42) Viliye kanthu kuti tiliyefwane munthu watingalalikile olo ŵanthu akana uthenga wasu, sewo tingankhale osangalala chifukwa chakuti tuziŵa kuti takodwelesha Atata ŵasu akululu.—Ŵelengani Miyambo 27:11.

14. Ndaŵa yanji tusangalala ngako wofalisa akafwana munthu wachidwi muutumiki?

¹⁴ Sewo tusangalala ngako mkwasu olo kalongosi akafwana munthu wachidwi muutumiki. Nsanja ya Mulonda iyakine iyelekezela ntchito yolalikila na ntchito yosakila mwana wamene wasoŵa. Ŵanthu anyinji oyavya pantchito yosakila mwana wamene uyo, ndipo osakila malo osiyana-siyana. Pavuli pake wala mwana akapezeka, munthu aliyense—osangalala ngako olo kuti wamufwana ni mmozi. Molingana na vamene ivi, ofalisa onse oyavya pantchito yolalikila. Wofalisa aliyense ofunika kulalikila kuti gawo yampingo ikwanile, ndipo aliyense osangalala munthu akayamba kupezeka pamisonkhano.

MUKOGANIZILA NGAKO MWAMUKONDELA YEHOVA KOMASOTI ŴANTHU

15. Kansi kukatishila ntchito lemba ya Mateyo 22:37-39 kungatiyavye tyani kuyangijila changu chasu pokata ntchito yolalikila? (Onanisoti chithunzi .)

¹⁵ Sewo tingayangijile changu chasu pokata ntchito yolalikila mwakuganizila mwatukondela Yehova komasoti ŵanthu. (Ŵelengani Mateyo 22:37-39.) Ganizilani chisangalalo chakunkhala nacho Yehova akatiwona tukata ntchito yolalikila, komasoti mwangasangalalile ŵanthu akayamba kuphunzila Baibolo! Mukoganizila za chipulumuso chakuyembekezela ŵanthu amene omvwishila uthenga wasu.—Yoh. 6:40; 1 Tim. 4:16.

16. Kansi tingafwane tyani chisangalalo pokata ntchito yolalikila olo pa nthawe yatisakwanisha kufuma pang’anda? Pelekani chisanzo.

 ¹⁶ Lomba tyani keno mwewo mungakwanishe lini kuloŵa muutumiki pavifukwa viyakine? Keno n’tetyo, mukoganizila tyala vinthu vamungakwanishe kuchita powonesha kuti mukonda Yehova komasoti ŵanthu ayakine. Panthawe ya mulili wa COVID-19, Samuel na Dania, enzekwanisha lini kufuma pang’anda. Pa nthawe yamene iyo yovuta, ove enzelalikila nthawe zonse pokatishila ntchito foni, makalata, komasoti enzesogoja maphunzila kupitila pa Zoom. Pa nthawe yamene iyo, Samuel enzelondela chithandizo kuchipatala chifukwa enze na kansa. Komasoti enzekatishila ntchito mipata yenzenkhala nayo akaluta kuchipatala polalikila mwangakwanishile. Yove enena kuti: “Mavuto angatifokeshe mwakuthupi, mwa mmaganizo, komasoti mwauzimu. Chifukwa cha vamene ivi, n’kofunika ngako kuti tikofwana chisangalalo potumikila Yehova.” Pa nthawe yamene iyo, Dania epona ndipo elichita, chifukwa chavamene ivi emukata adimiti kwa myezi itatu. Pavuli pake, yove enzefunikila kuyenda pa njinga ya ŵanthu olemala kwa myezi 6. Yove enena kuti: “Nenzeyeja-yeja kuchita vonse vaningakwanishe mokatijana na mwevenzele vinthu pamoyo wangu. Newo nenzelalikila kuli dokota wamene enzewela kuzaniyonja, komasoti kuli ŵanthu otumikila muchipatala. Nenkhalasoti na macheza aweme penitumila foni dokota mwanakazi wamene enzenilapa kuchipatala.” Chifukwa cha mwevenzele vinthu pamoyo wawo, Samuel na Dania enzekwanishalini kuchita vinyinji monga ni mwenzechitila poyamba. Olo n’tetyo, ove echita vangakwanishe ndipo esangalala ngako na vokonkhapo vake.

17. Kansi mungachite tyani kuti mukopindula ngako na vinthu vatakambilana munkhani ino?

¹⁷ Mukoyeja-yeja mwakhama kukonkheja vinthu vonse 5 vatakambilana munkhani ino. Chinthu chilichonse pacheka chili monga ni chowamishila vakulya. Tikaviyavija pamozi, chakulya chuwama ngako. Mwakukonkheja vinthu vonse vamene ivi, tizakwanishe kulimbana na maganizo ophoniyeka ndipo tikosangalala ngako pokata ntchito yolalikila.