1-2. Mokatijana na lemba ya Mateyu 5:11, kansi mayeselo tufunika kuŵawona tyani?

YESU elonjeza ophunzila ŵake kuti azankhale na chisangalalo ngacho-ngacho. Yove echenjejasoti ŵala ŵakukonda kuti azakumane na mayeselo. (Mt. 10:22, 23; Lk. 6:20-23) Tunkhala osangalala kunkhala ophunzila a Khilisitu. Koma kansi tukumvwa tyani tikoshushiwa na abanja ŵasu, tikotamanishiwa na aboma, na ayasu aku ntchito olo ayasu aku sikulu? Ni vomvwika kuti vinthu monga ni vamene ivi, vingatichitishe kunkhala na nkhaŵa.

² Ŵanthu ayakine oganiza kuti kutamanishiwa ni chifukwalini chonkhalila osangalala. Koma vamene ivi niye vakutiuja Mawu a Mulungu kuti tikochita. Mwachisanzo, wophunzila Yakobo, elemba kuti tufunikalini kunkhala okhumudwa tikakumana na mayeselo koma tufunika kunkhala osangalala. (Yak. 1:2, 12) Ndipo Yesu enena kuti tufunika kunkhala osangalala olo kuti tutamanishiwa. (Ŵelengani Mateyu 5:11.) Kansi tingachite tyani kuti tinkhale mphela osangalala olo kuti tukumana na mayeselo? Tingaphunzile vinyinji poganizila malingalilo ayakine amene ali mu kalata yechilemba Yakobo kulembela Akhilisitu oyambilila. Choyamba, tiyeni tiwone mavuto ayakine ŵechikumana nawo Akhilisitu amene awo.

3. Kansi chechitika ni chinji Yakobo pechinkhala wophunzila wa Yesu?

³ Papita tyala masiku atontho pavuli pakuti Yakobo nsaza wa Yesu wankhala wophunzila, Akhilisitu aku Yerusalemu eyamba kutamanishiwa. (Mac. 1:14; 5:17, 18) Ndipo wophunzila Sitefano  pechipaiwa, Akhilisitu anyinji eutukamo m’tauni yamene iyo ndipo “emwajikila m’madela aku Yudeya na Samariya,” mpaka efwika ku Kupuro na ku Antiokeya. (Mac. 7:58–8:1; 11:19) Ganizilani tyala mavuto ŵechikumana nawo ophunzila amene awo. Olo kuti venze tetyo, ove enzelalikila mphela uthenga uweme mwakhama kulikonse kwangalute, ndipo ŵanthu anyinji enkhala Akhilisitu mwakuti mipingo yenkhazikishiwa m’madela anyinji. (1 Pet. 1:1) Koma pavuli pa vamene ivi, ove echizakumanasoti na mavuto anyinji ngako.

4. Kansi Akhilisitu oyambilila enzefunika kulimbana na mayeselo otyani?

⁴ Akhilisitu oyambilila enzefunika kulimbana na mayeselo osiyana-siyana. Mwachisanzo, mu chaka cha 50 C.E., Mfumu Kalaudiyo ilamula kuti Ayuda onse achoke ku Roma. Tetyo, Ayuda onse amene enze enkhala Akhilisitu ekakamijiwa kusiya mang’anda ŵawo nakuyankhala kumalo ayakine. (Mac. 18:1-3) Cha m’ma 61 C.E., ntumwi Paulo elemba kuti Akhilisitu ayakine enyozewa pamenso pa ŵanthu, kuikiwa mu djeli, komasoti kuiŵiliwa vinthu vawo. (Ahe. 10:32-34) Ndipo molingana na ŵanthu ayakine, Akhilisitu enzefunika kulimbana na umphaŵi komasoti matenda.—Aro. 15:26; Afil. 2:25-27.

5. Kansi tiyankhe makonsho otyani?

⁵ Yakobo penzelemba kalata yake chaka cha 62 C.E. chikaliyefwika, yove enzeŵaziŵa luweme mayeselo ŵenzekumana nawo abale na alongo ŵake. Yehova eujila Yakobo kuti aŵalembele Akhilisitu amene awo kuti aŵapase malangizo amene angaŵayavye kunkhala mphela osangalala olo kuti enzekumana na mayeselo. Tiyeni tikambilane kalata ya Yakobo, pavuli pake tiyankhe makonsho aŵa: Kansi ni chisangalalo chotyani chechilemba Yakobo? Kansi ni vinthu votyani vamene sembe vichitisha Akhilisitu kuluza chisangalalo? Kansi nzelu, chikhulupililo komasoti kutang’a ntima vingatiyavye tyani kupitilija  kunkhala osangalala olo kuti tukumana na mayeselo osiyana-siyana?

6. Mokatijana na lemba ya Luka 6:22, 23, ndaŵa yanji Nkhilisitu angamvwe chisangalalo akokumana na mayeselo?

⁶ Ŵanthu ayakine angaganize kuti angankhale tyala osangalala akankhala na thanzi iweme, ndalama zinyiji komasoti banja yantendele. Koma ntundu wachisangalalo chechilemba Yakobo ni mbali ya chitwazi cha mzimu utuŵa wa Mulungu ndipo chudalilalini mwavili vinthu pa umoyo wa munthu. (Aga. 5:22) Nkhilisitu angafwane chisangalalo, kapena kuti chisangalalo ngacho-ngacho, poziŵa kuti okondwelesha Yehova nokonkheja chisanzo cha Yesu. (Ŵelengani Luka 6:22, 23; Akol. 1:10, 11) Chisangalalo chasu chulinganijiwa na mulilo wamene uyaka nkati mwa laiti ya gilasi, mulilo wamene uyu utetezeka ku chimphepo na ku mvula kuti osati uzimwe, molingana na vamene ivi, nase tingapitilije kunkhala osangalala paliye kanthu na mavuto ŵatingakumane nawo pa umoyo. Tingaluzelini chisangalalo olo tilwale kapena ndalama zikayamba kutisoŵa. Tingapitilije kunkhala osangalala keno ŵanthu otinyoza olo keno tushushiwa na a m’banja mwasu. Chisangalalo chasu chingakule nthawe iliyonse yamene ŵanthu oyeja kutichosela chisangalalo chamene icho. Mayeselo ŵatukumana nawo chifukwa cha chikhulupililo chasu otisimikijila kuti nise ophunzila ngawo-ngawo a Yesu Khilisitu. (Mt. 10:22; 24:9; Yoh. 15:20) Nʼchifukwa chake Yakobo elemba kuti: “Abale ŵangu, sangalalani pamukumana na mayeselo osiyana-siyana.”—Yak. 1:2.

7-8. Kansi chikhulupililo chasu chutang’a tyani tikoyesewa?

⁷ Yakobo elaŵilasoti chifukwa chiyakine chakulolela Akhilisitu kukumana na mayeselo akulu-akulu. Yove enena kuti: “Chikhulupililo chanu chikayesewa, chuvyala kupilila.” (Yak. 1:3) Mayeselo tingaŵayelekezele na mulilo wakukatishila ntchito poshokelela vinsimbi. Chinsimbi chikapya pavuli pake chikazizila, chunkhala chotang’a. Molingana na vamene ivi, tikokumana na mayeselo, chikhulupililo chasu chutang’ishiwa. Niye chifukwa chake Yakobo elemba kuti: “Mulole kuti kupilila kusilije kukata ntchito yake, kuti munkhale muliye chilema mu mbali zonse.” (Yak. 1:4) Tikawona kuti mayeselo otang’isha chikhulupililo chasu, tingaŵapilile mosangalala.

⁸ Mu kalata yake, Yakobo efotokozasoti vinthu viyakine vamene vingatichitishe kuluza chisangalalo chasu. Kansi mavuto amene awo ni otyani, ndipo tingaŵasilije tyani?

9. Ndaŵa yanji tufunikila nzelu?

⁹ Vuto: Keno tuziŵalini vatingachite. Keno takumana na mavuto, tufunika kudalila Yehova kuti atiyavye kusankha vinthu vamene vingamukondweleshe, vingapindulishe abale ŵasu na alongo  komasoti vingatiyavye kunkhala okhulupilika kwa Yehova. (Yer. 10:23) Tufunikila nzelu kuti tiziŵe vatingachite komasoti vatinganene kuli ŵala otishusha. Keno tuziŵalini vatingachite, payakine tingolimvwa kuti nise ofoka, ndipo tingaluze chisangalalo chasu mokulumija.

10. Mokatijana na lemba ya Yakobo 1:5, kansi tufunika kuchita chinji kuti tifwane nzelu?

¹⁰ Njila yoisilijila: Sengani nzelu kwa Yehova. Keno tufuna kupilila mayeselo ŵasu mosangalala, choyamba tufunika kusenga Yehova kupitila m’pemphelo kuti atipase nzelu zatufunikila kuti tipange vosankha viweme. (Ŵelengani Yakobo 1:5.) Kansi tufunika kuchita tyani tikawona kuti Yehova oyankhalini pemphelo yasu nthawe yamene iyo? Yakobo enena kuti tufunika “kusenga” kwa Mulungu. Yehova okalipalini tikopitilija kusenga nzelu kuli yove. Yove angatikalipilelini. Atata ŵasu ŵakululu “otipasa mowolowa manja” tikaŵasenga kuti atipase nzelu zakuti tipilile mayeselo ŵasu. (Sal. 25:12, 13) Yove owona mavuto ŵasu, otimvwila chifundo ndipo ofunishisha kutiyavya. Kulaŵila chendi, chamene ichi niye chifukwa chosangalalila! Kansi Yehova otipasa tyani nzelu?

11. Kansi tufunika kuchita chinji chiyakine kuti tifwane nzelu?

¹¹ Yehova otipasa nzelu kupitila m’Mawu ŵake. (Miy. 2:6) Kuti tifwane nzelu zamene izi, tufunika kuphunzila Mawu a Mulungu komasoti mabuku oyavya kuphunzila Baibolo. Koma tufunika kuchita vinyinji osati tyala kungophunzila. Tufunika kukatishila ntchito nzelu za Yehova pa moyo wasu pomvwila malangizo. Yakobo enena kuti: “Mukochita vakunena mawu, osati tyala kungokumvwa.” (Yak. 1:22) Tikokatishila ntchito malangizo a Mulungu, tunkhala antendele, ololela komasoti achifundo. (Yak. 3:17) Minkhalidwe yamene iyi, yutiyavya kupilila mavuto aliwonse paliye kuluza chisangalalo chasu.

12. Ndaŵa yanji ni chinthu chofunika ngako kuiziŵa luweme Baibolo?

¹² Mawu a Mulungu ochita monga ni chilola, otiyavya kuziŵa vinthu nowona vala  vatufunikila kukonza. (Yak. 1:23-25) Mwachisanzo, tikaphunzila Mawu a Mulungu, tingaziŵe kuti tufunika kuukata ntima. Moyavyiwa na Yehova, tuphunzila kunkhala ofasa pochita vinthu na ŵanthu ayakine olo popilila mavuto amene angatichitishe kuti tikalipe. Tikankhala ofasa, tukwanisha kupilila mavuto ŵatukumana nawo ndipo tuganiza luweme nopanga vosankha viweme. (Yak. 3:13) Tetyo, ni chinthu chofunika ngako kuiziŵa luweme Baibolo!

13. Ndaŵa yanji tufunika kuphunzila visanzo va ŵanthu otomolewa m’Baibolo?

¹³ Nthawe ziyakine tukuzaphunzilapo kanthu pa vinthu vatufunika kupewa, pavuli pakuti taphoniyesha kale. Koma yamene iyi, ni njilalini iweme yophunzilila. Njila iweme yopezela nzelu ni kuphunzila kufumila pa vochita viweme va ŵanthu ayakine komasoti vophoniya vawo. Niye chifukwa chake Yakobo otilimbikisa kuti tiwone visanzo va ŵanthu otomolewa m’Baibolo monga Abulahamu, Rahabi, Yobu na Eliya. (Yak. 2:21-26; 5:10, 11, 17, 18) Atumiki okhulupilika a Yehova amene aŵa epilila mayeselo amene sembe eŵachitisha kuluza chisangalalo chawo. Visanzo vawo va kupilia vuwonesha kuti na thandizo ya Yehova sewo nase tingachite chimozimozi.

14-15. Ndaŵa yanji tufunika kusilija vuto yasu yokaikila?

¹⁴ Vuto: Keno tukaikila vatukhulupilila. Nthawe na nthawe, payakine tingavutike kumvwisha chinthu chiyakine m’Mawu a Mulungu. Kapena, Yehova angayankhelini mapemphelo mu njila yetenzeyembekezela. Vamene ivi payakine vingachitishe kuti tiyambe kukaikila. Keno sewo tingasilijelini vuto yasu yokaikila, chikhulupililo chasu chingafoke komasoti ushamwali wasu na Yehova ungawonongeke. (Yak. 1:7, 8) Ndipo ivi vingatichitishe kuti tiluze chiyembekezo chasu.

¹⁵ Ntumwi Paulo eyelekezela chiyembekezo chasu cha m’sogolo na nangula. (Ahe. 6:19) Nangula yuyavya kuti sitima inkhazikike pa malo amozi kukankhala chimphepo champhamvu komasoti kuti osati ikankhiwe kuluta kuvimiyala. Koma nangula ni yofunika ngako keno nthambo yamene yamangililiwa ku sitima yutendekalini. Molingana na nthambo ya nangula yamene yuyamba kuchita siki pofuna kutendeka, kuleka kusilija vuto yasu yokaikila kungawononge chikhulupililo chasu. Akakumana na chiyeso monga kushushiwa, munthu wamene okaikila angaluze chikhulupililo chakuti Yehova azakwanilishe malonjezo ŵake. Keno sewo tingaluze chikhulupililo chasu, tingaluze chiyembekezo chasu. Monga ni mwechinenela Yakobo, wala wamene okaikila “ali monga ni manzi oundana apanyanja amene otolewa na mphepo na kukankhika-kankhika.” (Yak. 1:6) Munthu wamene akumvwa tetyo angankhalelini wosangalala napatontho kumo!

16. Kansi tufunika kuchita chinji keno tukaikila?

¹⁶ Njila yoisilijila: Silijani vuto yanu yokaikila; tang’ishani chikhulupililo chanu. Osankhala na ntima wokaikila. M’masiku a mneneli Eliya, ŵanthu a Yehova eyamba kunkhala na ntima wokaikila pa vinthu venzekhulupilila. Eliya eŵauja kuti: “Kansi mukaikekaike mpaka nthawe yanji? Keno Yehova ni Mulungu wachendi mukonkheleleni; koma keno Baala niye Mulungu wachendi konkhelelani wamene uyo!” (1 Maf. 18:21) Chimozimozisoti masiku ŵano. Tufunika kusakila-sakila kuti tisimikijile kuti Yehova ni Mulungu, kuti Baibolo ni Mawu ŵake komasoti kuti Mboni za Yehova ni gulu yake. (1 Ates. 5:21) Kuchita vonse vamene ivi kuchitishe kuti tileke kukaikila notang’isha chikhulupililo chasu. Keno tufuna thandizo kuti tisilije kukaikila kwasu, tingasenge akulu. Tufunika kuchitapo kanthu posankha vochita keno tufuna kupitilija kutumikila Yehova mwachimwemwe!

17. Kansi chingachitike ni chinji keno sewo tingataye ntima?

¹⁷ Vuto: Kufoka. Mawu a Mulungu onena kuti: “Ukafoka pa nsiku ya masauso, mphamvu zako zizankhale zitontho.” (Miy. 24:10) Mawu Achiheberi amene emasuliliwa kuti “ukafoka” angatanthauze  “kutaya ntima.” Mwewo mukataya ntima, mungaluze chosangalalo chanu mokulumija.

18. Kansi kupilila kutanthauza chinji?

¹⁸ Njila yoisilijila: Kudalila Yehova kuti akutang’isheni ntima kuti mupilile. Tufunika kunkhala otang’a ntima keno tufuna kupilila mayeselo. (Yak. 5:11) Mawu ŵechikatishila ntchito Yakobo, amene emasuliliwa kuti “chipililo” opeleka chithunzi cha munthu wamene opitilija kunkhala wotang’a. Payakine tingaganizile za nsodja wamene opanama pamalo ŵake motang’a ntima ndipo outukalini adani ŵake akamuukila.

19. Kansi tingaphunzile chinji pa chisanzo cha ntumwi Paulo?

¹⁹ Ntumwi Paulo epeleka chisanzo chiweme ngako cha kutang’a ntima komasoti kupilila. Nthawe ziyakine, yove enzekumvwa kunkhala wofoka. Koma yove ekwanisha kupilila chifukwa chakuti enzedalila Yehova kuti amupase mphamvu zenzefunikila. (2 Akor. 12:8-10; Afil. 4:13) Nase tingankhale na mphamvu zoteti komasoti tingankhale otang’a ntima tikavomekeja molichefya kuti tufunikila thandizo ya Yehova.—Yak. 4:10.

20-21. Kansi tingankhale osimikijila za chinji?

²⁰ Tingankhale osimikijila kuti mayeselo ŵatukumana nawo ni chilangolini cha Yehova. Yakobo otisimikijila kuti: “Munthu akankhala kuti oyesewa, osalaŵila kuti: ‘Mulungu oniyesa.’ Chifukwa Mulungu oyesewalini na vinthu viipa, soti yove oyesalini munthu na vinthu viipa.” (Yak. 1:13) Tikankhala osimikijila kuti vamene ivi ni vachendi, tuvwendelela pafupi na Atata ŵasu achikondi ŵakululu.—Yak. 4:8.

²¹ Yehova “ochinjalini.” (Yak. 1:17) Yove eyavya Akhilisitu oyambilila pa mayeselo, ndipo ayavyesoti aliyense wa sewo. Mufunika kusenga Yehova na ntima wanu wonse kuti akuyavyeni kufwana nzelu, chikhulupililo komasoti kutang’a ntima. Yove ayankhe mapemphelo ŵanu. Mukachita tetyo mungankhale wosimikijila kuti yove akuyavyeni kunkhala wosangalala pamupilila mayeselo!