Ewoneshewa chikondi kupitila mu vochita
YOMARA na azilongosi ŵake aŵili—Marcelo na Hiver—onkhala m’munzi uyakine utontho ku Guatemala. Yomara eyamba kuphunzila Baibolo na Wamboni ndipo papita nthawe, nawo azilongosi ŵake eyambasoti kuphunzila. Koma penze mavuto. Ŵanthu onse atatu amene aŵa enzelolalini ndipo enzekwanishalini kuŵelega mabuku mu chilaŵilo cha ŵanthu asalola. Enzephunzila nawo enzefunika kuchita kuŵaŵelengela phunzilo, vithunzi komasoti mavesi a m’Baibolo pophunzila nawo.
Vuto iyakine yenze kupezeka pa misonkhano ya mpingo. Paŵeka venze vosakwanishika kuyenda ulwendo wa makilomita 40 kuluta ku Ng’anda ya Ufumu yapafupi. Koma abale amu mpingo epanga makonzedwe kuti akoluta nawo kumisonkhano yonse ya mpingo. Ndipo pechiyamba kukamba nkhani za nkati mwa sondo, Abale enzeŵayavya kuti ayoloŵele nkhani zawo.
Pofwika m’mwezi wa May mu 2019, misonkhano ya mpingo iyamba kuchitikila m’munzi mwawo. Chifukwa cha vamene ivi banja iyakine ya apainiya ifulukila kumunzi kwawo. Banja yamene iyi yenzeziŵalini kuŵelenga olo kulemba muchilaŵilo cha ŵanthu asalola, koma ove enzefunishisha kuyavya abale amene aŵa kuti akokwanisha kuchita vamene ivi. Ove eluta ku laibulale kuti akaphunzile Afabeti komasoti kuphunzila mwangaphunzisileko ayakine.
Marcelo opelekela ndemanga pamisonkhano ya mpingo
Pavuli pa miyezi yoŵelengeka tyala abale amene aŵa ekwanisha mosavuta kuŵelenga chilaŵilo cha ŵanthu asalola, ndipo vamene ivi viŵayavya kupita pasogolo mwauzimu. a Palipano Yomara, Marcelo, komasoti Hiver otumikila monga apainiya onkhazikika. Marcelo ni ntumiki wothandiza. Sondo iliyonse yove onkhala na vochita vinyinji vauzimu. Ove otumikila mwakhama pa ntchito zauzimu, ndipo ayavya ŵanthu a mudela yawo kuchitasoti chimozi-mozi.
Abale atatu amene aŵa otembeja ngako thandizo yachikondi yeupeleka mpingo. Yomara enena kuti “kungofumila paulwendo woyamba wetikumana, Amboni atiwonesha chikondi cha Chikhilisitu.” Marcelo eyangijila kuti “Tili na azishamwali aweme mu mpingo wasu komasoti tili m’banja yapachalo chonse yamene ni yokatijana.” Yomara pamozi nenekwake ofunishisha kuzawona nsiku yamene chalo chizachinje nonkhala paladaiso.—Sal. 37:10, 11; Yes. 35: 5.
a Kabulosha ka mutu wakuti Learn to Read Braille kipangiwa kuti kayavye ŵanthu asalola kuti aphunzile kuŵelenga nolemba muchilaŵilo chamene ichi.
