1. Kansi Yesu eŵauja kuti tyani ophunzila ŵake vokhuza “mapeto a masiku osilijila,” ndipo eŵachenjeja vokhuza chinji?

 KWASALA masiku atontho kuti Yesu apaiwe ophunzila ŵake 4 emukonsha kuti: “Tizaziŵe tyani kuti tili kumapeto . . . kwa masiku osilijila?” (Mt. 24:3) Ophunzila amene aŵa owoneka kuti enzefuna kuujiwa chamene chingaŵayavye kuziŵa nthawe yamene Yerusalemu pamozi na kachisi wake pavikuti vizawonongewe. Yesu poyankha aliyeŵauje tyala vokhuza kuwonongewa kwa Yerusalemu pamozi na kachisi wake, koma eŵaujasoti vokhuza “kumapeto kwa masiku osilijila” kwamene niye kwatili masiku ŵano. Ponena za nthawe yamene iyi yamapeto, Yesu enena kuti: “Kulaŵila za nsiku yamene iyi olo nthawe yake paliye oziŵa, olo angelo kululu payakinesoti mwana koma Atata.” Pasogolo pake echenjeja ophunzila ŵake onse kuti “nkhalani tchelu” komasoti kuti “nkhalani menso.”—Mk. 13:32-37.

2. Ndaŵa yanji venze vofunika kuti atumwi apitilije kunkhala menso?

² Akhilisitu amunthawe ya atumwi enzefunika kunkhala menso kuti apulumuke. Yesu euja ophunzila ŵake vingaŵayavye kuziŵa kuti Yerusalemu pamozi na kachisi wake vasala patontho kuwonongewa. Yove enena kuti: “Mukazawona magulu ankhondo azenguluka Yerusalemu muzaziŵe kuti chiwonongeko chake chavwendela.” Panthawe yamene iyo ove enzefunika kumvwila chenjezo ya Yesu yakuti “azayambe kuthaŵila ku malupili.” (Lk. 21:20, 21) Emvwila chenjezo yamene iyi epulumuka pa nthawe yamene a Roma pechiwononga Yerusalemu.

3. Kansi tikambilane chinji mu nkhani ino?

³ Palipano tunkhala mu nthawe ya mapeto a ichi chalo chiipa.  Tetyo sewo nase tufunika kunkhala oganiza luweme komasoti kunkhala menso. Mu nkhani ino tikambilane vingatiyavye kupitilija kunkhala oganiza luweme patuwona vochitika va ichi chalo. Tiwonesoti vatingachite kuti tikonkhala osamala na vatuchita komasoti mwatingakatishile ntchito luweme nthawe yasala.

4. Ndaŵa yanji tufunika kuchita chidwi na mwamene vochitika va ichi chalo mwavukwanilishila maulosi?

⁴ Pali vifukwa viweme vutichitisha kunkhala na chidwi na mwamene vochitika va ichi chalo mwavukwanilishila maulosi a m’Baibolo. Mwachisanzo, Yesu etomola vinthu vosiyana-siyana vamene vutiyavya kuziŵa kuti mapeto a ichi chalo cha Satana ali pafupi. (Mt. 24:3-14) Ntumwi Petulo etilimbikisa kuti tikochita chidwi na mwakukwanilishiliwa maulosi a m’Baibolo kuti chikhulupililo chasu chinkhale chotang’a. (2 Pet. 1:19-21) Buku yosilijila ya m’Baibolo yuyamba na mawu akuti: “Chivumbuluso chopelekewa na Yesu Khilisitu chechimupasa Mulungu, kuti awoneshe akapolo ŵake vinthu vamene vufunika kuchitika kwalombapano.” (Chiv. 1:1) Tetyo tuchita chidwi ngako na vochitika va muchalo ichi kuti tiwone mwavukwanilishila maulosi a m’Baibolo. Ndipo tufunishisha kukambilana na ŵanthu ayakine vochitika vamene ivi.

5. kansi tufunika kupewa kuchita chinji, ndipo tufunika kuchita chinji? (Onanisoti chithunzi.)

⁵ Keno tukambilana za maulosi a m’Baibolo tikopewa kufotokoza va m’maganizo mwasu. Ndaŵa yanji? Chifukwa tufunalini kulaŵila chilichonse chamene chingasokoneze m’gwilizano mu mpingo. Mwachisanzo, ŵanthu muli ichi chalo ofotokoza vangachite kuti asilije vuto iyakine komasoti vangachite kuti alete ntendele na chitetezo. M’malo mofotokoza va m’maganizo mwasu kuti vamene ivi vukwanilisha ulosi wapa 1 Atesalonika 5:3, tunika kufotokoza mokatijana na mwavunenela vofalisa vasu. Tikolaŵila vinthu vukatijana na vayafalisa gulu ya Yehova m’mabuku ŵasu, tuyavya kuti mpingo upitilije kunkhala wokatijana komasoti kuti “unkhale na maganizo amozi.”—1 Akor. 1:10; 4:6.

6. Kansi tuphunzilapo chinji pa 2 Petulo 3:11-13?

⁶ Ŵelengani 2 Petulo 3:11-13. Ntumwi Petulo otilimbikisa kuti tikonkhala na maganizo aweme keno tuŵelenga maulosi a m’Baibolo. Yove echenjeja kuti “tikokumbukila nthawe zonse kunkhalapo kwa nsiku ya Yehova.” Ndaŵa yanji? Osati chifukwa chakuti tungofuna tyala kuziŵa “nsiku na nthawe” yamene Yehova azaniyate nkhondo ya Armagedo, koma chifukwa chakuti tufuna kukatishila ntchito nthawe yamene yasala kuti tinkhale ŵanthu “ankhalidwe ituŵa ndipo tikochita ntchito zuwonesha kuti nise olitwala kwa Mulungu.” (Mt. 24:36; Lk. 12:40) M’mawu ayakine tinganene kuti tufuna kuti tikochita vinthu viweme komasoti kuwoneshesha kuti tuchita khama potumikila Yehova chifukwa chakuti tumukonda ngako. Kuti vamene ivi vikwanishike tufunika kunkhala osamala na vatuchita.

7. Kansi tingawoneshe tyani kuti tusamala na mwatuchitila vinthu? (Luka 21:34)

⁷ Yesu euja ophunzila ŵake kuti ofunika kunkhala osamala osati tyala na vochitika va ichi chalo, komasoti na mwakuchitila vinthu. Mfundo yamene iyi yuwonekela luweme pa chenjezo yechipeleka pa Luka 21:34. (Ŵelengani.) Mawu a Yesu palemba yamene iyi onena kuti: “Samalani.” Munthu wamene ochita vinthu mosamala onkhala tchelu na vinthu vamene vingasokoneze ushamwali wake na Yehova ndipo oyeja-yeja kuvipewa. Akochita vamene ivi  onkhala kuti ochita vinthu vamene vuchitisha Yehova kumukonda.—Miy. 22:3; Yuda 20, 21.

8. Kansi ntumwi Paulo epeleka malangizo otyani kuli Akhilisitu?

⁸ Ntumwi Paulo elangiza Akhilisitu kuti akosamala na vakuchita. Mwchisanzo, euja Akhilisitu aku Efeso kuti: “Samalani ngako kuti mwamuyendela osati monga ni ŵanthu aliye nzelu koma monga anzelu.” (Aef. 5:15, 16) Nthawe zonse Satana oyeja-yeja kuwononga ushamwali wasu na Yehova. Tetyo Baibolo yutilangiza kuti tipitilije “kuzindikila chifunilo cha Yehova” na cholinga chakuti tiliteteze ku maukuka ŵake.—Aef. 5:​17.

9. Kansi tingaziŵe tyani vakufuna Mulungu kuti tikochita?

⁹ Baibolo yutomolalini vinthu vonse vamene vingasokoneze ushamwali wasu na Yehova. Nthawe zonse tufunika kusankha seka vochita pa nkhani zamene zingafotokozewelini mwasitiliti m’malemba. Kuti tisankhe vinthu mwanzelu tufunika kuzindikila, kapena kuti kuziŵa “chifunilo cha Yehova.” Tingachite vamene ivi keno nthawe zonse tuphunzila komasoti kuganizila ngako Mawu a Mulungu. Tikoyeja-yeja kuzindikila chifunilo cha Yehova komasoti kunkhala na “maganizo a Khilisitu,” niyesoti patuyenda “monga ni ŵanthu anzelu,” olo kuti tiliye malamulo otiuja vochita pa nkhani iliyonse. (1 Akor. 2:14-16) Nthawe ziyakine vunkhala vosavuta kuziŵa vinthu vofunika kupewa; koma nthawe ziyakine vunkhala vovuta.

10. Kansi ni vinthu viyakine votyani vatufunika kupewa?

¹⁰ Vinthu viyakine vatufunikila kupewa ni kukopana, uchakolwa, kulya ngako, kulaŵila mawu amene angakhumudwise ayakine, kulolela vosangulusha vachiwawa, volaula, na vinthu viyakine monga ni vamene ivi. (Sal. 101:3) Mdani wasu Mdyelekezi nthawe zonse osakila-sakila mipata yakuti awononge ushamwali wasu na Yehova. (1 Pet. 5:8) Keno tingankhalelini menso Satana angakomole m’mitima yasu mbewu za nsanje, chinyengo, dyela, chidani, kulikuja komasoti ukali. (Aga. 5:19-21) Poyamba vinthu vamene ivi vingawoneke monga ni vosayofya, koma keno tingachitepolini kanthu mokulumija nozijula m’mitima yasu zingapitilije kukula monga nichomela chupaya ndipo zingayambishe mavuto.—Yak. 1:14, 15.

11. Kansi nivuto yosawonekela yotyani yatufunika kuipewa, ndipo ndaŵa yanji?

¹¹ Vuto iyakine yosawonekela yatufunika kupewa ni kukatijana na ŵanthu aipa. Ganizilani chochitika ichi. Tiyelekezele kuti mukata ntchito na munthu muyakine wamene ni ni Mkhilisitulini muyanu. Pofuna kumuyavya kuti akoŵawona luweme a Mboni za Yehova, mwewo muyeja-yeja kunkhala muweme ntima komasoti kumuyavya. Komasoti nthawe zinyinji akakuitilani kuchakulya cha nzuŵa muvomela. Pakaliye pita nthawe muyamba kuchita vamene ivi pafupi-pafupi. Pasogolo pake muyanu wamene uyo wayamba kulaŵila nkhani ziipa zamene poyamba muzondana nazo. Mukupita kwa nthawe mwewo mwayamba kuziyoloŵela mwakuti muzondana nazolinisoti. Lomba nsiku iyakine wakusengani kuti mukakotoka, mukamwele pamozi chakumwa ndipo mwewo mwavomela. Patontho na patontho mwayamba kuwona kuti mukatijana ngako na muyanu wamene uyo. Vikafwika pamene apo, kansi muganiza kuti pangatole nthawe itali tyani kuti muyambe kutolelako vochita vake? Nichendi kuti tufuna kuwamila ntima komasoti kulemekeza ŵanthu onse, koma tikokumbukila kuti tutolela vochita va ŵanthu ŵatutandala nawo ngako. (1 Akor. 15:33) Keno tunkhala osamala na mwatuchitila vinthu monga ni mwechitilangizila Yesu, tikopewa kukatijana na ŵanthu amene okonkhejalini mfundo za Yehova. (2 Akor. 6:15) Tikowonelatu  vuto ingankhalepo tizakwanishe kuwona mwatingaipewele.

12. Kansi ophunzila a Yesu enzefunikila kuchita chinji poyembekezela kuti mapeto afwike?

¹² Ophunzila a Yesu enzefunikilalini kungokuŵa nkhale noyembekezela kuti mapeto afwike. Yesu eŵapasa ntchito yakuti akoikata. Yove eŵalamula kuti akolalikila Uthenga uweme “mu Yerusalemu ku Yudeya konse na ku Samariya mpaka kwachulekejela chalo.” (Mac. 1:6-8) Yamene iyi yenze ntchito ikulu ngako! Ove enzekatishila ntchito luweme nthawe yawo penzelipeleka pokata ntchito yamene iyi.

13. Ndaŵa yanji tufunika kukatishila ntchito luweme nthawe yasu? (Akolose 4:5)

¹³ Ŵelengani Akolose 4:5. Kuti tikosamala na mwatuchitila vinthu, tufunika kuganizila mwatukatishila ntchito nthawe yasu. “Vinthu vosayembekezeleka” vingatichitikile tonse. (Mlal. 9:11) Mwachisanzo tingamwalile mosayembekezeleka.

14-15. Kansi tingachite tyani kuti tikokatishila ntchito luweme nthawe yasu? (Aheberi 6:11, 12) (Onanisoti chithunzi.)

¹⁴ Tingakatishile ntchito luweme nthawe yasu pochita chifunilo cha Yehova komasoti potang’isha ushamwali wasu na Yove. (Yoh. 14:21) Tufunika kunkhala “otang’a, osanyang’anyika,  onkhala na vochita vinyinji nthawe zonse mu ntchito ya Ambuye.” (1 Akor. 15:58) Keno tuchita vamene ivi mapeto akafwika—keno ni mapeto a moyo wasu olo mapeto a ichi chalo chiipa—tizaliimbelini mulandu kuti tiliyechite vinyinji potumikila Yehova.—Mt. 24:13; Aro. 14:8.

¹⁵ Masiku ŵano Yesu opitilija kuŵasogolela ophunzila ŵake pakulalikila za Ufumu wa Mulungu pachalo chonse. Yove okwanilisha vechilonjeza. Kupitila mu gulu ya Yehova Yesu otiphunzisa mwatingalalikilile komasoti otipasa vonse vingatiyavye pokata ntchito yamene iyi. (Mt. 28:18-20) Tuchita mbali yasu keno tukata mwakhama ntchito yolalikila nophunzisa ŵanthu komasoti popitilija kunkhala menso patuyembekezela kuti Yehova awononge chino chalo chiipa. Keno tukonkheja malangizo apa Aheberi 6:11, 12, chiyembekezo chasu chizankhale “chosimikijilika mpaka pamapeto.”—Ŵelengani.

16. Kansi nise osimikija ntima kuchita chinji?

¹⁶ Yehova enkhazikisha nsiku na nthawe yamene azawononge chino chalo chamene chutongewa na Satana. Nsiku yamene iyi ikezefwika Yehova azawaye-wayelini kukwanilisha malonjezo ŵake onse ŵechilemba m’Mawu ŵake. Nthawe ziyakine tingowone monga mapeto ochelwa. Koma olo n’tetyo nsiku ya Yehova “izachelwelini!” (Hab. 2:3) Tetyo tiyeni tinkhale osimikija ntima kuti ‘tikoyembekezela Yehova’ komasoti kuwonesha kuti ‘tuyembekezela moleza ntima Mulungu wachipulumuso [chasu].’—Mik. 7:7.