PACHITATU pa 18 Djanuwale 2023, pa saiti ya jw.org peikiwa chilengezo chonena za m’Bale Gage Fleegle, komasoti Jeffrey Winder, abale amene eikiwa kuti akotumikila m’Bungwe yutonga ya Mboni za Yehova. Abale aŵili amene aŵa, achita vinyinji potumikila Yehova mokhulupilika.

M’Bale Fleegle ekulila ku dela yaku n’chingulo kwa Pensilvânia, ku U.S.A. ndipo elelewa m’banja ya Mboni za Yehova. Penze mulumbwana, banja yawo ifulukila mu tauni iyakine itontho yapafupi kwamene kwenzefunikila ngako thandizo. Papita tyala nthawe itontho, yove ebatizika pa 20 Novemba mu 1988.

Makolo a m’Bale Fleegle nthawe zonse enzemulimbikisa kuti azachite utumiki wa nthawe zonse. Nthawe zinyinji, ove enzelondela opanamila dela komasoti atumiki apa Beteli kung’anda kwawo. M’Bale Fleegle enze na mwayi wowona mwezesangalalila abale na alongo amene awo. Papita nthawe itontho pavuli pakuti wabatizika, yove eyamba kutumikila monga mpainiya wonkhazikika—pa 1 Sekutemba 1989. Pavuli pa vyaka viŵili, yove ekwanilisha cholinga chenze nacho kwa vyaka 12—chamene ni kutumikila pa Beteli. Yove eyamba kutumikila pa Beteli yaku Brooklyn mwezi wa Okutoba mu 1991.

Pa Beteli, m’Bale Fleegle etumikila mu Dipatimenti yodinda mabuku kwa vyaka 8, ndipo pavuli pake yove eikiwa kuti akotumikila mu Dipatimenti yautumiki. Panthawe yamene iyo kwa vyaka viyakine, yove enzetumikila mumpingo wachilaŵili chaku Russia. M’chaka cha 2006, yove elungulana na mulongo muyakine zina yake Nadia. Mulongo wamene uyu evomekejewa kuti naye akotumikila pa Beteli. Ove etumikila pamozi mudela yolaŵila Chipwitikizi, komasoti etumikila m’dela yachi Spanish kwa vyaka vopitilila 10. Pavuli pakuti watumikila mu Dipatimenti ya utumiki kwa vyaka vinyinji, m’Bale Fleegle eikiwa kuti akotumikila m’Komiti yophunzisa ndipo pavuli pake eyamba kutumikila m’Komiti yautumiki. Mu Malichi 2022, yove eikiwa kuti akoyavya mu Komiti yautumki ya Bungwe yutonga.

M’Bale Winder ekulila ku Murrieta, m’chalo cha  Califórnia, ku U.S.A. Yove ephunzila chonadi kufumila kuli makolo ŵake ndipo ebatizika pa 29 Malichi mu 1986. Pavuli pa mwezi umozi wabatizika, yove eyamba kutumikila monga mpainiya wothandiza. Yove esangalala ngako na utumiki wamene uyu ndipo enzefuna kupitilija. Pavuli potumikila monga mpainiya wothandiza kwa myezi inyinji, yove eyamba kutumikila monga mpainiya wonkhazikika pa 1 Okutoba mu 1986.

Penze mulumbwana, m’Bale Winder eluta kuyawona akwake aŵili amene ni akulu-akulu kuli yove amene enzetumikila pa Beteli. Pa nthawe yamene iyo ulwendo ŵake wamene uyo wemuchitisha kunkhala na ntima wofunishisha kutumikila pa Beteli. Ndipo mwezi wa Meyi m’chaka cha 1990, yove evomekejewa kuti akatumikile pa Beteli ku Wallkill.

Pa Beteli, m’Bale Winder etumikila m’madipatimenti osiyana-siyana, kupamikijapo mu Dipatimenti yowasha vovwala na mashini, mu Dipatimenti yaulimi, komasoti mu Ofesi yapa beteli. M’chaka cha 1997, yove elungulana na mulongo muyakine zina yake Angela, ndipo onse otumikila pa Beteli mpaka pano. Mu chaka cha 2014, m’Bale Winder etumijiwa ku Warwick, kwamene enzetumikila mu dipatimenti yowona Ntchito zomanga pachalo chonse. Mu 2016, ove efulukila ku Likulu ya maphunzilo ya Wachtower ku Patterson, kwamene Winder enzetumikila mu dipatimenti yautumiki wowona za ma Audiyo na Mavidiyo. Pavuli pa vyaka 4, ove ejokela ku Warwick, ndipo m’Bale Winder eyamba kutumikila mu Komiti yowona za atumiki apa Beteli. M’mwezi wa Malichi mu 2022, yove esankhiwa kuti akoyavya mu Komiti yowona za atumiki apa Beteli mu Bungwe yutonga.

Pemphelo yasu kwa Yehova ni yakuti Mulungu apitilije kudalisa abale amene aŵa amene ni “mphaso za analume”, tupemphelasoti kuti abale amene aŵa apitilije kukata ntchito mwakhama popitisha pasogolo vinthu va Ufumu.—Aife. 4:8.